Winston, tulwezeko omu unatondotondonga Kalunga.

Ngwakolelele mutanga yize kayapwile yavaka-kwitavako, kaha twatwaminenga hafwamu mumbaka yaQueensland, mulifuchi lyaAustralia. Hakuwana nge fwamu yetu yapwililile kwakusuku navatu, ngocho kangwatachikijile vatu vavavulu chikumako shina vatanga jami kaha. Jino omu ngwapwile namyaka yakusemuka 12, ngwaputukile kutondatonda Kalunga. Ngwalombele kuli Kalunga, nakumulweza angukafwe ngumutachikize kanawa. Mukuhita chalwola ngwawanyine milimo mumbaka yaAdelaide kuSouth Australia, ngocho ngwafumine jino hafwamu. Omu ngwapwile namyaka yakusemuka 21, ngwayile nakuhwimako mumbaka yaSydney, kaha ngwakaliwanyine naPamela uze angulwezele ngwenyi kwapwile lizavu lyavaka-kwitava vavulukilenga ngwavo British-Israel religious movement. Ava vatu valivulukilenga ngwavo vafuma kumuyachi wavaIsalele uze wajimbalile. Valivulukilenga ngwavo vafumine kumiyachi likumi yavalsalele vaze vapwile muwangana wakunote vaze vayile muufunge mulikulukaji lyamyaka lyakusokesa 8 B.C.E. Kahomu ngwakindulukile kuAdelaide, ngwashimutwilile chihande kana namukwetu mutwazachililenga hamwe uze apwile nakulinangula Mbimbiliya naVinjiho jaYehova. Omu twakumishile kushimutwila hajola jajindende kutalisa kuvyuma vafwelela Vinjiho jaYehova, ngwamwene jino ngwami Kalunga ali nakukumbulula kulomba chami chize ngwalombele omu ngwapwile ngukanyike. Ngocho ngwaputukile kulinangula muchano hali Tengi yami nahaWangana wenyi. Ngwawanyine jino ‘pela yandando yayinene chikuma.’—Mateu 13:45, 46.

Pam, nayove waputukile kutondatonda yize pela omu wapwile ukanyike, uno wayiwanyine ngachilihi?

Ngwasemukilile mumbaka yaCoffs Harbour, mulifuchi lyaNew South Wales. Visemi jami navakaka jami vafwelelele mukunangula chavaBritish-Israel movement. Ami nasongo yami walunga, nayayami  wapwevo navasonyi jami vatunangwilenga ngwavo, Kalunga amwenenga vatu vafuma kuchisemunwino chavatu vakuBritain kupwa vavalemu. Kangwakunyukile navyuma twafweleleleko, echi changulingishile ngulivwe nge kangwapandamine kuli Kalungako. Jino omu ngwapwile namyaka yakusemuka 14, ngwaputukile kuya kujichachi jakulisezaseza kuhakilako vene nachachi yaAnglican, naBaptist, naSeventh-day Adventist. Oloze jichachi josena eji kajangukafwile ngutachikize Kalungako.

Mukuhita chalwola tanga yetu yalukilile kumbaka yaSydney kuze jino ngwakaliwanyine naWinston. Ngana muze nahanjika, vyuma vyakupandama kukwitava twashimutwilile vikiko vyamulingishile aputuke kulinangula naVinjiho jaYehova. Hakuwana nge twapwile nakulisesembwa, ngocho mikanda angusonekelelenga asonekelengamo visoneka vyamuMbimbiliya vyavivulu. Kuhanjika muchano, hakavanga ngwevwilenga kupihya hakuwana nge mikanda yosena angusonekelelenga yazalile navisoneka. Oloze mukuhita chalwola ngwaputukile kumona jino ngwami, pamo vyuma apwile nakusoneka vyapwile himuchano wakutalisa kuli Kalunga.

Kuheta mu 1962, ngwayile nakutwama mumbaka yaAdelaide mangana ngupwenga hakamwihi naWinston. Alivwasanyine naThomas napuwenyi Janice Sloman vaze vapwile Vinjiho jaYehova, vaze nawa vazachililile umishonali muPapua New Guinea, mangana ngutwamenga navo. Halwola kana ngwapwile namyaka yakusemuka 18, ava vatu vangusolwelelele likoji lyakulipwila chiyovo, kaha vangukafwile chikuma kushipilitu. Ngocho ngwaputukile kulinangula Mazu aKalunga, kaha ngwakunyukile jino ngwami chikupu vene ngunawane muchano. Omu twalimbachile, hahaze vene twaputukile kuzachila Kalunga. Numba tuhu tunamononga vyeseko vyakulisezaseza, oloze kuzata milimo yaKalunga chinatukafwe tutwaleho lika kumona kulema chapela yandando yayinene yize twawanyine.

Winston, tulwezeko omu waputukile kuzachila Yehova.

Nakushimbula chiku kufuma haze twalimbachile, Yehova aputukile kutuhana milimo yakulipwila muliuka lyenyi. (Koli. 1, 16:9) Mulimo watete shina uze atulwezele ndumbu Jack Porter kalama wakujinguluka uze atambukililenga chikungulwilo chetu. (Uze jino nguli nakuzachila nenyi hamwe muKomiti yaMutango wamuAustralasia.) Jack napuwenyi Roslyn vatukolezezele mangana tuputuke kuzata upayiniya washimbu yosena. Twazachile upayiniya hamyaka 5, kaha twalivwishile kuwaha chikuma mulimo kana. Omu ngwapwile namyaka yakusemuka 29, yami napuwami Pam vatulwezele tuputuke mulimo wakutambwojoka. Twazachilililenga kumatungu akuSouth Pacific, jingalila jize jino vaputukile kutala kumutango waFiji. Matungu kana shina American Samoa, naSamoa, naKiribati, naNauru, naNiue, naTokelau, naTonga, naTuvalu naVanuatu.

Hamyaka kana yize, vatu vahamatungu kana kavapwile vakukasunuka naVinjiho jaYehovako, shikaho lwola lwosena twatelelele kupwa vakuvanguluka. (Mateu 10:16) Vikungulwilo vimwe kavyapwile navaka-kwambulula vavavuluko, ngocho kavahashile kututondela kwakutwamako. Shikaho twayilenga nakulomba zuvo yakusavala kuvatu vamuze mungalila, vatu kana vapwilenga valikoji vatuhanyinenga zuvo yakusavala shimbu yosena.

Winston, chasoloka nge wazanga mulimo wakwalumuna, chuma muka chakulingishile uzange mulimo kana?

Halwola kana vandumbwetu vahalitungu lyaTonga vapwile kaha najitalakiti jajindende, natumikanda mulilimi lyaTongan. Kaha hakuzata mulimo wakwambulula vazachishilenga mukanda wakwamba ngwavo Mucano Uli Nakutetekela Kumwono Wamyaka Yosena uze wapwilenga muChingeleshi. Shikaho, omu twapwile kushikola yavakulwane yize yambachile vyalumingo viwana, tulama vatatu vamuTonga vaze kavahanjikilenga kanawa Chingeleshiko, vetavilile kwalumuna mukanda waMucano mulilimi lyaTongan. Kahomu twawalumwinenga Pam ikiye asonekelenga, kaha twautumine kumutango kuUnited States mangana vakaupulite. Mulimo kana twauzachile kafwe havyalumingo 8. Numba tuhu mukanda kana katwawalumwine kanawako, oloze wakafwile vatu vahanjika lilimi lyaTongan valinangule muchano. Ami naPam katwapwa vaka-kwalumunako, oloze hakukafwa kuzata mumulimo kana chatulingishile tuuzange chikuma.

Pam, uno chiyoyelo chahamatungu chalihandununa ngachilihi nachiyoyelo chakuAustralia?

Chiyoyelo kana chalihandunwine chikuma. Kujingalila jimwe twayilenga kwapwilenga kuzuma chikuma, natungenengene chikuma, navatumbi, kaha nawa twavijilenga, shimbu jimwe nawa vyakulya  vyapwilenga vyavindende. Numba tuhu twamwenenga ukalu kana oloze hakumbi hakumbi twalivwishilenga kuwaha kutala kalungalwiji mukazuvo ketu kaze kapwile kakutunga kaha kwilu oloze kwishi kahululu. Shimbu jimwe naufuku kakweji amunyikilenga chikuma, kaha omu kumunyika kana chalivetelenga hameya chalingishile tumone namavale. Vyuma kanevi vyatulingishile tushinganyeke nakulomba, kaha nawa vyatukafwilenga tushinganyeke havyuma vyamwaza keshi haukalu twamwenengako.

Twaputukile kuzanga vanyike mwomwo vatwivwishilenga kuwaha, kaha nawa vasakilenga kutachikiza vyavivulu hali etu hakuwana nge twapwile tuvindele kaha nawa tuvamwiza. Omu twapwile nakuya kuNiue kanyike umwe walunga akwachile livoko lyaWinston nakwamba ngwenyi, “Ngunazange mangona ove.” Ou kanyike ahanjikile ngocho mwomwo kanda amonengaho lyehi mutu waungona shikaho ahanjikilile ngwenyi mangona mwomwo kejivile lizu livene lyakuzachisako.

Twevwilenga kumuchima kukola hakumona omu vatu vapwilenga nakuyanda. Jingalila kana japwilenga jamwaza chikuma, oloze kavapwile navipatela vyavineneko, kaha nawa chapwile chachikalu kuwana meya akunwa. Chipwe ngocho vandumbwetu vapwilenga vakuwahilila. Vamwene chiyoyelo kana kupwa chamwaza. Vapwile vakuwahilila kutwama hamwe najitanga javo, kaha nawa vapwile nachihela chize valiwanyinyinenga mangana valemese Yehova Kalunga kavo. Chakutalilaho chavo chatukafwile tufwile kuhaka kulutwe vyuma vyavilemu nakwashiwisako chiyoyelo chetu.

Pam, shimbu jimwe waliswichilililenga meya nakuwahisa nawa vyakulya chuma chize kawejililile kulingako, jino wahashilenga ngachilihi?

Ngwahashilenga kulinga vyuma kana mwomwo tata angunangwilevyo omu ngwapwile ngukanyike. Angunangwile vyuma vyavivulu vyakufwana nge kuwika kakahya nakutelekelaho, namwakuyoyela kachi nge vyakulya vinakehe. Omu twatambukilile chikungulwilo chakuKiribati twasavalilenga muzuvo yamwila yakutunga namahongo kwishi, kaha mumavu mwapwile mwakuumba. Ngwafulile wina muzuvo nakuwikamo kakahya kuzachisa mitango yamavale haze ngwatelekelelenga vyakulya. Hakuswita meya, twemanyinenga mumukana namapwevo vamungalila kana. Vazachishilenga mutondo wausuku jimita jivali kuze vakashilenga mukole kwijiva nge chimizo. Kaha muchishishisa chakukashilila ulovo kuze kusongo yamukole, vakiko vakashilileko mungomo. Kachi nge mutu lwola lwenyi lunahete lwakuswita meya, kaha azezumwinyinenga mukole mumeya nakuupinjisapinjisa mangana mungomo wingile wosena mumeya nakuputuka kukoka. Hakavanga ngwamwene ngwami chachashi, jino omu lwola lwami lwahetele lwakuswita hakiko jino ngwamwene ngwami chachikalu. Ngwengishile uze mungomo mapapa kakavulu oloze wakuminyinenga kaha helu kawajiminyinyinenga mangana uswite meyako. Ngocho vakwetu vangusehele, jino omu valingile vosena vanakumisa kuseha, pwevo umwe alisuwile kunguswichilako. Vatu kana vangukafwilenga chikuma kaha nawa vapwile valikoji.

Muvosena mwalivwishilenga kuwaha kuzachila hamatungu, kutala munahase kutulwezako vyuma vyamwaza mwalivwishilenga tahi?

Winston: Chambachile lwola numba twijilile visemwa vimwe. Chakutalilaho, omu vandumbwetu vatuwahishililenga vyakulya, vatuhanyinenga vyakulya vyosena vize vawahishilenga. Hakavanga katwatachikijile ngwetu twatelele kuvaselaho vaveneko. Shikaho twalilenga vyakulya vyosena vatuhanyinenga. Jino omu twatachikijile mwayile chisemwa chavo twaputukilenga jino kuvaselaho. Chamokomoko navyuma twalimbenjelenga, vandumbwetu vatwivwishishilenga. Vevwilenga kuwaha kachi nge lwola lwakutambukila chikungulwilo chavo lunahete. Kakwapwile vandumbwetu vakumafuchi eka vatachikijile kuli ava vandumbwetu vahamatungu kanako shina yami kaha napuwami.

Kaha nawa kuvatambukila chahanyinenga unjiho wamwenemwene mujingalila kana. Vatu vamujingalila kana vashinganyekelenga ngwavo vandumbwetu vahamatungu kana vakiko kaha vatungile eli liuka. Shikaho omu twatambukililenga ava vandumbwetu, vatu vamujingalila kana vamwene jino ngwavo liuka kana lyapwa lyakulongesa kanawa ngocho chavevwishile kuwaha chikuma.

Pam: Chuma chimwe chachilemu chikuma ngweji kwanukanga shina chize chasolokele omu twayile kuKiribati, kuze kwapwile chikungulwilo chapwile navaka-kwambulula vavandende kaha. Kuchikungulwilo kana kwapwile kalama umwe kaha walijina lyaItinikai Matera, uze atuzakamine chikuma. Likumbi limwe ejile nachizuma muze mwapwile liulu limwe kaha. Kaha ambile ngwenyi, “ngunaminehelako liulu  mulyenga.” Halwola kana twalikomokelele chikuma kumona liulu lyakasumbi mwomwo chapwile chachikalu kuliwana. Chuma alingile chatukwachile chikuma kumuchima.

Pam, mukuhita chamyaka wapihishile lijimo, jino chuma muka chakukafwile ulipike naukalu kana?

Mu 1973 ngwemichile, omu twapwile kuSouth Pacific. Ngocho twashinganyekele kukinduluka kuAustralia, kahomu mwahichile tukweji vawana lijimo lyapihile. Chuma kana chatukolesele chikuma kumuchima, kaha ushona wambachile myaka yayivulu. Kukola kana chakumine omu ngwatangile Kaposhi Kakutalila waApril 15, 2009 uze twatambwile. MuKaposhi kana mwapwile chihande chakwamba ngwavo, “Uno nge mwana nafu shimbu kanda asemuke, kutala mwakasanguka tahi?” hamutwe wakwamba ngwavo, “Vihula Vyakufuma Kuli Vaka-Kutanga.” Chihande kana chatufwelelesele ngwacho, Yehova ikiye atachikiza vyuma vyosena mwomwo ikiye eji kulinganga vyuma vyakwoloka lwola lwosena. Yehova mwakafumisako kukola chosena tweji kwivwanga mwomwo yakutwama mukaye kaSatana omu mwakalweza Mwanenyi mangana ‘akenyeke milimo yaLiyavolo.’ (Yowa. 1, 3:8) Chihande kana nawa chatukafwile tumone “pela” twatwama nayo etu vatu jaYehova kupwa yayilemu chikuma. Hakuwana nge twatwama nalutalililo ngocho cheji kutuvendejekanga chikuma numba tuhu tuli nakuhita muukalu wakulisezaseza.

Omu lyapihile lijimo, twaputukile cheka kuzata mulimo washimbu yosena. Twazachile hatukweji vamwe haMbetele yamuAustralia, kaha kufumaho twaputukile cheka mulimo wakutambwojoka. Ngocho twazachilile mungalila yakumembo, muNew South Wales naSydney, hamyaka yiwana. Kuheta mu 1981 vatusanyikile tuyenga nakukazachila kumutango waAustralia kweseka nomu vauvulukilenga halwola kana, kaha hakiko tuli nakuzachila nayino shimbu.

Winston, uno vyuma wahichilemo omu wapwile kulitungu lyaSouth Pacific vinakukafwe hakuzata mulimo wove hakuwana nge watwama muKomiti yaMutango waAustralasia tahi?

Eyo vinangukafwe chikuma. Chatete, mutango wamuAustralia vauhanyine mulimo wakutala matungu amuAmerica Samoa naSamoa. Kufumaho, mutango waNew Zealand vaufutakanyine namutango waAustralia. Shikaho makumbi ano, mutango waAustralasia uli nakutala milimo yamuAustralia, naAmerican Samoa naSamoa, naCook Islands, naNew Zealand, naNiue, naTimor-Leste, naTokelau, naTonga. Kaha mafuchi amwe hali awa ngunalave ngunawatambukilanga hakwimanyinako mutango. Vyuma ngwahichilemo omu ngwazachilenga navaze vandumbwami vakushishika hamatungu kana vinangukafwe chikuma omu nguli jino nakuzata haOfesi yamutango.

Nangukukulula jino ngwami, vyuma ngunahichimo yami naPamela vinatulingisa tutachikize ngwetu, keshi vakulwane kaha vanahase kutonda Kalungako. Vanyike navakiko vanahase kutonda ‘pela yandando yayinene’ numba tuhu vatanga javo kaveshi kuzanga vyuma kanako. (Vamya. 2, 5:2, 3; Miji. 2, 34:1-3) Kuhanjika muchano Yehova apwa Kalunga wazangi, kaha asaka vanyike navakulwane vakayoye haya myaka yosena.

Kafwe myaka yakuhambakana 50 yinahichimo, omu ami napuwami Pam twaputukile kutondatonda Kalunga, katwatachikijile vyuma navikasoloka hakulinga chuma kanako. Chikupu vene muchano waWangana, wapwa pela yandando yayinene chikuma. Tuli nakufwila kutwalaho lika kukwachilila pela kana nangolo jetu josena.