1, 2. (a) Kwatwamino kamyaka yino tunahase kukesekesa ngachilihi kuli uze chihwanga vali nakutwala nakujiha? (Talenu muvwimbimbi wakulivanga.) (b) Vyuma muka navikasoloka omu navakafumisako kano kaye kakuhuka?

ACHISHINGANYEKENU chihwanga vanakumulovola mukamenga, kaha vaka-kumulama vali nakutambakana ngwavo “Mutu wakufwa ali nakutambuka!”. Mwomwo ika ava vaka-kumulama vahanjikilile mazu kana? Numba tuhu ou chihwanga apwile wamutonyi kaha nawa wakulikangula kumujimba, oloze vapwile nakuya nakumujiha. Ngocho, numba tuhu ou lunga apwile wamutonyi oloze apwile kwijiva nge wakufwa lyehi. *

² Chochimwe nawa, katwamino kamyaka yino kanalifwane nauze chihwanga vapwile nakutwala nakujiha. Kano kaye kakuhuka vakavulukilile lyehi kukanongesa, ngocho kunonga kana chili hakamwihi. Mbimbiliya yamba ngwayo: “Kaye kali nakuhita.” (Yowa. 1, 2:17) Chikupu vene, kukuma chakano kaye chinapandama chikuma. Chipwe ngocho, kunonga chakano kaye chalihandununa chikuma nachayauze chihwanga. Omu naluheta lwola lwakumujiha, vatu vamwe vanahase kuhanjika ngwavo chihande chenyi  kavachisopanga kanawako chipwe kushinganyeka ngwavo vanahase kumutetela nakuhona kumujiha. Oloze chuma kanechi chalihandununa nakunongesa kano kaye mwomwo Mwata wakukupuka uze atenga vyuma vyosena atongola lyehi lwola lwakukanongesa. (Lushi. 32:4) Keshi kukalangisa kunongesa kano kayeko, kaha kakweshi kupwa mutu mwakahuhwasana chiyulo chenyiko. Omu Yehova mwakalinga hananongesa lyehi kano kaye, vyuma atenga namwilu nahano hamavu navikatachikiza ngwavyo chikupu vene chiyulo chaYehova chapwa chakwoloka. Chikupu vene, vatu navakawahilila chikuma.

3. Vyuma muka viwana natushimutwila vize Wangana waKalunga naukafumisako?

³ Vyuma vyeka muka vize vyatwama ‘mukaye’ kaze “kali nakuhita”? Vyuma kana shina vize vamona vatu ngwavo navipwangako lika mukuyoya chavo muno mukaye. Uno chuma kana chachipi tahi? Nduma. Mwomwo chuma kana, chikiko chapwa chachilemu chikuma havyuma vize vavuluka ‘mumujimbu wamwaza waWangana.’ (Mateu 24:14) Shikaho, tuchitalenu jino havyuma vize navakafumisako omu naukeza Wangana waKalunga. Navakafumisako vyuma viwana: vatu vakuhuka, namauka amapi amukaye, navilinga vyakuhenga navyuma vyavipi. Tushimutwilenu jino vyuma vino vitatu (1) omu vyuma kana vyeji kutunehelanga ukalu makumbi ano, (2) novyo mwakalinga Yehova kuvyuma kana (3) nomu mwakavifumisako nakuhakako vyuma vyamwaza.

4. Ukalu muka veji kutukokelanga vaka-kuhuka makumbi ano?

⁴ Ukalu muka veji kutukokelanga vatu vakuhuka? Omu kaposetolo Paulu akumishile kuhanjika vyamyaka yino ngwenyi “nahakapwa lwola lwalukalu,” vamuhwiminyinyine nawa asoneke ngwenyi: “Vatu vakuhuka navaka-kuhungumwisa vakwavo navayanga nakupihilako lika.” (Chimo. 2, 3:1-5, 13) Uno nayenu munamono omu upolofweto kanou uli nakutesamo nyi? Etu vavavulu vanatuyanjisanga kuli vaka-kuhuka vakufwana nge vilyanyi, navaka-kulitala havikova, navihwanga. Vamwe kavasweka vyuma vyavipi veji kulingangako, kaha veka veji kulyonganga kukafwa vatu, olozenyi kavalinga ngocho namichima yavo yosenako. Numba tuhu etu vamwe kanda vachituyanjisengaho lyehi kuli vaka-kuhuka, oloze vyuma vanakulinga vinakutwivwisa kupihya tuvosena. Tweji kwivwanga kukola chikuma kumuchima hakumonomu vaka-kuhuka vali nakuyanjisa vanyike, navakulwane, navatu veka vaze vali nakutwama muchiwomawoma. Vaka-kuhuka vatwama navilinga vyautu, navyaunyama, navyaundemone. (Yako. 3:15) Chipwe ngocho, Mazu aYehova atuhana lutalililo lwavyuma vyamwaza.

5. (a) Vaka-kuhuka vavahana lwola lwakulinga vyuma muka? (b) Vyuma muka navikasoloka kuli vaka-kuhuka vaze navakana kupihilila nakwalumuka?

⁵ Vyuma muka mwakalinga Yehova? Oholyapwa Yehova nahane lwola vaka-kuhuka mangana valumune vilinga vyavo. (Isa. 55:7) Numba tuhu kano kaye kalinwomu vakanongese, oloze Yehova kanda achisopese mutu himutu. Vyuma muka navikasoloka kuli vatu vaze kaveshi nakusaka kwalumukako vaze navatwalaho lika kukundwiza kano kaye palanga nakuluyando lwalunene? Yehova mwakanongesa vatu vakuhuka vosena hano hamavu. (Tangenu Samu 37:10.) Vaka-kuhuka vanahase kushinganyeka ngwavo kaveshi kukamona ukalu numba umwe hakuvasopesa kuli Kalungako. Vatu vavavulu muno mukaye vasaka kusweka vyuma veji kulinganga kaha nawa kavavazangamisako. (Yopa 21:7, 9) Mbimbiliya yatulweza ngwayo: “Meso aKalunga eji kutalanga jijila javatu, kaha eji kumonanga munayi jitambo javo. Kakweshi chihela chakwilava wi chipwe chamilima yayinene chize vanahase kuswama vaka-kuhengako.”  (Yopa 34:21, 22) Kakweshi vyuma vyakusweka kuli Yehova Kalungako. Kakwatwama muka-kuhungumwisa vatu nahase kwonga Kalungako kaha nawa kakweshi milima yayinene chikuma yize yinahase kulingisa Kalunga ahone kumona kala chumako. Omu nayikakuma Alamangetone, natukatalatala kuze vapwilenga vaka-kuhuka, oloze katweshi kukavamona chekako. Navakavanongesa vosena ndolokoto.—Samu 37:12-15.

6. Veya navakalitulaho omu navakanongesa vaka-kuhuka, kaha mwomwo ika chuma kana nachikapwila chamwaza?

⁶ Veya navakalitulaho omu navakanongesa vaka-kuhuka? Yehova atufwelelesa mumukanda waJisamu ngwenyi: “Vavavwovu navakaheta mavu, kaha navakalivwisa kuwaha kuunda chamwenemwene.” Kaha nawa ngwawo: “Vaka-kwoloka navakaheta mavu, kaha navakatwamangaho haya myaka yosena.” (Samu 37:11, 29) Uno “vavavwovu” ‘navaka-kwoloka’ vapwa veya? Vavavwovu vapwa vaze veji kwitavilanga jindongi jaYehova navyuma anangula, kaha vaka-kwoloka shina vaze veji kulinganga vyuma vize amona Yehova Kalunga ngwenyi vyakwoloka. Makumbi ano mukaye munavulu chikuma vaka-kuhuka kuhambakana vaka-kwoloka. Oloze mulifuchi lyalihya namukapwa kaha vatu vavavwovu, vakwoloka. Chikupu vene, vatu kanava navakalingisa mavu kupwa palachise.

7. Mauka amukaye eji kutukokelanga ukalu muka makumbi ano?

⁷ Mauka amapi amukaye eji kutunehelanga ukalu muka? Upi wauvulu unakusoloka muno mukaye unakufuma kumauka keshi kuvatu kahako. Achishinganyekenu havyuma veji kunangulanga mumauka akwitava, aze eji kwonganga vatu hakuvuluka omu apwa Kalunga, naMbimbiliya, nomu nakakapwa kaye kulutwe, navatu, navyuma vyeka vyavivulu. Nyi ngachilihi jifulumende jize jeji kukundwizanga jijita naulyanyi naluyanjisa kuli vaka-kuhutwa vaze kaveshi namutu wakuvakafwa, navatu vamuchivulu vaze vanakumona ukalu wamaswekeza navyuma vyeka? Nyi ngachilihi vatu valifwi vaze vanakwenyeka chitungilo chavatu, nakwenyeka vyuma vyakutenga, navyuma vyeka vize vanakulinga vatu mwomwo yakufwila kupwa naluheto? Chakuzeneka kukakasana, mauka amapi amuno mukaye akiko ali nakuneha ukalu tuli nakumona makumbi ano.

8. Kweseka naMbimbiliya, vyuma muka navikasoloka kumauka amapi aze vafwelela chikuma vatu makumbi ano?

⁸ Vyuma muka mwakalinga Yehova? Luyando lwalunene nalukaputuka omu jifulumende najikafumbukila pwevo muka-ujila uze apwa Mbavilone Yayinene, yize yemanyinako mauka akwitava amakuli osena. (Kuso. 17:1, 2, 16; 18:1-4) Mauka akwitava amakuli osena navakawanongesa ndolokoto. Nyi ngachilihi mauka eka amapi aze ali muno mukaye? Mbimbiliya yazachisa jipili namatungu kulumbununa mauka amavulu aze vafwelela chikuma vatu makumbi ano. (Tangenu Kusoloka 6:14.) Mbimbiliya yahanjikilile chimweza ngwayo jifulumende namauka osena navakawakatumuna muvihela vyawo. Omu luyando lwalunene nalukapwa kwakamwihi nakukuma, hakiko navakanongesa jifulumende josena jili muno mukaye navatu vosena vaze vali nakufumbukila Wangana waKalunga. (Yele. 25:31-33) Kaha kakweshi kukapwa cheka mauka amapiko.

9. Mwomwo ika twatela kufwelela ngwetu mavu amahya nawakapwa akulipwila?

⁹ Vyuma muka navikapwako omu navakavifumisako mauka amapi? Omu nayikakuma Alamangetone, kutala nakukapwa cheka liuka hano hamavu tahi? Mbimbiliya yamba ngwayo: “Kuli melu amahya namavu amahya aze tuli nakutalilila nge omu mwaya lushiko lwenyi,  kaha namukapwanga kwoloka.” (Petu. 2, 3:13) Melu namavu amwaka aze emanyinako mauka amapi nachitungilo chavatu chachipi kavyeshi kukapwako chekako. Kaha vyuma muka navikapwako? Mazu akwamba ngwavo “melu amahya namavu amahya” alumbununa nge nakukapwa fulumende yayihya nachitungilo chavatu chachihya chize navakayula kufulumende kana. Wangana uze navakayula kuli Yesu Kulishitu naukasolola vilinga vyaYehova Kalunga, uze apwa Kalunga wakuunda. (Koli. 1, 14:33) Chikupu vene, “mavu amahya” nawakapwa akulipwila. Nakukapwa malunga vakulindunuka vaze navakazakama kanawa vyuma. (Samu 45:16) Kulishitu navaze 144,000 navakatwaminyina malunga kanava. Achishinganyekenu kuwaha namukevwa omu navakafumisako mauka amapi osena nakuhakako jino kufulumende yamwaza yakukupuka.

10. Vilinga muka vyakuhenga vize vyalisala mungalila mwatwama, kaha ukalu muka mweji kumonanga natanga yenu mwomwo yavilinga kana?

¹⁰ Ukalu muka tunakumonanga mwomwo yavilinga vyakuhenga? Tuli nakuyoyela mukaye kaze kanazale navilinga vyavipi chikuma. Vilinga vyakufwana nge ujila, nakuhona kashishi, nauhwanga vinalisale chikuma muno mukaye. Kakavulu visemi cheji kuvakaluhwilanga kukinga vana vavo kuvilinga kanevi. Jipolongalamu jakuhemahema jili nakulingisa vilinga vyavipi visoloke nge vyamwaza nakuhombwanyisa jishimbi jaYehova jakulisakwila vyuma vyamwaza nevi vyavipi. (Isa. 5:20) Vaka-Kulishitu vamuchano kavazana mukuhema kanako. Vafwila kulama kulonga chavo numba nge vali kuvihela kuze vatu vanakulinga vyuma vize kavyavumbika jishimbi jaYehovako.

11. Vyuma muka natulinangula hali Yehova hakunongesa Sotome naNgomola?

¹¹ Vyuma muka mwakalinga Yehova kuvilinga vyakuhenga? Achishinganyekenu vyuma alingile Yehova havilinga vyavipi vize vyalisalile muSotome naNgomola. (Tangenu WaPetulu 2, 2:6-8.) Lunga wakwoloka Lote natanga yenyi vayanjilenga mwomwo yavilinga vyavipi vize vyapwile munganda vatwaminenga. Omu Yehova anongesele nganda kana hakufumisako vilinga vyavipi, ahanyine “chakutalilaho kuli vaka-kuzamukila Kalunga havyuma navikeza kulutwe.” Ngana muze Yehova afumishileko vilinga vyavipi vyosena mumakumbi aLote, mukiko nawa mwakalinga nakuvilinga vyavipi vinalisale makumbi ano omu mwakasopesa kano kaye.

12. Milimo yimwe muka mwasaka kukazata omu navakafumisako kano kaye kakuhuka?

¹² Vyuma muka navikapwako omu navakavifumisako vilinga vyakuhenga? Nakukapwa Palachise yize nayikazala navilinga vyamwaza. Achishinganyekenu hakuwaha natukevwa omu natukalumuna ano mavu kupwa palachise chipwe kutunga jizuvo jetu najavatu vaze twazanga. Ocho kuwaha kana natukevwa hakusambilila mayevuyevu avatu vaze vafwa, nakuvanangula jindongi jaYehova navyuma vize nalingilanga vatu jenyi. (Isa. 65:21, 22; Vili. 24:15) Natukazatanga milimo yize nayikatwivwisanga kuwaha nakwalisa Yehova.

13. Kulikanga chaSatana, naAlama, naEve chaneha ukalu muka makumbi ano?

¹³ Vyuma vyavipi vyeji kutunehelanga ukalu muka? Vatu vakuhuka, namauka amapi amukaye, navilinga vyakuhenga vikiko vili nakuneha ukalu chikuma hano hamavu. Tuvosena tuli nakumona ukalu wakufwana nge jijita, nauhutu, nakulimona ulumbi. Kaha nawa tuvosena tweji kuvizanga nakufwa. Misongo nakufwa vyeza mwomwo yaSatana, naAlama, naEve vaze valikangile kuli Yehova. Ngocho kakweshi mutu nahase kuchina ukalu uze weza mwomwo yakulikanga chavoko.

14. Vyuma muka mwakalinga Yehova kuvyuma vyavipi vize viliko makumbi ano? Hanenu chakutalilaho.

 ¹⁴ Vyuma muka mwakalinga Yehova kuvyuma vyavipi vize viliko makumbi ano? Achishinganyekenu hajijita. Yehova ashika ngwenyi mwakafumisako jijita haya myaka yosena. (Tangenu Samu 46:8, 9.) Nyi ngachilihi misongo? Amba ngwenyi, mwakayifumisako. (Isa. 33:24) Nyi Kufwa? Yehova ngwenyi mwakachimina haya myaka yosena. (Isa. 25:8) Kaha nawa mwakufumisako uhutu. (Samu 72:12-16) Omu mukiko mwakalinga nakuvyuma vyavipi vyosena vize vili nakutunehela ukalu makumbi ano. Mwakafumisako nawa “peho” yayipi yize yili muno mukaye mwomwo Satana navandemone jenyi kaveshi kukapwako chekako.—Efwe. 2:2.

15. Vyuma muka navakafumisako omu nayikahita Alamangetone?

¹⁵ Achishinganyekenu ocho kuwaha kana natukevwa hakutwama mulifuchi lyakuzeneka jijita, namisongo, nakufwa, namaswalale, najindeke jakuzungisa, navitwa vyakuzungisa, navipatela, navandotolo, navanase, natunokelo, navipeji namafuka. Hakuwana nge kakweshi kukapwa cheka uhwangako, ngocho kakweshi kukapwa kulizakamina vyawijiko, kakweshi kukapwa cheka tupokola, pamo kakweshi kukapwa natupachiso chipwe jisapiko. Kaha nawa katweshi kukalizakaminga hakala chumako.

16, 17. (a) Vyuma muka navakalivwisa kuwaha vatu vaze navakayovoka haAlamangetone? Hanenu chakutalilaho. (b) Vyuma muka navitukafwa tufwelele ngwetu natukayovoka omu navakanongesa kano kaye?

¹⁶ Uno kuyoya nachikapwa ngachilihi omu navakafumisako vyuma vyavipi vyosena? Chapwa chachikalu kuhumikiza vyuma kana. Hakuwana nge tunatwame muno mukaye hatando yayisuku chikuma, ngocho pamo tunahase kuputuka kumona vyuma vyavipi vili nakusoloka nge mukiko twatela kuyoya vene ngana. Chochimwe nawa, vatu vatwama kwakamwihi nachitulilo chamasuwa kavahaka mangana kuvyema vyamasuwako, kaha vaze vatwama kwakamwihi nachihela chakumbilila swali kavahaka mangana kulivumba lyaswaliko. Chikupu vene, kufumisako vyuma vyavipi vyosena nachikaneha kuwahilila chikuma.

¹⁷ Vyuma muka navikapwako omu navakafumisako ukalu tunakumona? Mukanda waSamu 37:11 wakumbulula ngwawo: “Navakalivwisa kuwaha kuunda chamwenemwene.” Uno mazu kana kawamihetele kumuchimako tahi? Omu mukiko ajina Yehova mukayoye. Shikaho, fwilenu kuzata nangolo mangana mupandame chikuma kuli Yehova Kalunga nakuliuka lyenyi omu tuli nakuyoyela mumakumbi ano amapi. Mwatela kupwa nalutalililo lwakukola, nakuhunananaho chikuma, nakulusolola muvilinga vyenu, nakufwila kulwezako vakwenu. (1 Chimo. 1, 4:15, 16; Petu. 1, 3:15) Nge namulinga ngocho, kaha kamweshi kukanongela hamwe nakaye kano kakuhukako. Oloze namukatwalaho lika kuyoya mukuwahilila haya myaka yosena.