MuchiHepeleu mazu kana anahase kutalisa kuvatu jaKalunga chipwe kuli vaka-mafuchi eka. Kwalumuka chamazu kana chapendamina havishina vino:

1. Mbimbiliya yayihya vayisononwene kukavangiza hanjikiso yachiHepeleu. Kulikwatasana chamazu ahali Samu 144:12-15 nawaze atwama muvesi 11 nakutwala mwishi, chapendamina haulumbunwiso walizu lyatete lyamu vesi 12, lize vavuluka muchiHepeleu ngwavo asher. Lizu vavuluka ngwavo asher tunahase kulizachisa mujijila jakulisezaseza. Chakutalilaho linahase kutalisa kulizu lyakwamba ngwavo “vaze.” Lizu “vaze” valizachishile (muMbimbiliya yamwaka yaChingeleshi.) Shikaho, vyuma vyamwaza vize vavuluka mu 12 nakuheta ku 14, vyatalishile kuli vaka-mafuchi eka, vaze vavuluka mu vesi 11 nakutwala kwishi. Chipwe ngocho, lizu asher linahase kulumbununa vyuma vize navisoloka mwomwo yavyuma nalingi mutu, shikaho vanahase kulyalumuna ngwavo “kaha,” chipwe “mangana,” chipwe ngwavo “ngocho.” Eli lizu “ngocho” likiko vazachisa muMbimbiliya yize vasononwene mu 2013 namujiMbimbiliya jeka.

2. Mazu vasononona hachisoneka kana alitombola kanawa namazu amujivesi jikwavo jahali Samu 144. Lizu “ngocho” vazachisa muvesi 12 lyalumbununa kutokwa chize vavuluka mujivesi 12 nakuheta ku 14. Kaha mazu kana atalisa kuli vaka-kwoloka vaze veji kusakanga ‘vavapululule nakuvalwila’ kumavoko avaka-mafuchi eka (vesi 11). Kwalumuka kana chalitombola nalizu lyakwamba ngwavo “vawahilila” lize lyasoloka mapapa kavali muvesi 15. Shikaho, lizu vawahilila lyatalisa kuli vaka-kwoloka vaze “vakwechi Kalunga kavo Yehova.” Tachikizenu nawa ngwenu muchiHepeleu kavazachisa mikingo yamazu, yakufwana nge yize yeji kusololanga mazu aze vanahanjika kuli mutuko. Shikaho, vaka-kwalumuna vatela kukekesa kanawa vyuma vyavivulu vyakufwana nge hanjikiso yachiHepeleu, nachihande chosena, najivesi jikwavo jamuMbimbiliya.

3. Mazu vasononona alitombola najivesi jikwavo jamuMbimbiliya jize jahanjika havyuma vyamwaza vize Kalunga ashika vatu jenyi vakushishika. Hakuwana nge ulumbunwiso walizu asher vanawalumuna, ngocho mazu ahali Samu 144 asolola nge Ndavichi afwelelele ngwenyi omu Kalunga mwakasokola vaIsalele, mwakavakisula nakupwa vakuwahilila nakufukila mukuyoya chavo. (Levi 26:9, 10; Lushi. 7:13; Samu 128:1-6) Chakutalilaho, hali Lushimbi lwamuchivali 28:4 ngwavo: “Navakakisula vana venu, najimbuto jamumande enu, navimuna jenu, navangombe namikoko.” Chikupu vene, muchiyulo chaSolomone mwana Ndavichi vatu vatwaminenga mukuunda nakupwa vakufukila. Chiyulo chaSolomone chemanyinyineko chiyulo chaMeshiya.—Vamya. 1, 4:20, 21; Samu 72:1-20.

Kukukulula jino chihande, kwalumuka chatwama hali Samu 144 kachalumwine vyuma yanangula Mbimbiliyako. Kwalumuka kana chinasolola jino hatoma chuma vatalilila vangamba jaYehova. Chuma kana shina kufumisako vatu vakuhuka mangana vaka-kwoloka vakatwamenga mukuunda nakupwa vakufukila.—Samu 37:10, 11.