1-2. Uno ndando yakusokola yapwa ika, kaha mwomwo ika twasakiwila ndando kana?

OMU mutu wakukupuka Alama alingile shili, ajimbalishile kuyoya chenyi chahaya myaka yosena, kuhakilako vene nechi chavana venyi. Hakuwana nge Alama alingile shili mukulisakila, ngocho kavamukonekeleleko. Oloze vana venyi kavalingile shiliko, kaha nawa kavakundwijile Alama alinge shiliko. (Loma 5:12, 14) Kutala Yehova alingileko chuma chimwe mangana vana vaAlama vakayoye haya myaka yosena tahi? Eyo. Kufuma haze Alama alingile shili, Yehova asolwele jila yakusokwelamo vana vaAlama kushili nakukufwa. (Kupu. 3:15) Yehova atumine Mwanenyi kufuma mwilu halwola atongwele, mangana “ahane mwono wenyi kupwa ndando yakusokola vavavulu.”—Mako 10:45; Yowa. 6:51.

² Uno ndando yakusokola yapwa ika? Kweseka naVisoneka VyachiHelase vyaVaka-Kulishitu, ndando yakusokola yapwa fweto yize Yesu ahanyine mangana akindulwise vyuma vize ajimbalishile Alama. (Koli. 1, 15:22) Mwomwo ika twasakiwila ndando yakusokola? Mwomwo jishimbi jaYehova jize ahanyine vatu jenyi, jasolwele ngwajo, nge mutu najihi mukwavo naikiye vatela kumujiha. (Kulo. 21:23, 24) Hakuwana nge Alama ajimbalishile kuyoya chakukupuka, ngocho Yesu ahanyine kuyoya chenyi chakukupuka mangana alinge kweseka namuze vasoneka muJishimbi. (Loma 5:17) Shikaho Yesu apwa “Setu waHaya Myaka Yosena” kuli vosena vaze vafwelela mundando yakusokola.—Isa. 9:6; Loma 3:23, 24.

3. Kweseka naYowano 14:31 na 15:13, mwomwo ika Yesu alisuwile kuhana kuyoya chenyi chakukupuka?

³ Yesu alisuwile kuhana kuyoya chenyi mwomwo azangile chikuma Ise wamwilu nayetu vatu. (Tangenu Yowano 14:31;  15:13.) Zangi kana yamulingishile atwaleho lika kulama kulonga chenyi palanga nakusongo, nakutesamo kujina chaIse. Yehova mwakatesamo vyuma ajinyine kulingila vatu hakavanga mwomwo yavyuma alingile Yesu. Muchihande chino, natushimutwila ovyo Kalunga etavishilile Yesu vamuyanjise shimbu kanda vamujihe. Natushimutwila nawa hali kaposetolo umwe uze amwene ndando yakusokola kupwa yayilemu chikuma. Natushimutwila nawa omwo tunahase kusolola ngwetu twasakwilila Kalunga hakutuhana ndando yakusokola, navyuma twatela kulinga mangana tutwaleho lika kumona ndando yakusokola yize vatuhana kuli Yehova naYesu kupwa yayilemu.

4. Lumbununenu jila afwilililemo Yesu.

⁴ Achishinganyekenu vihuli ahichilemo Yesu halikumbi lyamakumishilo mukuyoya chenyi hano hamavu. Numba tuhu Yesu apwile nangolo jakusanyika mayongomena avangelo vezenga nakumukinga, oloze alisuwile mangana vamukwate kumaswalale javaLoma nakumuveta. (Mateu 26:52-54; Yowa. 18:3; 19:1) Chikote chize vamuveteselenga chazumwinenga nyama yamujimba wenyi. Kufumaho vamutwikile chitondo chachilemu chakumusukikaho. Jino omu Yesu aputukile kukoka chize chitondo mangana atwale kuchihela chakumujihila, maswalale vamwene mutu nalimanyina, ngocho vamulwezele mangana amumbachileko. (Mateu 27:32) Omu Yesu ahetele kuze kuchihela, maswalale vamupapalilile hachitondo. Hakwimika chize chitondo, evwile kukola chikuma mwomwo yakulema chamujimba wenyi. Ngocho masepa jenyi vaputukile kulishona, kaha naye aputukile kulila. Oloze vaka-kuyula vavaYuleya vapwile nakumuhenda. (Luka 23:32-38; Yowa. 19:25) Yesu alyonyingile hajiola jajivulu. Hakuwana nge vamusukikile hachitondo chakuyanjishila, ngocho chamukaluhwilile kuhwima kanawa. Shimbu kanda afwenga, Yesu alombele kuli Yehova, kaha azewile mutwe wenyi, afwile. (Mako 15:37; Luka 23:46; Yowa. 10:17, 18; 19:30) Chikupu vene, jila afwilililemo Yesu yapwile yakwivwisa sonyi.

5. Chuma muka chahombesele chikuma Yesu?

⁵ Yesu kahombele mwomwo yajila vamujihilililemoko, oloze ahombele mwomwo yamulonga uze vamujihililile. Vamuvangijikilile ngwavo nasaula Kalunga. (Mateu 26:64-66) Mulonga vamuvangijikilile Yesu wamuhombesele chikuma. Oloze ashinganyekele ngwenyi Ise keshi kumwechelela asaule lijina lyenyi mujla kanako. (Mateu 26:38, 39, 42) Mwomwo ika Yehova etavishile Mwanenyi uze azanga vamuyanjise nakumujiha? Tutalenu vyuma vitatu vyamulingishile.

6. Mwomwo ika Yesu vamusukikilile hachitondo?

⁶ Chatete, Yesu vatelelele kumusukika hachitondo mangana asokole vaYuleya kuchangu. (Ngale. 3:10, 13) VaYuleya valitavilile ngwavo navakavangizanga Jishimbi jaKalunga, oloze kavajikavangijilengako. Ngocho vavangwile, kaha nawa vaswanyine shili kuli Alama. (Loma 5:12) Jishimbi jaKalunga jize vahanyine vaIsalele javulukile nge, mutu uze mwalinga shili yakutela kufwa, vatelelele kumujiha. Kufumaho vanahase kumusukika hachitondo. * (Lushi. 21:22, 23; 27:26) Shikaho, hakusukika Yesu hachitondo chakafwile vaYuleya vaze vamukanyine, vasokoke kuchangu nakushili yaAlama.

7. Chuma muka chamuchivali chalingishile Kalunga etavise Mwanenyi vamuyanjise?

⁷ Chamuchivali, Kalunga etavishile Mwanenyi vamuyanjise mangana atengamo kukazata mulimo wakupwa Kapilishitu Wakulitulaho. Yesu amwene omu chakaluhwa kwononoka Kalunga nge mutu ali muukalu waunene. Evwile chikuma kukola, ngocho alombele kuli Ise amukafwe “oku ali nakuteta chikuma miteto, nakulila  masoji.” Hakuwana nge Yesu ayanjile chikuma, ngocho mwatwivwishisa kanawa, ‘nakutukafwa’ omu ‘natumona vyeseko.’ Twawahilila chikuma hakutachikiza ngwetu Yehova atutongwela Kapilishitu Wakulitulaho uze eji ‘kutwivwilanga keke mukuhehela chetu.’—Hepe. 2:17, 18; 4:14-16; 5:7-10.

8. Chuma muka chamuchitatu chalingishile Kalunga etavise Yesu vamuyanjise chikuma?

⁸ Chamuchitatu, Yehova etavishile Yesu vamuyanjise chikuma mangana akumbulule chihula chachilemu chakwamba ngwavo: Kutala mutu nahase kupwa lika wakushishika kuli Yehova numba tuhu ali nakumona ukalu waunene tahi? Satana ngwenyi, nduma. Eji kuhanjikanga ngwenyi vatu veji kuzachilanga Yehova mangana vanganyalileho. Afwelela ngwenyi vatu kavazachila Yehova namuchima wavo wosenako ngana muze alingile Alama. (Yopa 1:9-11; 2:4, 5) Yehova afwelelele ngwenyi Mwanenyi mwapwa wakushishika kuli ikiye. Ngocho etavishile Mwanenyi vamweseke kuli Satana. Yesu atwalileho lika kulama kulonga chenyi, nakusolola Satana kupwa muka-makuli.

9. Chakutalilaho muka atusela kaposetolo Yowano?

⁹ Kutachikiza ndando yakusokola chinazamisa lufwelelo lwavandumbwetu vavavulu. Vanakutwalaho lika kwambulula mujimbu wamwaza chamokomoko nakuvafumbukila. Kaha nawa vali nakumika mukala ukalu vali nakumona mukuyoya chavo. Tushimutwilenu hachakutalilaho chakaposetolo Yowano. Ambulwilenga lika muchano wakuvuluka Kulishitu, nandando yakusokola kafwe hamyaka yakuhambakana 60. Omu Yowano apwile namyaka kafwe 100, fulumende yavaLoma yamwene ngwayo mwahungumwisa vatu. Shikaho vamukashile nakumutwala halitungu lyaPatamu. Mwomwo ika vamukashililile? Mwomwo “yakuhanjika vyaKalunga, nahakuhana unjiho wakuvuluka Yesu.” (Kuso. 1:9) Chikupu vene, kaposetolo Yowano asolwele chakutalilaho chamwaza chakupwa nalufwelelo, nakumika.

10. Uno mikanda asonekele Yowano yasolola ngachilihi nge amwene ndando yakusokola kupwa yayilemu?

¹⁰ Mikanda yize asonekele kaposetolo Yowano yasolola nge azangile chikuma Yesu, nakumona ndando yakusokola kupwa yayilemu. Mumikanda kana asonekamo vyandando yakusokola, chipwe vyuma vyamwaza vize vyeza mwomwo yandando yakusokola mapapa akuzomboka 100. Chakutalilaho, Yowano asonekele ngwenyi: “Nge mutu mwalinga shili, kaha tuli namuka-kutukafwa wakwoloka uze ali naSetu, ikiye Yesu Kulishitu.” (Yowa. 1, 2:1, 2) Kaposetolo Yowano asonekele nawa ovyo chapwila chachilemu “kwambulula unjiho hali Yesu.” (Kuso. 19:10) Chikupu vene, Yowano amwene ndando yakusokola kupwa yayilemu chikuma. Uno nayetu natusolola ngachilihi ngwetu twamona ndando yakusokola kupwa yayilemu?

11. Chuma muka nachitukafwa tulihende kukulinga shili?

¹¹ Lihendenunga kukulinga shili. Nge twamona ndando yakusokola kupwa yayilemu, kaha katweshi kushinganyeka ngwetu: ‘Novyo ngwatela kukilikichila mangana ngulihende kushili vene vyauchi, mwomwo nge ngunalingi shili nangulomba Yehova mwangukonekela.’ Nge tuli mucheseko chakulinga shili, twatela kuhanjika ngwetu: ‘Yehova naYesu vanangulingila vyuma vyamwaza, ngocho kangweshi kuhasa kulinga shiliko.’ Kaha nawa twatela kulomba Yehova atukafwe, nakumulembelela ngwetu: ‘Kanda kungwingisa muchesekoko.’—Mateu 6:13.

12. Tunahase kuzachisa ngachilihi mazu atwama hali WaYowano 1, 3:16-18?

¹² Zangenunga vandumbwenu. Kuzanga vandumbwetu nachisolola nawa nge twamona  ndando yakusokola kupwa yayilemu. Mwomwo ika tunambila ngocho? Mwomwo Yesu afwililile navandumbwetu keshi yetu kahako. Hakuwana nge avafwililile, ngocho avamona kupwa vavalemu. (Tangenu WaYowano 1, 3:16-18.) Tweji kusololanga ngwetu twazanga vandumbwetu kweseka navyuma natulinga kuli vakiko. (Efwe. 4:29, 31–5:2) Chakutalilaho, tweji kuvakafwanga nge vanaviji, chipwe nge vali nakumona ukalu wakulisezaseza kuhakilako vene naukalu wakulijila. Vyuma muka twatela kulinga nge ndumbwetu natulingi chipwe nahanjika vyuma vize vinatwivwisa kupihya kumuchima?

13. Mwomwo ika twatela kukonekelanga vandumbwetu?

¹³ Kutala mweji kulaminanga vandumbwenu koko tahi? (Levi 19:18) Nge mukiko, kaha kavangizenu mazu amuMbimbiliya akwamba ngwavo: “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe.” (Kolo. 3:13) Kala lwola natukonekela vandumbwetu, natusolola kuli Setu wamwilu ngwetu twamona ndando yakusokola kupwa yayilemu. Natutwalaho ngachilihi kusakwilila Kalunga hawana kanou atuhana?

14. Jila yimwe muka tunahase kusolwelamo ngwetu twamona ndando yakusokola kupwa yayilemu chikuma?

¹⁴ Sakwililenunga Yehova handando yakusokola. Ndumbwetu wapwevo Joanna wamyaka yakusemuka 83 uze atwama mulifuchi lyaIndia ambile ngwenyi: “Ngwamona ngwami chapwa chachilemu kuvuluka ndando yakusokola hakumbi hakumbi mukulomba chami, nakusakwilila Yehova hawana kana.” Hakulomba chenu chauka, mulwezenu Yehova vyuma vyavipi vize munalingi halikumbi mangana amikonekele. Nge munalingi shili yayinene, kaha mwatela kulweza tulama vamikafwe. Navevwilila kanawa kuukalu wenu nakumikafwa kuzachisa Mbimbiliya. Navalombela hamwe nayenu nakulweza Yehova amikonekele mangana “muhinduke [kushipilitu].”—Yako. 5:14-16.

15. Mwomwo ika twatela kuwanangako lwola lwakutanga mijimbu yahanjika handando yakusokola nakushinganyekaho?

¹⁵ Shinganyekenunga handando yakusokola. Ndumbwetu wapwevo Rajamani wamyaka yakusemuka 73 ambile ngwenyi: “Omu ngweji kutanganga mijimbu yahanjika haukalu amwene Yesu, ngweji kulilanga.” Nayenu munahase kwivwa kukola chikuma kumuchima hakushinganyeka  omu MwanaKalunga vamuyanjishile chikuma. Nge namushinganyeka chikuma handando yakusokola yize ahanyine Yesu, kaha namumuzanga chikuma, nakuzanga nawa naIse. Mwatela kulitomena kutanganga mijimbu yahanjika hali Yesu, mangana chimikafwe kushinganyekanga handando yakusokola.

16. Uno kunangula vakwetu vyandando yakusokola chinahase kutukafwa ngachilihi? (Talenu muvwimbimbi wahalipapilo lyahelu.)

¹⁶ Nangulenungako vakwenu vyandando yakusokola. Nge natwambulilako vakwetu vyandando yakusokola, kaha natuyimona kupwa yayilemu. Tukwechi vinoma vyamwaza vize tweji kuzachisanga mangana tunangule vatu vatachikize ovyo Yesu atufwililile. Chakutalilaho, tunahase kuzachisa chilongesa 4 chatwama muMbuloshuwa yaMujimbu Wamwaza Wakufuma Kuli Kalunga. Chilongesa kana chatwama namutwe wakwamba ngwavo “Uno Yesu Kulishitu Apwa Iya?” Chipwe tunahase kuzachisa kapetulu 5 mumukanda waMbimbiliya Nayitunangula Vyuma Muka?, kapetulu kana atwama namutwe wakwamba ngwavo “Ndando Yakusokola hiWana Waulemu Atuhana Kalunga.” Kaha mwaka himwaka, tweji kusololanga ngwetu twamona ndando yakusokola kupwa yayilemu hakupwanga kuchilika chaKwanuka Kufwa chaYesu, nahakulanyako vakwetu vapwenga kuchilika kana. Twatokwa chikuma hakutuhana mulimo kuli Yehova wakunangula vakwetu vatachikize Yesu.

17. Mwomwo ika ndando yakusokola yapwila wana waulemu uze atuhana Kalunga?

¹⁷ Chikupu vene, tuli navyuma vyavivulu vize vyatulingisa tutwaleho lika kumona ndando yakusokola kupwa yayilemu. Ndando yakusokola yatulingisa tupwenga nausepa wakukola naYehova numba tuhu katwakupukako. Kaha nawa ndando yakusokola yikiko nayikalingisa vakenyeke milimo yaLiyavolo. (Yowa. 1, 3:8) Ndando yakusokola nawa nayikalingisa Yehova akatesemo vyuma ajinyine hakutenga mavu. Hamavu hosena nahapwa palachise. Vatu vosena navakapwamo navakazanga Yehova nakumuzachila. Shikaho hakumbi hakumbi, tuwanenuko jijila jize natusolwelamo ngwetu twamona ndando yakusokola kupwa wana waulemu chikuma uze atuhana Yehova Kalunga.