1. Uno Apalahama afwelelele ngachilihi ngwenyi Yehova apwa wakwoloka? (Talenu muvwimbimbi wakulivanga.)

“KUTALA Muka-kuyula vaka-mavu vosena mwahona kulinga mwamwaza numba?” (Kupu. 18:25) Echi chihula chasolwele chikupu nge, Apalahama afwelelele ngwenyi Yehova mwolola vyuma munganda yaSotome naNgomola. Atachikijile chikupu ngwenyi Yehova keshi “kujiha muka-kwoloka namuka-kuhuka hamweko.” Apalahama naikiye atachikijile ngwenyi Yehova keshi kuhasa kulinga ngochoko. Omu mwahichile myaka 400, Yehova ahanjikile kutalisa kuli ivene ngwenyi: “Ikiye Lilolwa, milimo yenyi yapwa yakukupuka mwosena, jijila jenyi josena jakwoloka. Apwa Kalunga wakushishika uze keshi kuhengesa chiyuloko, apwa wakwoloka, wakusungama.”—Lushi. 31:19; 32:4

2. Mwomwo ika natwambila ngwetu Yehova akwechi chiyulo chakwoloka?

² Mwomwo ika Apalahama afwelelele chikupu ngwenyi Yehova mwayulanga mwakwoloka? Mwomwo Yehova apwa wachiyulo kaha nawa wakwoloka. Mazu achiHepeleu valumuna  ngwavo “chiyulo nakwoloka” asoloka hamwe mapapa kakavulu muVisoneka vyachiHepeleu. Kakavulu mazu kana alumbununa vyuma vyovimwe. Hakuwana nge Yehova apwa wakwoloka ngocho eji kuyulanga mujila yakwoloka. Kaha nawa Mazu enyi amba ngwawo: “Azanga kwoloka nachiyulo.”—Samu 33:5.

3. Lumbununenu omu luyanjisa lunalisale makumbi ano mukaye.

³ Kutachikiza nge Yehova apwa wakwoloka cheji kuvendejekanga vatu vamichima yamwaza chamokomoko nakuvula chaluyanjisa luze luli mukaye. Echi chinalingisa vatu vavavulu vavayanjise chikuma. Chakutalilaho, vatu vamwe vanavayanjisanga nakuvakasa mutumenga chakuzeneka mulonga. Mwomwo yakupwa naunjiho wavyuma vavuluka ngwavo DNA, chinalingisa vatu vamwe vaze vakashile hamyaka yayivulu mwomwo yakuvavangijikila vavafumise mutumenga. Numba tuhu vatu vanevunga kupihya hakuvahaka mutumenga, oloze vaka-Kulishitu vanahase kumona luyanjisa lwalukalu chikuma.

4. Uno muka-Kulishitu nahase kupwa ngachilihi mucheseko?

⁴ Vaka-Kulishitu vatela kutachikiza ngwavo vanahase kuvayanjisa kuvatu vamukaye. Chipwe ngocho, tunahase kupwa mucheseko kachi nge natumona vyuma vyavipi chipwe vilinga vyavandumbwetu muchikungulwilo vize navitwivwisa kupihya. Vyuma muka namulinga kachi nge munalimbalaka nandumbwenu muchikungulwilo chipwe nge munalikokojwesa namukwenu muka-Kulishitu? Kutala namwitavisa chuma kana chimizeyese kushipilitu tahi?

5. Mwomwo ika muka-Kulishitu katela kulikomokelako nge vandumbwenyi muchikungulwilo vanamwivwisa kupihya?

⁵ Hakuwana nge katwakupukako kaha nawa twapwa tuvakashili, ngocho tunahase kuhita muluyanjisa chipwe kulinga vyuma vize navivwisa vandumbwetu kupihya. (Yowa. 1, 1:8) Numba tuhu muchikungulwilo chavaka-Kulishitu kamwavulu vyuma vyakufwana nganako, oloze vaka-Kulishitu kavalikomokela chipwe kuzeya nge vyuma kana vinasolokako. Mwomwo Yehova atuhana jindongi jize jinahase kutukafwa tulame kulonga chetu numba tuhu vanatwivwisa kupihya kuli vandumbwetu.—Samu 55:12-14.

6, 7. Ukalu muka ahichilemo ndumbwetu umwe muchikungulwilo, kaha vyuma muka vyamukafwile omike muukalu kana?

⁶ Achishinganyekenu hachakutalilaho chaWilli Diehl. Kufuma mumwaka wa 1931 ndumbwetu Diehl azachilenga nakashishi hambetele muBern mulifuchi lyaSwitzerland. Kaha kuheta mumwaka wa 1946 ayile kushikola yaNgileyate yanambala 8 muNew York, U.S.A. Omu akumishile shikola kana vamutumine kuSwitzerland kupwa kalama wakutambwojoka. Kweseka namujimbu wakuyoya chenyi, Ndumbu Diehl ambile ngwenyi: “Kuheta muMay 1949 ngwalwezele chikota chaVinjiho jaYehova chamuBern ngwami ngwasakile kumbata.” Vyuma muka vamukumbulwile? “Vamulwezele ngwavo mwafuma hamutango nakuya nakuzata upayiniya washimbu yosena.” Ndumbwetu alumbunwine cheka ngwenyi: “Kavangwitavishilenga kuhanjika vihande vyaMbimbiliyako kaha nawa vatu vavavulu valitwaminyinyine kutumeneka nakutumona nge vatu vaze vahangile muchikungulwilo.”

⁷ Uno vyuma muka alingile Ndumbwetu Diehl? Ambile ngwenyi: “Hakuwana nge kwingila muulo kachalimbalaka naVisonekako, ngocho twalombelenga kuli Yehova nakumufwelela chikuma.” Nakushimbula chiku, vatu vamwene jino kulimbata kupwa  chakutamo, ngocho Ndumbu Diehl vamukindulwishilile milimo yenyi yosena. Yehova akiswile ou ndumbwetu mwomwo yakushishika chenyi. * Ngocho twatela kulihulisa ngwetu: ‘Kutala nanguzama lika kushipilitu kachi nge vanangufumbikila tahi? Kutala nanguvandamina Yehova akumise ukalu wami nyi nangufwila kukumisa ukalu kana ami ivene?’—Vishi. 11:2; tangenu Mika 7:7.

8. Mwomwo ika munahase kwamba ngwenu vanamifumbukila chipwe ngwenu ndumbwetu umwe muchikungulwilo vanamufumbukila?

⁸ Mwatela kwijiva ngwenu lwola lumwe munahase kwamba ngwenu vanakumifumbukila chipwe ngwenu ndumbwetu umwe muchikungulwilo vanakumufumbukila kumana chiku. Chuma kana chinahase kupwa ngocho mwomwo yakuhona kukupuka, nakumona vyuma mujila yakulisezaseza chipwe mwomwo yakuhona kutachikiza kanawa unjiho wachuma kana. Kala mweshomwo chili, numba tutachikiza muchano hachihande kana chipwe nduma, twatela kupendamina hali Yehova kuhichila mukulomba nakupwa lika vakushishika kuli ikiye mangana tuhone ‘kumwivwisa kupihya kumuchima.’—Tangenu Vishimo 19:3.

9. Vatu muka natushimutwila muchihande chino nechi chinakavangizaho?

⁹ Tushimutwilenu havatu jaYehova vatatu vaze vahichilenga muluyando kushikulu. Muchihande chino natushimutwila hali Yosefwe kakwatambuli kaApalahama, uze vayanjishile kuli vandumbwenyi. Kaha muchihande nachikavangizaho natushimutwila havyuma vize Yehova alingile kuli Mwangana wavaIsalele Ahave, navyuma ahichilemo kaposetolo Petulu kuli vaSulya vakuAndeyoka. Omu natushimutwila hali vatu kanava, shinganyekenu havyuma vize navimikafwa mangana mupwenga vakuzama kushipilitu nakulama usoko wenu naYehova chikumanyi nge munamono ngwenu vanakumiyanjisa.

10, 11. (a) Ukalu muka ahichilemo Yosefwe? (b) Vyuma muka alingile Yosefwe omu apwile mukamenga?

¹⁰ Yosefwe ngamba yaYehova wakushishika vamufumbukilile kuli vatu veka chikumanyi kuli vandumbwenyi. Omu Yosefwe apwile mukweze vamwivile nakumulanjisa muundungo muEjipitu. (Kupu. 37:23-28; 42:21) Kutwala muze, vamuvangijikilile ngwavo napiki pwevo lyambala, kaha vamukashile mukamenga. (Kupu. 39:17-20) Vihuli amwene vyambachile myaka kafwe 13. Vyuma muka natulinangula kuli Yosefwe vize navitukafwa tumike nge vandumbwetu vanakutuyanjisa?

¹¹ Yosefwe ashimutwilile chihande chenyi namukwavo funge. Uze funge alwezele chihande chenyi, ikiye apwile mukulwane wavaka-kuhana lupasa lwamwangana. Halwola luze vapwile mukamenga uze mukwavo alotele chilota, kaha Yosefwe amulumbunwinyinecho. Yosefwe alwezele uze muka-kuhana lupasa ngwenyi, navakamukindulwisa hachihela chenyi munganda yamwangana Fwalo. Omu Yehova amukafwile alumbunune chilota kanechi, Yosefwe alumbunwine ukalu wenyi kuli uze mukwavo funge. Tunahase kulinangula vyuma vyavilemu chikuma kuli Yosefwe havyuma ahanjikile navize kahanjikileko.—Kupu. 40:5-13.

12, 13. (a) Mazu ahanjikile Yosefwe kuli mukwavo funge asolwele ngachilihi nge kaholele kaha kuluko? (b) Vyuma muka vize Yosefwe kalwezele uze mukwavo fungeko?

¹² Tangenu Kuputuka 40:14, 15. Yosefwe ambile ngwenyi “vangwivile.” Chikupu vene,  amwene makava. Yosefwe ambile nawa ngwenyi chihande vamuhakililile mukamenga chapwile chakumuvangijikila. Ngocho alwezele uze muka-kuhana lupasa mangana akamuhanjikileko kuli mwangana Fwalo. Mwomwo ika? Ambile ngwenyi: “Mangana nayami vakangulovole muno mukamenga.”

¹³ Uno Yosefwe aholele kaha kulu nakuzeneka kulingako chuma numba chimwe tahi? Nduma. Atachikijile vene ngwenyi vapwile nakumuyanjisa. Alwezele ukalu wenyi uze muka-kuhana lupasa lwamwangana ngwenyi pamo nahase kukamukafwako. Oloze ijivenu ngwenu Visoneka kavyasolola nge Yosefwe alwezele mutu weka chipwe vene Fwalo ngwenyi vandumbwenyi vakiko vamulanjishileko. Omu vandumbu jaYosefwe vejile kuEjipitu nakulikonekela kuli ikiye, Fwalo avatambwile namavoko avali nakuvalweza mangana vezenga nakutwama muEjipitu mangana valivwise kuwaha “vyuma vyamwaza vyosena vyamulifuchi lyaEjipitu.”—Kupu. 45:16-20.

14. Vyuma muka vinahase kutukafwa tuhone kuhanjika makuli muchikungulwilo numba nge vanatufumbukila?

¹⁴ Nge muka-Kulishitu namono ngwenyi vilinga vyavandumbwenyi vili nakumwivwisa kupihya, kaha katela kutwaha vakwavoko. Chapwa chamwaza kuya kuli vakulwane muchikungulwilo vatukafwe chipwe kuvalweza nge ndumbwetu umwe nalingi shili yayinene. (Levi 5:1) Kaha nawa shimbu jimwe nge tunalimbalaka nandumbwetu twatela kuwana jijila jakukumishilamo ukalu kana muchishishisa chakulahila washi kuli vakulwane. (Tangenu Mateu 5:23, 24; 18:15.) Ngocho tufwilenu kukumisanga ukalu hakuzachisa jindongi jamuMbimbiliya. Shimbu jimwe tunahase kulimbenja mwomwo yakuhona kupwa naunjiho wakutamo nakuwana nge nou ali nakutuyanjisa vene wauchi. Kaha natwivwa kuwaha hakuwana nge katwatohwesele ukalu kana hakuhanjika makuli hali ndumbwetuko. Twatela kutachikiza ngwetu, numba tuhu vyuma natuhanjika vyamuchano chipwe vyamakuli, oloze kuhanjika makuli hali vandumbwetu kacheshi  kuhasa kukumisa ukaluko. Kupwa vakushishika kuli Yehova nakuli vandumbwetu chinahase kutukafwa tuhone kulinga vyuma kana. Muka-kwimba jiSamu ahanjikile kutalisa kuli “ou eji kutambukanga mukulonga” ngwenyi: “Keshi kuvangila vakwavo nalilimi lyenyiko, keshi kulinga vyuma vyavipi kuvakwavoko, kaha keshi kusaula masepa jenyiko.”—Samu 15:2, 3; Yako. 3:5.

15. Uno Yosefwe vamukiswile ngachilihi hakupwa nausoko wakukola naYehova?

¹⁵ Tweji kulinangulanga vyuma vyavilemu hali Yosefwe uze apwile nausoko wakukola naYehova. Numba tuhu amwene ukalu hamyaka 13, oloze amwene vyuma ngana muze avimona Yehova. (Kupu. 45:5-8) Yosefwe kahanyine Yehova mulonga haukalu apwile nakumonako. Numba tuhu kavulyamine ukalu ahichilemoko, oloze kawamuhombeseleko. Kaha nawa kechelelele tutenga chipwe vilinga vyavakwavo vyavipi vimusosolole kuli Yehovako. Kushishika chaYosefwe chamukafwile amone omu Yehova eji kwololanga vyuma vyavipi nakumukisula hamwe kaha natanga yenyi.

16. Mwomwo ika twatela kufwila kupandama chikuma kuli Yehova numba tuhu vilinga vyavandumbwetu vinakutwivwisa kupihya?

¹⁶ Makumbi ano, nayetu nawa twatela kukinga usoko wetu naYehova. Katwatela kwechelela tutenga twavandumbwetu vatuhonese kuzachila Kalunga uze tweji kulemesanga. (Loma 8:38, 39) Kachi nge vilinga vyavandumbwetu vinakutwivwisa kupihya, kaha twatela kulondezeza Yosefwe nakufwila kupandama chikuma kuli Yehova nakumona vyuma ngana muze avimona ikiye. Nge natulinga vyuma kweseka najindongi jamuMbimbiliya kaha nachisoloka nge tunaseze ukalu wosena mumavoko aYehova nakumuvandamina olole vyuma halwola mwasakula ivene kaha nawa mujila yakutamo.

17. Vyuma muka navitulingisa tusolole ngwetu twafwelela muli “Muka-kuyula vaka-mavu vosena”?

¹⁷ Omu tuli nakutwama muno mukaye vali nakuyula kuli Satana, twatela kutachikiza ngwetu natumonanga ukalu wakulisezaseza. Shimbu jimwe, ndumbwetu chipwe yetu vavene vanahase kutwivwisa kupihya kuli vandumbwetu muchikungulwilo. Shikaho katwatela kulitwamina kuzachila Yehovako. (Samu 119:165) Oloze hakupwa tuvangamba jaKalunga vakushishika, twatela kutwalaho lika kupendamina hali ikiye. Kaha nawa twatela kwitavila chikupu ngwetu katwatachikijile unjiho wosena hachihande kanako. Shimbu jimwe tunahase kumona vyuma mujila yeka mwomwo yakuhona kukupuka. Chihande chaYosefwe chinatukafwe tuhone kuhanjikanga vyuma vyavipi vize vinahase kutohwesa ukalu. Ngocho tufwilenu kuseza ukalu wosena mumavoko aYehova nakuvandamina akaukumise halwola asakula ivene muchishishisa chakulitwikawo etu vavene. Kulinga ngocho nachilingisa Yehova atwivwile uselewa nakutukisula ngana muze alingile kuli Yosefwe. Chikupu vene, twatela kufwelela ngwetu Yehova uze apwa “Muka-kuyula vaka-mavu vosena,” mwalinganga lika vyuma vyakwoloka mwomwo “jijila jenyi josena jakwoloka.”—Kupu. 18:25; Lushi. 32:4.

18. Vyuma muka natushimutwila muchihande chinakavangizaho?

¹⁸ Muchihande chinakavangizaho natushimutwila haluyanjisa lukwavo luze vamwene vatu jaYehova kushikulu. Evi vihande navisolola omu kulinyisa nakukonekela chatambukila hamwe nachiyulo chaYehova.