CHIHANDE CHAKULINANGULA 15
Vyuma Muka Natulinangula kuVyakukomwesa Alingile Yesu?
“Ahichile mungalila yosena nakulinga vyuma vyamwaza nakuhindula.”—VILI. 10:38.
MWASO 13 Kulishitu Ikiye Chakutalilaho Chetu
VYUMA NATUSHIMUTWILA a
1. Lumbununenu omwo vyapwile vyuma halwola Yesu alingile chakukomwesa chatete.
ACHISHINGANYEKENU hachuma chasolokele mu 29 C.E., omu Yesu aputukile mulimo wenyi. Yesu nanaye Maliya navaposetolo jenyi vamwe vavasanyikile kuchilika chawenga muKana, ngalila yize yapwile kunote yaNazaleta kwimbo lyaYesu. Maliya apwile sepa lyatanga yasamwenga natanga yanyamwenga, kaha pamo apwile nakuzakama vangeji. Oloze omu chalingile chilika chinaputuka lyehi, kwasolokele chuma chize chasakile kwivwisa sonyi tanga hamwe kaha nasamwenga nanyamwenga. Vinyo vyakumine. b Pamo vatu vavulile chikuma, kuhambakana vaze vasanyikile. Maliya ayile washi kuli mwanenyi nakumulweza ngwenyi: “Kaveshi navinyoko.” (Yowano 2:1-3) Uno Yesu alingile ngachilihi? Yesu alingile chuma chakukomwesa. Alumwine meya kupwa “vinyo vyamwenemwene.”—Yowano 2:9, 10.
2-3. (a) Vyakukomwesa muka alingile Yesu? (b) Uno kushimutwila havyuma vyakukomwesa alingile Yesu nachitunganyalisa ngachilihi?
2 Yesu alingilenga nawa vyuma vikwavo vyakukomwesa omu azachilenga mulimo wenyi. c Azachishile ngolo jenyi mujila yakukomwesa mangana akafwe vatu vavavulu. Chakutalilaho, alingile vyakukomwesa vivali halwola lwakulihandununa. Halwola lumwe alishile malunga 5,000, kaha halwola lweka alishile malunga 4,000. Nge natufutula vatu vosena ava kuhakilako mapwevo navanyike, kaha kuvula chavo chinahase kuheta ku 27,000. (Mateu 14:15-21; 15:32-38) Mapapa osena avali aze Yesu alishile vatu, okile nawa vatu vavavulu. (Mateu 14:14; 15:30, 31) Achishinganyekenu omwo evwile aze mayongomena hakuvoka nakuvalisa kuli Yesu mujila yakukomwesa.
3 Vyuma vyakukomwesa alingile Yesu vinahase kutunangula vishina vyavilemu makumbi ano. Muchihande chino, natushimutwila havishina vimwe vize natulinangula kuvyakukomwesa kana vize navizamisa lufwelelo lwetu. Kaha natukekesa nawa omwo tunahase kulondezeza muchima wakulinyisa nakutetela uze asolwele Yesu omu alingilenga vyakukomwesa.
VISHINA NATULINANGULA HALI YEHOVA NAYESU
4. Uno vyakukomwesa vize alingile Yesu vyakuzamisa lufwelelo lwetu vyatunangula hali iya?
4 Vyakukomwesa alingile Yesu vyatunangula hali ikiye nahali Ise vishina vize navizamisa lufwelelo lwetu. Anukenu ngwenu Yehova ikiye ahanyine Yesu ngolo jakulinga vyakukomwesa. Hali Vilinga 10:38 vatulweza ngwavo: “Kalunga [awavishile Yesu] nashipilitu yajila nangolo, kaha ahichile mungalila yosena nakulinga vyuma vyamwaza nakuhindula vosena vaze vashinyinyikile kuli Liyavolo, mwomwo Kalunga apwilenga nenyi.” Anukenu nawa ngwenu Yesu asolwele vishinganyeka vyaIse nomwo eji kwivwanga, kuhichila muvyuma vyosena vize ahanjikile nakulinga kuhakilako vene navyakukomwesa alingilenga. (Yowa. 14:9) Tutalenu havishina vitatu vize tunahase kulinangula kuvyakukomwesa alingile Yesu.
5. Chuma muka chalingishile Yesu alinge vyakukomwesa? (Mateu 20:30-34)
5 Chatete, Yesu naIse vatuzanga chikuma. Omu Yesu apwile hano hamavu, asolwele ngwenyi azanga chikuma vatu hakulinga vyakukomwesa mangana akafwe vatu vapwile nakuyanda. Halwola lumwe, tupuputa vavali vamutambakanyine mangana avakafwe. (Tangenu Mateu 20:30-34.) Anukenu ngwenu, Yesu avokile mwomwo “avevwilile keke.” Lizu lyachiHelase vazachisa muvesi kana ngwavo “avevwilile keke” lyasolola nge Yesu evwile kukola kumuchima hakumona vatu vaze vapwile nakuyanda. Evwile keke mwomwo yazangi, kaha keke kana yamulingishile nawa alise vatu nakuka muka-mbumba. (Mateu 15:32; Mako 1:41) Chikupu vene twatela kufwelela ngwetu, Yehova Kalunga ‘wakeke’ naMwanenyi vatuzanga chikuma, kaha nawa veji kwivwanga kukola kumuchima nge tuli nakuyanda. (Luka 1:78; Petu. 1, 5:7) Chikupu vene vafwila kukafumisako ukalu wosena uze vali nakumona vatu.
6. Uno Kalunga ahana Yesu ngolo jakulinga ika?
6 Chamuchivali, Kalunga ahana Yesu ngolo jakufumisako ukalu veji kumonanga vatu. Vyakukomwesa alingile Yesu vyasolwele ngolo jenyi jakukumisa ukalu uze etu katweshi kuhasa kukumisako. Chakutalilaho, atwama nangolo jakutusokola kuvyuma vize vyeji kunehelanga vatu ukalu. Vyuma kana shina shili yize twaswana, navyuma vyosena vize vyeji kwizanga mwomwo yashili, kuhakilako vene namisongo nakufwa. (Mateu 9:1-6; Loma 5:12, 18, 19) Milimo yenyi yakukomwesa yasolola nge nahase kuka “misongo yosena” nakusangula nawa vafu. (Mateu 4:23; Yowa. 11:43, 44) Atwama nawa nangolo jakufungulula peho yanyamanganda nakusokola nawa vatu kuvandemone. (Mako 4:37-39; Luka 8:2) Shikaho, kutachikiza ngwetu Yehova ahana Mwanenyi ngolo kana cheji kutukolezezanga chikuma.
7-8. (a) Uno vyakukomwesa alingile Yesu vyatufwelelesa vyuma muka? (b) Chuma muka chakukomwesa muli nakutalilila kukamona mukaye kakahya kaze kali nakwiza?
7 Chamuchitatu, twafwelela ngwetu vyuma vatushika kukatulingila muWangana waKalunga navikatesamo. Vyuma vyakukomwesa alingilenga Yesu omu apwile hano hamavu vyatukafwa tutachikize ngwetu mwakalinga vyuma vyavivulu hamavu hosena, omu mwakapwa Mwangana waWangana waKalunga mwilu. Achitalenu havyuma natulivwisa kuwaha kalinwaha muchiyulo chaKulishitu. Natukapwa vakulikangula, mwomwo mwakafumisako misongo yosena nautonji, vyuma vize vinayanjisanga vatu hamyaka yayivulu. (Isa. 33:24; 35:5, 6; Kuso. 21:3, 4) Katweshi kukafwa zala, chipwe kuyanda mwomwo yaukalu wakulijilako. (Isa. 25:6; Mako 4:41) Kaha nawa, natukalivwisa kuwaha kusambilila vausoko wetu vaze navakafuma “muvimbumbe.” (Yowa. 5:28, 29) Chuma muka chakukomwesa muli nakutalilila kukamona mukaye kakahya kaze kali nakwiza?
8 Omu Yesu alingilenga vyakukomwesa, asolwele muchima wakulinyisa nakutetela. Kaha twatela kumulondezeza hakupwa namuchima kana. Tutalenu havyakutalilaho vivali. Natuputukila hamujimbu wachifupawenga chamuKana.
KULINANGULA KUPWA VAKULINYISA
9. Chuma muka alingile Yesu hachifupawenga? (Yowano 2:6-10)
9 Tangenu Yowano 2:6-10. Omu vyakumine vinyo hachifupawenga, kutala wapwile mulimo waYesu wakulingaho chuma chimwe tahi? Chiku. Kakwatwama upolofweto uze wahanjikile ngwawo Meshiya mwakalumuna meya kupwa vinyoko. Uno kachi mwevwile ngachilihi nge hachifupawenga chenu hakiko hakumine vize vinyo? Chasoloka nge evwililile keke yize tanga, chikumanyi samwenga nanyamwenga, kaha asakile kuvafumisa sonyi. Shikaho ngana muze twavulukanga hakavanga, Yesu alingile chakukomwesa. Alumwine meya akuheta kafwe jilita 390 (chipwe jingalone 103) kupwa vinyo vyamwenemwene. Pamo alumwine vinyo vyavivulu mangana vimwe visaleho vakavizachise kulutwe chipwe kuvilanjisa mangana vasamwenga nanyamwenga vawaneko jimbongo jakulikafwa najo. Chikupu vene, echi chevwishile samwenga nanyamwenga kumichima hwo.
Londezezenunga Yesu hakulihenda kumuchima wakulisashila havyuma munatesamo (Talenu palangalafu 10-11) e
10. Vyuma muka vyavilemu vyatwama mumujimbu vasoneka hali Yowano kapetulu 2? (Talenu nawa muvwimbimbi.)
10 Achishinganyekenu havyuma vyavilemu vyatwama mumujimbu vasoneka mumukanda waYowano kapetulu 2. Yesu, keshi ikiye ahakile meya muze mumilondoko. Oloze hakuwana nge kasakile vatu vamwaliseko, alwezele vangamba vahake meya mumilondo. (Vesi 6, 7) Kaha nawa hanyima yakwalumuna meya kupwa vinyo, Yesu keshi ikiye atwalile vize vinyo kuli muka-kutwaminyina chiwanyinoko. Oloze alwezele vangamba vavitwale. (Vesi 8) Uno Yesu atwalile lupasa lwavinyo kuli vapwile hachilika nakulisasa ngwenyi, ‘Makilenu mwivwenga vinyo ngunalumuna’ tahi? Nduma.
11. Uno chakukomwesa alingile Yesu chinahase kutunangula vyuma muka?
11 Uno chakukomwesa alingile Yesu chakwalumuna meya kupwa vinyo nachitunangula vyuma muka? Nachitunangula kupwa namuchima wakulinyisa. Yesu kalisashile hachakukomwesa alingileko, kaha nawa kalisashilenga havyuma ateselengamoko. Oloze alinyishile nakuhana upahu nakavumbi kuli ise. (Yowa. 5:19, 30; 8:28) Nge natulondezeza Yesu hakuhona kulimona kupwa tuvavalemu chikuma, kaha katweshi kulisasanga havyuma natutesamoko. Shikaho, kala vyuma natulinga mumulimo waYehova, katwatela kulisashila hali etu vaveneko, oloze twatela kulisashila hali Kalunga uze tweji kuzachilanga. (Yele. 9:23, 24) Twatela kumuhananga kavumbi kakanene. Anukenu ngwenu vyuma vyosena vyamwaza tweji kuvilinganga mwomwo yakutukafwa kuli Yehova.—Koli. 1, 1:26-31.
12. Jila muka yikwavo tunahase kulondezezelamo muchima waYesu wakulinyisa? Lumbununenu.
12 Tutalenu hajila tunahase kulondezezelamo muchima waYesu wakulinyisa. Achishinganyekenu hachuma chino: Mukulwane muchikungulwilo nakafwenga muka-kuzachila wamukweze kuwahisa chihande chenyi chatete chalikungumbuwa. Kaha kutwala muze, uze ndumbwetu wamukweze mwahanjika chihande chenyi mujila yize nayivwisa kuwaha chikungulwilo. Hanyima yakukunguluka, ndumbwetu umwe mweza kuli uze mukulwane nakuhanjika ngwenyi: ‘Ndumbu nganji kananga nahanjika kanawa chihande, nyi mweka?’ Kutala uze mukulwane atela kuhanjika ngwenyi: ‘Mukiko vene, oloze ngwakilikitanga chikuma hakumukafwa.’ Nyi mwalinyisa nakuhanjika ngwenyi: ‘Mukiko vene, nachihanjika kanawa, kaha nangwivwisa kuwaha’ tahi? Nge natupwa vakulinyisa, kaha katweshi kulisasa havyuma vyamwaza natulingila vakwetuko. Twasuuluka hakutachikiza ngwetu Yehova eji kumonanga vyuma tweji kulinganga nakuvimona kupwa vyavilemu. (Esekesenuko Mateu 6:2-4; Hepe. 13:16) Chikupu vene, tweji kwivwisanga Yehova kuwaha kachi nge natulondezeza Yesu hakupwa namuchima wakulinyisa.—Petu. 1, 5:6.
KULINANGULA KUPWA NAKEKE
13. Chuma muka amwene Yesu omu apwile kwakamwihi nanganda yaNane, kaha chuma muka alingile? (Luka 7:11-15)
13 Tangenu Luka 7:11-15. Achishinganyekenu hachuma chino chasolokele omu Yesu azachilenga mulimo wenyi. Yesu ayile kuNane, nganda yakuNgalileya kwakamwihi naShuneme, kuze kapolofweto Elisha asangwile mwana wayauze pwevo amusolwelele chisambo, kafwe myaka 900 kunyima shimbu kanda Yesu ezenga hano hamavu. (Vamya. 2, 4:32-37) Omu Yesu ahetele kuweluka wanganda, amwene vatu vali nakulovoka munganda namufu wavo, vali nakulila. Chuma kana chapwile chaushona mwomwo kwapwile tuliwe uze afwishile mwanenyi umwe lyamunwe. Ou tuliwe kapwile ukawenyiko, oloze apwile naliyongomena lyavatu vapwile nakulovoka nenyi munganda. Yesu avemikile, kaha alingililile uze tuliwe apwile nakulishona chuma chimwe chakukomwesa. Amusangwilile mwanenyi. Ou ikiye apwile mutu watete havatu vatatu asangwile Yesu vaze vasoneka muMikanda yaMujimbu Wamwaza.
Londezezenunga Yesu hakutondatonda jijila jakusolwelamo keke vaze vali nakulishona (Talenu palangalafu 14-16)
14. Vyuma muka vyavilemu vyatwama mumujimbu vasoneka hali Luka kapetulu 7? (Talenu nawa muvwimbimbi.)
14 Achishinganyekenu havyuma vyavilemu vyatwama mumujimbu vasoneka mumukanda waLuka kapetulu 7. Mbimbiliya ngwayo Yesu avangilile ‘kumona’ uze tuliwe apwile nakulishona, kufumaho “amwivwilile keke.” (Vesi 13) Shikaho pamo kumona jila apwile nakulililamo uze pwevo oku ali nakukavangiza vaze vakulikile mujimba wamwanenyi, chikiko chamulingishile amwivwile keke. Yesu kakuminyinyine hakumwivwila kaha kekeko, oloze amusolweleleyo hakumulingilako chuma chimwe. Twafwelela ngwetu amuhanjikishile nalizu lyalivwovu ngwenyi: “Hola, kanda naulilako.” Kufumaho, amukafwile hakumusangwila mwanenyi, kaha uze mwana “amuhanyine kuli naye.”—Vesi 14, 15.
15. Uno chakukomwesa alingile Yesu chinahase kutunangula vyuma muka?
15 Uno chakukomwesa alingile Yesu chakusangula mwana tuliwe chatunangula vyuma muka? Chatunangula kupwa namuchima wakwivwila keke vatu vaze vali nakulishona. Chipwe ngocho, etu katweshi kuhasa kusangula vafu ngana muze alingile Yesuko. Oloze ngana mwaYesu, nayetu tunahase kupwa namuchima wakwivwila keke vaze vali nakulishona nge natupwanga vakuvanguluka. Tunahase kusolola muchima wakwivwila vatu keke hakuvakafwa nakuvavendejeka kuhichila muvyuma natuhanjika navize natulinga. d (Vishi. 17:17; Koli. 2, 1:3, 4; Petu. 1, 3:8) Numba vene kuhanjika mazu amandende chipwe kuvalingila tuvyuma twatundende chinahase kuvakafwa.
16. Nganomu vanasolola hamuvwimbimbi, vyuma muka munalinangula kumujimbu wapwevo uze afwisanga mwanenyi kalinwaha?
16 Achishinganyekenu hamujimbu uno. Kafwe myaka yayindende kunyima, omu vandumbwetu vapwile nakwimba mwaso hakukunguluka chachikungulwilo, ndumbwetu umwe amwene chisemi uze alihachile nenyi ali nakulila. Uze mwaso wapwile nakuhanjika halutalililo lwakusanguka, kaha uze chisemi apwile mukufuma hakufwisa mwanenyi wapwevo. Uze ndumbwetu hakutachikiza chuma kana ayile kuli uze chisemi nakumukwachilila, swi nomu vakumishile kwimba uze mwaso. Omu mwahichile lwola, uze chisemi ahanjikile ngwenyi: “Ngwamwene chikupu ngwami vandumbwami vanguzanga.” Amwene ngwenyi alingile kanawa kuya nakukunguluka. Ambile ngwenyi: “KuZuvo yaWangana kukiko tweji kuwananga vaka-kutukafwa.” Twatela kufwelela ngwetu Yehova eji kumonanga navyuma vyavindende vize tweji kulinganga mangana tusolwele keke vaze “vanahombo,” kaha vyuma kana avimona kupwa vyavilemu.—Samu 34:18.
KULINANGULA CHIZE NACHIZAMISA LUFWELELO
17. Vyuma muka tunalinangula muchihande chino?
17 Mijimbu yavyakukomwesa alingile Yesu vize vasoneka muMikanda yaMujimbu Wamwaza yinahase kutukolezeza chikuma nge natuyitanganga. Vyakukomwesa kana vyatukafwa tutachikize ngwetu Yehova naYesu vatuzanga chikuma, nakutachikiza ngwetu Yesu akwechi ngolo jakukumisa ukalu wosena veji kumonanga vatu, kaha nawa vyatukafwa tufwelele chikuma vyuma vatushika vize naulinga Wangana mukalinwomu. Omu natukekesanga mijimbu kana, tunahase nawa kushinganyeka hajijila tunahase kulondezezelamo vilinga vyaYesu. Shikaho, nachiwaha nge namunonekanga lwola mangana hachilongesa chenu chauka chipwe haKulemesa Kalunga mwaTanga, mulinangule chikuma havyakukomwesa vikwavo vize alingile Yesu. Twafwelela ngwetu namukalinangula vishina vyavivulu vize munahase kukalwezako navakwenu. Kaha chikupu vene vyuma namukashimutwila navikamikolezeza chikuma.—Loma 1:11, 12.
18. Vyuma muka natushimutwila muchihande nachikavangizaho?
18 Omu Yesu apwile kwakamwihi nakukumisa mulimo wenyi, asangwile mutu wamuchitatu havatu asangwile vaze vasoneka muMbimbiliya. Mutu kana alihandunwineko navakwavo mwomwo apwile sepa lyenyi wahamuchima, kaha nawa amusangwile oku hanahichi lyehi makumbi awana. Vyuma muka natulinangula kumujimbu wachakukomwesa kana chize vasoneka muMukanda waMujimbu Wamwaza? Kaha natuzamisa ngachilihi lufwelelo lwetu mulushiko lwakusanguka? Vihula kana navavikumbulula muchihande nachikavangizaho.
MWASO 20 Watuhanyine Mwanove Wakulipwila
a Yesu aunjishile peho yanyamanganda, nakuka vaveji, nakusangula vafu. Chikupu vene tweji kwivwanga kuwaha kutanga mijimbu yavyuma vyakukomwesa alingilenga Yesu. Mijimbu kana kavayisonekelele mangana yitwivwise kuwahako oloze kutunangula. Omu natushimutwila hamijimbu kana, natulinangula vishina hali Yehova naYesu vize navizamisa lufwelelo lwetu nakumona nawa vilinga vyaKalunga vize twatela kupwa navyo.
b Mutu umwe alinangula chikuma vyaMbimbiliya ambile ngwenyi: “Vatu vakumututuko vamwenenga kuzumbula vatu kupwa himulimo wajila. Kaha mutu atelelelenga kuwahisa vyakulya vyavivulu kuhambakanyisa hakuvula chavatu nasanyika. Omu mukiko chatelelelenga kupwa hakusolola zumbu yamwenemwene, chikumanyi hachilika chawenga navilika vyeka.”
c Mikanda yaMujimbu Wamwaza yavuluka vyakukomwesa alingile Yesu vyakuzomboka ha 30. Kaha nawa lwola lumwe vavilavila hohamwe. Chakutalilaho, halwola lumwe “vatu vosena vamunganda” vejile kuli ikiye, kaha “okile vatu vavavulu vaze vapwile nakuviza.”—Mako 1:32-34.
d Hakusaka muwane vyuma munahase kuhanjika chipwe kulinga mangana muvendejeke vaze vali nakulishona, talenu chihande chakwamba ngwavo “Vendejekenunga Vanafwisa, Ngana Muze Alingile Yesu,” muKaposhi Kakutalila waJanuary 1, 2011.
e MAZU AKULUMBUNUNA MUVWIMBIMBI: Yesu nemana ukawenyi, kaha samwenga nanyamwenga navaze vaneza kuchilika vali nakulivwisa kuwaha kunwa vinyo vyamwenemwene.
