1. Nganomu valumbununa hali Wavaka-Efwesu 6:10-13, jila muka yakulipwila yize Yehova asolwelamo ngwenyi atuzakama? Lumbununenu.

JILA yimwe yakulipwila chikuma yize Yehova asolwelamo ngwenyi atuzakama shina, hakutukafwa tufungulule vaka-kole jetu. Satana navandemone jenyi vakiko vapwa vaka-kole jetu vavanene. Yehova atuhuhumuna tulihende kuli ava vaka-kole, kaha atuhana vyuma vyakutukafwa mangana tuhase kuvafungulula. (Tangenu Wavaka-Efwesu 6:10-13.) Kachi nge natwitavilanga Yehova atukafwe nakupendamina chikuma hali ikiye, kaha tunahase kwimanyina Liyavolo nakole. Ngocho nayetu tunahase kuhanjika nakukunyuka ngana mwakaposetolo Paulu uze ambile ngwenyi: “Kachi nge Kalunga ali kuli etu, kaha iyaze mwatwimanyina nakole?”—Loma 8:31.

2. Vyuma muka natushimutwila muchihande chino?

² Hakuwana nge twapwa tuvaka-Kulishitu vamuchano, katwahaka mangana kuli Satana navandemone jenyiko. Etu twahaka chikuma mangana kukulinangula vyaYehova nakumuzachila. (Samu 25:5) Chipwe ngocho, twatela kutachikiza tufuta eji kuzachisanga Satana. Mwomwo ika? Mangana ahone kutuhungumwisa. (Koli. 2, 2:11) Muchihande chino natushimutwila jila yimwe yayinene eji kuzachisanga Satana navandemone mangana vahungumwise vatu. Natushimutwila nawa havyuma twatela kulinga mangana tuvafungulule.

3-4. (a) Uno kupanda chapwa chika? (b) Uno kupanda chinalisale ngachilihi mukaye?

³ Kupanda hijila yimwe yayinene chikuma yize Satana navandemone jenyi vali nakuhungumwishilamo vatu. Vatu vaze vapanda  veji kushinganyekanga ngwavo vatachikiza vyuma vize vahona kutachikiza vatu vaze kavapandako, kaha nawa ngwavo vanahase kulinga vyuma vize vakwavo kaveshi kuhasa kulingako. Chakutalilaho, vamwe vashinganyeka ngwavo vanahase kutachikiza vyuma vyakulutwe hakutaha ngombo chipwe hakuzachisa vatanganyika. Kaha veka veji kumonanga kwijiva nge vali nakuhanjika navafu. Veka nawa veji kupandanga chipwe kulinga visava nakuhelama vakwavo. *

⁴ Vatu vavavulu mukaye vafwelela chikuma mukupanda. Kweseka nakuhehwojola chimwe chapwile mumafuchi 18 muLatin America namuCaribbean, vawanyine ngwavo kafwe mutu umwe havatu vatatu vamona ngwavo tufuta nauloji vinahase kuvakafwa, kaha nawa vatu vavavulu vafwelela ngwavo vanahase kuhanjika navajimu. Kwapwile nawa kuhehwojola chikwavo mumafuchi 18 amuAfrica. Kaha vawanyine nge kafwe mutu umwe havatu vavali afwelela mukupanda. Chipwe ngocho, kala kuchihela twatwama twatela kulihenda kukupanda. Twatachikiza ngwetu Satana ali nakufwila kuhungumwisa “vatu vosena hamavu.”—Kuso. 12:9.

5. Uno Yehova amona ngachilihi kupanda?

⁵ Yehova apwa “Kalunga wamuchano.” (Samu 31:5) Jino amona ngachilihi kupanda? Achihunga chikuma. Yehova alwezele vaIsalele ngwenyi: “Muli enu kanda mukapwa mutu mwakahichisa mwanenyi walunga chipwe wapwevo mukakahyako, chipwe muka-kutaha ngombo, chipwe muka-kulinga visava, chipwe muka-kutahisa vitaho, chipwe muka-kupanda, chipwe muka-kuhelama vakwavo, chipwe muka-kutahisa vashipilitu, chipwe muka-kulweza vyuma vyakulutwe, chipwe muka-kwihula vafuko. Weshowo mwalinga vyuma kanevi napu waunyengwe kumeso aYehova.” (Lushi. 18:10-12) Vaka-Kulishitu kavakavangiza Jishimbi jize Kalunga ahanyine vaIsalele kuhichila muli Moseko. Chipwe ngocho twatachikiza ngwetu namakumbi ano Kalunga ahunga kupanda.—Mala. 3:6.

6. (a) Uno Satana eji kuzachisanga ngachilihi kupanda mangana ahungumwise vatu? (b) Kweseka namukanda waMuka-kwambulula 9:5, vyuma muka vyeji kusolokanga kuvafu?

⁶ Yehova atuhuhumuna tulihende kukupanda mwomwo atachikiza ngwenyi Satana eji kuzachisanga kupanda mangana ahungumwise vatu nakuvalemeka. Kaha nawa Satana eji kuzachisanga kupanda mangana akundwize vyuma vyamakuli, kuhakilako vene namakuli akwamba ngwenyi vafu vatwama kuchihela kumwe kuze veji kuyoyelanga. (Tangenu Muka-kwambulula 9:5.) Satana eji kuzachisanga nawa kupanda mangana evwise vatu woma nakuvalingisa valitwamine kuzachila Yehova. Asaka ngwenyi vatu vosena vafwelele vashipilitu vakuhuka muchishishisa chakufwelela Yehova.

7. Vyuma muka eji kutulwezanga Yehova?

⁷ Nganomu tunashimutwila, Yehova eji kutulwezanga vyuma twatela kutachikiza, kuchina Satana navandemone jenyi navatuhungumwisa. Tushimutwilenu jino havyuma twatela kulinga mangana tuhase kulwa naSatana navandemone jenyi.

8. (a) Jila muka yakulipwila nayitukafwa tufungulule vashipilitu vakuhuka? (b) Uno mukanda waSamu 146:4, wasopolola ngachilihi makuli aSatana kutalisa kuvafu?

⁸ Tangenunga Mazu aKalunga nakuwashinganyekanga. Kutanga Mazu aKalunga nakuwashinganyekanga, yapwa hijila yimwe yakulipwila yakukanyinamo makuli avashipilitu vakuhuka. Mazu aKalunga apwa ngana mwapoko yamukwale yakuvambuka yize yinahase kusolola hatoma makuli aSatana. (Efwe. 6:17) Chakutalilaho, Mazu aKalunga asopolola makuli  aSatana akwamba ngwenyi vafu vanahase kuhanjika navatu. (Tangenu Samu 146:4.) Kaha nawa asolola hatoma ngwawo, Yehova ikiye kaha nahase kutachikijila chimweza vyuma vyakulutwe. (Isa. 45:21; 46:10) Shikaho, kachi nge natutanga Mazu aKalunga nakuwashinganyekanga, kaha natupwa vakulizanga kukana makuli veji kuhanjika ava vashipilitu vakuhuka nakuwahunga.

9. Vyuma muka vyakupandama kukupanda vize tweji kulihendangako?

⁹ Lihendenu kukulinga kala chuma chize chakundwiza kupanda. Etu vaka-Kulishitu vamuchano, katwazana mukupanda mukala jilako. Chakutalilaho, katweshi kuya nakutaha chipwe kushimutwila navafu mukala jilako. Ngana muze twashimutwilanga muchihande chinafumuho, etu vaka-Kulishitu katwalinga vilika veji kulinganga havipeji vize vyakundwiza makuli akwamba ngwavo nge mutu nafu eji kutwalangaho lika kuyoyela kuchihela chekako. Kaha nawa katwazachisa vatanganyika chipwe kuya kuli muka-kulweza vyuma vyakulutwe mangana tutachikize vyuma navikasoloka kulutweko. (Isa. 8:19) Twatachikiza ngwetu kulinga vyuma vyangana chapwa chaponde chikuma kaha nawa nachitulingisa tulivwasane naSatana navandemone jenyi.

10-11. (a) Vyuma muka valingile vamwe mulikulukaji lyamyaka lyakulivanga omu valinangwile muchano? (b) Kweseka namazu ahali Wavaka-Kolinde 1, 10:21, mwomwo ika twatela kulondezeza vaka-Kulishitu vakulivanga, kaha tunahase kulinga ngachilihi ngocho?

¹⁰ Mbilenu kala chuma chize chakundwiza kupanda. Vatu vamwe vaze vatwaminenga muEfwesu mulikulukaji lyamyaka lyakulivanga vapanjile. Oloze omu valinangwile muchano, valumwine vilinga vyavo chakuzeneka kulangisa. Mbimbiliya yamba ngwayo: “Vavavulu vaze valingilenga visava vanehele mikanda yavo hamwe nakuyochela kumeso avatu vosena.” (Vili. 19:19) Vatu kana vakilikichile nangolo mangana valihende kuvashipilitu vakuhuka. Mikanda yavo yavisava yapwile yajimbongo jajivulu, oloze muchishishisa chakuhana mikanda kana kuvatu veka chipwe kuyilanjisa, vakiko vayochele. Chuma chachilemu vafwililile kulinga shina kwivwisa Yehova kuwaha kuhambakana kushinganyeka hajimbongo venyekele.

 ¹¹ Uno tuhase kulondezeza ngachilihi vaze vaka-Kulishitu vamulikulukaji lyamyaka lyakulivanga? Nachipwa chamwaza chikuma kachi nge natumbila kala chuma tuli nacho chize chapandama kukupanda. Vyuma kana vinahase kupwa mikalo, najipindo chipwe kala vyuma vize vatu veji kuvwalanga chipwe vize vatwama navyo mangana ngwavo vivakinge.—Tangenu Wavaka-Kolinde 1, 10:21.

12. Vihula muka twatela kulihulisa kupandama kuvyuma tweji kulihizumunanga navyo?

¹² Kekesenunga kanawa kulihizumuna chenu. Lihulisenu ngwenu: ‘Kutala ngweji kutanganga mikanda, najimangazini, chipwe vihande vyahaInternet vize vyahanjika hakupanda tahi? Nyi ngachilihi myaso ngweji kwivwililanga, najivindiyo namivwimbimbi yahaTV ngweji kutalanga, chipwe jivindiyo jize ngweji kuhemanga hamakina, kutala vyuma kana vyakundwiza kupanda tahi? Kutala vyuma kana vyeji kusololanga namisalu chipwe kala vyuma vyavandemone vyakwivwisa woma tahi? Kutala vyeji kusololanga nge kulinga visava, nakulihelama chipwe kutaha kupwa nge hikulihizumuna kaha tahi?’ Echi kacheshi nakulumbununa nge kulihizumuna chosena chize veji kutakanga vatu cheji kukundwizanga vandemoneko. Omu namukekesa kulihizumuna chenu, fwilenu kumona ngwenu vyuma munakulihizumuna kavyeshi kumilingisa mulinge vyuma ahunga Yehovako. Tuli nakufwila kukilikita mangana “[tu]pwenga nachivezu chitoma” kumeso aKalunga.—Vili. 24:16. *

13. Vyuma muka katwatela kulingako?

¹³ Kanda kushimutwilanga mijimbu yavandemoneko. Twatela kukavangizanga chakutalilaho chaYesu. (Petu. 1, 2:21) Shimbu kanda Yesu ezenga hano hamavu apwilenga mwilu, kaha atachikijile vyavivulu hali Satana  navandemone. Oloze kahanjikilenga vyuma valingile ava vashipilitu vakuhukako. Yesu afwilililile kupwa chinjiho chaYehova keshi muka-kutanjisa mijimbu yaSatanako. Shikaho twatela kulondezeza Yesu hakuhona kutandakanyisanga mijimbu yavandemone. Ngocho vyuma tweji kuhanjikanga vyatela kusololanga hatoma nge ‘michima yetu yawahilila navyuma vyamwaza,’ chipwe ngwetu yawahilila navyuma vyamuchano.—Samu 45:1.

14-15. (a) Mwomwo ika katwatela kwivwa woma vashipilitu vakuhukako? (b) Unjiho muka wasolola nge Yehova ali nakukinga vatu jenyi makumbi ano?

¹⁴ Kanda kwivwanga woma vashipilitu vakuhukako. Hakuwana nge tuli nakuyoyela mukaye kakuhuka, vyuma vyavipi vinahase kutusolokela. Vyuma vyakufwana nge jiponde, namisongo chipwe vene kufwa vinahase kutusolokela mukukasumuna. Oloze katwatela kushinganyekanga ngwetu vashipilitu vakuhuka vakiko vanatunehela ukalu kanako. Mwomwo Mbimbiliya yamba ngwayo, “lwola navyuma vyakwiza mukukasumuna” vyeji kuwananga vatu vosena. (Kwambu. 9:11) Yehova atwama nangolo chikuma kuhambakana vandemone. Chakutalilaho, Kalunga ketavishile Satana ajihe Yopako. (Yopa 2:6) Kaha mumakumbi aMose nawa, Yehova asolwele hatoma ngolo jenyi hali vapilishitu vaka-kulinga visava vamuEjipitu. (Kulo. 8:18; 9:11) Yehova ahanyine ngolo Yesu uze vatohwesa lyehi, ngocho Yesu ambilile Satana navandemone hano hamavu kufuma mwilu. Kaha kalinwomu vavambile muwina wakuzeneka kukuma, kaveshi kukahasa kuhungumwisa chipwe kulemeka vatuko.—Kuso. 12:9; 20:2, 3.

¹⁵ Tuli nakumona unjiho wauvulu wakusolola hatoma nge Yehova ali nakukinga vatu jenyi makumbi ano. Chakutalilaho, tuli nakwambulula nakunangula vatu muchano mukaye kosena. (Mateu 28:19, 20) Ngocho tweji kusopololanga vilinga vyakuhuka vyaLiyavolo. Chikupu vene, nge Satana apwile nangolo kachi nahonesa milimo yetu yosena, oloze katwama nangoloko. Shikaho katwatela kwivwa woma vashipilitu vakuhukako. Twatachikiza ngwetu, “Yehova eji kutalatalanga hamavu hosena mangana asolole ngolo jenyi jakukafwa vaze veji kumuzachilanga namuchima wavo wosena.” (Miji. 2, 16:9) Shikaho nge natupwa vakushishika kuli Yehova, kaha vandemone kaveshi kuhasa kutwalaho lika kutuyanjisako.

16-17. Hanenu chakutalilaho chakusolola nge kukana vashipilitu vakuhuka chasakiwa kupwa vakumika.

¹⁶ Kukana vashipilitu vakuhuka chasakiwa kupwa vakumika chikumanyi nge masepa jetu chipwe vausoko navatushinyinyika twazane hamwe navakiko muvilika vize vyakundwiza vandemone. Oloze Yehova eji kukisulanga vatu vaze veji kumikanga kachi nge vyuma kana vinasoloka. Achitalenu hachakutalilaho chandumbwetu umwe wapwevo walijina lyaErica, uze atwama muGhana. Erica etavilile kulinangula Mbimbiliya omu apwile namyaka 21. Hakuwana nge ise apwile kapilishitu uze alingilenga visava, ngocho atelelele kwazana muvilika vyakundwiza vandemone, muze nawa mwaliwezele kulya nyama yize vahanyinenga kuvakulu. Oloze omu Erica akanyine kwazana muvilika kana, tanga yenyi yamwene nge Erica nasaula tulunga twavo. Vashinganyekele ngwavo tulunga navavazangamisa kumujimba namuvishinganyeka.

¹⁷ Erica vamushinyinyikile kuli vatanga jenyi mangana azane muvilika kana, kaha vamulwezele ngwavo nge mwakana navamuhanga hembo, oloze ikiye atwalileho lika kukana. Kahomu vamuhangile hembo vandumbwetu vamwe vamusanyikilenga atwame navo kujizuvo javo. Yehova akiswile Erica hakumuhana tanga yayihya chipwe ngwetu vandumbwenyi vaka-Kulishitu vaze jino vapwile kwijiva nge vausoko wenyi. (Mako 10:29, 30) Numba tuhu vausoko wenyi vamukanyine nakwocha vyuma vyenyi, oloze Erica atwalileho lika kupwa wakushishika kuli Yehova. Kaha vamumbapachishile, oholyapwa jino apwa payiniya washimbu yosena. Erica kevwa woma vandemoneko. Erica ahanjikile kutalisa kuli vatanga jenyi ngwenyi, “makumbi osena ngweji kulombelangako vatanga jami ngwami vatachikize Yehova mangana valivwise kuwaha hakupwa nakulihehwa chize cheji kufumanga hakuzachila Kalunga ketu wazangi.”

18. Nganyo muka yeji kufumanga hakufwelela muli Yehova?

¹⁸ Keshi nge tuvosena tunahase kuhita mucheseko chachinene ngana chize ahichilemo Ericako. Chipwe ngocho, tuvosena twatela kukana vashipilitu vakuhuka nakufwelela muli Yehova. Kachi nge natulinga ngocho, kaha Satana keshi kuhasa kutuhungumwisa namakuli enyiko, Yehova nawa mwatukisula chikuma. Kaha nawa kulinga chuma kana nachitukafwa tuhone kwivwa woma vandemone, nakutukafwa tutwaleho lika kuzachila Kalunga. Chuma chachilemu chikumanyi shina, natuzamisa usepa wetu naYehova. Kambaji Yakova asonekele ngwenyi: “Liluulenu kuli Kalunga, oloze mwimanyinenu Liyavolo nakole, kaha mwamichina. Pandamenu kuli Kalunga, kaha mwapandama kuli enu.”—Yako. 4:7, 8.