MUMAKUMBI aPaulu kakwapwilenga mato akumbata vatu kahako. Shikaho nge mutu ali nakusaka kuya ungeji, avangililenga kuhulisa vakwavo vamulweze numba nge vanevuko wato wavaka-kusekasana vaze vali nakuya kuze ali nakusaka kuya kaha nawa vaze vali nakusaka kumbatako navatu. (Vili. 21:2, 3) Numba nge uze wato kaweshi nakuya kuchihela ali nakuyako, oloze omu wato wemanyinenga muvyau, asulukilenga nakuvandamina wato weka uze wayilenga kuchihela apwile nakuya.—Vili. 27:1-6.

Kwapwilenga jingonde jimwe kaha jize vatu vazaukilenga kalungalwiji mumato hakuya kujingalila jeka, kaha nawa kavanonekelenga lwola chipwe makumbi akutela kukatukako oloze vakatukilenga kala likumbi. Vaka-kutambukisa mato valangishilenga kukatuka ungeji wavo kachi nge hakalungalwiji hali makimba chikuma, chipwe nge vanashinganyeka ngwavo navengila muponde mwomwo pamo kuli peho yayinene chipwe nge vanamono wato weka kungenge unalyenyeka. Jino nge vanamono ngwavo peho yili kanawa, hakiko vasunukilenga jino ungeji wavo. Nge mutu nawane wato, kaha ambachilenga chiteli chenyi nakuya kuze vasulikilenga wato nakuvandamina jino mutambi wakuvalweza ngwavo kalinwomu wato usunuke.

Mutu alinangula vyakushikulu Lionel Casson ambile ngwenyi: “Munganda yaLoma vatu vachiwanyine kupwa chachashi kuwana wato nge vali nakusaka kuya ungeji, ngocho kavayanjilengako. Chau chakusulikila wato chapwililile hamawilo aKalwiji Tiber. Kaha mumbaka yaOstia mwapwile chihela chamwaza chize chapwile najiofesi jajivulu. Jiofesi jajivulu japwilenga javakulwane vemanyinyineko chau hichau. Chakutalilaho, vaka-kutambukisa wato wakuNarbonne [vanakuvuluka makumbi ano ngwavo France] vapwile naofesi yimwe, vaze vatambukishilenga wakuCarthage [vanakuvuluka makumbi ano ngwavo Tunisia] navakiko vapwile naofesi yimwe, . . . Kuhakilako namafuchi akwavo. Shikaho kala mutu uze asakilenga kuya ungeji ayilenga kujiofesi kana nakutala vihela eji kuhitanga aze mato mangana awane wato nahase kunyinamo hakuya kungalila ali nakuya.”

Vatu valivwishilenga kuwaha kutambuka ungeji muwato mwomwo vahetelenga washi, chipwe ngocho kutambuka muwato nachikiko chapwilenga naponde. Paulu avombelenga mapapa kakavulu omu ayilenga nawato muungeji wenyi waumishonali.—Koli. 2, 11:25.