1-2. Mwomwo ika Yesu alyonyingilile?

YESU alyonyingile chikuma halikumbi lyamakumishilo shimbu kanda afwenga, mwomwo halikumbi kana hakiko vamujihile mujila yayipi kumalunga vaupapwoki. Oloze kwapwile nawa vyuma vyavivulu vize vyamulingishile alyonyinge. Chatete, azangile chikuma Ise, kaha asakile kumwivwisa kuwaha. Yesu atachikijile ngwenyi nge mwatwalaho kupwa wakushishika muukalu uze apwile nakuhitamo, kaha mwahakwila lijina lyaYehova. Yesu nawa azangile chikuma vatu, shikaho atachikijile ngwenyi nge mwashishika lika kuli Yehova palanga nakukufwa chenyi, kaha mwakalingisa vatu vakapwe nalutalililo lwakukayoya haya myaka yosena.

² Numba tuhu Yesu apwile nakuhita muukalu, oloze apwile lika wakuunda. Alwezele vaposetolo jenyi ngwenyi “nangumihana vene kuunda chami.” (Yowa. 14:27) Yesu apwile “[na]kuunda chaKalunga,” kulumbununa nge kalizakaminyine hachuma numba chimweko mwomwo yakupwa nausepa naYehova. Kuunda kana chikiko chamukafwile ahone kulizakamina.—Fwili. 4:6, 7.

3. Vyuma muka natushimutwila muchihande chino?

³ Twatachikiza ngwetu etu vatu katweshi kukamona vihuli ngana vize amwene Yesuko, oloze hakuwana nge twapwa tuvaka-kumukavangiza ngocho nayetu natuhitanga muvyeseko. (Mateu 16:24, 25; Yowa. 15:20) Shimbu jimwe tunahase kulyonyinga ngana muze alyonyingile Yesu. Uno tunahase kuhonesa ngachilihi kulizakamina mangana tupwenga lika vakuunda muvishinganyeka? Tukekesenu havyuma vitatu vize alingile Yesu omu azachilenga mulimo wenyi hano hamavu nomu tunahase kumulondezeza nge tuli nakuhita muvyeseko.

4. Kweseka namazu ahali Wavaka-Tesolonyika 1, 5:17, hanenu vyakutalilaho vize vyasolola nge Yesu alombele mapapa kakavulu halikumbi lyamakumishilo shimbu kanda afwenga.

⁴ Tangenu Wavaka-Tesolonyika 1, 5:17. Yesu alombele mapapa kakavulu halikumbi lyamakumishilo mukuyoya chenyi hano hamavu. Chakutalilaho, omu apwile nakulweza tumbaji twenyi mwakulingila chilika chakwanuka kufwa chenyi, alombele shimbu kanda ahane mbolo navinyo. (Koli. 1, 11:23-25) Kaha nawa shimbu kanda vafume kuchihela kuze valingililile Paseka alombele natumbaji twenyi. (Yowa. 17:1-26) Omu ahetele kuNgetesemane natumbaji twenyi alombele mapapa kakavulu ufuku vene uze. (Mateu 26:36-39, 42, 44) Kaha nawa omu apwile hachitondo chakumuyanjishila shimbu kanda afwenga alombele. (Luka 23:46) Yesu alombele kuli Yehova havyuma vyavivulu halikumbi kana.

5. Chuma muka chalingishile vaposetolo vahone kupwa vakumika?

⁵ Chuma chimwe chachilemu chakafwile chikuma Yesu mangana omike muvyeseko shina kupendamina chikuma hali Ise kuhichila mukulomba. Oloze vaposetolo jenyi vahonene kulomba naluzema haufuku kana. Ngocho omu lwola lwacheseko lwahetele, vahonene kupwa vakumika. (Mateu 26:40, 41, 43, 45, 56) Nayetu nawa, omu natupwanga muvyeseko twatela ‘kulombanga lika’ ngana muze alingile Yesu numba tuhase kupwa lika vakushishika. Jino vyuma muka twatela kulombanga?

6. Uno lufwelelo nalutukafwa ngachilihi tupwenganga vakuunda?

⁶ Twatela kulomba Yehova “[a]tukafwe tupwenga nalufwelelo lwalunene.” (Luka 17:5; Yowa. 14:1) Satana eji kwesekanga vosena vaze veji kukavangizanga Yesu, shikaho twatela kupwa nalufwelelo. (Luka 22:31) Uno  lufwelelo nalutukafwa ngachilihi tupwenga vakuunda chamokomoko naukalu wosena uze natumona mukuyoya? Kachi nge tunazate nangolo jetu josena mangana tukumise ukalu tuli nawo oloze kawakumineko, kaha lufwelelo nalutukafwa tuhone kulizakamina mwomwo tunatachikiza ngwetu Yehova mwakakumisa ukalu kana halwola lwakutamo. Kutachikiza ngwetu Yehova ikiye kaha nahase kukumisa ukalu wetu wosena kuhambakana etu vavene, nachitukafwa tupwenga vakuunda muvishinganyeka namumichima yetu.—Petu. 1, 5:6, 7.

7. Uno munalinangula ika kumazu ahanjikile Robert?

⁷ Kulomba cheji kutukafwanga tupwenga vakuunda muvishinganyeka chamokomoko nakala ukalu natumona. Achishinganyekenu hachakutalilaho chaRobert uze ali namyaka yakusemuka yamuji 80, uze nawa apwa kalama muchikungulwilo. Ambile ngwenyi: “Mazu atwama hali Wavaka-Fwilipi 4:6, 7, anangukafwe ngulipike navyeseko vyakulisezaseza mukuyoya chami. Ngunalipikinga naukalu wakuhona jimbongo, kaha lwola lumwe kangwazachilenga cheka mulimo waulama muchikungulwiloko.” Uno chuma muka chakafwile Robert apwenga lika wakuunda? Ambile ngwenyi: “Nge ngunaputuka kulizakamina ngweji kulombanga hahaze vene.” Ambile nawa ngwenyi: “Ngunamono jino ngwami kulombanga chikuma chinangukafwe ngupwenga wakuunda chikuma.”

8. Kweseka namazu ahali Yowano 8:29, chuma muka chikwavo chalingishile Yesu apwenga wakuunda?

⁸ Tangenu Yowano 8:29. Yesu apwile lika wakuunda nahalwola vapwile nakumuyanjisa, mwomwo atachikijile ngwenyi apwile nakwivwisa  Ise kuwaha. Atwalileho lika kwononoka Yehova numba tuhu chapwile chachikalu kulinga ngocho. Yesu azangile chikuma Yehova, ngocho kuzachila Ise chikiko chapwile chachilemu chikuma mukuyoya chenyi. Shimbu kanda ezanga hano hamavu, Yesu apwile “kuluwa muka-kuzata” waKalunga. (Vishi. 8:30) Kahomu apwile hano hamavu azachilenga natwima hakunangula vatu vatachikize Ise. (Mateu 6:9; Yowa. 5:17) Yesu apwile wakuwahilila chikuma mwomwo yakuzata mulimo kana.—Yowa. 4:34-36.

9. Tunahase kupwa ngachilihi vakuunda mumuchima nge natuhundangana chikuma mumulimo wakwambulula?

⁹ Tunahase kulondezeza Yesu hakwononoka Yehova “[nakupwa] navyuma vyavivulu vyakuzata mumulimo waMwata” shimbu yosena. (Koli. 1, 15:58) Shikaho nge ‘natuhundangananga’ chikuma mumulimo wakwambulula, kaha nachitukafwa tuhone kulizakaminanga chikuma. (Vili. 18:5) Chakutalilaho, vatu vaze tweji kuwananga muwande veji kulitalasananga naukalu wakulisezaseza kuhambakana nayetu. Oloze omu veji kulinangulanga vyaYehova nakuzachisa vyuma veji kulinangulanga, veji kwalumunanga chiyoyelo chavo nakupwa vakuwahilila. Kahomu tweji kumonanga vatu kana vanawahilila cheji kutulingisanga tufwelele chikupu ngwetu Yehova mwatuzakama. Kaha kufwelela chuma kana cheji kutulingisanga tupwenga vakuunda. Ndumbwetu umwe wapwevo uze nalipikinga naukalu wakuhomba uze nawa alimwenenga kupwa wamokomoko etavilile chishina tunavuluka. Ambile ngwenyi: “Omu ngweji kuzatanga chikuma mumulimo wakwambulula ngweji kupwanga wakuwahilila mwomwo kangweshi kulizakamina chikumako. Mwomwo nge nguli mumulimo wakwambulula, ngweji kwivwanga nge ngunapandama chikuma kuli Yehova.”

10. Uno munalinangula ika kumazu ahanjikile Brenda?

¹⁰ Tutalenu cheka chakutalilaho chandumbwetu Brenda. Ou ndumbwetu namwanenyi vaviza musongo waunene chikuma uze wapwa waukalu kuka. Brenda eji kutambukilanga muchitwamo chakushindumuna, kaha nawa ngolo jeji kumukumanga mwomwo yamusongo kana. Shimbu jimwe eji kwambululanga kuzuvo hizuvo, oloze kakavulu eji kwambululanga hakusonekela vatu mikanda. Eji kwambanga ngwenyi: “Omu ngwatachikijile ngwami yami kukayoya kuvanga kano kaye kaSatana kanakumu, changukafwile nguhake mangana kumulimo wakwambulula muchishishisa chakushinganyeka hamusongo wami. Kwambulula mujimbu cheji kungukafwanga nguhone kushinganyeka haukalu wami. Oloze ngweji kushinganyekanga kaha havatu vaze ngweji kwambulilanga mungalila yetu. Kaha nawa nge nguli nakwambulula cheji kungukafwanga ngushinganyeke halushiko ngwatalilila kulutwe.”

11-13. (a) Uno vaposetolo navatu veka vasolwele ngachilihi hatoma ngwavo vapwile masepa jaYesu? (b) Uno Yesu evwile ngachilihi hakumukafwa kuli masepa jenyi?

¹¹ Omu Yesu apwile nakuzata mulimo wenyi wakwambulula, vaposetolo jenyi vakushishika vakiko vapwile masepa jenyi vamwenemwene. Vapwile masepa vaze vavuluka muMbimbiliya ngwavo “kwali sepa uze mwalipanjika nasepa lyenyi kuhambakana ndumbwenyi.” (Vishi. 18:24) Yesu azangile chikuma ava masepa jenyi nakuvamona kupwa vavalemu. Halwola apwile nakuzata mulimo wenyi wakwambulula kakwapwile ndumbwenyi amufweleleleko. (Yowa. 7:3-5) Shimbu yimwe vausoko wenyi vashinganyekele ngwavo nazaluka. (Mako 3:21) Echi chikiko chalingishile Yesu ahanjike kuli vaposetolo jenyi vakushishika naufuku shimbu kanda vamujihe ngwenyi: “Enu yenu munalinjilila kuli ami muvyeseko vyami.”—Luka 22:28.

¹² Shimbu jimwe navaposetolo jenyi valingilenga vyuma vimwe vize vyevwishilenga Yesu kupihya, oloze ikiye atalile kaha halufwelelo vapwile nalwo keshi hatutenga twavoko. (Mateu 26:40; Mako 10:13, 14; Yowa. 6:66-69) Haufuku  wamakumishilo shimbu kanda vamujihe, Yesu alwezele ava malunga vakushishika ngwenyi: “Ami ngunamivuluka ngwami, mumasepa, mwomwo ngunamilweze vyosena vize ngwevwa kuli Tata.” (Yowa. 15:15) Chakuzeneka kukakasana, Yesu vamukolezezelenga chikuma kuli ava masepa jenyi. Yesu awahilililenga chikuma omu vamukundwijilenga mumulimo wakwambulula.—Luka 10:17, 21.

¹³ Yesu kapwile kaha navaposetoloko, oloze apwile namasepa veka vamalunga namapwevo vaze vamukundwijilenga mumulimo wakwambulula namumilimo yeka. Vamwe vamusanyikilenga kujizuvo javo mangana vakalye hamwe vyakulya. (Luka 10:38-42; Yowa. 12:1, 2) Vakwavo vatambukilenga hamwe nenyi nakuzachisa vyuma vyavo hakumuzakama. (Luka 8:3) Yesu apwilenga namasepa vamwenemwene mwomwo naikiye apwilenga mutu wamwenemwene. Avalingililenga vyuma vyamwaza, oloze kasakile ngwenyi naikiye vamulingile vyuma vize kaveshi kuhasa kulingako. Yesu apwile wakukupuka, oloze asakwilililenga chikuma hakumukafwa kuli masepa jenyi vakuhona kukupuka. Twafwelela chikupu ngwetu ava masepa vamukafwile apwenga wakuunda.

14-15. Tunahase kupwa ngachilihi namasepa vamwenemwene, kaha vanahase kutukafwa ngachilihi?

¹⁴ Masepa vamwenemwene navatukafwa tupwenga lika vakushishika kuli Yehova. Kaha nawa nge tuli nakusaka kupwa namasepa vamwenemwene, kuvanga nayetu tupwenga vamwenemwene. (Mateu 7:12) Chakutalilaho, Mbimbiliya yatukolezeza tuzachisenga lwola lwetu nangolo jetu hakukafwa vakwetu chikumanyi vaze ‘vanakalikiza.’ (Efwe. 4:28) Munahase kushinganyekako ndumbwenu umwe muchikungulwilo uze munahase kukafwa. Kaha nawa nge ndumbwenu  wakashinakaji chipwe uze atwama muluuta mwasaka kulandako vyuma vimwe kuchitanda, kaha munahase kumuyilako. Munahase nawa kuhanako vyakulya tanga yize yinakalikiza. Kachi nge mwejiva mwakuzachishila keyala yetu ya jw.org^® naChisete cha JW, kaha munahase kukafwako vandumbwetu muchikungulwilo vejive mwakuvizachishila mangana vanganyale kushipilitu. Kachi nge natukafwanga chikuma vakwetu, kaha tunahase kupwa vakuwahilila.—Vili. 20:35.

¹⁵ Masepa vaze tweji kulikatanga navo vanahase kutuzakama nge tuli muukalu, nakutukafwa tupwenga vakuunda. Ngana muze Elihu evwililile omu Yopa apwile nakuhanjika haukalu wenyi, namasepa jetu navatukafwa hakwivwilila kanawa omu natuvalweza ukalu wetu. (Yopa 32:4) Katwatela kufwelela ngwetu vakwetu navatulweza vyakulingako, oloze twatela kaha kwivwilila kujindongi jamuMbimbiliya navatulweza nakulisakwila etu vavene vyakulinga. (Vishi. 15:22) Mwangana Ndavichi naikiye etavilile kumukafwa kuli masepa jenyi, shikaho nayetu nawa twatela kwitavila vakwetu vatukafwe. (Samwe. 2, 17:27-29) Chikupu vene masepa vamwenemwene vapwa wana wakufuma kuli Yehova.—Yako. 1:17.

16. Kweseka namazu ahali Wavaka-Fwilipi 4:6, 7, tunahase kupwa ngachilihi vakuunda? Lumbununenu.

¹⁶ Tangenu Wavaka-Fwilipi 4:6, 7. Mwomwo ika Yehova atulwezela ngwenyi mwatuhana kuunda “kuhichila muli Kulishitu Yesu”? Mwomwo tunahase kupwa nakuunda chamwenemwene nge natufwelela Yesu nakutachikiza kanawa mulimo atwama nawo muvyuma ajina Kalunga. Chakutalilaho, jishili jetu veji kutukonekelangajo kuhichila mundando yakusokola yaYesu. (Yowa. 1, 2:12) Kutachikiza chuma kana cheji kutuvendejekanga chikuma. Kaha nawa Yesu hakupwa Mwangana waWangana waKalunga mwakakumisa ukalu wosena tuli nakuhitamo mwomwo yaSatana nakaye kenyi. (Isa. 65:17; Yowa. 1, 3:8; Kuso. 21:3, 4) Chikupu vene chuma kana chatukafwa tutalilile vyuma vyamwaza kulutwe. Numba tuhu Yesu atuhana mulimo waukalu, oloze ali nakutukafwanga omu tuli nakuuzata mumakumbi ano akukuminyina. (Mateu 28:19, 20) Echi cheji kutujikijisanga chikuma, nakupwa vakumika nakupwa nalutalililo nakuunda mumuchima.

17. (a) Uno vaka-Kulishitu vanahase kupwa ngachilihi vakuunda? (b) Chisoneka chaYowano 16:33, nachitukafwa tulinge vyuma muka?

¹⁷ Jino munahase kupwa ngachilihi vakuunda nge muli nakuhita muvyeseko? Munahase kupwa vakuunda kachi nge namulondezeza vyuma alingile Yesu. Chatete, mwatela kulombanga naluzema. Chamuchivali, mwatela kwononokanga Yehova nakwambululanga lika natwima numba vene nge vyuma vinakaluhwa. Chamuchitatu, itavilenunga masepa jenu vamikafwe omu namupwa muukalu. Kachi nge namulinga vyuma kana, kaha kuunda chaKalunga nachikinga michima navishinganyeka vyenu. Kaha nayenu munahase kufungulula kala cheseko ngana muze alingile Yesu.—Tangenu Yowano 16:33.