Lushingo valulumbununa ngwavo lwapwa “lushiko lwajila luze mutu nahase kushika hakusaka kutesamo vyuma vimwe, kakavulu mutu eji kuvulukanga Kalunga . . . kupwa chinjiho.” Lushingo kana lunahase kupwa lwakusoneka chipwe lwakuhanjika kaha hakanwa.

Vatu vamwe vanahase kuhanjika ngwavo chapwa chakuhenga kulishinga lushingo mwomwo Yesu ahanjikile ngwenyi: “Kanda mulishinga numba hahandendeko . . . Oloze lizu lyenu lyakwamba ngwenu ‘Eyo’ lipwenga vene eyo, kaha ‘Nduma,’ lipwenga vene nduma, mwomwo cheshocho chakuhakilako kumazu awa chinapu chakufuma kuli uze wakuhuka.” (Mateu 5:33-37) Chipwe ngocho, Yesu atachikijile ngwenyi Jishimbi jaMose jasakiwile kulishinga, kaha nawa vangamba jaKalunga vamwe vakushishika vanalishinginga jishingo. (Kupu. 14:22, 23; Kulo. 22:10, 11) Kaha nawa atachikijile ngwenyi naYehova eji kulishinganga. (Hepe. 6:13-17) Shikaho, Yesu kalumbunwine ngwenyi vatu kavatela kulishingako. Oloze asolwele nge vatu kavatela kulishinga nahatuvyuma twatundendeko. Twatela kumonanga mazu natuhanjika kupwa amuchano, nakulinga vyuma kweseka nomu tunashiki.

Jino natulinga ngachilihi kachi nge vanatulweze tulishinge lushingo? Chatete, tachikizenu ngwenu mwatela kulinga vyuma kweseka nomu namulishingavyo. Nge kamwatachikijile kanawa vyuma kanako, kaha nachiwaha kuhona kulishinga. Mazu aKalunga atuhuhumuna ngwawo: “Chinawahe kuli ove kuzeneka kushika lushiko kuhambakana kushika lushiko nakuzeneka kulutesamo.” (Kwambu. 5:5) Chamuchivali, shinganyekenu jindongi jamuMbimbiliya jize jinapandama kuchihande namulishinga, kaha sakulenu jino kulinga vyuma kweseka nachivezu chenu. Jindongi jimwe shina eji jinakavangizaho.

Kulishinga chimwe kachalimbalaka navyuma yahanjika Mbimbiliyako. Chakutalilaho, Vinjiho jaYehova veji kulishikanga jishiko nge vali nakwingila muulo. Kaha eji jishiko veji kulishikanga valunga napwevo japwa lushingo nahalwo. Veji kulishikanga eji jishiko kumeso aKalunga navatu kupwa vinjiho vaze vanamono nakwivwa vyuma vanalishingi valunga napwevo ngwavo navatwalaho lika kulizanga, nakulivwisa kuwaha muulo nakulivumbika umwe namukwavo. Kaha navatwalaho kulinga ngocho “hamakumbi osena aze navayoyanga.” (Vinjiho jaYehova vamwe vaze veji kwingilanga muulo kaveshi kuhanjika mazu kana munona munonako, oloze navakiko veji kulishikanga jishiko kumeso aKalunga.) Ngocho veji kuvavulukanga jino kupwa lunga napwevo vaze vanalimbate, kaha vatela kutwalaho kutwama muulo wavo mukuyoya chavo chosena. (Kupu. 2:24; Koli. 1, 7:39) Shikaho, kulongesa kanechi chapwa chakutamo, kaha nawa mukiko mwaya namuchima waKalunga.

Kulishinga chimwe chalimbalaka navyuma yahanjika Mbimbiliya. Muka-Kulishitu wamuchano keshi kulishinga lushingo lwakwitavila kuzachisa vitwa mangana akinge lifuchi lyenyi chipwe akane lufwelelo lwenyiko. Kulinga chuma kana chapwa kulikanga kuli  Kalunga. Vaka-Kulishitu ‘kavapwa vamukayeko,’ shikaho, katwazana muvikokojola vyalifuchi najijitako.—Yowa. 15:19; Isa. 2:4; Yako. 1:27.

Kulishinga chimwe chapendamina hachivezu chamutu. Shimbu jimwe chasakiwa kukekesa kanawa vyuma shimbu kanda tulishinge lushingo, mwomwo Yesu ambile ngwenyi: “Hanenunga vyuma vyaKesale kuli Kesale, oloze vyuma vyaKalunga kuli Kalunga.”—Luka 20:25.

Chakutalilaho, achishinganyekenu muka-Kulishitu ali nakusaka kutambula mukanda wakumwitavisa kutwama mulifuchi lyeka chipwe kutambula chitupa chakutambuka nacho mumafuchi eka, kaha fulumende nayimulweza alishinge lushingo numba atambule. Kachi nge mulifuchi kana kulishinga nachilingisa mutu alinge vyuma vize vyalimbalaka najishimbi jaKalunga, kaha chivezu chenyi nachimukafwa ahone kulishinga. Kaha fulumende kana yinahase kulweza mutu alumuneko mazu alushingo vasoneka lyehi mangana alishinge kweseka nomu nachimwitavisa chivezu chenyi.

Kwalumunako mazu alushingo mwalishinga mutu chalitombola nalundongi lwatwama hali Wavaka-Loma 13:1, luze lwamba ngwalwo: “Mutu himutu aluukenga kuli vaze vali nawata.” Muka-Kulishitu nahase kwitavila kulishinga mwomwo atachikiza ngwenyi kaheshi ukaluko hakuwana nge Kalunga etavisa vaka-Kulishitu valiluulenga kuli vaze vali nawata.

Kaha nawa mutu eji kusakiwanga kuzachisa chivezu chenyi nge navamulweza azachise chinoma chipwe chilyo chamujimba oku ali nakulishinga lushingo. Kushikulu vatu vamuLoma navaka-Sukute valishingilenga kuzachisa jipoko jamikwale, echi chalumbunwine nge vapwile nakulomba kuli kalunga wachifwanyisa mangana vasolole nge vamufwelelele avakafwe. VaHelase nawa vazundwilenga livoko mwilu oku vali nakulishinga. Echi chasolwele nge vashinganyeke ngwavo kuli kalunga uze apwile nakwilila kuvyuma vapwile nakuhanjika nakumona vyuma vapwile nakulinga, uze nawa vatu vatela kukalyambulula vavene kuli ikiye.

Tunatachikiza ngwetu ngamba yaYehova keshi kuhasa kulishinga hakuzachisa kala chifwanyisa chize chapandama kukulemesa chamakuliko. Uno namulinga ngachilihi kachi nge vaka-zango yakusopela navamilweza musalike livoko lyenu haMbimbiliya mangana mulishinge nakusolola nge muli nakuhana unjiho wamuchano? Nge vyuma kana vinamisolokela, kaha pamo chivezu chenu chinahase kumitavila mulinge ngocho, mwomwo Mbimbiliya yavuluka vangamba jaKalunga vaze vazachishile mavoko avo hakulishinga lushingo. (Kupu. 24:2, 3, 9; 47:29-31) Chapwa chachilemu kutachikiza ngwenu nge namulishinga mujila kaneyi, muli nakulishinga kumeso aKalunga nakusolola ngwenu vyuma namuhanjika vyamuchano. Mwatela kulizanga hakukumbulula mwakwoloka kala chihula navamihulisa.

Hakuwana nge twamona usoko wetu naYehova kupwa waulemu chikuma, shikaho twatela kulomba nakushinganyeka kanawa havyuma tuli nakusaka kulishinga mangana tuhone kulemeka chivezu chetu chipwe kuhokola jindongi jamuMbimbiliya. Shikaho nge namusakula kulishinga lushingo, kaha mwatela kululama nakulutesamo.—Petu. 1, 2:12.