Chaluvinda, omu ngwapwile namyaka kafwe 13, usoko wami naYehova wazeyele. Ngwamwenenga ngwami masepa jami valivwishilenga kuwaha kuyoya, mwomwo valingilenga kala vyuma vanasake. Ngocho ngwasakile kupwa ngana mwavakiko. Ngwamwenenga ngwami jishimbi vakashilenga visemi jami, najishimbi javaka-Kulishitu nakulemesa Yehova vyapwile vyavikalu chikuma. Numba tuhu ngwejivile ngwami Kalunga kwatwama, oloze kangwapandamine chikuma kuli ikiyeko.

Ngwatwalileho lika kwambulula, numba tuhu kangwazachilenga natwimako. Omu ngwayilenga muwande kangwaliwahishilengako, ngocho changukaluhwililenga kwambulula. Kangwapwile nachilongesa numba chimweko, echi changulingishile nguhone kulivwisa kuwaha kuzata mulimo wamuwande. Ngwalihulishilenga ngwami, ‘Uno mutu nahase kutwalaho ngachilihi kuzata mulimo kanou waukalu ngana?’

Omu ngwapwile namyaka 17 ngwafumine hembo, ngocho ngwayile nakutwama kuAustralia. Visemi jami vevwile kupihya chikuma omu ngwafumine hembo.  Valizakaminyine, chipwe ngocho vashinganyekele ngwavo nangutwalaho lika kuzachila Yehova.

Oloze omu ngwapwile nakutwama kuAustralia hakiko jino ngwazeyele chikuma kushipilitu. Kaha kangwayilenga kukukunguluka shimbu yosenako. Ngwalikachilenga chikuma navakwetu vana vamapwevo vaze kavavulilenga kuya kukukungulukako, oloze vazangilenga kuya nakunwa wala nakukina kuvihela vyakuhemena. Nge nangwanuka omu chapwile chiyoyelo chami, chasoloka nge ngwazangile muchano, kaha nawa ngwazangile vyuma vyakukaye. Oloze nevi vyangusuulwishile vyauchi.

Omu mwahichile myaka yivali, ngwaliwanyine nandumbwetu wapwevo uze angukafwile ngushinganyeke hachiyoyelo chami. Ngwapwile nakutwama navandumbwami vamapwevo vavajike 4, kahomu twapwile nachalumingo chakulipwila twalitavilile kutwama nakalama wakujinguluka napuwenyi Tamara kuzuvo yetu hachalumingo chosena chamuundu. Omu kalama wakujinguluka apwile nakuzata milimo yakuchikungulwilo, puwenyi apwile nakushikama nayetu, nakuhanjika vihande vize vyapwile nakutwivwisa kuwaha chikuma nakutusehesa. Ngwevwilenga kuwaha kushikama nenyi, mwomwo apwilenga wamwashi kuhanjikisa. Ngwalikomokelele chikuma, mwomwo kangwashinganyekele ngwami mutu wakuhya kushipilitu nahase kupwa walyepeko.

Tamara apwilenga muka-kwambulula watwima. Hakuwana nge azangilenga muchano namulimo wakwambulula, echi chatulingishile nayetu tumulondezeze. Evwilenga kuwaha mwomwo azachilililenga Yehova nangolo jenyi josena. Oloze ami kangwevwilenga kuwahako, mwomwo kangwalingilenga ngochoko. Vilinga vyenyi vyamwaza namuchima wenyi wakuwahilila vyangulingishile ngwalumuneko chiyoyelo chami. Chakutalilaho chenyi chamwaza changukafwile ngwanuke chishina chachilemu chamuMazu aKalunga chakwamba ngwavo, Yehova asaka tumuzachile ‘nakuwahilila oku tuli nakutwa jingunda.’—Samu 100:2.

Ngwasakile kupwa nguwakuwahilila ngana mwaTamara, oloze ngwatelele kwalumunako vyuma vimwe mukuyoya chami. Ngwaputukile kwalumunako chiyoyelo chami chindende chindende numba  tuhu kangwalingile ngocho hahaze veneko. Ngwaputukilenga kuliwahisa shimbu kanda nguyenga muwande, nakuzatako upayiniya wakukafwa hatukweji vamwe. Echi changukafwile nguhone kwivwa woma kushimutwila navatu. Kuzachisa chikuma Mbimbiliya muwande changukafwile ngulivwise kuwaha kwambulila vatu mujimbu. Kutwala muze ngwaputukile kuzata upayiniya wakukafwa kakweji hikakweji.

Ngwalikachilenga navandumbwetu vakulisezaseza vaze vapwile nakulinga kanawa kushipilitu, kaha nawa vaze valivwishilenga kuwaha kuzachila Yehova. Chakutalilaho chavo chamwaza changukafwile ngumone vyuma vyavilemu vize ngwahakile kulutwe mukuyoya chami nakulitomena kutanga Mbimbiliya hakumbi. Ngwaputukile kulivwisa kuwaha chikuma kuzata mulimo wamuwande, kaha mukuhita chalwola ngwaputukile kuzata upayiniya washimbu yosena. Omu mwahichile myaka yayivulu ngwazamine jino mumuchano nakulivwisa kuwaha kuzachila Yehova muchikungulwilo.

Omu mwahichile mwaka umwe kufuma halwola ngwazamine mumuchano, ngwaliwanyine nandumbwami Alex uze apwile walikoji, kaha nawa azangile Yehova namulimo wakwambulula. Apwile muka-kuzachila muchikungulwilo, kaha nawa halwola kana hanazate lyehi mulimo waupayiniya hamyaka 6. Kaha nawa Alex azachilileko kuMalawi kuze kwapwile nakusakiwa kukafwa chikuma. Omu apwile kuze, alikachilenga chikuma navamishonali vaze vamukolezezele ahake chatete Wangana waKalunga kulutwe mukuyoya chenyi.

Kuheta mu 2003 ami naAlex twalimbachile, kaha tunatwaleho lika kuzata mulimo washimbu yosena. Tunalinangula vyuma vyavivulu, kaha Yehova natukisula mujijila jakulisezaseza.

Mu 2009, vatutongwele kuzata mulimo waumishonali, ngocho vatutumine kulifuchi lyaTimor-Leste lize lyatwama hamatungu amuIndonesia. Twawahililile chikuma hakututongola umishonali, chipwe ngocho  twalizakaminyine. Kahomu mwahichile tukweji 5 twayile munganda yaDili yamulifuchi kana.

Jila twayoyelelengamo mulifuchi kana yalihandunwine nakuze twafumine. Twaputukile kwijilila vyakulya vyakulifuchi kana nakulinangula lilimi nachisemwa chavo. Omu twayilenga nakwambulula, twawanyinenga vatu vakuhutwa navaze kavatangako, navatu vakuyanda mwomwo yajita nauhwanga. *

Twalivwishilenga kuwaha kuzata mulimo wakwambulula. Chakutalilaho, omu ngwapwile mumulimo wamuwande ngwaliwanyine naMaria * kanyike wapwevo wamyaka 13, uze apwile wakuhomba, mwomwo afwishile naye, kaha nawa kapwile nakutwama hamwe naiseko. Maria katachikijile vyuma atelele kulinga mukuyoya chenyiko nganomu chapwa kuli vanyike vosena. Ngweji kwanukanga likumbi limwe omu apwile nakungulweza ukalu wenyi oku ali nakulila. Oloze kangwevwishishile vyuma apwile nakuhanjikako mwomwo halwola kana kangwejivile kanawa lilimi lyenyiko. Ngocho ngwalombele kuli Yehova angukafwe ngumuvendejeke, kaha ngwamutangilile visoneka vize vyamukafwile chikuma. Mukuhita chamyaka yayindende Maria alumwineko chiyoyelo chenyi mwomwo yamuchano wamuMbimbiliya uze alinangwile. Kutwala muze vamumbapachishile, kaha oholyapwa ali jino nakutwaminyina vilongesa vyaMbimbiliya. Makumbi ano Maria jino ali mutanga yayinene yakushipilitu.

Yehova ali nakukisula mulimo wakwambulula muTimor-Leste. Numba tuhu vatu vavavulu vanavambapachisa mumyaka kafwe 10, oloze vavavulu vali nakuzata upayiniya, veka vaka-kuzachila kaha vakwavo tulama. Veka vazachila haofesi yakwalumwina mikanda haze veji kwalumwinanga mikanda yamumalimi avo. Ngwevwilenga kuwaha kuvamona vali nakwimba kukukunguluka, vanawahilila, kaha nawa vali nakuzovoloka kushipilitu.

Numba tuhu chiyoyelo chakuTimor-Leste chalihandunwine nachize chakuAustralia, oloze ngwalivwishilenga kuwaha kuzachila kuchihela kana. Shimbu jimwe twanyinyinenga musacha yayindende muze mwapwile vatu vavavulu, muze valongejekele jinjeke javaishi vakuma neji jamafwo. Kaha shimbu jimwe, twatwaminyinyinenga vilongesa vyaMbimbiliya mujizuvo jajindende muze mwazuminenga chikuma, kaha nawa mwapwile mwamajilo oku nawa tusumbi vali nakuhemena muzuvo kana. Oloze ngwalivwishilenga kuwaha kuyoya chamokomoko naukalu kana.

Ngweji kusakwililanga visemi jami hakukilikita chavo mangana vangunangule vyaYehova, nakungukafwa nahalwola luze ngwazeyele kushipilitu. Ngwamwene jino mazu atwama hali Vishimo 22:6 kupwa amuchano. Visemi jami veji kuwahililanga chikuma hakumona ami nalunga lyami vali nakutuzachisa kuli Yehova. Kufuma vene mu 2016, tuchili nakuzata mulimo wakutambwojoka mungalila yamutango waAustralasia.

Hakavanga ngwamwenenga mulimo wakwambulula kupwa waukalu, oholyapwa ngwazanga jino mulimo kana. Ngunatachikiza jino ngwami, chamokomoko naukalu natumona mukuyoya, kuwahilila chamwenemwene cheji kwizanga kuvanga kaha nge natuzachila Kalunga namuchima wetu wosena. Chikupu vene, ngunalivwisa kuwaha kuyoya hakuzachila Yehova hamwe nalunga lyami hamyaka 18. Ngunatachikiza jino ngwami mazu aze ahanjikile Ndavichi kuli Yehova apwa amuchano. Ambile ngwenyi: “Vosena vaze veji kuchinyinanga muli ove navawahililanga. Navatwanga jingunda lwola lwosena. . . . Vaze vazanga lijina lyove navawahililanga muli ove.”—Samu 5:11.