MWAKAWALI, makombakaji aVinjiho jaYehova vamalunga mukaye kosena vavatongolanga kupwa tulama navaka-kuzachila. Kachi nge muli hamukana wavava vandumbwetu, kaha tunafwelela ngwetu muli nakulivwisa kuwaha kuzata mulimo kana.

Chipwe ngocho, pamo mweji kulizakaminanga. Jason kalama wamukweze ambile ngwenyi: “Omu vangutongwele, ngwalizakaminyine chikuma hamulimo wauhya uze vanguhanyine kuzata.” Mose naYelemiya navakiko valizakaminyine hamulimo uze avahanyine Yehova. (Kulo. 4:10; Yele. 1:6) Kachi nge nayenu mweji kwivwanga mwomumwe, kaha munahase kuhonesa ngachilihi ukalu kana nakutwalaho lika kuzovoloka? Tuchitalenu hachakutalilaho chakambaji Chimoteu.—Vili. 16:1-3.

Halwola luze Paulu alwezele Chimoteu vatambukilenga hamwe mumulimo waumishonali, pamo Chimoteu apwile namyaka yakusemuka yakukokela ku 20 chipwe kuzombokaho. Hakuwana nge Chimoteu apwile kanyike, ngocho pamo evwile woma chipwe vene kuhona kuzata mulimo vamuhanyine. (Chimo. 1, 4:11, 12; Chimo. 2, 1:1, 2, 7) Omu mwahichile myaka 10, Paulu alwezele chikungulwilo chamuFwilipi ngwenyi: “Ngunatalilila muli Mwata Yesu ngwami kalinwomu ngutume Chimoteu kuli enu, . . Mwomwo kangweshi namutu weka ukwechi muchima nge wenyiko.”—Fwili. 2:19, 20.

Vyuma muka vyakafwile Chimoteu apwenga kalama wamwenemwene? Tutalenu havishina 6 natulinangula kuli Chimoteu.

1. Azakaminenga vatu. Paulu alwezele vandumbwenyi muFwilipi ngwenyi: “[Chimoteu] mwazakama kanawa vyuma vyakutalisa kuli enu.” (Fwili. 2:20) Chikupu vene, Chimoteu azakaminenga vatu. Avazakaminenga chikuma kushipilitu, ngocho alisuwile kuvakafwa.

Shikaho, kamwatela kupwa ngana mwamuka-kutambukisa sacha uze mwahona kumbata vatu mwawana mwomwo yakufwila kaha kuheta washi kuchitulilo chajisachako. William uze nazate ulama hamyaka yakuzomboka 20, akolezeza vaze vanatongola kalinwomu ngwenyi: “Zangenunga vandumbwenu nakuvakafwa muchishishisa chakufwila kaha kuzata milimo muli nayo.”

2. Ahakilenga mulimo wakwambulula kulutwe. Paulu avulukile chihandwa chapwile hali Chimoteu navakwavo vakweze ngwenyi: “Vakwavo vosena vali nakufwilanga kaha vyuma vyavo vavene, keshi vize vyaYesu Kulishituko.” (Fwili. 2:21) Paulu asonekele ou mukanda omu apwile muLoma. Atachikijile ngwenyi vandumbwenyi vahakilenga kaha milimo yavo yamukuyoya kulutwe. Vatu kana kavazachilenga milimo yakushipilitu natwimako. Oloze Chimoteu kapwile ngana mwavakikoko. Omu vamuhanyine mulimo wakutandakanyisa mujimbu wamwaza, asolwele muchima wakulisuula apwile nawo Isaya, uze ambile ngwenyi: “Yami uno. Ngutume.”—Isa. 6:8.

Namuhasa ngachilihi kuzata milimo yenu yamukuyoya oku nawa muli nakuzakama milimo yaYehova? Chatete twatela kutachikiza vyuma twatela kulinga. Paulu atukolezeza ngwenyi: ‘Kekesenu mumone vyuma vyavilemu.’ (Fwili. 1:10) Fwilenunga kuzata milimo yize Kalunga amona kupwa yayilemu. Chamuchivali, kehesenungako vyakulinga. Lihendenunga kuvyuma vize vinahase kumyenyekela lwola chipwe kumizeyesa. Paulu akolezezele Chimoteu ngwenyi: “China kufwila chize cheji  kwizanga haukweze, oloze fwilanga kwoloka, nalufwelelo, nazangi, nakuunda.”—Chimo. 2, 2:22.

3. Azachilenga mulimo wajila natwima. Paulu alwezele vandumbwenyi muFwilipi ngwenyi: “Enu munatachikiza unjiho asolwele [Chimoteu] hali ivene, mwomwo nganomu mwana eji kuzachilanga hamwe naise, mukiko vene azachile nayami hamwe nakutwala mujimbu wamwaza kulutwe.” (Fwili. 2:22) Chimoteu kapwile muvwako. Atambukilenga hamwe naPaulu, kahechi chavakafwile valizange chikuma.

Namakumbi ano, muliuka lyaKalunga muli milimo yayivulu. Milimo kana yinahase kumilingisa mupwenga vakusuuluka nakulikata chikuma navandumbwenu. Shikaho, fwilenunga kupwa “navyuma vyavivulu vyakuzata mumulimo waMwata.”—Koli. 1, 15:58.

4. Akavangijilenga vyuma alinangwile. Paulu asonekelelele Chimoteu ngwenyi: “Ove unakavangiza kanawa kunangula chami, natwamiso yami, navyuma ngwajina, nalufwelelo lwami, namuchima wami wakutalilila chikoki, nazangi yami, nalukakachila lwami.” (Chimo. 2, 3:10) Hakuwana nge Chimoteu akavangijilenga vyuma alinangwile, ngocho atelemo kuzata mulimo waulemu.—Koli. 1, 4:17

Kutala kuliko ndumbwenu wakuhya kushipilitu uze eji kumikafwanga tahi? Nge wauchi, kaha fwilenu kutondako umwe. Tom uze nazate ulama hamyaka yayivulu, ambile ngwenyi: “Kalama umwe anguzakaminenga chikuma, kaha nawa angunangwile mwakupwila kalama wamwenemwene. Kakavulu ngwamulwezelenga angukafwe, kaha vyuma angunangwilenga ngwavikavangijilenga. Chuma kana changukafwile ngupwenga natwima.”

5. Atwalileho lika kulinangula. Paulu akolezezele Chimoteu ngwenyi: “Lilongese ove ivene nakufwila kupwa namuchima wakuzachila Kalunga.” (Chimo. 1, 4:7) Chakutalilaho, muka-kulaha nahase kupwa namuka-kumulongesa kulaha, oloze atela nawa kulilongesa ivene. Paulu akolezezele cheka Chimoteu ngwenyi: “Lihakeho lika kutangilanga kumeso avatu, nakulembelelanga vakwenu, nakunangulanga. . . . Hunanana havyuma evi, lihane kuvikiko mangana kuzovoloka chove vachimone kuli vatu vosena.”—Chimo. 1, 4:13-15.

Nayenu nawa mwatela kutwalaho lika kuhotola uhashi wenu. Mwatela kufwila kutwalaho lika kuzovoloka kushipilitu. Kamwatela nawa kupendaminanga kaha hauhashi wenu nakushinganyeka ngwenu mwatachikiza vyavivulu chakuzeneka kuhehwojola kanawa muwane muchano wamuMbimbiliyako. Hakusaka mulondezeze Chimoteu, mwatela ‘kulilamanga enu vavene nakuhaka muchima kukunangula chenu.’—Chimo. 1, 4:16.

6. Apendaminyinenga hashipilitu yaYehova. Kutalisa kumulimo wakwambulula azachilenga Chimoteu, Paulu amulwezele ngwenyi: “Shipilitu yajila yize yatwama muli etu yikukafwe ulamenga chumechi chamwenemwene.” (Chimo. 2, 1:14) Hakusaka Chimoteu azate mulimo wakwambulula natwima, atelelele kupendamina hashipilitu yaKalunga.

Donald uze nazate ulama hamyaka 10 ambile ngwenyi: “Malunga vaze vatongola vatela kutunga usoko wamwenemwene naKalunga. Kaha vaze navalinga ngocho, ‘navakwatanga lika ngolo.’ Nge navalombanga shipilitu yaKalunga yivakafwe nakupwa namihako yashipilitu, kaha navakafwa kanawa vandumbwavo.”—Samu 84:7; Petu. 1, 4:11.

Tweji kwivwanga kuwaha chikuma hakumona enu vandumbwetu vavahya vanatongola muli nakutwalaho lika kuzovoloka kushipilitu. Jason uze twavulukanga hakavanga, ambile ngwenyi: “Hamyaka yosena eyi ngunazatenga mulimo waulama, ngunalinangula vyuma vyavivulu, kaha ngunazovoloka chikuma. Oholyapwa jino nguli nakulivwisa kuwaha kuzata mulimo wami nakuumona kupwa himulimo waulemu chikuma.”

Kutala namutwalaho lika kuzovoloka kushipilitu tahi? Fwilenu kulinangula kuli Chimoteu. Kaha nayenu vanahase kumizachisa kuli Yehova mangana mukafwe vatu jenyi.