1-2. Chuma muka twatela kulinga omu tuli nakuvandamina kaye kakahya?

 TWAMONA lushiko lwaYehova lwakufumisako kano kaye nakuneha kaye kakahya kakwoloka kupwa lwalulemu. (Petu. 2, 3:13) Numba tuhu katwatachikiza lwola luvene nakakeza kaye kakahyako, oloze unjiho wasolola nge kali hakamwihi.—Mateu 24:32-34, 36; Vili. 1:7.

² Muholyapwanyi, tuvosena twatela kuzamisa lufwelelo lwetu mulushiko kana, chamokomoko nakuvula chamyaka tunatwame mumuchano. Mwomwo ika? Mwomwo nalufwelelo lwakukola lunahase kuzeya. Kaposetolo Paulu ahanjikile ngwenyi kuhona lufwelelo yapwa “shili yize yeji kutulimbanga [washiwashi].” (Hepe. 12:1) Hakusaka lufwelelo lwetu luhone kuzeya, twatela kushinganyekanga chikuma havyuma vize vyasolola ngwavyo kaye kakahya kalinwomu kezenga.—Hepe. 11:1.

3. Vyuma muka natushimutwila muchihande chino?

³ Muchihande chino, natushimutwila hajijila jitatu jize tunahase kuzamishilamo lufwelelo lwetu mulushiko atushika Yehova lwakuneha kaye kakahya. Jijila kana shina (1) kuhunanananga handando yakusokola, (2) kushinganyekanga hangolo jaYehova, (3) kuzatanga milimo yakushipilitu. Kufumaho, natushimutwila omwo mujimbu valwezele Hambakuke kuli Yehova unahase kuzamisa lufwelelo lwetu makumbi ano. Oloze tuvangilenu kushimutwila haukalu tunahase kumona oholyapwa uze wasakiwa kuzamisa lufwelelo lwetu mulushiko lwakaye kakahya kaze kali nakwiza.

 UKALU UZE WASAKIWA KUPWA NALUFWELELO LWAKUKOLA

4. Vyuma muka tweji kusakulanga kulinga vize vyasakiwa lufwelelo lwakukola?

⁴ Hakumbi hakumbi tweji kusakulanga kulinga vyuma vize vyasakiwa lufwelelo lwakukola. Chakutalilaho, tweji kusakulanga vatu twatela kulikata navo, navyakuhemahema, namashikola, namutu wakulimbata nenyi, nakusakula kupwa navana chipwe chiku, namilimo twatela kuzata. Shikaho twatela kulihulisa ngwetu: ‘Kutala vyuma ngunasakula vyasolola nge ngwafwelela ngwami kano kaye kanapu kaha kashimbu yayindende, kaha nawa kalinwomu vakashise kukaye kakahya kaKalunga tahi? Kutala ngweji kusakulanga vyuma kweseka navishinganyeka vyavatu vaze kavafwelela ngwavo navakayoya haya myakako tahi?’ (Mateu 6:19, 20; Luka 12:16-21) Tunahase kusakula kanawa vyakulinga kachi nge natuzamisa lufwelelo lwetu hakushinganyeka ngwetu kaye kakahya kali hakamwihi.

5-6. Mwomwo ika twasakiwila lufwelelo lwakukola mulwola lwavihuli? Hanenu chakutalilaho.

⁵ Tweji kumonanga nawa vyeseko vize vyasakiwa kupwa nalufwelelo lwakukola. Tunahase kumona luyanjisa, chipwe kuviza misongo yayinene chipwe kumona ukalu weka uze unahase kutuhombesa. Hakavanga tunahase kushinganyeka ngwetu, tunahase kumika muvyeseko tuli nakuhitamo. Oloze nge ukalu wakufwana ngana nautwalaho lika, kaha twasakiwa kupwa nalufwelelo lwakukola mangana tupwenga vakumika nakutwalaho lika kuzachila Yehova nakuwahilila.—Loma 12:12; Petu. 1, 1:6, 7.

⁶ Nge tuli mucheseko, tunahase kushinganyeka ngwetu kaye kakahya kaYehova kakeshi kukezako. Uno echi chili nakulumbununa nge katweshi nalufwelelo lwakukolako tahi? Nduma. Talenu hachakutalilaho chino. Nge tuli mungonde yachishika kaha kunatutu chikuma, tunahase kushinganyeka ngwetu ngonde yanonga kayeshi kukezako. Olozenyi ngonde yanonga yeji kwizanga. Chochimwe nawa, nge tunahombo chikuma, tunahase kushinganyeka ngwetu kaye kakahya kakeshi kukezako. Oloze nge tuli nalufwelelo lwakukola, kaha natutachikiza ngwetu vyuma ashika Kalunga navikatesamo. (Samu 94:3, 14, 15; Hepe. 6:17-19) Nge tunakunyuka, kaha natuhaka kulutwe kulemesa Yehova mukuyoya chetu.

7. Vishinganyeka muka twatela kulihendako?

⁷ Tushinganyekenu hachuma chikwavo chize chasakiwa kupwa nalufwelelo lwakukola. Chuma kana shina mulimo wakwambulula. Vatu vavavulu vaze tweji kwambulilanga vashinganyeka ngwavo “mujimbu wamwaza” wahanjika hakaye kakahya kaKalunga wapwa wakutaka kaha. (Mateu 24:14; Ezeke. 33:32) Twatela kuzangama kuchina natupwa navishinganyeka kana. Shikaho twatela kutwalaho lika kuzamisa lufwelelo lwetu mangana tulihende kuvishinganyeka kana. Tutalenu hajijila jitatu tunahase kuzamishilamo lufwelelo lwetu.

HUNANANENUNGA HANDANDO YAKUSOKOLA

8-9. Uno kuhunanana handando yakusokola nachizamisa ngachilihi lufwelelo lwetu?

⁸ Jila yimwe yakuzamishilamo lufwelelo lwetu shina kuhunanananga handando yakusokola. Ndando yakusokola yatulingisa tufwelele ngwetu jishiko jaKalunga najikatesamo. Nge natushinganyeka kanawa ovyo Kalunga atuhanyinyine ndando yakusokola navyuma alisuwile hakuhana ndando kana, kaha natuzamisa lufwelelo lwetu hakushinganyeka ngwetu lushiko lwaKalunga lwakukayoya haya myaka nalukatesamo. Mwomwo ika tunambila ngocho?

⁹ Uno vyuma muka alisuwile Kalunga hakutuhana ndando yakusokola? Yehova atumine Mwanenyi wakulipwila watwatwa uze apwa sepa lyenyi azanga chikuma, kwiza hano hamavu nakusemuka kupwa mutu wakukupuka.  Omu Yesu apwile hano hamavu, omikilenga muvyeseko vyavivulu. Kaha ayanjile nakufwa mujila yayipi. Chikupu vene, Yehova afwetele ndando yayinene chikuma. Kalunga ketu wazangi keshi kuhasa kwechelela Mwanenyi ayande nakufwa mangana atuhane kuyoya chakashimbu kakandende kahako. (Yowano 3:16; Petu. 1, 1:18, 19) Shikaho Yehova mwakatesamo lushiko atushika lwakukayoya haya myaka mukaye kakahya mwomwo afwetele ndando yayinene chikuma.

SHINGANYEKENUNGA HANGOLO JAYEHOVA

10. Kweseka naWavaka-Efwesu 3:20, vyuma muka vize Yehova nahase kulinga?

¹⁰ Jila yamuchivali yakuzamishilamo lufwelelo lwetu shina kushinganyekanga hangolo jaYehova. Atwama nangolo jakutesamo vyuma vyosena vize ashika. Chikupu vene, vatu vavavulu vanahase kumona ngwavo kuyoya chahaya myaka mukaye kakahya kacheshi kuhasa kupwako. Oloze Yehova nashikinga kuswakumwe vyuma vize vatu kaveshi kuhasa kutesamoko. Nalinginga ngocho mwomwo apwa Kalunga Wangolo Josena. (Yopa 42:2; Mako 10:27) Kutala Yehova nahase kushika jishiko jamokomoko tahi?—Tangenu Wavaka-Efwesu 3:20.

11. Vulukenuko lushiko lumwe lwakulipwila luze Kalunga ashikile. (Talenu lipwata lyakwamba ngwavo “ Jishiko Jimwe Jakulipwila Jize Jinatesamo Lyehi.”)

¹¹ Achishinganyekenu havyuma vimwe vize Yehova ashikile vatu jenyi kushikulu, vize vatu vamwenenga ngwavo kavyeshi kuhasa kutesamoko. Afwelelesele Apalahama naSala ngwenyi navakapwa namwana muushinakaji. (Kupu. 17:15-17) Alwezele nawa Apalahama ngwenyi vaka-tanga yenyi mwakavahana lifuchi lyaKanane. Hamyaka yayivulu, vaIsalele vaze vapwile vaka-tanga yaApalahama vapwile vandungo muEjipitu, ngocho chasolokele nge lushiko kana kalweshi kukatesamoko. Olozenyi lwateselemo. Yehova ahanjikile nawa ngwenyi Elizaveta uze apwile kashinakaji mwakapwa namwana. Alwezele nawa Maliya uze apwile kanda achilisavaleho nalunga ngwenyi mwakasema MwanaKalunga, uze Yehova ashikile lyehi myaka yayivulu kunyima mumilemba yaEtene. Lushiko kana nawa lwateselemo.—Kupu. 3:15.

12. Uno mukanda waYoshuwa 23:14 nou waIsaya 55:10, 11 watufwelelesa vyuma muka hangolo jaYehova?

¹² Tweji kuzamisanga lufwelelo lwetu mungolo jaYehova jakuneha kaye kakahya hakushinganyekanga hajishiko jize nashikinga nomwo najitesangamo. (Tangenu Yoshuwa 23:14; Isaya 55:10, 11.) Echi cheji kutulingisanga tupwenga vakulizanga kulwezako vakwetu vatachikize ngwavo lushiko lwaYehova lwakuneha kaye kakahya nalukatesamo. Yehova ahanjikile kutalisa kumelu amahya namavu amahya ngwenyi: “Mazu awa atela kuwafwelela, kaha amuchano.”—Kuso. 21:1, 5.

ZATENUNGA CHIKUMA MILIMO YAKUSHIPILITU

13. Uno kukunguluka chachikungulwilo chinahase kuzamisa ngachilihi lufwelelo lwetu? Lumbununenu.

¹³ Jila yamuchitatu tunahase kuzamishilamo lufwelelo lwetu shina kuzata chikuma milimo yakushipilitu. Chakutalilaho, achishinganyekenu omwo kukunguluka chachikungulwilo cheji kutunganyalisanga. Musole, uze nazatenga milimo yakulisezaseza mumulimo washimbu yosena hamyaka yayivulu ambile ngwenyi: “Kukunguluka chachikungulwilo cheji kuzamisanga chikuma lufwelelo lwami. Numba vene nge muka-kuhanjika chihande keshi nauhashi wakunangula kanawako, chipwe nge keshi kuhanjika vishina vyavihyako, oloze cheji kungukafwanga ngwivwishise muchano wamuMbimbiliya nakungukafwa nguzamise lufwelelo lwami.” b Chakuzeneka kukakasana, nayetu nawa tweji kusakwililanga vandumbwetu havishina vize veji kukumbululanga vyakutukolezeza.—Loma 1:11, 12; 10:17.

14. Uno mulimo wakwambulula weji kuzamisanga ngachilihi lufwelelo lwetu?

 ¹⁴ Tweji kuzamisanga nawa lufwelelo lwetu hakwazana mumulimo wakwambulula. (Hepe. 10:23) Kutemba, uze nazachila Yehova hamyaka yakuzomboka 70 ambile ngwenyi: “Ngwamona ngwami mulimo wakwambulula weji kuzamisanga lufwelelo lwami. Shikaho, kulwezangako vakwetu vyajishiko jaYehova cheji kuzamisanga chikuma lufwelelo lwami.”

15. Uno chilongesa chauka nachizamisa ngachilihi lufwelelo lwetu? (Talenu nawa mivwimbimbi.)

¹⁵ Chuma chikwavo chakushipilitu chize cheji kuzamisanga lufwelelo lwetu shina chilongesa chauka. Ndumbwetu Sombo eji kunganyalanga hakunoneka kanawa lwola lwakulinangula. Ambile ngwenyi: “Halikumbi lyaSondo ngweji kuhitulukanga chihande chaKaposhi Kakutalila chachalumingo nachikavangizaho. Kaha lyaMande naChivali ngweji kuhitulukanga kukunguluka chamukachi kachalumingo. Kaha hamakumbi akwavo ngweji kulinangulanga havihande vyeka vize ngweji kulitomenanga.” Sombo eji kutwalangaho lika kuzamisa lufwelelo lwenyi hakukavangiza lwola alitomena lwakulinangula. Kamiji, uze nazachilanga hachikota chetu hamyaka yayivulu, ambile ngwenyi kulinangula upolofweto wamuMbimbiliya cheji kuzamisanga lufwelelo lwenyi. Ambile nawa ngwenyi: “Ngweji kwivwanga kuwaha hakumona omu upolofweto waYehova unatesangamo wosena.” c

“NACHIKATESAMO CHIKUPU”

16. Mwomwo ika natwambila ngwetu vyuma vize Yehova afwelelesele Hambakuke vinahase kutunganyalisa nayetu? (WavaHepeleu 10:36, 37)

¹⁶ Vangamba jaYehova vamwe vanavandaminanga kukuma chakano kaye hamyaka yayivulu. Vatu vamwe vashinganyeka ngwavo vyuma ashika Kalunga kutalisa kukukuma chakano kaye vinashimbula kutesamo. Yehova ahanjikile hachuma kana hakufwelelesa kapolofweto  Hambakuke ngwenyi: “Chakumwenesa kana nachikasoloka halwola vachitongwela, kaha chili nakwanguhwa mangana chisoloke, kacheshi kulyongako. Numba nge nachishimbula, oloze chivandaminenga. Mwomwo nachikatesamo chikupu. Kacheshi kukakotokelako.” (Hamba. 2:3) Kutala awa mazu ahanjikile Kalunga apwile akunganyalisa Hambakuke kaha tahi? Uno anahase kutunganyalisa nayetu makumbi ano tahi? Kaposetolo Paulu vamuhwiminyinyine asoneke chishina chochimwe kuli vaka-Kulishitu vaze vali nakuvandamina kaye kakahya. (Tangenu WavaHepeleu 10:36, 37.) Chikupu vene, numba tuhu vyuma ashika Yehova navisoloka nge vinashimbula, oloze twafwelela ngwetu ‘navikatesamo chikupu. Kavyeshi kukakotokelako.’

17. Ndumbwetu umwe wapwevo nakavangizanga ngachilihi mazu aze Yehova ahanjikile kuli Hambakuke?

¹⁷ Vangamba jaYehova vavavulu vanakavangizanga mazu ahanjikile ngwenyi “chivandaminenga.” Vamwe vanalinginga ngocho hamyaka yayivulu. Chakutalilaho, Lowise aputukile kuzachila Yehova mu 1939. Ambile ngwenyi: “Halwola kana ngwashinganyekele ngwami Alamangetone nayiza shimbu kanda ngukumise shikola. Oloze kayejileko. Hamyaka yinahichimo, kutanga mijimbu yamuMbimbiliya yavatu vaze vavandaminyinenga Yehova atesemo jishiko jenyi chinangukafwe nayami nguvandamine Yehova akatesemo jishiko jenyi. Ngunatangenga mujimbu waNowa, naApalahama, naYosefwe naveka. Kutwalaho kuvandamina chinangukafwe ami navakwetu tukunyuke ngwetu kaye kakahya kali hakamwihi.” Vatu vavavulu vaze vanalemesanga Yehova hamyaka yayivulu vanahase kwitavila mazu kana.

18. Uno kutalanga vyuma vyakutenga chinahase kutukafwa ngachilihi tufwelele chikuma ngwetu kaye kakahya kali nakwiza?

¹⁸ Tunejiva vene ngwetu kaye kakahya kanda kezenga. Oloze achishinganyekenu havyuma vize viliko. Vyuma kana shina vatanganyika, namitondo, natunyama, navakwenu vatu. Tuvosena twafwelela ngwetu vyuma kana kuvyatwama chikupu, numba tuhu lwola lumwe kavyapwileko. Vyapwako mwomwo Yehova avitengele. (Kupu. 1:1, 26, 27) Kalunga ketu ajina kukaneha kaye kakahya. Kaha mwakatesamo echi chuma ajina. Mukaye kakahya, vatu navakayoya haya myaka, kaha nawa vakulikangula. Kaye kakahya nakakapwako chikupu halwola atongola Kalunga, ngana muze apwako melu namavu.—Isa. 65:17; Kuso. 21:3, 4.

19. Uno munahase kuzamisa ngachilihi lufwelelo lwenu?

¹⁹ Shimbu tuli nakuvandamina kaye kakahya, zatenu nangolo muzamise lufwelelo lwenu. Sakwililenunga Kalunga handando yakusokola. Shinganyekenunga hangolo jaYehova. Zatenunga chikuma milimo yakushipilitu. Nge namulinga ngocho, kaha namupwa hamukana wavatu “vaze vanaswane vyuma vashika hakupwa nalufwelelo namuchima wakutalilila chikoki.”—Hepe. 6:11, 12; Loma 5:5.