CHIHANDE CHAKULINANGULA 17
Yehova Amizanga
“Yehova azanga vatu jenyi.”—MIJI. 2, 2:11.
MWASO 108 Zangi yaKalunga Yakwilila
VYUMA NATUSHIMUTWILA *
Setu wamwilu “atuzanga” tuvosena (Talenu palangalafu 1)
1. Vyuma muka eji kumonanga Yehova muli vangamba jenyi?
YEHOVA KALUNGA “azanga vatu jenyi.” (Miji. 2, 2:11) Mazu kana eji kutwivwisanga kuwaha chikuma. Yehova eji kumonanga vilinga vyetu vyamwaza, nakutufwelela ngwenyi tunahase kumuzachila. Ngocho eji kutukafwanga tupwenga tumasepa jenyi. Kachi nge natupwa lika vakushishika kuli Yehova, kaha mwapandama lika kuli etu.—Yowa. 6:44.
2. Mwomwo ika vandumbwetu vamwe cheji kuvakaluhwilanga kufwelela ngwavo Yehova avazanga?
2 Vandumbwetu vamwe veji kuhanjikanga ngwavo, ‘Ngwatachikiza ngwami Yehova azanga vangamba jenyi mwalizavu, uno nangutachikiza ngachilihi ngwami azanga mutu himutu?’ Vyuma muka vinahase kulingisa mutu ahulise chihula kana? Ndumbwetu Oksana *, uze amwene ukalu omu apwile kanyike ambile ngwenyi: “Ngwawahililile chikuma omu vangumbapachishile nomu ngwaputukile upayiniya. Oloze omu mwahichile myaka 15, ngwaputukile kwanuka ukalu uze ngwamwenenga omu ngwapwile ngukanyike. Ngocho ngwakukulwile ngwami Yehova keshi nakungwivwila uselewa, kaha nawa keshi nakunguzangako.” Ndumbwetu wapwevo Yua, uze apwa payiniya naikiye amwene ukalu omu apwile kanyike, kaha ambile ngwenyi: “Ngwalihanyine kuli Yehova mwomwo ngwasakile kumwivwisa kuwaha, oloze ngwamwene ngwami keshi kunguzangako.”
3. Vyuma muka natushimutwila muchihande chino?
3 Nayenu munahase kuzanga chikuma Yehova, oloze munahase kuhuhwasana numba nge amizanga nganomu chapwile kuli vandumbwetu tunavuluka. Mwomwo ika mwatela kufwelela chikupu ngwenu Yehova amizanga? Nge mweji kushinganyekanga ngwenu Yehova kamizangako, kaha vyuma muka navimikafwa mangana mulihende kuvishinganyeka kana. Tuwanenu muvakumbulwila vihula kana.
KATWATELA KUHUHWASANA NGWETU YEHOVA KATUZANGAKO
4. Mwomwo ika katwatela kuhuhwasana ngwetu Yehova katuzangako?
4 Zangi yapwa yayilemu chikuma mukuyoya chamutu. Kachi nge twakunyuka ngwetu Yehova atuzanga kaha nawa eji kutukafwanga, nachitulingisa tumuzachile namuchima wetu wosena chamokomoko naukalu natumona. Oloze nge natuhuhwasana numba nge Yehova atuzanga, kaha ‘ngolo jetu najikeha.’ (Vishi. 24:10) Kachi nge natuhomba nakushinganyeka ngwetu Yehova katuzangako, kaha Satana mwatufungulula.—Efwe. 6:16.
5. Vyuma muka vinasolokanga kuli vandumbwetu vamwe vaze vanahuhwasananga numba nge Kalunga avazanga?
5 Vandumbwetu vamwe vanazeye kushipilitu mwomwo yakuhuhwasana numba nge Yehova avazanga nyi chiku. Ndumbwetu James uze apwa kalama ambile ngwenyi: “Numba tuhu ngwazachilililenga haMbetele nakulivwisa kuwaha kuzachila muchikungulwilo chize chazachisa lilimi lyeka, oloze ngwahuhwasanyinenga numba nge Yehova etavililile milimo ngwapwile nakumuzachila. Shimbu jimwe ngwahuhwasanyinenga numba nge Yehova evwilililenga kukulomba chami.” Ndumbwetu Eva, uze azata mulimo washimbu yosena ambile ngwenyi: “Ngwamwene ngwami chapwa hiponde kuhuhwasana numba nge Yehova atuzanga mwomwo chinahase kutulingisa tuhone kumuzachila natwima, nakuhona kupwa vakuwahilila.” Ndumbwetu Michael, uze apwa payiniya washimbu yosena kaha nawa kalama ambile ngwenyi: “Kachi nge mutu mwahuhwasana numba nge Yehova amuzanga, kaha nahase kuzeya kushipilitu.”
6. Vyuma muka twatela kulinga nge tunaputuka kuhuhwasana ngwetu Kalunga katuzangako?
6 Vyakutalilaho vyavandumbwetu tunashimutwila vyasolola ponde yinahase kufumamo kachi nge natushinganyeka ngwetu Yehova katuzangako. Vyuma muka twatela kulinga kachi nge tunaputuka kushinganyeka ngwetu Kalunga katuzangako. Twatela kuzata nangolo mangana tufumise vishinganyeka kana mumichima yetu. Twatela kulomba Yehova atukafwe tufumise ‘vishinganyeka vinakutuyanjisa’ mumichima yetu, nakushishisamo ‘kuunda chaKalunga chize nachikinga michima yetu navishinganyeka vyetu.’ (Samu 139:23; kwinyikila chamwishi; Fwili. 4:6, 7) Anukenu ngwenu navandumbwenu vanakumona ukalu kana. Kaha nawa navangamba jaYehova vakushikulu valipikilenga naukalu kana. Tutalenu vyuma natulinangula kuli kaposetolo Paulu.
VYUMA NATULINANGULA KULI PAULU
7. Ukalu muka amwene Paulu?
7 Kutala shimbu jimwe mweji kumonanga ngwenu milimo yinamivulila chikuma, kaha kamweshi kuhasa kutesamo milimo yosenako tahi? Nge mukiko mweji kwivwanga, kaha chakutalilaho chaPaulu nachimikafwa. Alizakaminyine “havikungulwilo vyosena.” (Koli. 2, 11:23-28) Uno mwaviza misongo yayinene yize yeji kumihombesanga tahi? Paulu alipikilenga naukalu uze wapwile nge “mungonga mumujimba” wenyi, ukalu kana pamo wapwile musongo uze asakile ngwenyi ukume. (Koli. 2, 12:7-10) Uno mweji kuhombanga mwomwo yatutenga twenu tahi? Omu mukiko chapwile nakuli Paulu shimbu jimwe. Alyambilenga ngwenyi “omu ngwavindama ami!” mwomwo yakushinganyeka hatutenga twenyi.—Loma 7:21-24.
8. Chuma muka chakafwile Paulu omike muukalu?
8 Paulu atwalileho lika kuzachila Yehova chamokomoko nakala ukalu uze amwenenga mukuyoya chenyi. Chuma muka chamukafwile? Numba tuhu atachikijile tutenga twenyi, oloze atwalileho lika kufwelela mundando yakusokola. Paulu atachikijile mazu ahanjikile Yesu akwamba ngwawo ‘weshowo mwamufwelela [Yesu] mwakapwa nakuyoya chahaya myaka yosena.’ (Yowa. 3:16; Loma 6:23) Chikupu vene, Paulu naikiye afwelelele mundando yakusokola. Atachikijile ngwenyi Yehova eji kukonekelanga navatu vaze veji kulinganga shili yayinene, kachi nge navapihilila nakwalumuka.—Samu 86:5.
9. Vyuma muka natulinangula kuli Paulu kweseka namazu ahanjikile hali Wavaka-Ngalesha 2:20?
9 Paulu atachikijile nawa ngwenyi Kalunga amuzangile mwomwo atumine Mwanenyi kwiza nakumufwila. (Tangenu Wavaka-Ngalesha 2:20.) Tutalenu mazu akukolezeza ahanjikile Paulu atwama hamukanda Wavaka-Ngalesha 2:20, ambile ngwenyi: “MwanaKalunga . . . anguzangile ami nakulyecha ivene hali ami.” Paulu kashinganyekele ngwenyi Kalunga keshi kumuzanga mwomwo yavilinga vyavipi alingilenga kunyimako. Kashinganyekele ngwenyi, ‘Yehova azanga kaha vandumbwami, oloze kazanga yamiko.’ Paulu anukishile vandumbwenyi vamuLoma ngwenyi: “Shimbu twapwilenga tuvaka-shili, Kulishitu atufwilile.” (Loma 5:8) Kakweshi chuma chize nachihonesa Kalunga kutuzangako.
10. Mukanda Wavaka-Loma 8:38, 39 watunangula ika?
10 Tangenu Wavaka-Loma 8:38, 39. Paulu atachikijile chikupu ngwenyi Kalunga atwama nazangi yayinene. Asonekele ngwenyi kakweshi chuma chinahase ‘kutuhandununa kuzangi yaKalungako.’ Paulu atachikijile omu Yehova atalilile chikoki vaIsalele, nomu nawa amwivwililile keke. Mujila yikwavo tunahase kwamba ngwetu, ‘Hakuwana nge Yehova atumine Mwanenyi mangana ezenga nakungufwila, shikaho kangweshi kuhasa kuhuhwasana numba nge Yehova anguzangako.’—Loma 8:32.
Chuma chachilemu kuli Kalunga shina, vyuma tunakulinga oholyapwa, navize natukalinga kulutwe, keshi vyuma vyavipi vize twalingile kunyimako (Talenu palangalafu 11) *
11. Mwomwo ika Paulu atachikijile chikupu ngwenyi Kalunga amuzanga, numba tuhu alingile jishili ngana jize vavuluka hali WaChimoteu 1, 1:12-15?
11 Tangenu WaChimoteu 1, 1:12-15. Pamo Paulu apwile nakwivwanga kupihya, omu ashinganyekelenga havyuma vyavipi alingilenga shimbu kanda apwenga muka-Kulishitu. Chikupu vene, echi chikiko chalingishile Paulu alivuluke ngwenyi “muka-shili chikuma.” Shimbu kanda Paulu alinangule muchano, ayanjishilenga chikuma vaka-Kulishitu, nakuvahaka mutumenga, kaha veka etavilile mangana vavajihe. (Vili. 26:10, 11) Achishinganyekenu omu kachi evwile Paulu nge awanyine muka-Kulishitu wamukweze, uze ukwechi visemi jenyi vaze etavilile ngwenyi vavajihe. Paulu aliveyele havyuma vyavipi alingilenga kunyima, oloze atachikijile ngwenyi keshi kuhasa kuvyololako. Etavilile ngwenyi Kulishitu amufwililile, ngocho asonekele ngwenyi: “Halikoji lyalinene lyaKalunga hakiko ngunapwila nge omu nguli.” (Koli. 1, 15:3, 10) Chishina muka natulinangula kuli Paulu? Itavilenu ngwenu Kulishitu amifwililile, kaha nawa amikafwile mangana mupwenga nausoko wakukola naYehova. (Vili. 3:19) Chuma chachilemu kuli Kalunga shina vyuma tunakulinga oholyapwa, navize natukalinga kulutwe, keshi vyuma vyavipi twalingile kunyima numba twapwile tuVinjiho jaYehova chipwe chiku.—Isa. 1:18.
12. Uno mazu atwama hali WaYowano 1, 3:19, 20 nawatukafwa ngachilihi kachi nge tweji kulivwanga kupwa tuvamokomoko chipwe ngwetu Kalunga katuzangako?
12 Chinahase kumikaluhwila kwitavila ngwenu Yesu amifwililile hashili yenu. Mwomwo ika? Mwomwo yakuhona kukupuka, michima yetu yinahase kutwonga, nakushinganyeka ngwetu twapwa tuvamokomoko, chipwe kushinganyeka ngwetu Kalunga katuzangako. (Tangenu WaYowano 1, 3:19, 20.) Kachi nge tunaputuka kupwa navishinganyeka kana, kaha twatela kwanuka ngwetu “Kalunga ahambakana michima yetu.” Setu wamwilu atuzanga, kaha nawa mwatukonekela numba tuhu natushinganyeka ngwetu katuzangako, kaha nawa keshi kutukonekelako. Twatela kukunyuka nakwitavila ngwetu Yehova atuzanga. Vyuma navitukafwa tulinge ngocho shina kulinangulanga Mazu enyi lwola lwosena, nakulombanga kuli ikiye lwola lwosena, nakulikatanga navangamba jenyi lwola lwosena. Mwomwo ika chapwila chachilemu kulinga vyuma kanevi?
MASEPA VAKUSHISHIKA, NAKULINANGULA MBIMBILIYA, NAKULOMBA VINAHASE KUTUKAFWA
13. Uno kulinangulanga Mazu aKalunga chinahase kutukafwa ngachilihi? (Talenu nawa lipwata lyakwamba ngwavo, “ Kutanga Mbimbiliya Cheji Kutukafwanga.”)
13 Kulinangula Mazu aKalunga hakumbi hakumbi nachitukafwa tutachikize vilinga vyavivulu atwama navyo Yehova. Nachitukafwa nawa tutachikize ngwetu Yehova atuzanga. Kushinganyeka havyuma natutanga muMazu aKalunga hakumbi hakumbi, nachitukafwa ‘twolole vyuma’ muvishinganyeka vyetu, namumichima yetu. (Chimo. 2, 3:16) Ndumbwetu Kevin uze apwa kalama, uze alimwenenga kupwa wamokomoko ambile ngwenyi: “Kutanga Samu 103 nakushinganyekaho changukafwile ngwolole vishinganyeka vyami, nakutachikiza omu Yehova angumona.” Eva uze twavulukanga hakavanga ambile ngwenyi: “Hakumbi hakumbi ngweji kushinganyekanga vyuma vize amona Yehova kupwa vyavilemu. Echi cheji kungukafwanga nguunde muchima nakuzamisa lufwelelo lwami.”
14. Uno kulomba chinahase kutukafwa ngachilihi?
14 Lombenunga shimbu yosena. (Teso. 1, 5:17) Hakusaka tutunge usepa wamwenemwene namutu, chasakiwa kushimutwilanga nenyi lwola lwosena. Omu mukiko chapwa nakutunga usepa naYehova. Nge natulomba Yehova nakumulweza vishinganyeka vyetu, nomu tuli nakwivwa, kaha natusolola ngwetu twamufwelela, nakutachikiza ngwetu atuzanga. (Samu 94:17-19; Yowa. 1, 5:14, 15) Yua uze twavulukanga hakavanga ambile ngwenyi: “Omu ngweji kulombanga, ngweji kulwezanga Yehova omu linatambuka likumbi lyosena. Ngweji kumulwezanga nawa vishinganyeka vyami nomu nguli nakwivwa. Chikupu vene, echi chinangukafwe ngutachikize ngwami, Yehova apwa chisemi uze azanga vana venyi, keshi nge himukulwane wakapaniko.”—Talenu lipwata lyakwamba ngwavo “ Kutala Mwautangaho Lyehi Tahi?”
15. Uno Yehova asolola ngachilihi zangi yenyi kuli etu?
15 Likatenu namasepa vakushishika mwomwo vapwa wana wakufuma kuli Yehova. (Yako. 1:17) Setu wamwilu eji kusololanga ngwenyi atuzanga, hakutuhana vandumbwetu vaze ‘vatuzanga shimbu yosena.’ (Vishi. 17:17) Mukanda uze asonekelele vaka-Kolose, Paulu avulukile vaka-Kulishitu vamwe vaze vamukafwile, nakuvavuluka ngwenyi vapwile “vaka-kumuvendejeka.” (Kolo. 4:10, 11) Yesu Kulishitu naikiye asakwililile vangelo navatu vaze vamukafwile.—Luka 22:28, 43.
16. Uno masepa jetu vakushishika vanahase kutukafwa ngachilihi tupandame kuli Yehova?
16 Uno mweji kwitavilanga masepa jenyi vakushishika vaze vapwa wana wakufuma kuli Yehova vamikafwe tahi? Kulwezako sepa lyetu wakuhya kushipilitu ukalu wetu, kachasolola nge twapwa vakuhehelako, oloze chinahase kutukinga. Ndumbwetu James twavulukanga hakavanga ambile ngwenyi: “Kutunga usepa wamwaza navaka-Kulishitu vakuhya chinangukafwe chikuma. Nge ngunalizakamina, ava masepa jami veji kungwivwililanga, nakungulweza ngwavo vanguzanga. Kahechi cheji kungukafwanga ngutachikize ngwami Yehova anguzanga, kaha nawa anguzakama.” Ngocho chapwa chachilemu kutunga usepa wakukola navandumbwetu.
TWAMENUNGA MUZANGI YAYEHOVA
17-18. Iya twatela kwivwilila, kaha mwomwo ika?
17 Satana kasaka etu tutwaleho lika kulinga vyuma vyakwolokako. Asaka tushinganyeke ngwetu Yehova katuzangako, kaha nawa katwatamo kutuyovolako. Oloze nganomu tunalinangula, vishinganyeka kana vyapwa vyakuhenga.
18 Yehova amizanga, kaha nawa amimona kupwa muvavalemu. Nge natumwononoka, kaha ‘natutwamanga muzangi yenyi’ haya myaka yosena ngana mwaYesu. (Yowa. 15:10) Shikaho kanda kwivwilila Satana chipwe muchima wenu vimihungumwise mangana mushinganyeke ngwenu Yehova kamizangako. Oloze ivwililenunga Yehova uze eji kumonanga vyuma vyamwaza muli etu tuvosena. Tachikizenu ngwenu Yehova “azanga vatu jenyi,” kuhakilako vene nayenu.
MWASO 141 Kuyoya Chapwa Chakukomwesa
^ par. 5 Vandumbwetu vamwe veji kushinganyekanga ngwavo Yehova kavazangako. Muchihande chino, natushimutwila ovyo twatela kufwelela ngwetu Yehova atuzanga mutu himutu. Natushimutwila nawa omu tunahase kuhonesa vishinganyeka vyakuhuhwasana numba nge Yehova atuzanga nyi chiku.
^ par. 2 Majina amwe vanawalumuna.
^ par. 67 MAZU AKULUMBUNUNA MUVWIMBIMBI: Shimbu kanda Paulu alinangule muchano, ayanjishilenga vaka-Kulishitu, kaha vamwe avatwalile mutumenga. Omu afwelelele Yesu, alumwine vilinga vyenyi nakujikijisa vandumbwenyi, vamwe vapwile vausoko wavaze ayanjishile Paulu.
