Omu Yesu apwile hachitondo chakuyanjishila, mwomwo ika ahanjikilile mazu aNdavichi atwama hali Samu 22:1?

Mazu amwe amakumishilo aze ahanjikile Yesu shimbu kanda afwenga vawasoneka hali Mateu 27:46, akwamba ngwavo: “Ove Kalunga kami, ove Kalunga kami, mwomwo ika unangusezela?” Hakuhanjika mazu kana, Yesu apwile nakutesamo mazu ahanjikile Ndavichi hali Samu 22:1. (Mako 15:34) Nachipwa chakuhenga kukukulula ngwetu Yesu ahanjikile mazu kana mwomwo Kalunga kamukingileko chipwe mwomwo kapwile nalufwelelo lwakukola halwola kanako. Yesu atachikijile kanawa ovyo atelelele kufwila, kaha alisuwile mangana vamujihe. (Mateu 16:21; 20:28) Kaha nawa atachikijile ngwenyi halwola luze navamujiha, Yehova keshi ‘kumukingako.’ (Yopa 1:10) Shikaho Yehova kakingile Yesuko, mangana Yesu asolole hatoma ngwenyi mwapwa wakushishika lika kuli Yehova palanga nakukufwa chenyi.—Mako 14:35, 36.

Kaha mwomwo ika Yesu ahanjikilile mazu amumukanda waSamu? Numba tuhu katwatachikijile kanawako, oloze tushimutwilenu havyuma vimwe vize pamo vyamulingishile ahanjike mazu kana. *

Hakuhanjika mazu kana, kutala Yesu apwile nakulumbununa ngwenyi Yehova keshi kumukinga omu navamujihako tahi? Yesu asakiwile kuhana ndando yakusokola chakuzeneka kumukafwa kuli Yehova. Hakuwana nge avwalile mujimba wautu, ngocho atelele kufwa mangana ‘afwile vatu vosena.’—Hepe. 2:9.

Hakuhanjika mazu amumukanda waSamu, kutala Yesu apwile nakusaka vatu vatachikize mijimbu yosena vasoneka muSamu kana tahi? Kushikulu vaYuleya valaminyinenga mumutwe  jivesi jajivulu jajisamu. Shikaho, hakuvanukisa mazu amuvesi yimwe yasamu, vanahase kwanuka samu yosena yamuundu. Nge omu mukiko apwile nakushinganyeka Yesu hakuvuluka aze mazu vasoneka mumukanda waSamu, kahanyi chakafwile vaka-kumukavangiza vavaYuleya vanuke upolofweto wauvulu watwama musamu kana, uze wavuluka vyakufwa chenyi. (Samu 22:7, 8, 15, 16, 18, 24) Kaha mazu amujivesi jamakumishilo musamu kana, asolola nge Wangana waYehova naukayula hamavu hosena.—Samu 22:27-31.

Uno hakuvuluka awa mazu ahanjikile Ndavichi, kutala Yesu apwile nakulumbununa ngwenyi kapwile namulongako tahi? Shimbu kanda afwenga, Yesu apwile mucheseko chakumuvangijikila ngwavo nasaula Kalunga. (Mateu 26:65, 66) Vamuhanyine mulonga kana mukachi kaufuku, oloze vahonene kuwana unjiho wakusolola chikupu nge asawile Kalunga. (Mateu 26:59; Mako 14:56-59) Shikaho, Yesu hakuvuluka mazu atwama hali Samu, pamo apwile nakulumbununa ngwenyi kavulumwine mulonga wakutela kumujihilako.

Kutala Yesu apwile nakwanukisa vatu ngwenyi Ndavichi uze asonekele eyi samu, kavamwivwililile uselewa kuli Yehovako omu apwile nakumona ukalu tahi? Chihula ahulishile Ndavichi kachasolwele nge kapwile nalufweleloko. Hanyima yakuhulisa echi chihula, Ndavichi ahanjikile ngwenyi Yehova mwakinga vatu jenyi, kaha nawa atwalileho lika kumukisula. (Samu 22:23, 24, 27) Omu mukiko chapwile nakuli Yesu. Numba tuhu Yesu uze apwa “MwanaNdavichi,” amwene vihuli omu apwile hachitondo chakuyanjishila, echi kachasolwele nge Yehova kamwivwililile uselewako.—Mateu 21:9.

Uno Yesu apwile nakulyonyinga mwomwo yakutachikiza ngwenyi Yehova kamukingile kuli vaka-koleko mangana asolole hatoma kulonga chenyi tahi? Yehova kajinyine ngwenyi Mwanenyi atela kuyanda nakufwako. Oloze chapwile ngocho omu Satana afumbukilile Kalunga. Numba tuhu Yesu kalingile chuma chakuhengako, oloze atelelele kuyanda nakufwa mangana avatule chihande chize akatwile Satana, nakuhana ndando yakusokola mangana akindulwise vyuma vize vajimbalishile visemi jetu vakulivanga. (Mako 8:31; Petu. 1, 2:21-24) Hakusaka Yesu atesemo vyuma kana, chasakiwile Yehova kuhona kukinga Yesu hatando yayindende.

Kutala Yesu apwile nakusaka kukafwa vaka-kumukavangiza vashinganyeke hachuma chalingishile Yehova amwitavise afwenga mujila kaneyi tahi? * Yesu atachikijile ngwenyi kumujiha mujila kaneyi yayipi nakumusukika hachitondo nachihukanyisa vavavulu. (Koli. 1, 1:23) Nge vaka-kumukavangiza vatachikijile chuma chalingishile Yesu vamujihe, kachi vejivile mwalumbunukilile kufwa chenyi. (Ngale. 3:13, 14) Kachi chavakafwile kumona Yesu kupwa Mulwilo keshi nge hichihwangako.

Numba tuhu katwatachikiza kanawa ovyo vyalingishile Yesu ahanjike mazu ahanjikile Ndavichiko, oloze atachikijile ngwenyi vihuli apwile nakuhitamo vyasolwele nge mukiko mwayile muchima waYehova. Omu akumishile kuhanjika awa mazu, Yesu ahanjikile ngwenyi: “Vyuma vyosena vinatesamo jino.” (Yowa. 19:30; Luka 22:37) Hakuwana nge Yehova kakingile Yesu hali kaze katando kakandendeko, echi chakafwile Yesu atesemo vyuma vyosena vize ejililile hano hamavu. Kaha nawa chamukafwile atesemo vyuma vyosena vize vasoneka “muJishimbi jaMose namuMazu aVapolofweto namuJisamu” vyakutalisa kuli ikiye.—Luka 24:44.