CHIHANDE CHAKULINANGULA 18
Likolezezenunga naVakwenu haKukunguluka chaChikungulwilo
“Tulihakenunga michima navakwetu mangana . . . , [tulikolezezenga] navakwetu.”—HEPE. 10:24, 25.
MWASO 88 Ngulweze Jijila Jove
VYUMA NATUSHIMUTWILA a
1. Mwomwo ika tweji kukumbulwilangaho nge tuli nakukunguluka?
MWOMWO ika tweji kuyilanga kukukunguluka chachikungulwilo? Chuma chachilemu shina, mangana twalise Yehova. (Samu 26:12; 111:1) Tweji kuyanga nawa kukukunguluka mangana tulikolezeze navandumbwetu mulwola luno lwalukalu. (Teso. 1, 5:11) Shikaho nge tunemika livoko nakukumbululaho, kaha tuli nakwalisa Yehova nakukolezeza nawa vandumbwetu.
2. Uno lwola muka tweji kupwanga nakutokwa chakwazanaho nge tuli nakukunguluka?
2 Chalumingo hichalumingo tweji kupwanga nakutokwa chakwazanaho hakukunguluka. Chakutalilaho, tunahase kwazana haChilongesa chaKaposhi Kakutalila chize cheji kupwangako hakukunguluka chakusongo yachalumingo. Kaha nawa hakukunguluka chamukachi kachalumingo, tunahase kukumbulula hachihanda chaVishina VyamuMazu aKalunga nahaChilongesa chaMbimbiliya chaChikungulwilo nahavihande vyeka vize vyasakiwa kushimutwila navaze vali mulizavu.
3. Ukalu muka tunahase kumona, kaha chisoneka chaWavaHepeleu 10:24, 25 chinahase kutukafwa ngachilihi?
3 Tuvosena twafwila kwalisa Yehova nakukolezeza vandumbwetu. Oloze nge tuli nakusaka kwazanaho hakukunguluka, tunahase kumona ukalu. Tunahase kwivwa woma kukumbululaho, chipwe pamo tunahase kufwila kukumbululaho, oloze kaveshi kututongola lwola lwosena tukumbululeho, ngana muze tuli nakusakako. Uno tunahase kufungulula ngachilihi ukalu kana? Tunahase kuwana muvakumbulwila chihula kana mumukanda uze kaposetolo Paulu asonekelele vaHepeleu. Omu apwile nakuhanjika hakulema chakulikungulwilanga hamwe, ambile ngwenyi, chuma twatela kufwila kulinga shina ‘kulikolezezanga navakwetu.’ (Tangenu WavaHepeleu 10:24, 25.) Nge tunamono ngwetu tunahase kukolezeza vandumbwetu numba vene mutumazu twatundende, kaha nachitulingisa tufwile kukumbululaho. Kaha nawa nge kaveshi kututongolanga kakavulu mangana twazanehoko, twatela kuwahilila hakutachikiza ngwetu vakwetu nawa navapwa nakutokwa chakukumbululaho.—Petu. 1, 3:8.
4. Vishina muka vitatu vize natushimutwila muchihande chino?
4 Muchihande chino, natuvangila kushimutwila omwo tunahase kulikolezezelamo navakwetu nge twatwama muchikungulwilo chachindende muze mwatwama vaka-kukumbululaho vavandende kaha. Natushimutwila nawa omwo tunahase kulikolezezelamo navakwetu muchikungulwilo chachinene muze mwatwama vatu vavavulu veji kwimikanga mavoko mangana vakumbululeho. Chamakumishilo, natushimutwila hajijila jinahase kutukafwa tuhanjikenga vyuma vize navikolezeza kanawa vakwetu.
LIKOLEZEZENUNGA NAVAKWENU MUCHIKUNGULWILO CHACHINDENDE
5. Uno natuhasa kulikolezeza ngachilihi navakwetu nge mulizavu muli vatu vavandende?
5 Chikungulwilo chachindende chipwe lizavu kamwatwama vatu vavavulu vaze veji kukumbululanga hakukungulukako. Lwola lumwe muka-kutetekela nahase kuvandaminako hakapyapya kakandende numba jino kusoloke mutu mwalisuula kwimika livoko akumbulule. Halwola kana kukunguluka cheji kwivwisanga uli, ngocho kacheshi kukolezeza vatuko. Jino vyuma muka munahase kulinga? Halwola lwakufwana ngana, lisuulenunga kwimika livoko mapapa kakavulu. Nge namulinga ngocho, kaha namukunyula vakwenu navakiko vazanemo chikuma.
6-7. Tunahase kukehesako ngachilihi woma uze tweji kwivwanga hakusaka kukumbululaho?
6 Namulinga ngachilihi nge muli nakwivwa woma kukumbululaho? Vatu vavavulu mukiko veji kwivwanga. Oloze hakusaka mukolezeze vandumbwenu, zatenu nangolo muwane jijila jakukeheselamo woma kana. Uno munahase kulinga ngachilihi ngocho?
7 Chuma chinahase kumikafwa shina kuhehwojola vishina vasoneka mujimangazini jakunyima jaKaposhi Kakutalila. b Chakutalilaho, wahishilenunga chimweza. (Vishi. 21:5) Nge namwivwishisa kanawa chihande, kaha namupwa vakukasunuka kukumbululaho. Kaha nawa kumbululenunga mukavatu. (Vishi. 15:23; 17:27) Kukumbulula mukavatu nachimikafwa muhone kulizakamina. Nge namukumbulula mumazu amandende, kaha chinahase kupwa chachashi vandumbwenu kwivwishisa vyuma munahanjika, kuhambakana kuhanjika mazu amavulu muze namupwa vishina vyavivulu. Kuhanjika mukavatu mumazu enu nachisolola nge mwahitulukanga chimweza, kaha nawa chihande munachivwishisa.
8. Uno Yehova eji kumonanga ngachilihi kukilikita chetu?
8 Uno namulinga ngachilihi nge nahanyima yakuzachisa jijila kana, muchili lika nakwivwa woma kukumbululaho mapapa kakavulu? Tachikizenu ngwenu Yehova mwevwa kuwaha hakukilikita chenu. (Luka 21:1-4) Yehova katulweza tulinge vyuma vize katweshi kuhasako. (Fwili. 4:5) Litomenenu vyuma muli nakusaka kulinga, nakufwila kuvitesamo nakulomba nawa Yehova amikafwe muunde muchima. Hakavanga munahase kulitomena kukumbululanga mukavatu.
LIKOLEZEZENUNGA NAVAKWENU MUCHIKUNGULWILO CHACHINENE
9. Mwomwo ika chinahase kupwila chachikalu kukumbululaho muchikungulwilo chachinene?
9 Nge muchikungulwilo chenu mwatwama vaka-kwambulula vavavulu, kaha munahase kumona ukalu weka. Pamo vandumbwetu vavavulu veji kuvulanga kukumbululaho ngocho muka-kutetekela nahase kumisezaho mapapa kakavulu. Chakutalilaho, Mulemba nalivwisanga kuwaha kwazanaho hakukunguluka. c Achimona kupwa hijila yakwalishilamo Yehova nakukolezeza vakwavo, kaha nawa hijila yakuzamishilamo lufwelelo lwenyi muvyuma yanangula Mbimbiliya. Oloze omu alukililile kuchikungulwilo chachinene kavavulilenga kumutongola akumbululehoko. Shimbu jimwe kukunguluka chalikuminyinyinenga chakuzeneka kumutongola akumbululeho. Ambile ngwenyi: “Ngwevwilenga kupihya chikuma kumuchima. Ngwevwilenga nge vanahono kunguhana chuma ngwafwila. Kaha omu chuma kana changusolokelelenga mapapa kakavulu ngwashinganyekelenga ngwami pamo muka-kutetekela kasakile ngukumbululehoko.”
10. Vyuma muka twatela kulinga mangana vatutongolenga tukumbululeho?
10 Kutala nayenu mwevwaho lyehi ngana muze evwile Mulemba tahi? Nge mukiko kaha munahase kupwa mucheseko chakusaka kulitwamina kukumbululaho nakutwama kaha nakwivwilila. Oloze kanda kulitwamina kukumbululahoko. Vyuma muka munahase kulinga? Munahase kuwahisa vishina vyavivulu vize namukasaka kukumbululaho. Nge kavamitongwele kukumbululaho kumaputukiloko, kaha ijivenu ngwenu omu kukunguluka nachitwalililaho munahase kupwa nakutokwa chakukumbululaho. Nge muli nakuwahisa vyaChilongesa chaKaposhi Kakutalila, kaha shinganyekenu omwo palangalafu hipalangalafu yinalikwatasana namutwe wachihande. Nge namulinganga ngocho, kaha munahase kupwanga navishina vyakukumbululaho. Kaha nawa, munahase kuliwahisa mukakumbulule hajipalangalafu haze hali muchano wakujiminyina waukalu kulumbununa. (Koli. 1, 2:10) Mwomwo ika? Mwomwo kunahase kukapwa vatu vavandende kaha navakemika mavoko vakumbululeho. Jino namulinga ngachilihi nge nahanyima yakulinga vyuma kana, oloze kaveshi nakumitongola mukumbululehoko? Shimbu kanda kukunguluka chiputuke, munahase kulweza muka-kutetekela chihula muli nakusaka kukumbululaho.
11. Uno chisoneka chaWavaka-Fwilipi 2:4 chatukolezeza tulingenga ika?
11 Tangenu Wavaka-Fwilipi 2:4. Kaposetolo Paulu vamuhwiminyinyine akolezeze vaka-Kulishitu vahakenga kulutwe vyuma vasaka vakwavo. Uno tunahase kuzachisa ngachilihi chisoneka kana nge tuli nakukunguluka? Hakwanukanga ngwetu navakwetu nawa vali nakufwila kukumbululaho ngana muze tuli nakusaka etu.
Ngana muze namulingisa vakwenu vahanjikeho nge muli nakushimutwila, mukiko nawa mwatela kulingisa vakwenu vakumbululeho hakukunguluka (Talenu palangalafu 12)
12. Jila muka yamwaza yakukolezezelamo vakwetu hakukunguluka? (Talenu nawa muvwimbimbi.)
12 Achishinganyekenu hachuma chino. Nge muli nakushimutwila namasepa jenu, kutala yenu kaha namuhanjikanga chakuzeneka kuvahana lisesa lyakuhanjikaho tahi? Kamweshi kulinga ngochoko. Namusaka navakiko vazane muchihande muli nakushimutwila. Chochimwe nawa, nge tuli nakukunguluka, twasaka vatu vavavulu vakumbululeho. Tachikizenu ngwenu jila yimwe yakukolezezelamo vandumbwetu shina kuvahana lisesa lyakuhanjika vyuma vafwelela. (Koli. 1, 10:24) Tutalenu omwo tunahase kulinga ngocho.
13. Vyuma muka twatela kulinga mangana vatu vavavulu vakumbululeho hakukunguluka?
13 Chuma chimwe tunahase kulinga shina kukumbululanga mukavatu, mangana tuseleko navakwetu vazanemo. Vakulwane muchikungulwilo navaka-kwambulula vakulindunuka vanahase kuhana vakwavo chakutalilaho. Numba vene nge muli nakukumbulula mukavatu, kanda kuhanjika vishina vyavivuluko. Nge namukumbulula vishina vyosena vili mupalangalafu, kaha vakwenu nevi navakumbulula vyauchi. Chakutalilaho, mupalangalafu yino vanavulukamo vishina vivali vize twatela kukavangiza. Vishina kana shina kukumbulula mukavatu nakulihenda kukuhanjika vishina vyavivulu. Nge yenu vatete kutongola mukumbulule hapalangalafu yino, kaha nachiwaha nge namuvulukako kaha chishina chimwe mangana museleko vakwenu.
Lwola muka luze twatela kumona ngwetu katwatela kwimika livoko hakukungulukako? (Talenu palangalafu 14) f
14. Vyuma muka navitukafwa tutachikize mapapa twatela kwimika livoko? (Talenu nawa muvwimbimbi.)
14 Zachisenu uhashi wenu wakushinganyeka mangana mutachikize mapapa mwatela kwimika livoko. Nge natwimikanga mapapa kakavulu, kaha natulingisa muka-kutetekela atutongole tukumbululeho, numba tuhu vakwetu veka kanda vakumbululeho. Echi chinahase kuhonesa vakwetu kwimika mavoko.—Kwambu. 3:7.
15. (a) Uno tunahase kulinga ngachilihi nge kavatutongwele tukumbululehoko? (b) Uno vaka-kutetekela navasolola ngachilihi nge vazakama vatu vosena mulizavu? (Talenu lipwata lyakwamba ngwavo “ Kachi Nge Muli Nakutetekela Chihanda chaVihula Nakukumbulula.”)
15 Nge vaka-kwambulula vavavulu vali nakwimika mavoko hachilongesa, kaha katweshi kukumbululaho mapapa kakavulu ngana muze twasakangako. Shimbu jimwe pamo muka-kutetekela keshi kututongola tukumbululehoko. Chuma kana chinahase kutwivwisa kupihya, oloze kanda kupihililako.—Kwambu. 7:9.
16. Tunahase kukolezeza ngachilihi vakwetu vaze vanakumbululaho?
16 Nge kavamitongwele mukumbululeho mapapa kakavulu ngana muze munasakeko, kaha mwatela kwivwilila kanawa kuvyuma vali nakukumbulula vakwenu mangana muvasangejeke hakukumbulula chavo. Kuvasangejeka chinahase kuvakolezeza ngana muze munahase kuvakolezeza kuhichila mukukumbululaho. (Vishi. 10:21) Kusangejeka yapwa hijila yimwe yakulikolezezelamo navakwetu.
JIJILA JEKA JAKULIKOLEZEZELAMO NAVAKWETU
17. (a) Uno visemi vanahase kukafwa ngachilihi vana vavo vawahisenga kanawa vyuma navakakumbulula? (b) Kweseka navindiyo, vyuma muka viwana vize vyasakiwa hakuliwahisa tukakumbululeho? (Talenu nawa kwinyikila chamwishi.)
17 Jijila jeka muka tunahase kulikolezezelamo navakwetu hakukunguluka? Nge mwapwa muvisemi, kaha kafwenu vana venu vawahise vyuma navakambulula kweseka namyaka yavo. (Mateu 21:16) Shimbu jimwe kweji kupwanga vihande vyavinene wakufwana nge ukalu wamumalo chipwe vihande vyaujila. Chipwe ngocho, kunahase kupwa palangalafu yimwe chipwe jivali jize vanahase kukumbululaho vanyike. Kaha nawa kafwenu vana venu vatachikize ovyo navilingisa vahone kuvatongola vakumbululeho lwola lwosena navemika livoko. Kuvalumbunwina chishina kana nachivakafwa vahone kwivwa kupihya nge vanatongola vakwavo veka.—Chimo. 1, 6:18. d
18. Tunahase ngachilihi kulihenda kukulingisa vatu vahake kaha mangana kuli etu? (Vishimo 27:2)
18 Tuvosena tunahase kuliwahisa tukahanjike vyuma vize navineha kavumbi hali Yehova nakutunga vakwetu vaka-Kulishitu. (Vishi. 25:11) Numba tuhu lwola lumwe tunahase kuhanjika havyuma vimwe twahichilemo, oloze twatela kulihenda kukuhanjika vyuma vize navilingisa vatu vamone ngwavo tuli nakulisasa. (Tangenu Vishimo 27:2; Koli. 2, 10:18) Oloze tweji kufwilanga kulingisa vatu vashinganyeke hali Yehova naMazu enyi navatu jenyi vosena. (Kuso. 4:11) Chipwe ngocho, nge chihula chapalangalafu chili nakusaka tuhanjike vyuma twahichilemo, kaha tunahase kulinga vene ngocho. Mupalangalafu yinakavangizaho muchihande chino, muli chihula chamuyachi kana.
19. (a) Vyuma muka navifumamo nge natuzakama vatu vosena vali mulizavu? (Wavaka-Loma 1:11, 12) (b) Mwomwo ika mwazangila kukumbululangaho hakukunguluka?
19 Numba tuhu kakwatwama jishimbi jahanjika munona munona jila twatela kukumbulwilamoko, oloze tuvosena twatela kufwila kuhanjikanga vyuma vize navikolezeza vakwetu. Echi pamo chili nakulumbununa kukumbululangaho mapapa kakavulu nge chili nakusakiwa kulinga ngocho. Chipwe pamo chili nakulumbununa nge mwatela kupwa vakusuuluka namapapa munakumbululaho, nakuwahilila nawa hakumona ngwenu navakwenu vanapu nakutokwa chakukumbululaho. Shikaho, nge natuhakanga vyuma vasaka vakwetu kulutwe hakukunguluka, kaha tuvosena natulivwisa kuwaha “kulikolezeza.”—Tangenu Wavaka-Loma 1:11, 12.
MWASO 93 Kisula Kukunguluka Chetu
a Tweji kulikolezezanga navakwetu nge natukumbululangaho hakukunguluka. Chipwe ngocho, vamwe veji kwivwanga woma kukumbululaho. Veka nawa veji kwivwanga kuwaha kukumbulula, oloze veji kushinganyekanga ngwavo kaveshi nakuvatongola vakumbululeho mapapa kakavuluko. Numba nge twatwama nawoma wakukumbululaho chipwe chiku, natusolola ngachilihi ngwetu twazakama vakwetu mangana tulikolezeze tuvosena? Kaha vyuma muka navitukafwa tukumbululenga mujila yize nayikolezeza vandumbwetu vasolole zangi navilinga vyamwenemwene? Chino chihande nachikumbulula vihula kana.
b Nge muli nakusaka jijila jikwavo jakukeheselamo woma, kaha hitulukenu Kaposhi Kakutalila waJanuary 2019, li. 8-13, nou waSeptember 1, 2003, li. 19-22.
c Lijina vanalyalumuna.
d Talenu vindiyo yakwamba ngwavo Pwenu Masepa jaYehova—Wahisenunga Chimweza Vyuma Namukakumbululaho.
e Talenu Kaposhi Kakutalila waJuly 15, 2013, li. 32, nawaSeptember 1, 2003, li. 21-22.
f MAZU AKULUMBUNUNA MUVWIMBIMBI: Ndumbwetu uze nakumbululaho lyehi hakukunguluka muchikungulwilo chachinene naselako nawa vakwavo vakumbululeho.
