1-2. Tunahase kukavangiza ngachilihi mujitambo jaYesu? Hanenu chakutalilaho.

ACHISHINGANYEKENU muli nakutambuka navakwenu mumusenge muze vanate tupata. Kaha kuli mutu uze ali nakumitwaminyina atachikiza mwakutambukila mumusenge muze vanate tupata. Kahomu ali nakutambuka, mwamilweza mukavangize mujitambo jenyi. Kutwala muze, muka-kumitwaminyina namumumwena hahasuku, kufumaho mwalelangana. Chipwe ngocho, kamweshi kulizakaminako mwomwo namukavangiza mujitambo jenyi.

² Etu vaka-Kulishitu vamuchano, tuli nakutambuka mumusenge waponde wachifwanyisa, kulumbununa kaye kano kakuhuka. Chipwe ngocho, Yehova atuhana muka-kututwaminyina wamwenemwene, Mwanenyi Yesu Kulishitu uze twatela kukavangiza kanawa mujitambo jenyi. (Petu. 1, 2:21) Mukanda umwe wahanjika haMbimbiliya wamba ngwawo, Petulu afwanyishile Yesu kuli mutu uze ali nakutwaminyina vakwavo. Ngana mwamutu uze ali nakutwaminyina vakwavo mwaseza jingano, naYesu nawa atusela jingano chipwe ngwetu jitambo, jize twatela kukavangiza. Uno kukavangiza mujitambo jaYesu chalumbununa ika? Mwomwo ika twatela kukavangijila mujitambo jenyi? Kaha tunahase kulinga ngachilihi ngocho? Vihula kana natuvikumbulula muchihande chino.

3. Uno kukavangiza mujitambo jamutu chalumbununa ika?

³ Uno kukavangiza mujitambo jamutu chalumbununa ika? MuMbimbiliya, lizu lyakwamba ngwavo “kutambuka,” nalizu lyakwamba ngwavo “mahinji,” shimbu jimwe emanyinako vyuma eji kulinganga mutu mukuyoya chenyi. (Kupu. 6:9; Vishi. 4:26) Vyuma  mwalinga mutu mukuyoya chenyi vanahase kuvyesekesa nawa kujitambo, chipwe kujingano mwaseza mutu omu ali nakutambuka. Shikaho, kukavangiza mujitambo jamutu chalumbununa kukavangiza vyuma eji kulinganga.

4. Uno kukavangiza mujitambo jaYesu chalumbununa ika?

⁴ Kukavangiza mujitambo jaYesu chalumbununa ika? Chalumbununa kukavangiza chakutalilaho chenyi. Kweseka namazu ali muchisoneka chamutwe wachihande, kaposetolo Petulu apwile nakuhanjika hachakutalilaho chaYesu chakumika halwola vapwile nakumuyanjisa. Chipwe ngocho, kuli vyuma vyavivulu vize alingilenga Yesu twatela kulondezeza. (Petu. 1, 2:18-25) Chikupu vene, vyuma vyosena alingilenga Yesu navize ahanjikilenga, vyapwa chakutalilaho chize twatela kulondezeza.

5. Uno vatu vakuhona kukupuka vanahase kukavangiza chakutalilaho chaYesu tahi? Lumbununenu.

⁵ Hakuwana nge katwakupukako, kutala tunahase kukavangiza chakutalilaho chaYesu tahi? Eyo tunahase, numba tuhu katweshi kukavangiza mujitambo jenyi mujila yakukupukako. Oloze nge natukavangiza kanawa mujitambo jenyi kweseka noho hakumina ngolo jetu numba tuhu katwakupukako, kaha natukavangiza mazu ahanjikile kaposetolo Yowano akwamba ngwawo: ‘Tambukenunga ngana muze atambukilenga Yesu.’—Yowa. 1, 2:6.

6-7. Mwomwo ika natwambila ngwetu kukavangiza mujitambo jaYesu nachitukafwa tupandame chikuma kuli Yehova?

⁶ Kukavangiza mujitambo jaYesu nachitupandamisa kuli Yehova. Mwomwo ika? Chatete, Yesu alingilenga vyuma vize vyevwishilenga Kalunga kuwaha. (Yowa. 8:29) Shikaho nge natukavangiza chakutalilaho chaYesu, kaha natwivwisa Yehova kuwaha. Kaha nawa twafwelela ngwetu, Setu wamwilu mwapandama kuli vosena vaze veji kuzatanga nangolo mangana vapwenga masepa jenyi.—Yako. 4:8.

 ⁷ Chamuchivali, Yesu alondezezele Ise mujila yakukupuka. Echi chikiko chalingishile Yesu ahanjike ngwenyi: “Weshowo nangumono ami namono naTata nawa.” (Yowa. 14:9) Twatela kulondezeza vilinga vyaYesu najila amwenenengamo vatu. Chakutalilaho, evwililile keke muka-mbumba, navatu vaze vafwishile vausoko wavo, nakutetela pwevo uze avijile musongo waupi. Shikaho nge natulondezeza Yesu, kaha tuli nakulondezeza Yehova. (Mako 1:40, 41; 5:25-34; Yowa. 11:33-35) Nge natulondezeza vilinga atwama navyo Yehova, kaha natupandama kuli ikiye.

8. Mwomwo ika kukavangiza mujitambo jaYesu nachitukafwa “kufungulula” kaye?

⁸ Kukavangiza mujitambo jaYesu nachitukafwa tuhone kutanguka navyuma vyamukaye kano kakuhuka. Haufuku wamakumishilo wakuyoya chenyi hano hamavu, Yesu ambile ngwenyi: “Ami ngunafungulula lyehi kaye.” (Yowa. 16:33) Hakuhanjika mazu kana alumbunwine ngwenyi, kechelelele vishinganyeka vyamuno mukaye navyuma vafwila vatu vimutanguleko. Yesu atachikijile ngwenyi chuma chachinene vamutuminyinyine hano hamavu shina kuhakwila Yehova. Nyi ngachilihi yetu? Muno mukaye muli vyuma vyavivulu vinahase kututangula. Nayetu nge natulinga mwaya muchima waYehova, kaha ‘natufungulula’ kaye ngana muze alingile Yesu.—Yowa. 1, 5:5.

9. Vyuma muka twatela kulinga mangana tutwaleho lika kutambuka mujila yakuya kukuyoya chahaya myaka yosena?

⁹ Kukavangiza mujitambo jaYesu nachitulingisa tukayoye haya myaka yosena. Omu mukweze umwe walunga muka-luheto ahulishile Yesu vyuma atela kulinga mangana akawane kuyoya chahaya myaka yosena, Yesu amukumbulwile ngwenyi: “Twaya upwenga umuka-kungukavangiza.” (Mateu 19:16-21) VaYuleya vamwe vashinganyekelenga ngwavo Yesu keshi ikiye Kulishituko. Ngocho avalwezele ngwenyi: “Mikoko jami . . . veji kungukavangizanga. Ami nanguvahana kuyoya chahaya myaka yosena.” (Yowa. 10:24-29) Nyikotemu uze apwile wamuzango yamuSunendeline, ayile kuli Yesu mangana amunangule vyaWangana waKalunga. Yesu amulwezele ngwenyi, vosena vaze ‘navamufwelela navakapwa nakuyoya chahaya myaka yosena.’ (Yowa. 3:16) Tweji kufwelelanga Yesu hakukavangiza vyuma vize anangwilenga navize alingilenga. Nge natulinga ngocho, kaha natutwalaho kutambuka mujila yakuya kukuyoya chahaya myaka yosena.—Mateu 7:14.

10. Vyuma muka twatela kulinga numba ‘tutachikize’ kanawa Yesu? (Yowa. 17:3)

¹⁰ Twatela kuvangila kutachikiza Yesu numba tukavangize mujitambo jenyi. (Tangenu Yowano 17:3.) “Kutachikiza” Yesu kachatwama noho chakuminako. Twatela kutachikiza kanawa vilinga vyenyi, navishinganyeka vyenyi, navyuma asaka. Chamokomoko namyaka tunatwame mumuchano, twatela kutwalaho lika kutachikiza Yehova naYesu.

11. Vyuma muka vyatwama muMikanda yaMujimbu Wamwaza yiwana?

 ¹¹ MuMbimbiliya mwatwama Mikanda yaMujimbu Wamwaza yiwana yize yavuluka mujimbu wakuyoya chaYesu, namulimo wakwambulula azachilenga. Mijimbu kana yeji kutukafwanga tutachikize kanawa Yesu. Mumikanda kana vasonekamo vyuma alingilenga Yesu navize ahanjikilenga. Eyi mikanda yeji kutukafwanga “tushinganyeke chikuma” havyuma vize alingilenga. (Hepe. 12:3) Echi chili nakulumbununa nge mumikanda kana mwatwama jitambo jaYesu jize atusela mangana tukavangizengamo. Shikaho kutanga mikanda kana nachitukafwa tutachikize kanawa Yesu, nakukavangiza kanawa mujitambo jenyi.

12. Vyuma muka twatela kulinga mangana tunganyale kuMikanda yaMujimbu Wamwaza?

¹² Kuli vyuma vikwavo twatela kulinga numba tunganyale chikuma kuMikanda yaMujimbu Wamwaza. Twatela kulinangula chikuma mikanda kana nakuhunanana havyuma natulinangula. (Esekesenuko Yoshuwa 1:8, kwinyikila chamwishi.) Tushimutwilenu havyuma vivali vize navitukafwa kuhunanana kanawa haMikanda yaMujimbu Wamwaza, nomu tunahase kukavangiza vyuma natulinangula mumikanda kana.

13. Vyuma muka mwatela kulinga mangana mwivwishise Mikanda yaMujimbu Wamwaza?

¹³ Chatete, lingenu vyuma vize navimikafwa mwivwishise Mikanda yaMujimbu Wamwaza. Humikizenu nge muli nakumona, nakwivwa vyuma vize vyasolokele. Hakusaka mulinge ngocho, hehwojolenu mumikanda yetu. Kekesenu mumone vyuma vyasolokele shimbu kanda, chipwe hanyima yamujimbu kana. Hehwojolenu muwane mijimbu yavatu, navihela vanavuluka mumujimbu kana. Esekesenu mujimbu munakutanga kumujimbu wakulifwanako, vavuluka mumukanda ukwavo waMujimbu Wamwaza, mwomwo shimbu jimwe muka-kusoneka umwe, nahase kusezamo mijimbu yimwe yize mukwavo muka-kusoneka mwavuluka.

14-15. Tunahase kuzachisa ngachilihi vyuma tunalinangula muMikanda yaMujimbu Wamwaza?

¹⁴ Chamuchivali, mwatela kukavangiza vyuma namulinangula muMikanda yaMujimbu Wamwaza. (Yowa. 13:17) Nge munalinangula  mujimbu umwe muMikanda yaMujimbu Wamwaza, kaha lihulisenu ngwenu: ‘Chishina muka ngunalinangula kumujimbu kana chize nanguzachisa mukuyoya chami? Uno ngunahase kuzachisa ngachilihi vyuma ngunalinangula mangana ngukafweko vakwetu?’ Chakutalilaho, munahase kushinganyekako mutu umwe nakumulwezako vyuma munalinangula.

¹⁵ Tushimutwilenu chakutalilaho chize nachitukafwa tuwane omu tunahase kuzachishilamo vishina kanevi vivali. Natushimutwila hali tuliwe muka-kukalikiza, uze vamwene kuli Yesu mutembele.

16. Mujimbu muka watwama hali Mako 12:41? Lumbununenu.

¹⁶ Lingenu vyuma vize navimikafwa mwivwishise mujimbu munakutanga. (Tangenu Mako 12:41.) Achihumikizenu vyuma vyasolokele haNyisane 11, 33 C.E., omu kwasalile makumbi amandende shimbu kanda Yesu afwenga. Halikumbi kana Yesu apwile nakunangula mutembele, oloze vatwamina vamukwitava vapwile nakufwefulula vyuma apwile nakunangula. Shimbu kanda likumbi kana, vatwamina vamwe vamukwitava vamuhulishile avalweze okwo apwile nakuwana ngolo jakulinga vyuma vyakukomwesa. Veka vamuhulishilenga vihula vize vashinganyekele ngwavo keshi kuhasa kukumbululako. (Mako 11:27-33; 12:13-34) Yesu jino ayile kuchihela cheka chamutembele, pamo chize vavulukilenga ngwavo Chipango chaMapwevo. Muchihela kana mukiko mwapwile vikasha vyamawana, kaha atwamine nakutala vatu omu vapwile nakuhaka mawana muvikasha. Amwene vaka-luheto navahaka jimbongo jajivulu jachichele muvikasha. Pamo apwile nakwivwilila omu japwile nakuvuma jimbongo jize vapwile nakuhaka muvikasha.

17. Chuma muka alingile pwevo wakuhutwa vavuluka hali Mako 12:42?

¹⁷ Tangenu Mako 12:42. Kutwala muze, Yesu amwene “pwevo watuliwe muka-kukalikiza.” (Luka 21:2) Ou pwevo chamukaluhwililenga kuwana vyuma vyakulikafwa navyo mukuyoya. Chipwe ngocho, ayile kuchikasha nakuhakamo tujimbongo twachichele tuvali, tuze pamo katwanehele nazungo chikumako. Yesu atachikijile ngwenyi uze pwevo nahakemo tujimbongo twachichele twajileputa jivali. Jimbongo kana kajalemene chikuma halwola kanako, kaha nawa kajatelemo nakulanda kajilili umwe uze valanjilenga handando yayashiko.

18. Kweseka namukanda waMako 12:43, 44, chuma muka ahanjikile Yesu kutalisa kuwana ahanyine uze pwevo watuliwe?

¹⁸ Tangenu Mako 12:43, 44. Yesu alikomokelele havyuma alingile ou tuliwe. Ngocho asanyikile tumbaji twenyi mangana vamone vyuma alingile, nakuvalweza ngwenyi: “Ou tuliwe muka-kuhutwa nahakemo jimbongo jajivulu kuhambakana vosena. Mwomwo [vaka-luheto] vosena vanahakemo jimbongo jakufuma kujimbongo javo jajivulu, oloze ikiye, nakukalikiza chenyi nahakemo jimbongo jize apwanga najo josena jakulikafwa najo mukuyoya chenyi.” Ou tuliwe wakushishika hakuhakamo tujimbongo tuze apwile natwo twosena chasolwele nge, afwelelele ngwenyi Yehova mwamuzakama.—Samu 26:3.

19. Chishina muka chachilemu tunalinangula kuli Yesu hamazu aze ahanjikile kutalisa kuli pwevo watuliwe wakuhutwa?

¹⁹ Kavangizenu vyuma namulinangula. Lihulisenu ngwenu, ‘Chishina muka ngunalinangula kuli Yesu hamazu aze ahanjikile kutalisa kuli pwevo wakuhutwa?’ Anukenu ngwenu ou tuliwe afwililile kuhana wana wauvulu kuli Yehova, oloze ahanyine kweseka navyuma apwile navyo. Yesu atachikijile ngwenyi wana ahanyine ou pwevo watuliwe wapwile waulemu chikuma kuli Yehova. Chishina chachilemu natulinangulako shina echi: Yehova eji kwivwanga kuwaha nge natumuzachila namuchima wetu wosena, namwono wetu wosena. (Mateu 22:37; Kolo. 3:23) Yehova eji kwivwanga kuwaha nge natumuzachila kweseka noho hakumina ngolo jetu. Tweji kulinganga  ngocho hakuzachisa ngolo jetu nalwola lwetu hakuya muwande, nakukukunguluka.

20. Munahase kuzachisa ngachilihi chishina munalinangula kumujimbu wapwevo watuliwe? Hanenu chakutalilaho.

²⁰ Munahase kuzachisa ngachilihi chishina munalinangula kumujimbu wapwevo watuliwe? Munahase kulinga ngocho hakukolezezako vandumbwenu vamwe vaze vanakusakiwa kuvalweza ngwavo, Yehova amona milimo veji kumuzachilanga kupwa yayilemu. Chakutalilaho, kutala munejivako ndumbwenu wakashinakaji wapwevo, uze anakulivwa kupwa wamokomoko mwomwo yamisongo, nakushinganyeka ngwenyi keshi nakuzata chikuma mumulimo wamuwandeko tahi? Chipwe mwejivako ndumbwetu walunga uze aviza chikuma, ngocho eji kuhombanga mwomwo yakuhona kwizanga kukukunguluka lwola lwosena tahi? Mwatela kuvakafwa hakuhanjika ‘mazu amwaza akuvatunga.’ (Efwe. 4:29) Mwatela kuvalwezako chishina munalinangula kumujimbu wapwevo watuliwe wakuhutwa. Mazu namuvakolezeza nawavakafwa vamone ngwavo Yehova eji kuwahililanga kachi nge natumuzachila noho hakumina ngolo jetu. (Vishi. 15:23; Teso. 1, 5:11) Kachi nge namusangejeka vandumbwenu mwomwo yakuzachila Yehova kweseka noho hakumina ngolo javo, kaha nachisolola nge muli nakukavangiza kanawa mujitambo jaYesu.

21. Vyuma muka munakufwila kulinga?

²¹ Twatokwa chikuma hakutulumbunwina chiyoyelo chaYesu muMikanda yaMujimbu Wamwaza, mangana tulondezeze Yesu nakukavangiza kanawa mujitambo jenyi. Shikaho, nachipwa chamwaza kulinangulanga naMikanda yaMujimbu Wamwaza omu namupwanga nachilongesa chauka, nahaKulemesa Kalunga mwaTanga. Twatela kutachikiza ngwetu hakusaka tunganyale kumijimbu natutanga, twatela kwivwishisanga kanawa mijimbu natutanga, nakuzachisa vishina natulinangula kumijimbu kana. Hakusaka tulondezeze Yesu, twatela nawa kwivwilila kuvyuma vize ahanjikilenga. Muchihande nachikavangizaho, natushimutwila vyuma natulinangula kuli Yesu hamazu amakumishilo aze ahanjikile shimbu kanda afwenga.