1, 2. (a) Vyuma muka veji kulinganga vatu hakusaka kupwa vakulihehwa? (b) Ukalu muka weji kufumanga hakulinga vyuma kana?

MAKUMBI ano, mumafuchi amavulu vatu vasaka kupwa vakulihehwa, nakusokoka. Vamwe vasaka kupwa vakulihehwa kuluyanjisa, nakukuvamona ulumbi, nakuuhutu. Veka nawa vasaka kupwa nalisesa lyakuhanjika nakusakula vyuma vanasake kulinga, nakulitwaminyina vavene. Shikaho vatu vasaka kulinga vyuma vanazange nakuyoya nawa mujila yize vanasake vavene.

² Oloze chapwa chachikalu kuwana kulihehwa chamwenemwene. Hakusaka vatu vapwenga vakulihehwa, vavavulu veji kulikanganga kuli vaze vali nangolo jakuyula. Uno kulinga chuma kana cheji kuvakafwanga vapwenga vakulihehwa tahi? Nduma, mwomwo vamwe veji kulikokelanga ukalu chipwe vene kutokesamo myono yavo. Echi chalitombola namazu ahanjikile Mwangana Solomone ngwenyi: “Mutu nashinyinyika mukwavo mutu mangana amuyanjise.”—Kwambu. 8:9.

3. Vyuma muka twatela kulinga numba tupwenga vakulihehwa nakuwana kuwahilila chamwenemwene?

³ Kambaji Yakova ahanjikile vyuma vyavilemu atela kulinga  mutu numba awane kuwahilila chamwenemwene. Asonekele ngwenyi: “Ou mwashishika mujishimbi eji jakulihehwa jakukupuka mwosena nakukakachila kujikiko . . . mwawahililanga navyuma mwalinganga.” (Yako. 1:25) Yehova ikiye atuhana jishimbi jakukupuka, ngocho atachikiza kanawa vyuma vize navitukafwa tuwane kuwahilila chamwenemwene. Ahanyine valunga napwevo vakulivanga vyuma vyamwaza vize vasakiwile kuhakilako nakulihehwa chamwenemwene.

4. Alama naEve vapwile vakulihehwa kuvyuma muka? (Talenu muvwimbimbi wakulivanga.)

⁴ Omu tweji kutanganga tupetulu vavali vakulivanga mumukanda waKuputuka, tweji kumonanga kulihehwa chize vapwile nacho vaAlama naEve, chize kavatwama nacho vatu makumbi anoko. Alama naEve vapwile navyuma vyosena vize vasakiwile, kaha nawa nou avayanjishilenga wauchi. Ava valunga napwevo kavalizakaminyinenga havyakulya, namilimo, namisongo chipwe kufwako. (Kupu. 1: 27-29; 2:8, 9, 15) Uno chili nakulumbununa nge vapwile nalisesa lyakulisakwila kulinga kala vyuma tahi? Tukekesenu tumone mwakukumbulwila chihula kana.

5. Chamokomoko navyuma veji kushinganyekanga vatu, vyuma muka vyasakiwa numba tupwenga vakulihehwa?

⁵ Vatu vavavulu makumbi ano, vashinganyeka ngwavo, hakusaka mutu apwenga wakulihehwa, atela kupwa nalisesa lyakulinga kala vyuma nasake chamokomoko naukalu naufumamo. Mukanda waThe World Book Encyclopedia wamba ngwawo kulihehwa chalumbununa “kupwa nauhashi wakulisakwila vyakulinga nakuvitesamo.” Wamba nawa ngwawo: “Vatu vanahase kupwa vakulihehwa kachi nge fulumende kayeshi kuvashinyinyika valinge vyuma vize kavasakileko.” Mazu kana ali nakulumbununa nge kwatela kupwa jishimbi jize najikafwa vatu kulivwisa kuwaha lisesa vatwama nalyo. Tunahase kulihulisa ngwetu: Iya atwama nalisesa lyakuhakako jishimbi jize japwa jakwoloka?

6. (a) Mwomwo ika Yehova apwila nalisesa lyakulinga kala vyuma? (b) Lisesa muka kavatwama nalyo vatuko, kaha mwomwo ika?

⁶ Twatela kutachikiza ngwetu Yehova Kalunga ikiye kaha atwama nalisesa lyakulinga kala vyuma nasake. Mwomwo ika? Mwomwo ikiye Tengi wavyuma vyosena kaha nawa apwa Mwata wakulitulaho mwilu nahamavu. (Chimo. 1, 1:17; Kuso. 4:11) Mwangana Ndavichi azachishile mazu amwaza hakulumbununa chihela chakulipwila atwama nacho Yehova. (Tangenu Mijimbu 1, 29:11, 12.) Vyuma vyosena atenga kavyatwama nalisesa lyakulilingila kala vyuma ngana muze apwa ikiyeko. Shikaho twatela kutachikiza ngwetu Yehova Kalunga atwama nangolo jakuhakako jishimbi jakwoloka. Omu mukiko alingile kuli vatu vatete vaze atengele.

7. Vyuma muka vyavilemu vize vyeji kulingisanga mutu kupwa wakuwahilila?

⁷ Numba tuhu vaAlama naEve vapwile vakulihehwa kulinga vyuma vimwe, oloze kavapwile nalisesa lyakulilingila kala vyuma vasakileko. Vyuma vimwe vize valingilenga vyapwile vyavilemu. Chakutalilaho, ava visemi jetu vakulivanga vatachikijile ngwavo hakusaka vatwaleho lika kuyoya vasakiwile kulya, nakusavala, nakuhwima navyuma vyeka. Uno kulinga vyuma kana chavalingishile vashinganyeka ngwavo kavapwile vakulihehwako tahi? Nduma, Yehova atachikijile ngwenyi kulinga vyuma kana nachivakafwa vapwenga vakuwahilila nakusuuluka. (Samu 104:14, 15; Kwambu. 3:12, 13) Tuvosena tweji kwivwanga kuwaha kuhwima peho yituta, nakulya vyakulya vize twazanga, nakusavala mangana tunokese mijimba yetu. Tweji kulinganga vyuma kana nakuwahilila chakuhona kulishinjila. Omu mukiko chapwile nakuli Alama naEve.

8. Kalunga ahanyine visemi jetu vakulivanga lushimbi muka, kaha mwomwo ika?

 ⁸ Yehova alwezele Alama naEve ngwenyi vaseme nakuzalisa hamavu nakuwalama. (Kupu. 1:28) Uno lushimbi kana lwavalingishile vahone kupwa vakulihehwa tahi? Nduma. Lushimbi kana lwasolola nge vatelelele kutesamo vyuma ajinyine Tengi vyakulingisa mavu kupwa palachise muze mwatelele kupwa vatu vakukupuka. (Isa. 45:18) Makumbi ano kachapwa chakuhenga mutu kusakula kutwama ujike chipwe vaze valimbata kuhona kupwa navanako. Chipwe ngocho, vatu veji kwingilanga muulo nakupwa navana chamokomoko naukalu weji kufumangamo. (Koli. 1, 7:36-38) Mwomwo ika? Mwomwo kusomboka nakusema vana cheji kulingisanga vatu vawahilile chikuma. (Samu 127:3) Alama naEve vatelelele kulivwisa kuwaha ulo wavo nakuyoyela hamwe natanga yavo.

9. Mwomwo ika lushimbi lwaKalunga lwahali Kuputuka 2:17 kalwapwila lwakuhengako?

⁹ Yehova ahanyine Alama naEve lushimbi lukwavo luze lwahanjikile haukalu naufumamo kachi nge navahona kulukavangiza. Ambile ngwenyi: “Kumutondo wakutachikijila kuwaha nakupihya kanda ukalyakoko, mwomwo halikumbi lize naukalyako naukafwa chakufwa.” (Kupu. 2:17) Uno lushimbi kana lwapwile lwalukalu kukavangiza tahi? Kutala lwalingishile Alama naEve vahone kupwa vakulihehwa tahi? Nduma. Vatu vaze valinangula chikuma Mbimbiliya vamba ngwavo chapwile chakutamo Alama naEve kuvahana lushimbi kana. Chakutalilaho, muka-kulinangula umwe ambile ngwenyi: “Elu lushimbi lwahali [Kuputuka 2:16,17] lwasolola hatoma ngwalwo Kalunga kaha ikiye atachikiza vyuma vyamwaza vize vasakiwa kuli vatu navize kavyasakiwako. Shikaho, hakusaka vatu valivwise kuwaha vyuma vyamwaza, vatela kufwelela Kalunga nakumwononoka. Kulikanga kuli Kalunga nachisolola nge vakwechi lisesa lyakulisakwila kulinga vyuma vyamwaza chipwe vyavipi.” Oloze vatu kavatwama nalisesa lyakuhasa kulinga vyuma kanako.

10. Mwomwo ika twatela kwijiva chihandwa chatwama halisesa lyakulisakwila vyakulinga nalisesa lyakulinga vyuma vyamwaza nevi vyavipi?

¹⁰ Vatu vavavulu veji kwambanga ngwavo lushimbi luze Yehova ahanyine Alama, lwalingishile Alama ahone kupwa nalisesa lyakulinga vyuma asakile. Echi chasolola nge vatu kana vahona kutachikiza chihandwa chatwama halisesa lyakulisakwila vyakulinga nalisesa lyakulinga vyuma vyamwaza chipwe vyavipi. Alama naEve vapwile nalisesa lyakulisakwila kwononoka Kalunga chipwe chiku. Chipwe ngocho, Yehova kaha ikiye atwama nangolo jakutulweza vyuma vyamwaza nevi vyavipi nganomu alingile hakuhakako “mutondo wakutachikijila kuwaha nakupihya” mumilemba yaEtene. (Kupu. 2:9) Twatela kutachikiza ngwetu etu katwatachikiza vyuma navifuma muvyuma vize natusakula kulingako, kaha nawa katweshi kuhasa kutachikiza ngwetu vyuma tunajinyi navitesamoko. Vatu vamwe veji kujinanga kulinga vyuma vyamwaza oloze kutwala muze vyeji kuvanehelanga ukalu. (Vishi. 14:12) Chikupu vene, vatu kavatwama nangolo jakulitwaminyina vaveneko. Shikaho, Yehova hakuhana Alama naEve elu lushimbi, apwile nakuvanangula omwo chapwa kulihehwa chamwenemwene. Mujila muka, kaha ava vapwevo nalunga vakwileko ngachilihi?

11, 12. Mwomwo ika vyuma vasakwile vaAlama naEve vyavanehelele ukalu? Hanenu chakutalilaho.

¹¹ Chaluvinda ava visemi jetu vatete vasakwile kulikanga kuli Yehova. Eve ahonene kukana mazu ahanjikile Satana ngwenyi,  “meso enu nawakatona, kaha namukapwanga nge Kalunga, kaha namukatachikizanga kuwaha nakupihya.” (Kupu. 3:5) Kutala vyuma vasakwile kulinga vyavalingishile vapwenga vakulihehwa tahi? Nduma. Vyuma avongele Satana kavyateselemoko. Vatachikijile jino ngwavo kulikanga kuli Yehova cheji kunehanga ukalu. (Kupu. 3:16-19) Mwomwo ika? Mwomwo Yehova kahanyine vatu lisesa lyakulilingila vyuma vyamwaza chipwe vyavipiko.—Tangenu Vishimo 20:24 nakwinyikila chamwishi; Yelemiya 10:23.

¹² Hakusaka muka-kutambukisa ndeke ahete kanawa kuchihela ali nakuya, atela kukavangiza kanawa jindongi jamwakutambukila namwakuwilila jize vali nakumulweza vaze veji kuvalwezanga mwakulingila ngocho. Oloze nge keshi kukavangiza jindongi kanako, kaha nahase kwingila muponde. Ngana mwamuka-kutambukisa ndeke uze mwahona kukavangiza jishimbi, Alama naEve vasakwile kulilingila vyuma vavene. Vakanyine kuvatwaminyina kuli Kalunga. Jino ukalu muka wafuminemo? Vyuma vasakwile vyavalingishile vapwenga vaka-shili nakufwa, kaha ukalu kana ukiko twaswana nayetu. (Loma 5:12) Kulikanga chalingishile Alama naEve vahone kupwa vakulihehwa. Kaha nawa vajimbalishile kulihehwa chamwenemwene chize avahanyine Yehova.

13, 14. Vyuma muka navitukafwa tuwane kulihehwa chamwenemwene?

¹³ Vatu vavavulu vashinganyeka ngwavo nge navapwa vakulihehwa nakulinga kala vyuma, kaha vanahase kupwa vakuwahilila, oloze vishinganyeka kana vyapwa vyakuhenga. Kulihehwa cheji kunehanga vene kuwahilila, oloze nge kakwapwile jishimbiko kachi vyuma mukaye kavyapwa kanawako. Evi vikiko vyalingisa mukanda waThe World Book Encyclopedia wambenga ngwawo, ‘numba tuhu jishimbi veji kutunganga jeji kukinganga vatu, oloze jeji kuvalingisanga nawa vahone kulilingila kala vyuma vanasake.’ Chuma kana kachapwa chachashiko. Echi chikiko chalingisa kupwenga jishimbi jajivulu, navyambamilonga, navaka-kuyula vaze veji kulumbununanga mwakukavangijila jishimbi kana.

 ¹⁴ Yesu Kulishitu avulukile mwakuwanyina kulihehwa chamwenemwene. Ambile ngwenyi: “Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.” (Yowa. 8:31, 32) Yesu avulukile vyuma vivali vize vyatela kutukafwa tupwenga tuvakulihehwa. Chatete, ambile ngwenyi twatela kwitavila muchano uze anangwilenga, kaha chamuchivali twatela kupwa tutumbaji twenyi. Kulinga vyuma kana nachitulingisa tupwenga vakulihehwa. Uno kulihehwa kuvyuma muka? Yesu alumbunwine ngwenyi: “Weshowo eji kulinganga shili apwa ndungo yashili. . . . Kachi nge Mwana mwamilingisa kupwa vakulihehwa, kaha namupwanga vakulihehwa chikupu.”—Yowa. 8:34, 36.

15. Mwomwo ika kulihehwa chize atushika Yesu chapwila chamwenemwene?

¹⁵ Chikupu vene, kulihehwa chize Yesu ashikile tumbaji twenyi chalihandununa nachize vafwila vatu makumbi ano. Yesu hakuhanjika ngwenyi: “Kachi nge Mwana mwamilingisa kupwa vakulihehwa, kaha namupwanga vakulihehwa chikupu,” apwile nakuhanjika vyakusokoka kuundungo uze vatwamamo vatu kulumbununa ‘kupwa ndungo yashili.’ Shili kayatulingisa kaha tulinge vyuma vyavipiko, oloze yeji kutuhonesanga nawa kulinga vyuma vyakwoloka chipwe kuyoya mujila yize twatela kuyoyelamo. Echi chikiko chasolola nge twapwa tuvandungo jashili, kaha nawa cheji kutulingisanga tuyande, nakufwa. (Loma 6:23) Kaposetolo Paulu naikiye amwene ukalu kanou. (Tangenu Wavaka-Loma 7:21-25.) Shikaho omu natukasokoka kushili, hakiko jino natukapwa nakulihehwa chamwenemwene chize vajimbalishile visemi jetu vakulivanga.

16. Vyuma muka twatela kulinga numba tupwenga tuvakulihehwa?

¹⁶ Mazu aYesu akwamba ngwawo “kachi nge namutwamanga mumazu ami,” alumbununa nge twatela kulingako vyuma vimwe numba tupwenga vakulihehwa. Hakuwana nge twapwa tuvaka-Kulishitu, ngocho twalikana etu vavene, kaha nawa twasaka kukavangiza vyuma vize anangwilenga tumbaji twenyi. (Mateu 16:24) Ngana muze atushika Yesu, natukapwa tuvakulihehwa omu natukanganyala chikuma kundando yenyi yakusokola.

17. (a) Vyuma muka navitulingisa tupwenga tuvakuwahilila mukuyoya? (b) Vyuma muka natushimutwila muchihande nachikavangizaho?

¹⁷ Kukavangiza vyuma anangwile Yesu hakupwa tutumbaji twenyi, nachitukafwa tupwenga vakuwahilila mukuyoya chetu nakupwa nawa nalutalililo lwakukatusokola kushili nakukufwa. (Tangenu Wavaka-Loma 8:1, 2, 20, 21.) Chihande nachikavangizaho nachishimutwila omu twatela kuzachishilamo kulihehwa chetu mangana tuvumbike Yehova uze eji kuhananga vatu kulihehwa chamwenemwene.