1. (a) Vyuma muka vyakulifwana alingile Muka-kuyula Yefweta naHana? (Talenu mivwimbimbi wakulivanga.) (b) Vihula muka natushimutwila muchihande chino?

YEFWETA apwile twamina wakumika kaha nawa muka-kwasa jita wangolo. Hana apwile wakulinyisa kaha nawa azakaminenga tanga yenyi. Muka-kuyula Yefweta naHana, pwevo lyaElekana valemeselenga Yehova, kaha vyuma muka valingile vosena? Mutu himutu ashikile lushiko Kalunga kaha nawa aluteselemo. Vatu kana vapwa hichakutalilaho chamwaza kumalunga namapwevo vaze veji kushikanga jishiko Yehova makumbi ano. Oloze tunahase kulihulisa ngwetu: Uno lushiko lwapwa chuma muka? Uno lushiko twashikile Kalunga twalumona kupwa lwalulemu tahi? Vyuma muka natulinangula kuli Yefweta naHana?

2, 3. (a) Uno lushiko lwapwa chuma muka? (b) Vyuma muka yahanjika Mbimbiliya kutalisa kuvyuma natushika Kalunga?

² Mbimbiliya yalumbununa ngwayo, lushiko lwapwa chivwasano mukachi kamutu naKalunga. Mutu eji kushikanga Yehova lushiko lwakulinga vyuma vimwe, chipwe kuhana wana, chipwe kwazana mumilimo yimwe chipwe kulihenda kukulinga vyuma vimwe. Jishiko veji kujishikanga kuli mutu ivene. Kalunga eji kumonanga jishiko kupwa jajilemu mwomwo vatu veji kulisakwilanga vavene nakufwila kutesamo vyuma vanashiki. (Kupu. 14:22, 23; Hepe. 6:16, 17) Visoneka vyasolola ngachilihi kulema chatwama hakushika Kalunga lushiko?

³ Jishimbi jaMose jamba ngwajo: “Kachi nge lunga mwalishika lushiko naYehova chipwe mwalishinga lushingo . . . , kanda akazomboka  mazu enyiko. Akalinge vyuma vyosena vize nashiki.” (Kula. 30:2) Kutwala muze, Solomone vamuhwiminyinyine asoneke ngwenyi: “Omu naushika Kalunga lushiko, kanda naulangisa kulutesamoko, mwomwo keshi kwivwila kuwaha vileyako. Tesamo lushiko unashiki.” (Kwambu. 5:4) Yesu asolwele ovyo chapwila chachilemu chikuma kushika lushiko hakwamba ngwenyi: “Muze valwezele vatu vakushikulu ngwavo: ‘Kanda mukalishinga chakuzeneka kutesamoko, oloze tesenumo jishiko jenu kuli Yehova.’”—Mateu 5:33.

4. (a) Uno lushiko twashikile Kalunga twalumona kupwa lwalulemu tahi? (b) Vyuma muka twatela kulinangula kuli Yefweta naHana?

⁴ Chikupu vene, kushika Kalunga lushiko chapwa hichuma chachilemu chikuma. Jishiko jetu jinahase kuzamisa chipwe kwenyeka usoko wetu naYehova. Ndavichi ambile ngwenyi: “Iya nahase kukanduka hapili yaYehova? Iya nawa nahase kwimana muchihela chenyi chajila? Shina . . . ou kalishingile kuyoya chaKalunga mwakwonga, Chipwe kulishinga vyuma vyamakuliko.” (Samu 24:3, 4; kwinyikila chamwishi) Yefweta naHana vashikile Yehova kulinga ika, uno chapwile chachashi kutesamo vyuma vashikile tahi?

5. Vyuma muka Yefweta ashikile Yehova, kaha vyuma muka vyafuminemo?

⁵ Yefweta alamine lushiko luze ashikile Yehova omu ayile nakuzunga jita navaAmone vaze vevwishilenga woma vatu jaKalunga. (Kuyu. 10:7-9) Hakuwana nge Yefweta afwililile kufungulula vaAmone, ngocho ashikile Kalunga ngwenyi: “Kachi nge nauhana vaAmone mumavoko ami, kaha weshowo mwakalivanga kulovoka muzuvo yami nakungusesa omu nangukakinduluka mukuunda hakufuma nakulwa jita navaAmone, mwakapwa waYehova.” Vyuma muka vyafuminemo? Yefweta afungulwile vaAmone. Kahomu akindulukile kujita mwanenyi wapwevo uze azangile chikuma ikiye ejile nakumusesa. Ou mwana ikiye uze ambile Yefweta ngwenyi: “mwakapwa waYehova.” (Kuyu. 11:30-34) Uno echi chapwile nakulumbununa ika kuli uze mwana?

6. (a) Uno mwana Yefweta akundwijile ngachilihi ise atesemo lushiko ashikile Kalunga? (b) Vyuma muka natulinangula hamukanda waLushimbi lwamuchivali 23:21, 23 naSamu 15:4 kutalisa kukushika jishiko?

⁶ Hakusaka mangana lushiko lwaIse lutesemo, mwana Yefweta wapwevo atelelele kuya nakuzachila Yehova hatavanaku mukuyoya chenyi chosena. Uno Yefweta alusukile hakushika lushiko kana tahi? Nduma, atela atachikijile ngwenyi mwanenyi wapwevo ikiye kaha mwakalovoka muzuvo yenyi nakumusesa. Chipwe ngocho, chuma kana chapwile chachikalu chikuma kuli ou chisemi namwanenyi mwomwo chasakiwile kupwa namuchima wakulisuula. Omu Yefweta amwene mwanenyi, ‘apulile uvwalo wenyi’ nakwamba ngwenyi amwivwishile chinyengo. Kaha mwanenyi ‘ayile nakulila ujike wenyi.’ Mwomwo ika? Mwomwo Yefweta kapwile namwana walungako kaha nawa uze mwanenyi wapwevo keshi kukasomboka nakukamuhana vazukuluko. Kaha nawa nou mwakaswana lijina lyatanga chipwe luheto wauchi. Chipwe ngocho, vyuma kana kavyapwile vyavilemu chikuma kuli Yefwetako. Mwomwo ambile ngwenyi: “Ngunamushiki lyehi Yehova nakanwa kami, kaha kangweshi kuhasa kwalumukako.” Kaha mwanenyi amukumbulwile ngwenyi: “Linga nganomu unamushiki.” (Kuyu. 11:35-39) Chikupu vene, vatu kana vapwile vakushishika mwomwo vateselemo lushiko luze vashikile Kalunga Wakulitulaho Chikuma numba tuhu chapwile chachikalu kulinga ngocho.—Tangenu Lushimbi lwamuchivali 23:21, 23; Samu 15:4.

7. (a) Vyuma muka Hana ashikile Yehova, kaha mwomwo ika? Vyuma muka vyasolokele? (b) Uno vyuma ashikile Hana vyakwachile ngachilihi hali mwanenyi Samwele? (Talenu kwinyikila chamwishi.)

⁷ Hana naikiye alamine lushiko luze ashikile Yehova. Ashikile lushiko kana omu apwile nakulyonyinga mumuchima wenyi mwomwo yakuhona lusemo nomu nawa vamutolekelenga kuli muhalika wenyi. (Samwe. 1, 1:4-7, 10, 16) Hana alombele kuli Kalunga nakumushika lushiko  ngwenyi: “Ove Yehova wamayongomena, kachi nge nautala havihuli vyayami ngamba yove nakungwalakana, kachi nge kaweshi kunguvulyama ami ngamba yoveko, oloze naunguhana mwana walunga, kaha nangukakuhanayo ove Yehova akakuzachilenga mukuyoya chenyi chosena. Kumutwe wenyi kakweshi kukahita yembeko.” * (Samwe. 1, 1:11) Kalunga akumbulwile kulomba chaHana, ngocho amuhanyine mwana walunga. Hana evwile kuwaha chikuma. Numba ngocho, kavulyamine lushiko luze ashikile Kalungako. Omu Hana asapulukile mwanenyi walunga, ambile ngwenyi: “Ngunamulombo kuli Yehova.”—Samwe. 1, 1:20.

8. (a) Uno chapwile chachashi kuli Hana kutesamo lushiko lwenyi tahi? (b) Uno mazu asonekele Ndavichi hali Samu 61, amyanukisa ngachilihi muchima apwile nawo Hana?

⁸ Omu Samwele apwile namyaka yakusemuka kafwe yitatu vamusumwine, kaha Hana ateselemo vyuma ashikile Kalunga. Kashinganyekele kwalumuna vishinganyeka vyenyiko. Atwalile Samwele kuli Kapilishitu Wakulitulaho Eli hatavanaku kuShilo, kaha ambile ngwenyi: “Ngwalombele Yehova anguhane mwana, kaha ikiye ou nanguhane. Ngocho ngunamuhane kuli Yehova. Ngunamuhane apwenga waYehova hamakumbi osena mwayoyanga.” (Samwe. 1, 1:24-28) Ngocho uze “kanyike Samwele akolelenga lika, kaha Yehova amwivwililenga uselewa.” (Samwe. 1, 2:21) Uno echi chapwile nakulumbununa ika kuli Hana? Hakuwana nge Hana azangile chikuma mwanenyi, ngocho echi chapwile nakulumbununa nge keshi kuhasa kumumonanga hakumbi hakumbiko. Hana afwilililenga kusata mwanenyi, nakuhema nenyi, nakumulela, nakulivwisa kuwaha vyuma vyosena vize chisemi wazangi asaka kulingila mwanenyi omu eji kukolanga. Chipwe ngocho, Hana kaliveyele hakutesamo vyuma ashikile Kalungako. Muchima wenyi wawahililile muli Yehova.—Samwe. 1, 2:1, 2; tangenu Samu 61:1, 5, 8.

9. Vihula muka natukumbulula?

⁹ Hakuwana nge tunatachikiza jino omwo jalema jishiko tweji kushikanga Kalunga, tuchishimutwilenu jino havihula vino: Jishiko muka tunahase kushika etu vaka-Kulishitu? Kaha mwomwo ika twatela kufwila kujitesamo?

10. Lushiko muka lwalulemu chikuma luze muka-Kulishitu eji kushikanga, kaha vyuma muka atela kulinga?

¹⁰ Lushiko lwalulemu chikuma luze muka-Kulishitu eji kushikanga Yehova, shina lwakulihana chenyi kuli ikiye. Mwomwo ika? Mwomwo muka-Kulishitu eji kulihananga kuli Yehova kuhichila mukulomba nakumulweza ngwenyi mwamuzachilanga mukuyoya chenyi chosena chamokomoko nakala ukalu. Kweseka namazu ahanjikile Yesu, mutu atela ‘kulikana ivene,’ kulumbununa nge atela chatete kulinga mwaya muchima waKalunga kuhambakana kala vyuma asaka mukuyoya chenyi chosena. (Mateu 16:24) Kufuma vene hakulihana chenyi, ‘eji kupwanga wakuli Yehova.’ (Loma 14:8) Vosena vaze veji kulihananga kuli Yehova vatela kumona chikupu ngwavo, lushiko veji kushikanga Kalunga lwapwa lwalulemu chikuma ngana muze alingile muka-kwimba jisamu uze ahanjikile kutalisa kujishiko ashikile Kalunga ngwenyi: “Nangumushishishilamo ika Yehova havyuma vyamwaza vyosena nangulingila? Nangutesamo jishiko jami kuli Yehova kumeso avatu jenyi vosena.”—Samu 116:12, 14.

11. Vyuma muka vyasolokele halikumbi vamimbapachishile?

¹¹ Kutala munalihane lyehi kuli Yehova nakusolola kulihana chenu hakumimbapachisa tahi? Nge mukiko, kaha munalingi kanawa. Mwatela kwanuka ngwenu halikumbi vamimbapachishile vamihulishile numba nge munalihane lyehi kuli Yehova nakutachikiza ngwenu “kulihana chenu nalumbapachiso lwenu vili nakumisolola hatoma  kupwa muVinjiho jaYehova hakuzachila hamwe naliuka lize vali nakutwaminyina nashipilitu yaKalunga.” Kwitavila hatoma vyuma kana, chamisolwele hatoma kumeso avatu nge, mwalihanyine chikupu kaha nawa mwatelemo kuya kulumbapachiso nakupwa vaka-kumuzachila Yehova. Chikupu vene mwevwishile Yehova kuwaha.

12. (a) Vihula muka twatela kulihulisa? (b) Vilinga muka vize Petulu ambile ngwenyi twatela kupwa navyo?

¹² Lumbapachiso lweji kusololanga nge tunaputuka kuzachila Yehova mukuyoya chetu kaha nawa natutwalaho lika kulinga ngocho. Ngocho tunahase kulihulisa ngwetu: ‘Kutala ngunakuzovoloka kushipilitu kufuma haze vangumbapachishile tahi? Uno ngunakutwalaho lika kuzachila Yehova namuchima wami wosena tahi? (Kolo. 3:23) Uno ngweji kulombanga, nakutanganga Mazu aKalunga, nakukungulukanga, nakwazananga mumulimo wakwambulula lwola lwosena nyi? Uno shimbu jimwe ngunevunga uli wakuzata milimo kaneyi yakushipilitu nyi?’ Kaposetolo Petulu alumbunwine ngwenyi hakusaka tutwaleho lika kuzachila Kalunga, lufwelelo lwetu lwasakiwa kupwa nachinyingi, nalukakachila, namuchima wakuzachila Kalunga.—Tangenu WaPetulu 2, 1:5-8.

13. Vyuma muka atela kutachikiza muka-Kulishitu uze vambapachisa?

¹³ Katwatela kwalumuna lushiko lwetu twashikile Kalunga hakulihana chetu kuli ikiyeko. Kachi  nge mutu nazeye kuzachila Kalunga nakuhona kukavangiza jishimbi jaYehova mukuyoya chenyi, katela kulyonga ngwenyi kalihanyine namuchima wenyi wosena kaha nawa lumbapachiso lwenyi lwapwile lwamokomokoko. * Mwomwo alihanyine kuli Kalunga namuchima wenyi wosena, nakuchisolola jino halumbapachiso. Kachi nge mwalinga shili yayinene, kaha mwakalyambulula ivene kuli Yehova nakuchikungulwilo havyuma nalingi. (Loma 14:12) Vatu kavatela kwamba ngwavo ‘tunaseze zangi yize twapwile nayo hakavangako.’ Oloze tunakufwila Yesu akambe kuli etu ngwenyi: “Ngunatachikiza vilinga vyove, nazangi yove, nalufwelelo lwove, namulimo wove, nalukakachila lwove, nomu vilinga uli nakulinga oholyapwa vinavulu kuhambakana vize walingilenga hakavanga.” (Kuso. 2:4, 19) Ngocho tufwilenu lika kutwama kweseka nakulihana chetu mangana twivwise Yehova kuwaha.

14. Lushiko muka lukwavo lwalulemu luze mutu nahase kushika, kaha mwomwo ika?

¹⁴ Lushiko lukwavo nawa lwalulemu luze mutu nahase kushika shina lushiko lwamuulo. Mwomwo ika lwapwila lwalulemu? Mwomwo ulo wapwa wajila. Valunga napwevo veji kulishikanga jishiko jamuulo hatoma kumeso aKalunga navatu vosena. Kakavulu veji kulishikanga kumeso avatu vavavulu ngwavo navalizanganga, nakulivwisa kuwaha, nakulivumbikanga kaha nawa navatwalaho lika kulinga ngocho “hamyaka yosena [navatwama] hamwe hano hamavu, nganomu Kalunga alongesele ulo.” Numba tuhu vamwe veji kwingilanga muulo chakuhona kuhanjika mazu kana, oloze chochimwe navakiko veji kulishikanga kumeso aKalunga. Kufumaho, veji kuvavulukanga jino ngwavo valunga napwevo, kaha ulo wavo watela kutwalaho lika myaka yosena. (Kupu. 2:24; Koli. 1, 7:39) “Shikaho,” hakusaka tukavangize mazu aYesu akwamba ngwenyi,“chuma chize Kalunga nanungu hamwe mutu kanda achihandununako,” kakwatela kupwa lunga chipwe pwevo chipwe kala mutu atela kujiha uloko. Ngocho vatu vaze navalimbata kavatela kupwa navishinganyeka vyakulilukululako.—Mako 10:9.

15. Mwomwo ika vaka-Kulishitu kavatela kumona malo nganomu vawamona vaka-kayeko?

¹⁵ Tuyokutuyoku nawa, kakwatwama ulo wakukupukako. Valunga napwevo vaze veji kwingilanga muulo kavapwa vakukupukako. Echi chikiko chalingisa Mbimbiliya yambenga ngwayo vaze valimbata “navamonanga luyando” shimbu jimwe. (Koli. 1, 7:28) Chaluvinda vatu vavavulu muno mukaye kavavumbika maloko. Nge vali muukalu, kaha veji kulusukanga nakufwila kujiha ulo wavo. Olozenyi vaka-Kulishitu kavatela kulinga ngochoko. Kuhokola jishiko jamuulo chapwa kwonga Kalunga kaha nawa Kalunga ahunga vaka-makuli. (Levi 19:12; Vishi. 6:16-19) Kaposetolo Paulu asonekele ngwenyi: “Uno unakashiwa kuli pwevo tahi? Litwamine kutondatonda jila yakukasunukilamo.” (Koli. 1, 7:27) Paulu ahanjikile ngocho mwomwo atachikijile ngwenyi Yehova ahunga kulilukulula.—Mala. 2:13-16.

16. Vyuma muka yahanjika Mbimbiliya kutalisa kukulilukulula nakukulihandununa?

¹⁶ Yesu anangwile ngwenyi mulonga unahase kulingisa vaka-Kulishitu valilukulule shina ujila, chikumanyi nge muka-mahya amutu kate kukonekela muka-mahyenyi uze nalingi ukojiko. (Mateu 19:9; Hepe. 13:4) Nyi ngachilihi kulihandununa namuka-mahya amutu? Mbimbiliya yahanjika hatoma chihande kanechi. (Tangenu Wavaka-Kolinde 1, 7:10, 11.) Mbimbiliya kayavuluka vyuma vyatela kulingisa valunga napwevo valihandununeko. Chipwe ngocho, vaka-Kulishitu vamwe vakulimbata vanalihandununanga mwomwo yakushinganyeka vyuma vimwe vize vanamono ngwavo chakutamo kulihandununa, vyakufwana nge kuhaka  kuyoya chamuka-mahyamutu muponde, chipwe kukanyisa muka-mahyamutu kulinga vyuma vyakushipilitu, chipwe nge muka-mahyamutu mwasaka kusosoloka kulufwelelo. *

17. Uno vaka-Kulishitu vaze valimbata vanahase kuzamisa ngachilihi ulo wavo?

¹⁷ Nge vaka-kulimbata navalweza vakulwane muchikungulwilo vavakafwe haukalu vali nawo muulo, kaha vakulwane vatela kuvahulisa nge vanatale vindiyo yakwamba ngwavo Zangi yaMuchano Yapwa Ngachilihi? nakutangila hamwe Mboloshuwa yakwamba ngwavo Munahase Kuwahilila muTanga Yenu. Mwomwo ika vatela kuvahulishila? Mwomwo vinoma kana vyalumbununa jindongi jamwaza jamuMbimbiliya jize jinakafwe vatu vavavulu vazamise malo avo. Vaka-kulimbata vamwe vambile ngwavo: “Kutanga Mboloshuwa kana chinatukafwe tupwenga vakuwahilila chikuma muulo wetu.” Pwevo umwe uze natwame muulo hamyaka 22 uze nawa ashinganyekele ngwenyi ulo wavo wapwile hakamwihi nakufwa, ambile ngwenyi: “Ami namuka-mahyami twapwa tuvakumbapachisa, oloze katwalivwasanyinengako. Vindiyo kana yejile halwola lwakutamo. Oholili jino tuli nakutwama kanawa.” Kutala mwatwama muulo tahi? Kaha nayenu fwilenu kukavangizanga jishimbi jaYehova muulo wenu. Kulinga ngocho nachimikafwa mulame lushiko lwenu lwamuulo nakupwa vakuwahilila.

18, 19. (a) Visemi vavavulu vaze vapwa vaka-Kulishitu vanakolezezanga ngachilihi vana vavo? (b) Vyuma muka vatela kukavangiza vaze vali mumulimo wakulipwila washimbu yosena?

¹⁸ Kutala munamono chuma chikwavo alingile tahi? Lushiko ashikile Yefweta naHana lwalingishile vana vavo vazate mulimo wakulipwila wajila hatavanaku. Echi chalingishile ava vana vazachile Yehova mujila yakulipwila. Makumbi ano, visemi vavavulu vaze vapwa vaka-Kulishitu veji kukolezezanga vana vavo vengile mumulimo washimbu yosena nakuzachila Kalunga mukuyoya chavo chosena. Vatu kanava vanalisuula kulinga chuma kanechi vatela kuvasangejeka.—Kuyu. 11:40; Samu 110:3.

¹⁹ Oholyapwa, kuli vatu vakuheta ku 67,000 vaze vali muMulimo Wakulipwila Washimbu Yosena waVinjiho jaYehova. Vamwe veji kuzachilanga haMbetele, veka mumulimo wakutungatunga chipwe mumulimo wakutambwojoka, vakwavo nawa vaka-kunangula vyamuliuka, navapayiniya vakulipwila, navamishonali, navaka-kutunga vihela vyakukungulukila, navaka-kuzata hajiZuvo jaKukunguluka Chachinene, navaka-kuzata havihela vyakunangwila mashikola aMbimbiliya amuliuka. Vosena veji kutwamanga kweseka “naLushiko Lwakwitavila Kukavangiza Jishimbi Nakwashiwisako Chiyoyelo,” vetavila kuzata kala mulimo navavahana mangana vakundwize mulimo waWangana, nakwashiwisa chiyoyelo chavo nakulihenda kukuzata kala milimo yakukaye kuvanga kaha nge vanavetavisa kulinga ngocho. Mulimo wavo ukiko wapwa wakulipwila keshi vatu vaveneko. Vatachikiza kulema chalushiko luze vashikile, ngocho navafwila kulutesamo hamakumbi osena aze vali nakuzata mumulimo wakulipwila washimbu yosena.

20. Vyuma muka twatela kulinga “hakumbi hakumbi,” kaha mwomwo ika?

²⁰ Tunashimutwila jishiko jitatu muchihande chino, kutala nayenu mwalishikaho lyehi lushiko lumwe, chipwe jivali nyi josena tahi? Tachikizenu ngwenu kamwatela kulelesa jishiko jenuko. (Vishi. 20:25) Kuhona kutesamo vyuma natuhanjika chipwe jishiko tunashiki Yehova chinahase kuneha ukalu waunene. (Kwambu. 5:6) Shikaho, tutwalenuho ‘kwimbanga myaso yakwalisa lijina lyaYehova omu natutesangamo jishiko jetu hakumbi hakumbi.’—Samu 61:8.