1. Omu Alama naEve valikangile muEtene, Yehova akolezezele vatu vatalilile vyuma muka?

KUFUMA vene halwola luze visemi jetu vakulivanga valingile shili nakupwa jino vakuhona kukupuka, Yehova nakolezezanga lika vatu. Omu Alama naEve valingile hivanalikange lyehi, Yehova ahanjikile mazu aupolofweto aze atelele kukolezeza nakuhana lutalililo vatu vaze vasemukile hanyima yakulikanga chaAlama naEve. Upolofweto kana watwama hali Kuputuka 3:15 haze vatufwelelesa ngwavo Satana Liyavolo nakaye kenyi kakuhuka kalinwomu vavanongese.—Kuso. 12:9; Yowa. 1, 3:8.

2. Yehova akolezezele ngachilihi Nowa?

² Numba tuhu Nowa natanga yenyi valemeselenga Kalunga, oloze vatu vaze vayoyelele mulwola kana kavalemeselenga Kalungako. Vatu kana vapwile navilinga vyaulyanyi naujila, ngocho echi  kachi chamulingishile ahombe. (Kupu. 6:4, 5, 11; Yuta 6) Oloze Yehova amukolezezele hakumulweza vyuma vize vyamukafwile mangana atwaleho ‘kutambuka naKalunga.’ (Kupu. 6:9) Amulwezele ngwenyi mwanongesa kaze kaye kakuhuka nakumulweza vyuma atelelele kulinga mangana ikiye natanga yenyi vakayovoke. (Kupu. 6:13-18) Chikupu vene, Nowa amwene ngwenyi Yehova apwa Kalunga muka-kukolezeza.

3. Yehova akolezezele ngachilihi Yoshuwa? (Talenu muvwimbimbi wakulivanga.)

³ Mukuhita chamyaka, Yoshuwa vamuhanyine mulimo wakutetekela vatu jaKalunga hakwingila muLifuchi lyaLushiko. Mulimo kana wapwile waukalu mwomwo atelelele kulwa namazavu amaswalale vangolo vaze vapwile nakutwama mulifuchi kana. Chuma kana chevwishile woma Yoshuwa ngocho Yehova alwezele Mose amukolezeze. Ambile ngwenyi: “Tongola Yoshuwa, mukolezeze nakumuzamisa, mwomwo ikiye mwakapwa kulutwe lwavatu ava hakuzauka kalwiji, kaha ikiye nawa mwakavatwaminyina vakaswane lifuchi eli mumona.” (Lushi. 3:28) Shimbu kanda Yoshuwa alinge vyuma vamulwezele, Yehova amukolezezele cheka ngwenyi: “Anuka omu ngunakulweze ngwami, umika, jikiza. Kanda naulizuzukila chipwe kwivwa womako, mwomwo Yehova Kalunga kove ali nayove kweshokwo nauyanga.” (Yoshu. 1:1, 9).Chikupu vene, mazu kana akolezezele Yoshuwa.

4, 5. (a) Yehova akolezezele ngachilihi vatu jenyi kushikulu? (b) Yehova akolezezele ngachilihi Mwanenyi?

⁴ Yehova kakolezezelenga kaha mutu himutuko oloze avakolezezelenga nawa mwalizavu. Halwola lukwavo nawa akolezezele vaYuleya vaze vapwile muundungo muMbavilone ngwenyi: ‘Kanda namwivwa womako, mwomwo nguli nayenu. Kanda namulizakaminako, mwomwo nguKalunga kenu. Nangumijikijisa, nangumikafwa, nangumikwachilila nalivoko lyami lyachilyo lyakwoloka.’ (Isa. 41:10) Awa mazu akolezezele navaka-Kulishitu vakulivanga kaha eji kutukolezezanga nayetu makumbi ano.—Tangenu Wavaka-Kolinde 2, 1:3, 4.

⁵ Yesu naikiye vamukolezezelenga kuli Ise. Omu vamumbapachishile, evwile lizu nalifuma mwilu lyakwamba ngwalyo: “Ou ikiye Mwanami, ou ngwazanga, ou ngwevwila kuwaha.” (Mateu 3:17) Mazu kana akolezezele Yesu omu apwile nakuzata mulimo wenyi hano hamavu.

6. Uno chifwanyisa chajitalende chatukolezeza ngachilihi?

⁶ Yesu alondezezelenga Ise. Chakutalilaho, chifwanyisa chajitalende chize azachishile hakunangula vatu vyachikukulwishi chakatwamino kamyaka yino cheji kutukolezezanga tupwenga vakushishika. Mwata wamuchifwanyisa kana asangejekele vandungo jenyi vakushishika ngwenyi: “Wazachila, ove ndungo wamwaza wakushishika! Unapunga uwakushishika havyuma vyavindende. Nangukutongola ulamenga vyuma vyavivulu. Wahilila hamwe nakaka yove.” (Mateu 25:21, 23) Mazu kana nawatukolezeza tutwaleho kuzachila Yehova nakashishi.

7. Yesu akolezezele ngachilihi vaposetolo jenyi chikumanyi Petulu?

⁷ Omu tumbaji vapwile nakulikokojwesa vawane iya hakachi kavo apwile wamulemu chikuma, Yesu avakolezezele vapwenga vakulinyisa nakupwa vaka-kuzachila vakwavo keshi nge vamyatako. (Luka 22:24-26) Kakavulu, Petulu alimbenjelenga nakwivwisa Yesu kupihya. (Mateu 16:21-23; 26:31-35, 75) Oloze muchishishisa chakumuhanga, Yesu amukolezezele nakumuhana mulimo wakukolezeza vandumbwenyi.—Yowa. 21:16.

8. Hezekiya akolezezele ngachilihi tupitau twamaswalale navatu vamuYuta?

⁸ Shimbu kanda Yesu ezenga hano hamavu nakutuhana chakutalilaho chakukupuka chamwakulikolezezela, vangamba jaYehova vasakiwilenga kuvakolezeza. Chakutalilaho, omu vaAsulya vasakile kulukuka nganda yaYelusalema, Hezekiya akungulwile tupitau twamaswalale navatu vamuYuta mangana avakolezeze. Mbimbiliya ngwayo: “Vatu vakwachile ngolo hakwivwa mazu [enyi.]”—Tangenu Mijimbu 2, 32:6-8.

9. Vyuma muka natulinangula kuli Yopa hakulikolezeza navakwetu?

⁹ Yopa nawa atusela chakutalilaho chamwaza. Numba tuhu asakiwile kumukolezeza chikuma, oloze anangwile ‘vaka-kuvendejeka vaze vapwile nakumuyanjisa’ mwakukolezezela vakwavo. Avalwezele ngwenyi nge ikiye apwile ngana mwavakiko, ‘kachi avakolezezele namazu amukanwa kenyi. Mazu enyi akuvendejeka kachi avasuulwishile.’ (Yopa 16:1-5) Kufumaho Yopa vamukolezezele jino kuli Elihu naYehova.—Yopa 33:24, 25; 36:1, 11; 42:7, 10.

10, 11. (a) Mwomwo ika mwanaYefweta wapwevo asakiwilile kumukolezeza? (b) Vatu muka twatela kukolezezanga makumbi ano?

¹⁰ Chakutalilaho chikwavo chakushikulu chamutu uze asakiwile kumukolezeza shina chamwanaYefweta wapwevo. Omu Yefweta ayile nakulwa jita navaAmole, alishikile lushiko naYehova ngwenyi kachi nge mwafungulula vaka-kole, kaha weshowo mutu mwakalivanga kwiza nakumusesa mwakamuhana kuli Yehova mangana akazachilenga hatavanaku. Omu akindulukile, mwanenyi umwe kaha wapwevo ikiye ejile nakumusesa, ngocho Yefweta evwile chinyengo. Chipwe ngocho, ateselemo lushiko lwenyi hakutuma ou mwana kuShilo mangana akazachile hatavanaku mukuyoya chenyi chosena.—Kuyu. 11:30-35.

¹¹ Chuma kana kachapwile chachikalu kuli Yefweta kahako oloze nakuli mwanenyi nawa. Chipwe ngocho, alisuwile kulinga vyuma ashikile Ise. (Kuyu. 11:36, 37) Alisuwile kutwama ujike nakuhona kupwa navana vaze vatelelele kuswana lijina naupite waIse. Chikupu vene ou mwana asakiwile kumuvendejeka nakumukolezeza. Mbimbiliya yamba ngwayo: “Vatu muIsalele valingilenga chuma chino: Mwaka himwaka vana vamapwevo muIsalele vayilenga nakusangejeka mwanaYefweta kaNgileyate, makumbi awana mumwaka.” (Kuyu. 11:39, 40) Echi chatela kutulingisa tusangejekenga nakukolezeza vandumbwetu vavajike vaze vali nakuzachisa ujike wavo mangana vazakame “vyuma vyaMwata.”—Koli. 1, 7:32-35.

12, 13. Petulu akolezezele ngachilihi vandumbwenyi?

¹² Haufuku wakukokela kukufwa chenyi, Yesu alwezele kaposetolo Petulu ngwenyi: “Ove Shimona, ove Shimona, Satana nalombo mangana muvosena amipepe nge tiliku. Oloze ami ngunakulembelelako, mangana lufwelelo lwove luzeneke kukuma. Kahove omu naukalinga hiunapihilila nakwalumuka, kazamikise vandumbwove.”—Luka 22:31, 32.

¹³ Petulu apwile hamukana wavaze vatwaminyinyinenga chikungulwilo chavaka-Kulishitu vakulivanga. (Ngale. 2:9) Vyuma alingile haPendekoseta vyakolezezele chikuma vandumbwenyi. Omu Petulu apwile kwakamwihi nakufwa, asonekelele vakwavo vaka-Kulishitu ngwenyi: “Ngunamisonekela mazu amandende . . . mangana ngumikolezeze nakumilweza unjiho wamwenemwene ngwami eli likiko likoji lyalinene lyaKalunga  lyamuchano. Zamenunga mbe mulikoji kana.” (Petu. 1, 5:12). Mazu aze asonekele Petulu anakolezezanga vaka-Kulishitu kufuma vene kushikulu kaha nawa achili nakutukolezeza nayetu. Tuli nakusakiwa kutukolezeza mujila kaneyi chikumanyi omu tuli nakuvandamina kutesamo chajishiko jaYehova.—Petu. 2, 3:13.

14, 15. Uno mazu asonekele kaposetolo Yowano atukolezeza ngachilihi?

¹⁴ Kaposetolo Yowano nawa apwile nakutwaminyina chikungulwilo chavaka-Kulishitu vakulivanga. Mukanda waMujimbu Wamwaza asonekele, uze wahanjika hamulimo azachilenga Yesu wakolezezele vaka-Kulishitu vakulivanga kaha uchili lika nakutukolezeza nayetu nawa. Mumukanda wenyi kaha mukiko mwatwama mazu aYesu akwamba ngwenyi tumbaji twenyi navakavatachikijila hazangi vatwama nayo.—Tangenu Yowano 13:34, 35.

¹⁵ Kaha nawa mumikanda yitatu yize asonekele Yowano, mwatwama vishina vyavilemu chikuma. Chakutalilaho, nge tunahombo mwomwo yakuvulumuna mulonga washili, kaha mazu akwamba ngwavo “manyinga aMwanenyi Yesu nawatutomesa kushili yosena” nawatukafwa. (Yowa. 1, 1:7) Kaha nawa nge chivezu chetu chichili nakutuhana mulonga, kaha chinahase kutuvendejeka hakutanga mazu akwamba ngwavo: “Kalunga ahambakana michima yetu.” (Yowa. 1, 3:20) Yowano ikiye kaha asonekele ngwenyi: “Kalunga ikiye zangi.” (Yowa. 1, 4:8, 16) Mumukanda wenyi wamuchivali nou wamuchitatu asangejeka vaka-Kulishitu vaze “vali nakutambuka lika mumuchano.”—Yowa. 2, 4; Yowa. 3, 3, 4.

16, 17. Paulu akolezezele ngachilihi vaka-Kulishitu vakulivanga?

¹⁶ Mulikulukaji lyamyaka lyakulivanga kaposetolo Paulu pamo ikiye akolezezelenga chikuma vandumbwenyi. Omu hahichile katando kakandende kufuma hakufwa chaYesu tumbaji  twenyi vavavulu vatwaminenga muYelusalema muze mwapwilenga lizavu lyakutwaminyina. (Vili. 8:14; 15:2) Vaka-Kulishitu vaze vatwaminenga muYuleya vanangwilenga vatu vyaKulishitu. Vatu kana vatachikijile kunangula chavaYuleya, kaha vafwelelele ngwavo kwatwama Kalunga umwe kaha wamuchano. Shipilitu yajila nawa yatumine Paulu kuya nakwambulila vaHelase, navaLoma navatu vakumafuchi eka vaze valemeselenga tulunga veka.—Ngale. 2:7-9, Chimo. 1, 2:7.

¹⁷ Paulu atambukililenga jingalila jakufwana nge Helase, naItalya nangalila yize vali nakuvuluka jino ngwavo Turkey mangana akambulile vaze kavapwile vaYuleyako nakutunga vikungulwilo. Ava vaka-Kulishitu vavahya ‘vavamweneselenga vihuli kuli vaka-lifuchi lyavo.’ Ngocho vasakiwile kuvakolezeza. (Teso. 1, 2:14) Kuheta kafwe mu 50 C.E., Paulu asonekelele chikungulwilo chachihya chamuTesolonyika ngwenyi: “Tweji kumusakwililanga Kalunga shimbu yosena omu tweji kumivulukanga enu muvosena mukulomba chetu, mwomwo tweji kwanukanga milimo mweji kuzatanga nakashishi, nakukilikita mweji kukilikitanga muzangi, nalukakachila lwenu.” (Teso. 1, 1:2, 3) Avakolezezele nawa ngwenyi: “Likolezezenunga navakwenu, nakulitunganga nawa navakwenu.”—Teso. 1, 5:11.

18. Lizavu lyakutwaminyina lyamulikulukaji lyamyaka lyakulivanga lyakolezezele ngachilihi Fwilipu?

¹⁸ Lizavu lyakutwaminyina lyamulikulukaji lyamyaka lyakulivanga lyakolezezelenga vaze vatwaminyinyinenga vikungulwilo navaka-Kulishitu vosena. Chakutalilaho, lizavu kana lyakundwijile Fwilipu omu apwile nakwambulula mujimbu wakuvuluka Kulishitu muSamaliya. Vatumine Petulu naYowano mangana vayenga nakulombelako ava vaka-Kulishitu vavahya vapwenga nashipilitu yajila. (Vili. 8:5, 14-17) Chikupu vene, Fwilipu navaze anangwile vavakolezezele kulizavu lyakutwaminyina.

19. Vaka-Kulishitu vakulivanga vevwile ngachilihi hakutambula mukanda uze wafumine kulizavu lyakutwaminyina?

¹⁹ Halwola lukwavo, lizavu lyakutwaminyina valisanyikile mangana litale hachihande chakujihana, mwomwo vaYuleya vasakile ngwavo vaka-Kulishitu vaze kavapwile vaYuleyako vatelelele kuvajihana kweseka naJishimbi jaMose. (Vili. 15:1, 2) Vakekesele Visoneka, kaha nawa shipilitu yajila yatwaminyinyine ava vandumbwetu vakukulule ngwavo chuma kana kachasakiwile chekako, ngocho vasonekelele vikungulwilo mikanda yakuvalweza vyuma vakashile. Vatumine vaka-kwimanyinako lizavu lyakutwaminyina vatwale mikanda kuvikungulwilo. Nganyo muka yafuminemo? Mbimbiliya ngwayo: “Kahomu vakumishile kuutanga, vawahililile hamazu akuvakolezeza.”—Vili. 15:27-32.

20. (a) Lizavu lyakutwaminyina lili nakutukolezeza ngachilihi makumbi ano? (b) Chihula muka natushimutwila muchihande nachikavangizaho?

²⁰ Makumbi ano, Lizavu lyaKutwaminyina lyaVinjiho jaYehova lyeji kukolezezanga vaka-Mbetele, navaze vazata mulimo washimbu yosena kuhakilako navandumbwetu vosena mukaye. Ngana muze chapwile mulikulukaji lyamyaka lyakulivanga, namakumbi ano tweji kuwahililanga chikuma hakutukolezeza kulizavu lyakutwaminyina. Kaha nawa mu 2015, Lizavu Lyakutwaminyina lyalowele mbuloshuwa yaKinduluka Kuli Yehova, yize yili nakukolezeza vatu vavavulu mukaye kosena. Uno vandumbwetu vaka-kutwaminyina vakiko kaha vatela kukolezeza vakwavo tahi? Natukumbulula chihula kana muchihande nachikavangizaho.