1-2. Lumbununenu omu vyuma vyapwile halwola Yesu ahanjikile mazu amakumishilo omu apwile hachitondo chakuyanjishila.

HALIKUMBI lyaNyisane 14, 33 C.E., Yesu vamuvangijikilile mulonga uze kalingileko, nakumusaula nakumuyanjisa. Kufumaho vamupapalilile hachitondo chakuyanjishila. Numba tuhu apwile nakwivwa kukola, oloze afwililile kuhanjika mwomwo apwile namazu amalemu aze atelelele kulweza vatu.

² Tushimutwilenu havyuma ahanjikile Yesu omu apwile hachitondo chakuyanjishila, navyuma natulinangulako, chipwe ngwetu ‘twivwililenu’ kuli Yesu.—Mateu 17:5.

3. Uno Yesu apwile nakuhanjika hali veya omu ambile ngwenyi: “Ove Tata, vakonekele”?

³ Mazu muka ahanjikile Yesu? Omu Yesu vamupapalilile hachitondo chakuyanjishila, alombele ngwenyi: “Ove Tata, vakonekele.” Uno kukonekela veya? Mazu ahanjikile nawatukafwa tutachikize vatu kana, ambile ngwenyi: “Kavatachikijile chuma vali nakulingako.” (Luka 23:33, 34) Pamo apwile nakuhanjika hali maswalale javaLoma vaze vamupapalilile hachitondo chakuyanjishila. Kavafwelelele ngwavo Yesu MwanaKalungako. Pamo nawa apwile nakushinganyeka havatu vaze vetavilile ngwavo vamusukike, vaze amwene ngwenyi pamo kulutwe vanahase kukamufwelela. (Vili. 2:36-38) Yesu kechelelele vyuma vyavipi vamulingile vimwivwise kupihya kumuchima, nakuvalamina kokoko. (Petu. 1, 2:23) Chipwe ngocho, alombele Yehova mangana akonekele vosena vaze vapwile nakumujiha.

4. Vyuma muka natulinangula kuli Yesu omu alisuwile kukonekela vaka-kole jenyi?

 ⁴ Vyuma muka natulinangula kuli Yesu hamazu ahanjikile? Twatela kukonekelanga vakwetu ngana muze alingile Yesu. (Kolo. 3:13) Vatu vamwe kuhakilako vene navausoko wetu vanahase kutufumbukila mwomwo yakuhona kwivwishisa vyuma twafwelela, novyo tweji kulingilanga vyuma vimwe mukuyoya. Ngocho vanahase kutuvangijikila, chipwe kutwivwisa sonyi, chipwe kwenyeka mikanda yetu, chipwe vene kutwivwisa woma ngwavo navatulemeka. Muchishishisa chakuvalamina koko, twatela kulomba Yehova mangana avakafwe, pamo kulutwe navaketavila muchano. (Mateu 5:44, 45) Shimbu jimwe tunahase kuchiwana kupwa chachikalu kukonekela vakwetu, kachi nge vanatulingi mwamupi chikuma. Oloze nge natutwalaho kupihilila nakuvalamina koko, kaha natulinehela ukalu etu vavene. Ndumbwetu umwe wapwevo ambile ngwenyi: “Kukonekela kachalumbununa nge ngunawahilila navyuma vyavipi vanangulingiko, nyi chipwe vatwaleho lika kungulinga mwamupiko. Oloze chalumbununa nge kangweshi nakuvalamina kokoko.” (Samu 37:8) Nge natukonekela vakwetu, kaha chili nakulumbununa nge katweshi nakwechelela vyuma vyavipi navatulinga vitwivwise kupihyako.—Efwe. 4:31, 32.

5. Uno Yesu ashikile chuma muka uze chihwanga, kaha mwomwo ika?

⁵ Mazu muka ahanjikile Yesu? Yesu vamupapalilile hamwe navihwanga vavali. Hakavanga ava vihwanga navakiko vahendelenga Yesu. (Mateu 27:44) Kutwala muze, chihwanga umwe echele kuhenda Yesu, mwomwo atachikijile ngwenyi Yesu “kalingile chuma chakuhengako.” (Luka 23:40, 41) Ou chihwanga afwelelele nawa ngwenyi Yesu navakamusangula nakupwa mwangana. Alwezele Yesu ngwenyi: “Ove Yesu, kangwanuke omu naukengila muWangana wove.” (Luka 23:42) Chikupu vene, ou chihwanga asolwele lufwelelo lwalunene. Kaha Yesu amukumbulwile ngwenyi: “Chamuchano vene nangukulweza lelo lino ngwami, naukapwa nayami [keshi muWanganako oloze] muPalachise.” (Luka 23:43) Tachikizenu ngwenu mazu ahanjikile Yesu asolola nge Yesu ivene ikiye afwelelesele uze chihwanga. Yesu atachikijile ngwenyi Ise atwama nakeke. Echi chikiko chamulingishile ashike uze chihwanga vyuma vyamwaza.—Samu 103:8.

6. Chuma muka natulinangula kuli Yesu hamazu aze ahanjikile kuli uze chihwanga?

⁶ Chuma muka natulinangula kuli Yesu hamazu ahanjikile? Yesu eji kusololanga vilinga atwama navyo Ise. (Hepe. 1:3) Yehova afwila kutukonekela, nakutusolwela keke kachi nge natupihilila nakwalumuka nakufwelela ngwetu mwatukonekela kuhichila mumanyinga aYesu Kulishitu. (Yowa. 1, 1:7) Vatu vamwe cheji kuvakaluhwilanga kufwelela ngwavo, Yehova nahase kuvakonekela jishili javo valingile kunyima. Nge mukiko mweji kushinganyekanga, kaha tachikizenu ngwenu Yesu evwililile keke chihwanga uze vapapalilile hamwe naikiye, omu aputukile kusolola lufwelelo muli ikiye. Nge uze chihwanga vamwivwilile keke, kahanyi Yehova mwahambakanamo kwivwila keke vangamba jenyi vakushishika, vaze vali nakukilikita mangana vakavangize jishimbi jenyi.—Samu 51:1; Yowa. 1, 2:1, 2.

7. Kweseka nachisoneka chaYowano 19:26, 27, mazu muka ahanjikile Yesu kuli Maliya naYowano, kaha mwomwo ika ahanjikilile mazu kana?

⁷ Mazu muka ahanjikile Yesu? (Tangenu Yowano 19:26, 27.) Yesu apwile nakushinganyeka mwakuzakamina naye, uze pamo apwile tuliwe. Ashinganyekele ngwenyi pamo vasongo jenyi navazakama naye hakumukafwa  kuwana vyuma vyakulikafwa navyo mukuyoya. Oloze alizakaminyine ou mwamuzakama kushipilitu. Kakwatwama unjiho wasolola nge halwola kana vasongo jenyi vapwile tumbajiko. Oloze Yowano apwile kaposetolo wakushishika, kaha nawa sepa lyenyi wahamuchima. Yesu amwenenga vosena vaze vapwile nakulemeselanga hamwe Yehova naikiye kupwa tanga yenyi yakushipilitu. (Mateu 12:46-50) Echi chikiko chamulingishile alweze Yowano ngwenyi azakame naye, mwomwo atachikijile ngwenyi mwamuzakama kushipilitu. Alwezele naye ngwenyi: “Tala! Mwanove ou!” Kaha alwezele nawa Yowano ngwenyi: “Tala! Noko ou!” Kufuma vene halikumbi lize, Yowano azakaminenga Maliya kwijiva nge naye wakumusema. Chikupu vene,  echi chasolola nge Yesu azakamine naye Maliya uze emanyine kuli ikiye halwola vamusukikile hachitondo.

8. Vyuma muka natulinangula kuli Yesu hamazu ahanjikile kuli Maliya naYowano?

⁸ Vyuma muka natulinangula kuli Yesu hamazu ahanjikile? Usoko twatwama nawo navandumbwetu vakushipilitu weji kukolanga chikuma kuhambakana uze twatwama nawo navausoko wetu. Vausoko wetu vanahase kutuhunga chipwe kutufumbukila. Oloze ngana muze ambile Yesu ngwenyi nge natupandama kuli Yehova naliuka lyenyi, kaha natukatambwilaho “vyeka mapapa likulukaji” kuhambakana vize tunaseze. Muliuka lyaYehova tweji kuwanangamo masetu, namanetu, navana. (Mako 10:29, 30) Uno mweji kwivwanga ngachilihi kupwa mutanga yakushipilitu yize yalinunga hamwe muzangi?—Kolo. 3:14; Petu. 1, 2:17.

9. Yesu hakuhanjika mazu atwama hali Mateu 27:46, asolola vyuma muka?

⁹ Mazu muka ahanjikile Yesu? Shimbu kanda Yesu afwenga, ahanjikile nalizu lyakutambakana ngwenyi: “Ove Kalunga kami, ove Kalunga kami, mwomwo ika unangusezela?” (Mateu 27:46) Mbimbiliya kayatulweza ovyo Yesu ahanjikilile mazu kanako. Oloze mazu ahanjikile ateselemo upolofweto wahali Samu 22:1. * Kaha nawa mazu kana asolola hatoma nge Yehova ‘kakingile’ Mwanenyi halwola kanako. (Yopa 1:10) Yesu atachikijile ngwenyi Ise amuhanyine mumavoko avaka-kole jenyi mangana vamweseke palanga nakukufwa chenyi. Kaha nawa mazu kana asolwele nge kapwile namulonga wakumujihilako.

10. Vyuma muka natulinangula kuli Yesu hamazu ahanjikile kuli Ise?

¹⁰ Vyuma muka natulinangula kuli Yesu hamazu ahanjikile? Chatete, twatela kutachikiza ngwetu Yehova keshi kutukinganga kuvyeseko vyosena navituwanako. Ngana muze omikile Yesu muvyeseko palanga nakukufwa chenyi, nayetu twatela kulizanga kumika muvyeseko, numba tuhu vyeseko kana navitutwala nakukufwa. (Mateu 16:24, 25) Chipwe ngocho, twafwelela ngwetu Kalunga keshi kutwechelela vatweseke kuhambakana noho hakumina ngolo jetuko. (Koli. 1, 10:13) Chamuchivali, nayetu vanahase kutuyanjisa chakuhona mulonga ngana muze chapwile kuli Yesu. (Petu. 1, 2:19, 20) Vaka-kole jetu veji kutuyanjisanga mwomwo tweji kuvilikanga mujimbu waWangana, kaha nawa mwomwo katwapwa tuvakukayeko. (Yowa. 17:14; Petu. 1, 4:15, 16) Yesu atachikijile ovyo Yehova amwechelelele vamuyanjise. Oloze vangamba jaYehova vamwe vanahuhwasananga ovyo Kalunga netavishilanga vyuma vyavipi vivasolokele. (Hamba. 1:3) Oloze Kalunga ketu wakeke, wakutalilila chikoki kamona vatu kana nge kaveshi nalufweleloko, avamona ngwenyi vanakusakiwa kuvavendejeka.—Koli. 2, 1:3, 4.

11. Mwomwo ika Yesu ahanjikilile mazu ahali Yowano 19:28?

¹¹ Mazu muka ahanjikile Yesu? (Tangenu Yowano 19:28.) Mwomwo ika Yesu ahanjikilile ngwenyi: “Ngunevu lipwila”? Alingile ngocho “mangana visoneka vitesemo” nganomu vasolola muupolofweto watwama hali Samu 22:15, uze wamba ngwawo: “Ngolo jami jinakumu, kaha ngunapu nge chizanda, lilimi lyami linakakachila kuushishinya wami.” Kaha nawa pamo evwile lipwila mwomwo vamuyanjishile chikuma nakulyonyinga, omu apwile hachitondo chakuyanjishila. Ngocho apwile nakusaka  vamuhaneko vyuma vimwe vize navimuvatula lipwila.

12. Vyuma muka natulinangula kuli Yesu hamazu ahanjikile akwamba ngwenyi “ngunevu lipwila”?

¹² Vyuma muka natulinangula kuli Yesu hamazu ahanjikile? Yesu kashinganyekele ngwenyi navamumona kupwa wakuhehela hakuhanjika omu apwile nakwivwako. Ngocho nayetu twatela kuhanjikanga omu tuli nakwivwa. Shimbu jimwe tunahase kushinganyeka ngwetu kachatelemo kulweza vakwetu vyuma tuli nakusakako. Oloze kachi nge tuli muukalu uze uli nakusakiwa kutukafwa kuli vakwetu, kaha katwatela kulangisa kuvalweza vatukafweko. Chakutalilaho, nge tunashinakajiwa chipwe tunaviji, twatela kulwezako vakwetu vatulanjileko vyuma kuvitanda chipwe kututwala kuchipatela. Kaha nge tunahombo, twatela kulweza kalama chipwe kala ndumbwetu wakuhya kushipilitu, uze mwevwilila kuukalu wetu, chipwe uze mwahanjika “mazu amwaza” aze nawatuhizumuna. (Vishi. 12:25) Twatela kutachikiza ngwetu vandumbwetu vatuzanga, kaha nawa vasaka kutukafwa “mulwola lwavihuli.” (Vishi. 17:17) Oloze kaveshi kuhasa kutachikiza vili mumichima yetuko. Kaveshi kuhasa kutachikiza ngwavo tuli nakusakiwa kutukafwako, kuvanga kaha nge natuvalweza.

13. Vyuma muka ateselemo Yesu hakulama kulonga chenyi palanga nakusongo?

¹³ Mazu muka ahanjikile Yesu? HaNyisane 14 nalwola lwa 15:00, Yesu ahanjikile nalizu lyakukanguka ngwenyi: “Vyuma vyosena vinatesamo jino.” (Yowa. 19:30) Mazu ahanjikile Yesu asolwele nge ateselemo vyuma vyosena amulwezele Yehova. Yesu ateselemo vyuma vyavivulu hakulama kulonga chenyi palanga nakusongo. Chatete, asolwele Satana kupwa muka-makuli. Yesu asolwele nge mutu wakukupuka nahase kulama kulonga chenyi chamokomoko naukalu wosena mwaneha Satana. Chamuchivali, Yesu ahanyine kuyoya chenyi kupwa ndando yakusokola. Kufwa chaYesu mwachimuna wakuvatula chakafwa vatu vakuhona kukupuka vapwenga nausoko wakukola naKalunga, nakupwa nalutalililo lwakukayoya haya myaka yosena. Chamuchitatu, Yesu akundwijile nakutohwesa wata waYehova wakwoloka nakufumisa katombo halijina lyaIse.

14. Vyuma muka twatela kufwila kulinga hakumbi hakumbi? Lumbununenu.

¹⁴ Vyuma muka natulinangula kuli Yesu hamazu ahanjikile? Twatela kufwila kulama kulonga chetu hakumbi hakumbi. Tutalenu vyuma ahanjikile ndumbwetu Maxwell Friend, uze apwile muka-kunangula vaka-shikola yaNgileyate Yakulinangula Mbimbiliya. Hakukunguluka chamafuchi amavulu, ndumbu Friend muchihande chenyi chapwile nakuhanjika hakushishika, ambile ngwenyi: “Kanda kulangisa kulinga chipwe kuhanjika vyuma lelo nakwamba ngwenu nangukavalinga chipwe kuvihanjika hameneko. Kutala munafwelela chikupu ngwenu nahamene namukapwako tahi? Likumbi hilikumbi namuyoya, mwatela kulama kulonga chenu, nakumona likumbi namuyoya nge likiko likumbi lyamakumishilo mukuyoya chenu.” Shikaho twatela kulama kulonga chetu likumbi hilikumbi natuyoya. Echi nachitukafwa, mwomwo numba nge natufwa tunahase kuhanjika ngwetu, “Ove Yehova, ngunalame kulonga chami mulikumbi lyalelo, nakusolola Satana kupwa muka-makuli, nakuvumbika lijina lyove nawata wove.”

15. Kweseka naLuka 23:46, uno Yesu akunyukile havyuma muka?

¹⁵ Mazu muka ahanjikile Yesu? (Tangenu Luka 23:46.) Yesu ahanjikile nakukunyuka ngwenyi: “Ove Tata, nanguseza shipilitu yami  mumavoko ove.” Yesu atachikijile ngwenyi chiyoyelo chenyi chakulutwe chapendaminyine hali Yehova, nakutachikiza nawa ngwenyi Ise mwakamwanuka.

16. Vyuma muka natulinangula kuli ndumbwetu Joshua?

¹⁶ Vyuma muka natulinangula kuli Yesu hamazu ahanjikile? Twatela kupendamina hali Yehova mukuyoya chetu chosena. Hakusaka kulinga ngocho, twatela ‘kufwelelanga Yehova namuchima wetu wosena.’ (Vishi. 3:5) Tushimutwilenu hali ndumbwetu Joshua wamyaka yakusemuka 15, uze avijile musongo waunene chikuma. Akanyine kumuka mujila yize yalimbalaka najishimbi jaKalunga. Omu apwile kwakamwihi nakufwa, alwezele naye ngwenyi: “Mama, nguli mumavoko aYehova. . . . Ngunafwelela chikupu ngwami Yehova mwakangusangula. Atachikiza vili mumuchima wami, kaha nawa ngwamuzanga chikuma.” * Mutu himutu, atela kulihulisa ngwenyi, ‘Nge nangumona ukalu waunene wakulinga nahameso wi, kutala ngunahase kuhaka kuyoya chami mumavoko aYehova, nakufwelela ngwami mwakangwanuka tahi?’

17-18. Vyuma muka tunalinangula muchihande chino? (Talenu nawa lipwata lyakwamba ngwavo, “ Vyuma Natulinangula Kuli Yesu haMazu Amakumishilo Ahanjikile.”)

¹⁷ Vishina muka vyavilemu tunahase kulinangula kuli Yesu hamazu amakumishilo ahanjikile? Vanatukolezeza nge twatela kukonekelanga vakwetu, nakufwelela ngwetu nayetu nawa Yehova mwatukonekelanga. Chapwa hikutokwa chachinene kupwa mutanga yakushipilitu muze mwatwama vandumbwetu vanahase kutukafwa. Oloze hakusaka vatukafwe, twatela kuvalweza ukalu wetu. Twatachikiza ngwetu Yehova mwatukafwa tumike mukala ukalu. Tunamono kulema chakulama kulonga chetu hakumbi hakumbi, nakumona kala likumbi natuyoya nge likiko lyamakumishilo mukuyoya chetu. Kaha nawa twatela kumona ngwetu kuyoya chetu tunachihake mumavoko aYehova.

¹⁸ Chikupu vene, mazu ahanjikile Yesu omu apwile hachitondo chakuyanjishila akwechi ulumbunwiso waulemu kuli etu tuvosena. Kachi nge natuzachisa vyuma vyosena tunalinangula muchihande chino, kaha nachisolola nge tuli nakukavangiza mazu ahanjikile Yehova kutalisa kuli Mwanenyi ngwenyi: “Mwivwililenunga.”—Mateu 17:5.