CHIHANDE CHAKULINANGULA 14
Uno Muli Nakutesamo Kanawa Mulimo Wenu waKwambulula Tahi?
“Ambululanga lika mujimbu wamwaza, tesamo kanawa mulimo wove.”—CHIMO. 2, 4:5, kwinyikila chamwishi.
MWASO 57 Kwambulila Vatu Vosena
VYUMA NATUSHIMUTWILA *
Omu Yesu asangukile, aliwanyine natumbaji twenyi, kaha ali nakuvalweza ‘vayenga nakunangula vatu vapwenga tumbaji’ (Talenu palangalafu 1)
1. Mulimo muka vafwila kuzata vangamba jaKalunga vosena, kaha mwomwo ika? (Talenu muvwimbimbi wahalipapilo lyahelu.)
KULISHITU YESU alwezele vaka-kumukavangiza ngwenyi, “yenunga mukanangule vatu vakumafuchi osena vakapwe tumbaji.” (Mateu 28:19) Shikaho vangamba jaKalunga vakushishika vosena vafwila kutachikiza omu vanahase ‘kutesamo kanawa mulimo’ uze vavahana. (Chimo. 2, 4:5) Twatachikiza ngwetu mulimo kana wapwa waulemu chikuma, kaha nawa uli nakusakiwa kuuzata mukapachapacha kuhambakana kala mulimo. Chipwe ngocho, shimbu jimwe chinahase kutukaluhwila kuzata jiola jajivulu mumulimo wakwambulula.
2. Ukalu muka tweji kumonanga hakusaka kutesamo mulimo wetu wakwambulula?
2 Kuli milimo yeka yayilemu yamukuyoya yize yasakiwa lwola lwaluvulu nangolo hakuyizata. Yetu vamwe hakusaka tuwane vyuma vyakulikafwa navyo najitanga jetu, twatela kuzata lwola lwaluvulu kumilimo. Kaha nawa tunahase kulipika namisongo, chipwe kuvijisa kausoko kuhakilako naukalu uze weji kwizanga mwomwo yaushinakaji. Jino tunahase kutesamo ngachilihi mulimo wetu wakwambulula oku nawa tuli nakulipika naukalu wakufwana ngana?
3. Vyuma muka natukukulula kweseka namazu atwama hali Mateu 13:23?
3 Kachi nge ukalu tuli nakumona unakutuhonesa kuzachila kanawa Yehova, kaha katwatela kwivwa kupihyako. Yesu atachikijile ngwenyi vatu kaveshi kukalovola mihako yaWangana yakweseka hamweko. (Tangenu Mateu 13:23.) Yehova amona milimo tweji kumuzachilanga kupwa yayilemu, chachikalu kaha nge natuyizata nangolo jetu josena. (Hepe. 6:10-12) Kaha nawa shimbu jimwe tunahase kumona ngwetu tunahase kuzata chikuma milimo yakushipilitu. Shikaho muchihande chino natukekesa havyuma vinahase kutukafwa tumone mulimo wakwambulula kupwa waulemu mukuyoya chetu, nomu tunahase kwashiwisako chiyoyelo chetu, nakuhotola uhashi wetu wakwambulula nakunangula. Uno kutesamo kanawa mulimo wetu chalumbununa ika?
4. Uno kutesamo kanawa mulimo wetu chalumbununa ika?
4 Hakusaka tutesemo kanawa mulimo wetu wakwambulula, twatela kuzata nangolo jetu josena mumulimo wakwambulula nakunangula. Oloze kutesamo mulimo wetu wakwambulula kachalumbununa kaha kuzata jola jajivulu muwandeko. Chuma amona Yehova kupwa chachilemu shina ovyo vyeji kutulingisanga twambulule mujimbu kana. Tweji kuzatanga namuchima wetu wosena mumulimo * wetu mwomwo twazanga Yehova navakwetu vatu. (Mako 12:30, 31; Kolo. 3:23) Kuzachila Kalunga namwono wetu wosena chalumbununa kulisuula, nakuzachisa ngolo jetu nauhashi wetu kumilimo yenyi. Kachi nge twamona mulimo wakwambulula kupwa waulemu, kaha natuzata nangolo jetu josena mangana twambulile vatu vavavulu.
5-6. Hanenu chakutalilaho chize chasolola omu mutu uze ali nalwola lwalundende nahase kuhaka kulutwe mulimo wakwambulula.
5 Achishinganyekenu hali mukweze walunga uze eji kulivwisanga kuwaha kwimba ngita. Eji kwivwanga kuwaha kwimba myaso lwola lwosena. Mukuhita chalwola mwawana milimo yakwimbanga myaso kuzuvo yakuhemena kusongo yavyalumingo. Chipwe ngocho, milimo ali nakuzata kayeshi nakumuhana jimbongo jajivuluko. Ngocho himwengila cheka milimo muchitanda, yize eji kuzatanga kuputuka lyaMande nakuheta lyaChitanu. Numba tuhu eji kuzatanga jola jajivulu muchitanda, oloze muchima wenyi watwama kukwimba myaso. Kaha afwila kuhotola uhashi wenyi wakwimba mangana jino apwenga kuluwa mukwimba myaso. Shikaho eji kwimbanga ngita nge nawaneko kalwola numba vene kakandende kaha.
6 Chochimwe nawa, nayenu pamo mwazanga kuzata chikuma mulimo wakwambulula, oloze pamo mweji kuhonanga mwomwo yakuhona kupwa nalwola lwaluvulu lwakuzata mulimo kana. Chipwe ngocho mweji kufwilanga kuhotola uhashi wenu wakunangula mangana muhete hamichima yavatu. Hakuwana nge mukwechi vyuma
vyavivulu vyakulinga pamo munahase kuhuhwasana nakushinganyeka ngwenu, namulinga ngachilihi mangana muhake mulimo wakwambulula kulutwe mukuyoya chenu.OMU MUNAHASE KUHAKA KULUTWE MULIMO WAKWAMBULULA MUKUYOYA CHENU
7-8. Tunahase kulondezeza ngachilihi Yesu hakwambulula mujimbu?
7 Yesu ahakile kulutwe mulimo wakwambulula mukuyoya chenyi, kaha atusela chakutalilaho chamwaza. Chuma chapwile chachilemu chikuma mukuyoya chenyi shina kwambulula vyaWangana waKalunga. (Yowa. 4:34, 35) Atambukilenga jitunda jajisuku chikuma mangana ambulile vatu vavavulu. Esekelenga kuwana jijila jakulisezaseza mangana ambulile vatu kuvihela vyasanga nahamembo avo. Yesu ahakile chikuma kulutwe mulimo wakwambulula.
8 Nayetu tunahase kulondezeza Kulishitu hakuwanangako jijila jakwambulwilamo mujimbu wamwaza kala kwosena okwo natuwana vatu. Muchishishisa chakuzachisa lwola lwetu mangana tulisuulwise etu vavene, oloze tweji kuluzachisanga kumulimo wakwambulula. (Mako 6:31-34; Petu. 1, 2:21) Vatu vamwe muchikungulwilo veji kuzatanga upayiniya wakulipwila, nawashimbu yosena chipwe wakukafwa. Veka vanalinangula lilimi lyeka chipwe kuya nakuzachila kuvihela kuze kuli nakusakiwa vaka-kwambulula vavavulu. Chipwe ngocho, vaka-kwambulula vaze veji kuchiwananga kupwa chachikalu kuzata milimo kaneyi tunavuluka navakiko veji kuzatanga chikuma mulimo wakwambulula muvikungulwilo vyavo. Numba nge tweji kuzatanga chikuma mumulimo wakwambulula chipwe chiku, oloze twatela kwijiva ngwetu Yehova asaka tuzate kweseka noho hakumina ngolo jetu. Asaka tulivwise kuwaha mulimo tweji kumuzachilanga hakuvilika “mujimbu wamwaza waupahu waKalunga ou apwa wakuwahilila.”—Chimo. 1, 1:11; Lushi. 30:11.
9. (a) Uno Paulu ahakile ngachilihi mulimo wakwambulula kulutwe numba tuhu azachilenga mulimo wakutunga jimbalaka? (b) Uno mazu ahali Vilinga 28:16, 30, 31 asolola ngachilihi muchima apwile nawo Paulu kutalisa kumulimo wakwambulula?
9 Kaposetolo Paulu naikiye ahakilenga mulimo wakwambulula kulutwe mukuyoya chenyi, kaha atusela chakutalilaho chamwaza. Omu apwile muKolinde haungeji wenyi waumishonali wamuchivali, kaposetolo Paulu kapwile najimbongoko, ngocho atungilenga jimbalaka mangana awaneko jimbongo. Oloze Paulu kamwene mulimo wakutunga jimbalaka kupwa waulemu chikuma mukuyoya chenyiko. Azachilenga mulimo kana mangana awaneko vyuma vyakulikafwa navyo hakwambulula mujimbu kuli vaka-Kolinde “chakuhona vakiko kumufweta” kulumbununa kuchina mwavahana chiteli chakumuzakama. (Koli. 2, 11:7) Numba tuhu Paulu azachilengako milimo yimwe yize yamukafwilenga awaneko vyuma vyakulikafwa navyo mukuyoya, oloze atwalileho lika kuhaka mulimo wakwambulula kulutwe mukuyoya chenyi, kaha ambulwilenga nahamakumbi aSambata. Kahomu awanyineko vyuma vyakumukafwa mukuyoya, “aputukile kuhundangana mulimo wakwambulula mazu, kaha ambulilile vaYuleya mangana asolole unjiho ngwenyi, Yesu ikiye Kulishitu.” (Vili. 18:3-5; Koli. 2, 11:9) Mukuhita chalwola omu Paulu vamukashile muzuvo yenyi muLoma hamyaka yivali, ambulililenga vosena vaze vejilenga kuli ikiye kaha nawa asonekelelenga vandumbwenyi mikanda. (Tangenu Vilinga 28:16, 30, 31.) Paulu kechelelele kala chuma chimuhonese kuzata mulimo wenyi wakwambululako. Ambile ngwenyi: “Hakuwana nge tuli namulimo kanou . . . , ngocho katweshi kuzeyako.” (Koli. 2, 4:1) Ngana muze chapwile kuli Paulu, nayetu tunahase kuhaka mulimo wakwambulula Wangana kulutwe mukuyoya chetu numba tuhu tweji kuzatanga lwola lwaluvulu kumilimo yetu yamukuyoya.
Kuli jijila jajivulu tunahase kuzachisa mangana tutesemo kanawa mulimo wetu wakwambulula (Talenu palangalafu 10-11)
10-11. Natutesamo ngachilihi mulimo wetu wakwambulula chamokomoko namisongo?
10 Numba tuhu katweshi kuhasa kwambulula chikuma kuzuvo hizuvo mwomwo pamo yaushinakaji Vili. 17:17; 20:20) Kachi nge cheji kutukaluhwilanga kutambuka, kaha tunahase kutwama kuchihela chasanga kuze tunahase kwambulila vatu vaze navahita. Chipwe tunahase kwambulula mukutulukila, chipwe kusonekela vatu mikanda chipwe kwambulula kuzachisa shinga. Shikaho vatu vaze veji kuchiwananga kupwa chachikalu kwambulwila kuzuvo hizuvo vanahase kulivwisa kuwaha kuzachisa jijila tunavuluka.
chipwe misongo, kaha tunahase kulivwisa kuwaha kwambulula kuzachisa jijila jeka. Vaka-kwambulula vamulikulukaji lyamyaka lyakulivanga vambulililenga vatu kukala chihela. Vambulwililenga kuzuvo hizuvo, nakuvihela vyasanga, namukutulukila nakukala chihela kuze ‘valiwanyinenga’ navatu. (11 Munahase kutesamo kanawa mulimo wenu wakwambulula, chamokomoko namisongo. Achitalenu cheka hali kaposetolo Paulu. Ambile ngwenyi: “Ngunajikiza muvyuma vyosena kuhichila muli ou eji kunguhananga ngolo.” (Fwili. 4:13) Paulu asakiwile ngolo jakufuma kuli Kalunga chikumanyi halwola luze avijile omu apwile haungeji wenyi umwe waumishonali. Alumbunwinyine vaka-Ngalesha ngwenyi: “Kuviza chami chikiko changulingishile ngumyambulile mujimbu wamwaza halwola lwatete.” (Ngale. 4:13) Chochimwe nayenu nawa, kachi nge muli nakuviza, kaha munahase kwambulila vandotolo, navanase navaze vali nakumilama omu muli nakuviza. Namulinga kanawa kachi nge namwambulila vatu kana, mwomwo kakavulu veji kupwanga kumilimo omu vaka-kwambulula veji kuyanga hamembo avo.
MWAKWASHIWISHILA CHIYOYELO CHENU
12. Uno kutala liso lyenu “mumwe kaha” chalumbununa ika?
12 Yesu ambile ngwenyi: “Linongo lyamujimba likiko liso. Shikaho kachi nge liso lyove linatale mumwe kaha, [chipwe “lili nakumona kanawa,” kwinyikila chamwishi], namujimba wove wosena naumunyika zwalala.” (Mateu 6:22) Uno Yesu alumbunwine ika hakuhanjika mazu kana? Alumbunwine ngwenyi twatela kwashiwisa chiyoyelo chetu chipwe kutala liso lyetu mumwe kaha hakusaka kutesamo chuma tunalitomena kulinga nakuhona kwechelela kala chuma chituhonese. Yesu ahakile mulimo wakwambulula kulutwe mukuyoya chenyi, kaha nawa anangwile natumbaji twenyi vashishike hakuzachila Yehova nakukundwiza Wangana wenyi. Nayetu tweji kulondezezanga Yesu “hakutondatonda . . . chatete Wangana . . . waKalunga nakwoloka chenyi.”—Mateu 6:33.
13. Vyuma muka navitukafwa tushishike hamulimo wetu wakwambulula?
13 Tunahase kushishika hamulimo wetu wakwambulula hakwashiwisako chiyoyelo chetu mangana tuzachise lwola lwaluvulu hakukafwa vakwetu vatachikize Yehova nakumuzanga. * Chakutalilaho, tunahase kukehesako lwola tweji kuzatanga milimo yetu mangana tuzate jola jajivulu mumulimo wakwambulula mukachi kachalumingo. Kaha nawa tunahase kukehesako vyakulihizumuna vize vyeji kutulilanga lwola mangana tupwenga nalwola lwaluvulu lwakuzata muwande.
14. Vyuma muka valumwineko valunga napwevo vamwe mangana vazate chikuma muwande?
14 Elias uze apwa kalama napuwenyi navakiko vashiwishile chiyoyelo chavo. Elias ambile ngwenyi: “Hakavanga chatukaluhwilile kuzata upayiniya, oloze kwapwile vyuma vimwe vize twatelele kulinga mangana tuzate chikuma mumulimo wakwambulula. Ngocho twalumwineko vyuma vimwe mangana tuzatenga jola jajivulu muwande. Chakutalilaho, twakeheseleko vyakulandalanda, nakukehesako vyakulihizumuna nakulomba mukulwane wetu wamilimo atukeheseleko lwola lwakuzata mangana tuzate chikuma muwande. Kahechi chatukafwile twambululenga nachingoloshi, nakutetekela vilongesa vyaMbimbiliya vyavivulu nakwazana mumulimo wakwambulula mukachi kachalumingo kavali mukakweji. Twalivwishile kuwaha chikuma!”
MWAKUHOTWELA UHASHI WETU WAKWAMBULULA NAKUNANGULA
Kuzachisa vyuma tweji kulinangulanga hakukunguluka chamukachi kachalumingo nachitukafwa tuzovoloke hakuzata mulimo wetu wakwambulula (Talenu palangalafu 15-16) *
15-16. Kweseka namazu ahali WaChimoteu 1, 4:13, 15, tunahase kutwalaho ngachilihi kuhotola uhashi wetu hakupwa tuvaka-kwambulula? (Talenu nawa lipwata lyakwamba ngwavo, “ Vyuma Navingukafwa Kutesamo Kanawa Mulimo Wami waKwambulula.”)
15 Tunahase kutesamo kanawa mulimo wakwambulula hakuhotola uhashi wetu wakunangula. Chakutalilaho, vatu vaze vazata milimo yakukaye veji kutwalaho kulinangula mangana vapwenga nachinyingi chikuma nakuhotola uhashi wavo. Kahomu mukiko chapwa nakuli vaka-kwambulula Wangana. Twatela kutwalaho lika kulinangula mwakuhotwela uhashi wetu mumulimo wakwambulula.—Vishi. 1:5; tangenu WaChimoteu 1, 4:13, 15.
16 Uno tunahase ngachilihi kutwalaho lika kuzovoloka mumulimo wakwambulula? Tunahase kulinga ngocho hakukavangiza jindongi jize veji kutuhananga kukukunguluka chaChiyoyelo naMulimo. Kukukunguluka kana veji kutunangulanga vishina vyavilemu chikuma vyakutukafwa tuhotole uhashi wetu wakuzata muwande. Chakutalilaho, nge cheyamani ali nakuhana punga vaka-shikola vaze vanahane vihande, kaha tunahase kwivwilila vishina vize navitukafwa tuzovoloke mumulimo wakwambulula. Tunahase kuzachisa vishina kana hakala lwola luze natwambulila vatu mujimbu wamwaza. Kaha nawa tunahase kuhulisa kalama walizavu lyamulimo wamuwande mangana atukafwe chipwe kuzata nenyi muwande chipwe kuzata nandumbwetu wakulindunuka, chipwe payiniya, chipwe kalama wakujinguluka. Omu natutachikiza kanawa mwakuzachishila Vinoma vyaKuzachisa haKunangula, natulivwisa kuwaha chikuma kwambulula nakunangula.
17. Vyuma muka namunganyala kachi nge namutesamo kanawa mulimo wenu wakwambulula?
17 Chapwa hikutokwa chikuma hakuwana nge Yehova atulweza tupwenga “tuvaka-kuzachila hamwe” naikiye. (Koli. 1, 3:9) Kachi nge ‘natukekesa tumone vyuma vyavilemu’ nakuhaka mulimo wakwambulula kulutwe, kaha ‘natuzachila Yehova nakuwahilila.’ (Fwili. 1:10; Samu 100:2) Hakuwana nge mwapwa muvaka-kuzachila Kalunga, mwatela kufwelela ngwenu Kalunga mwamihana ngolo mangana mutesemo kanawa mulimo wakwambulula chamokomoko naukalu muli nakumona. (Koli. 2, 4:1, 7; 6:4) Numba nge mweji kuzatanga chikuma mumulimo wakwambulula chipwe chindende oloze munahase kupwa ‘vakuwahilila’ kachi nge namuzatanga namwono wenu wosena. (Ngale. 6:4) Shikaho nge namutesangamo kanawa mulimo wenu, kaha namusolola ngwenu mwazanga chikuma Yehova navakwenu vatu. ‘Hakulinga ngocho namulilwila enu vavene nakulwila vaze navamivwilila nawa.’—Chimo. 1, 4:16.
MWASO 58 Kutondatonda Masepa Vaze Vasaka Kuunda
^ par. 5 Tuvosena vatuhana mulimo wakwambulula mujimbu wamwaza waWangana nakunangula vatu vapwenga tumbaji. Muchihande chino natushimutwila omu tunahase kutesamo mulimo wetu wakwambulula chamokomoko naukalu tuli nakuhitamo. Natushimutwila nawa omu tunahase kupwa vaka-kwambulula vatwima nakupwa vakuwahilila hakuzata mulimo kana.
^ par. 4 MAZU VANALUMBUNUNA: Mumulimo wetu wakuzachila Yehova mwaliweza kwambulula nakunangula, kutunga nakutungulula vihela vyakulemesela Kalunga, nakuzata mulimo wakukafwa vaze vali muukalu wakulijila.—Koli. 2, 5:18, 19; 8:4.
^ par. 13 Talenu jijila vasoneka mulipwata lyakwamba ngwavo “Mwakwashiwishila Chiyoyelo Chenu,” muKaposhi Kakutalila kaJuly 2016, li. 10.
^ par. 62 MAZU AKULUMBUNUNA MUVWIMBIMBI: Ndumbwetu wapwevo ali nakulinga ungeji wakukindulukilako hakukunguluka chamukachi kachalumingo. Kufumaho, omu cheyamani mwahana punga ou ndumbwetu mwaputuka kusoneka vishina mumbuloshuwa yenyi yaKunangulanga. Kaha kuheta kusongo yachalumingo himwazachisa vishina kana mumulimo wakwambulula.