1. Twakunyuka ngwetu ika?

 HAKUPWA tuvatu jaYehova, twatachikiza ngwetu atuzanga kaha nawa asaka tulivwise kuwaha kuyoya. (Loma 8:35-39) Twakunyuka ngwetu jindongi jamuMbimbiliya najitukafwa nge natujikavangizanga lwola lwosena. (Isa. 48:17, 18) Jino natulinga ngachilihi nge natumona ukalu uze nawiza mukukasumuna?

2. Ukalu muka tunahase kumona, kaha unahase kutulingisa tulihulise vihula muka?

² Vangamba jaYehova vosena veji kumonanga ukalu. Chakutalilaho, mutu umwe mutanga nahase kutwivwisa kupihya. Tunahase kuviza misongo yize nayituhonesa kuzata chikuma milimo yaYehova. Tunahase nawa kuyanda mwomwo yaukalu wakulijila, chipwe vanahase kutuyanjisa mwomwo yavyuma twafwelela. Nge tuli nakumona ukalu wakufwana ngana, tunahase kulihulisa ngwetu: ‘Mwomwo ika ukalu kana unangusolokela? Kutala kuli vyuma vyavipi ngunalingi tahi? Uno echi chili nakusolola nge Yehova keshi nakungukisulako tahi?’ Kutala mwalihulisaho lyehi vihula kana tahi? Nge mukiko, kaha kanda kuhombako. Vangamba jaYehova vakushishika vavavulu vanamononga ukalu woumwe.—Samu 22:1, 2; Hamba. 1:2, 3.

3. Uno chisoneka chaSamu 34:19 nachitunangula vyuma muka?

³ Tangenu Samu 34:19. Achitalenu vishina vivali vyatwama musamu kaneyi: (1) Vaka-kwolola navakiko veji kumonanga ukalu. (2) Yehova eji kutupulululanga kuvyeseko tweji kumonanga. Uno Yehova eji kutupulululanga ngachilihi? Jila yimwe shina kutukafwa tumonenga vyuma muno mukaye mujila yamwaza. Numba tuhu Yehova atushika ngwenyi natulivwisanga kuwaha kumuzachila, oloze kacheshi nakulumbununa nge natutwamanga  chakuzeneka kulizakaminako. (Isa. 66:14) Atulweza tuhakenga mangana kulwola lwakulutwe, omu natukapwa nachiyoyelo chize asaka tukalivwise kuwaha haya myaka. (Koli. 2, 4:16-18) Muholyapwanyi, eji kutukafwanga tutwaleho lika kumuzachila.—Lungu. 3:22-24.

4. Vyuma muka natushimutwila muchihande chino?

⁴ Tushimutwilenu vyuma tunahase kulinangula kuli vaka-kulemesa Yehova vakushishika vakushikulu navamakumbi ano. Nganomu natumona, nayetu tunahase kumona ukalu wakwiza mukukasumuna. Oloze nge natupendamina hali Yehova, kaha mwatuzakamanga. (Samu 55:22) Omu natushimutwila havatu kana, lihulisenu ngwenu: ‘Uno nge ukalu kana wangusolokelele ami, kachi ngwalingile ngachilihi? Uno vyakutalilaho kana navingukafwa ngachilihi ngufwelele chikuma Yehova? Vyuma muka ngunalinangulako vize nanguzachisa mukuyoya chami?’

5. Ukalu muka vamwenesele Yakova kuli Lavane? (Talenu muvwimbimbi wahalipapilo lyahelu.)

⁵ Vangamba jaYehova vakushikulu vamwenenga ukalu wakwiza mukukasumuna. Achishinganyekenu vyuma ahichilemo Yakova. Vamulwezele kuli ise ayenga nakumbata pwevo havana vaLavane, kausoko kavo uze alemeselenga Kalunga, kaha nawa vamufwelelesele ngwavo Yehova mwamukisula chikuma. (Kupu. 28:1-4) Ngocho Yakova alingile vyuma vyakwoloka. Afumine mulifuchi lyaKanane nakuya kwimbo lyaLavane uze apwile navana vamapwevo vavali, Leya naLakele. Yakova azangile Lakele mwana Lavane wakanyike, kaha etavililile kuzachila Lavane hamyaka 7 mangana amuhane mwanenyi. (Kupu. 29:18) Oloze vyuma kavyazachiwile ngana muze Yakova ashinganyekeleko. Lavane ongele Yakova mangana ambate mwanenyi wamukulwane Leya. Lavane alwezele Yakova ngwenyi mwamuhana Lakele hanyima yachalumingo chimwe, kuvanga nge mwamuzachila hamyaka yikwavo 7. (Kupu. 29:25-27) Lavane apwile nawa namuchima walwiso muvyuma vyeka nawa valivwasanyinenga naYakova. Lavane evwishilenga Yakova kupihya hamyaka 20.—Kupu. 31:41, 42.

6. Ukalu muka ukwavo amwene Yakova?

⁶ Yakova amwene nawa ukalu ukwavo. Apwile natanga yayinene chikuma, oloze vana venyi kavalivwasanyinenga mwavomwavoko. Valanjishile nandumbwavo Yosefwe muundungo. Kaha nawa vana venyi vavali, Shimeyone naLevi, vanehele katombo mutanga nahalijina lyaYehova. Pwevo lyenyi Lakele uze azangile chikuma nawa afwile omu apwile nakusapula mwanavo wamuchivali. Kaha nawa omu kwapwile zala yakalombolombo, Yakova ayile kulifuchi lyaEjipitu okunyi nashinakajiwa lyehi.—Kupu. 34:30; 35:16-19; 37:28; 45:9-11, 28.

7. Yehova asolwele ngachilihi ngwenyi evwililile Yakova uselewa?

⁷ Numba tuhu Yakova amwenenga ukalu wosena ou, oloze atwalileho lika kufwelela Yehova najishiko jenyi. Kutwala muze, Yehova asolwele kuli Yakova ngwenyi amwivwililile uselewa. Chakutalilaho, numba tuhu vamulyapwilenga kuli Lavane, oloze Yehova amukiswile apwenga naluheto lwaluvulu. Achishinganyekenu omwo evwile Yakova hakumukafwa kuli Yehova aliwane cheka namwanenyi Yosefwe uze ashinganyekelenga ngwenyi afwa lyehi. Kupwa nausoko naYehova chakafwile Yakova afungulule vyeseko. (Kupu. 30:43; 32:9, 10; 46:28-30) Nge natuzamisanga usoko wetu naYehova, kaha nayetu tunahase kufungulula vyeseko vyakwiza mukukasumuna.

8. Chuma muka afwililile kulinga Mwangana Ndavichi?

⁸ Mwangana Ndavichi kahashile kulinga vyuma vyosena ajinyine kulinga mumulimo waYehovako. Chakutalilaho, Ndavichi afwililile kutungila Kalunga kenyi tembele. Vyuma afwililile  kulinga avilwezele kapolofweto Natane. Natane amukumbulwile ngwenyi: “Linga vyeshovyo vili kumuchima wove, mwomwo Kalunga wamuchano ali nayove.” (Miji. 1, 17:1, 2) Achishinganyekenu omwo evwile Ndavichi hakumukolezeza mujila kana. Pamo hahaze vene aputukile kulongesa mwakuzachila uze mulimo waunene ngana.

9. Uno Ndavichi alingile ngachilihi hakwivwa mujimbu wakumukanyisa kulinga chuma ajinyine?

⁹ Nakushimbula chiku, kapolofweto kaYehova ejile nakulweza Ndavichi mujimbu wakumukanyisa kulinga chuma ajinyine. “Haufuku vene uze,” Yehova alwezele Natane ngwenyi, Ndavichi keshi ikiye mwatunga tembeleko, oloze navakayitunga kuli mwanenyi. (Miji. 1, 17:3, 4, 11, 12) Uno Ndavichi alingile ngachilihi hakwivwa mujimbu kana? Alumwine vishinganyeka vyenyi. Ahakile jino mangana kumulimo wakukungulula jimbongo navyakutungisa vize mwakazachisa mwanenyi Solomone hakutunga tembele.—Miji. 1, 29:1-5.

10. Uno Yehova akiswile ngachilihi Ndavichi?

¹⁰ Kufuma haze Yehova alwezele Ndavichi ngwenyi keshi ikiye mwakatunga tembeleko, alishikile nenyi lushiko. Yehova afwelelesele Ndavichi ngwenyi mutu wakuchisaka chenyi mwakayulanga haya myaka. (Samwe. 2, 7:16) Mukaye kakahya, Ndavichi mwakevwa kuwaha kutachikiza ngwenyi ali nakuyoyela muChiyulo chaYesu chaMyaka 1,000, Mwangana uze asemukilile kuchisaka chenyi. Ou mujimbu watunangula tumone ngwetu numba tuhu katweshi kuhasa kulinga vyuma vize twajinyine kulinga mumulimo waYehovako, Kalunga ketu nahase kutukisula mujijila jeka jize katwatachikijileko.

11. Uno vaka-Kulishitu vakulivanga vavakiswile ngachilihi numba tuhu Wangana kawejile halwola vapwile nakusaka wizengako? (Vilinga 6:7)

¹¹ Vaka-Kulishitu vakulivanga navakiko vamwenenga ukalu wakwiza mukukasumuna. Chakutalilaho, vapwile nakutalilila Wangana waKalunga, oloze kavatachikijile lwola naukezako. (Vili. 1:6, 7) Jino valingile ngachilihi? Vatwalileho lika kuzata mulimo wakwambulula. Omu mujimbu wamwaza wapwile nakutanda, vamwene chikupu ngwavo Yehova ali nakuvakisula.—Tangenu Vilinga 6:7.

12. Uno vaka-Kulishitu vakulivanga valingile vyuma muka omu kwapwile zala yakalombolombo?

¹² Halwola lumwe, “hamavu hosena” hepukile zala yakalombolombo. (Vili. 11:28) Navaka-Kulishitu vakulivanga vamwene ukalu kana. Achishinganyekenu kuyanda vayanjile mwomwo yazala yakalombolombo. Chikupu vene, mitwe yajitanga valizakaminyine chikuma mwakutondela jitanga javo vyakulikafwa navyo. Nyi ngachilihi vakweze vaze vapwile nakushinganyeka kutohwesa mulimo wavo wakwambulula? Kutala vashinganyekelenga ngwavo vatela kuvandaminako zala yikume numba vakalinge vyuma vajinyine tahi? Chamokomoko nomwo vyapwile vyuma, ava vaka-Kulishitu kavazeyeleko. Vatwalileho lika kwambulula mujimbu wamwaza kweseka noho vahashilile, nakuhanako vakwavo vaka-Kulishitu vamuYuleya vyakulikafwa navyo.—Vili. 11:29, 30.

13. Vyuma muka vyamwaza valivwishile kuwaha vaka-Kulishitu omu kwapwile zala yakalombolombo?

¹³ Vyuma muka vyamwaza valivwishile kuwaha vaka-Kulishitu omu kwapwile zala yakalombolombo? Vaze vatambwile vyuma vavatuminyinyine vandumbwavo, vamwene chikupu ngwavo Yehova ali nakuvakafwa. (Mateu 6:31-33) Chikupu vene, vamwene ngwavo vandumbwavo vaze vavakafwile vavazanga. Kaha nawa vaze vahanyine vandumbwavo wana chipwe vaze vazanyine mumulimo wakuvakafwa mujijila jeka, vosena vapwile nakuwahilila chize cheji kwizanga mwomwo yakupwa namuchima wakuhana. (Vili. 20:35) Yehova avakiswile vosena omu valipikilenga naukalu wakwalumuka chavyuma.

14. Vyuma muka vyasolokelele Mbalanape nakaposetolo Paulu, kaha mwafumine ika? (Vilinga 14:21, 22)

 ¹⁴ Vaka-Kulishitu vakulivanga vavayanjishilenga mapapa kakavulu, nahalwola luze kavashinganyekelenga ngwavo navavayanjisako. Talenu vyuma vyasolokele kuli Mbalanape nakaposetolo Paulu omu vapwile nakwambulwila mungalila yaLusutala. Hakavanga vavatambwile kanawa kuvatu vaze vapwile nakwivwilila kanawa kuvyuma vahanjikilenga. Oloze kutwala muze, vaka-kole “vakunywile mayongomena” kaha vatu vamwe havatu kana vashile malolwa Paulu nakumuseza nalezumuka. (Vili. 14:19) Oloze Mbalanape naPaulu vatwalileho lika kwambulwila kuvihela vyeka. Vyuma muka vyafuminemo? Vahashile “kutunga tumbaji vavavulu,” kaha vyuma vahanjikilenga nachakutalilaho chavo vyakolezezele vandumbwavo. (Tangenu Vilinga 14:21, 22.) Vatu vavavulu nawa vanganyalile chikuma, mwomwo Mbalanape naPaulu kavalitwaminyinyine kwambululako numba tuhu vavayanjishile. Nayetu nawa Yehova mwatukisula nge katweshi kuzeya kuzata mulimo atuhanako.

15. Vyuma muka munalinangula kumujimbu wandumbwetu A. H. Macmillan?

¹⁵ Mumyaka yakukokela ku 1914, vatu jaYehova vatalililenga chuma chakulipwila chikuma. Tutalenu chakutalilaho chandumbwetu A. H. Macmillan. Ndumbwetu Macmillan ashinganyekelenga ngana muze vashinganyekelenga vandumbwetu vosena vapwileko halwola kana, ngwavo kalinwaha vayenga mwilu. Muchihande chenyi ahanjikile muSeptember 1914, ambile ngwenyi: “Echi pamo chikiko chihande chami chamakumishilo nguli nakuhanjika.” Oloze echi kachapwile hichihande chenyi chamakumishiloko. Kutwala muze ndumbwetu Macmillan asonekele ngwenyi: “Chasoloka nge etu vamwe twapwile namuchima wakandakundaku, hakushinganyeka ngwetu kalinwaha tuyenga mwilu.” Ambile nawa ngwenyi: “Chuma twatelelele kulinga shina kuzata chikuma mulimo waMwata.” Omu mukiko alingile ndumbwetu Macmillan. Azachile natwima mumulimo wakwambulula. Kaha nawa akolezezelenga vandumbwetu vavavulu vaze vakashile mukamenga mwomwo yakukana kwazana muvihande vyalifuchi nachiyulo. Atwalilengaho lika kukunguluka namuushinakaji wenyi. Uno ndumbwetu Macmillan anganyalile ngachilihi hakuzata chikuma milimo yaYehova oku nawa ali nakuvandamina fweto yenyi? Shimbu kanda afwenga mumwaka wa 1966, asonekele ngwenyi: “Noholyapwa lufwelelo lwami hanga lwapwila lwakuzama mbe.” Chikupu vene, ou himuchima wamwaza twatela kupwa nawo tuvosena, chikumanyi nge tunavandaminanga halwola lwalusuku kuhambakana nomwo twashinganyekelenga.—Hepe. 13:7.

16. Ukalu muka wakwiza mukukasumuna uze amwene Herbert Jennings napuwenyi? (WaYakova 4:14)

¹⁶ Vatu jaYehova vavavulu veji kuhitanga muukalu wakuviza misongo yakwiza mukukasumuna. Chakutalilaho, mumujimbu wakuyoya chandumbwetu Herbert Jennings, b alumbunwine omwo ikiye napuwenyi valivwishilenga kuwaha mulimo waumishonali muGhana. Kutwala muze, ndumbwetu Herbert Jennings vamuwanyine namusongo wakuwongo (mood disorder). Ou ndumbwetu ambile ngwenyi ukalu wenyi wapwile nge “‘likumbi lyahamene’ lize katwatachikijile omwo navikapwa vyumako,” kweseka namazu ahali WaYakova 4:14. (Tangenu.) Asonekele ngwenyi: “Mwomwo yaukalu kana, twafumine muGhana nakuseza masepa jetu vaze twazangile chikuma, kaha twakindulukile kuCanada [mangana ngukaye kuchipatela].” Yehova akafwile ndumbwetu Jennings  napwevo lyenyi vatwaleho lika kumuzachila nakashishi chamokomoko naukalu vapwile nakumona.

17. Uno chakutalilaho chandumbwetu Jennings chakolezezele ngachilihi vandumbwenyi?

¹⁷ Mazu amwenemwene andumbwetu Jennings aze atwama mumujimbu wakuyoya chenyi, akafwile chikuma vakwavo. Ndumbwetu umwe wapwevo asonekele ngwenyi: “Mujimbu wayou ndumbwetu wangukunywile chikuma. . . . Kutanga mazu akusolola nge ndumbwetu Jennings asezele mulimo wenyi waumishonali mangana ayenga kuchipatela vakamuke musongo wenyi, changukafwile nguhone kulizakamina chikuma haukalu wami.” Kaha nawa, ndumbwetu umwe walunga asonekele ngwenyi: “Ngwapwile ngumukulwane muchikungulwilo hamyaka 10, oloze ngwechele kuzata mulimo kana mwomwo ngwapwile namusongo wakuwongo. Ngwalimwenenga kupwa nguwakukuminamo, ngocho ngwahombelenga chikuma nge nangutanga mijimbu yakuyoya chavatu. . . . Oloze kumika chandumbwetu Jennings changukolezezele chikuma.” Shikaho echi chatela kutukafwa tutachikizenga ngwetu nge natumika muukalu wakwiza mukukasumuna, kaha tunahase kukolezeza vakwetu. Chikupu vene, kupwa nalufwelelo nakumika nachikafwa vakwetu, numba vene nge vyuma kavyeshi kupwa ngana muze twashinganyekeleko.—Petu. 1, 5:9.

18. Ngana muze muli nakumona mumuvwimbimbi, vyuma muka munalinangula kuli tuliwe wakuNigeria?

¹⁸ Musongo wachihita waCOVID-19 naukalu weka unayanjisa vatu jaYehova. Chakutalilaho, ndumbwetu umwe watuliwe wakuNigeria kapwile navyakulyako. Likumbi limwe nachimene, mwanenyi wapwevo amuhulishile amulweze okwo navawana vyakulya nge vanali lyehi lupasa lumwe lwaloso vapwile nalwo. Ou ndumbwetu alwezele mwanenyi ngwenyi kavapwile najimbongo chipwe vyakulya vyekako, oloze vatelelele kaha kuteleka vyakulya vyavo nakufwelela Yehova ngana muze alingile uze tuliwe wakuZalefwate. (Vamya. 1, 17:8-16) Shimbu kanda  vaputuke kushinganyeka okwo navawana vyakulya vyamusana, vatambwile vyakulya vize vavatuminyinyine vandumbwavo. Vyakulya kana vyavulile, mwomwo vyapwile vyakulya havyalumingo vivali nakuzombwesaho. Ou ndumbwetu ambile ngwenyi amwene jino ngwenyi Yehova apwile nakwivwilila kanawa omu ikiye apwile nakuhanjika namwanenyi. Chikupu vene, nge natupendaminanga hali Yehova, kaha ukalu natumonanga wakwiza mukukasumuna nautupandamisa chikuma kuli ikiye.—Petu. 1, 5:6, 7.

19. Uno Aleksey Yershov omikile muukalu muka?

¹⁹ Mumyaka yakalinwaha vandumbwetu vavavulu vanamononga ukalu wakuvayanjisa uze kavashinganyekele ngwavo naukavasolokelako. Tutalenu hachakutalilaho chandumbwetu walunga Aleksey Yershov uze atwama muRussia. Vatu jaYehova mulifuchi kana valivwishilenga kuwaha kupwa nalisesa lyakuzata mulimo wakwambulula halwola vamumbapachishile mu 1994. Oloze kutwala muze, vyuma muRussia vyalumukile. Mu 2020, ndumbwetu Yershov vamulukukile nakusandasanda muzuvo yenyi, kaha vikumba vyenyi vyavivulu vavimbachile. Kahomu mwahichile tukweji, fulumende yamukashililile chihande. Chuma chapihile chikuma shina vamuwanyine namulonga mwomwo kwapwile vindiyo akopele mutu umwe uze alyongelenga kulinangula Mbimbiliya kafwe hamwaka wamuundu. Echi hichuma chachipi chikupu.

20. Uno vyuma muka vinakafwe ndumbwetu Yershov azamise usoko wenyi naYehova?

²⁰ Uno luyanjisa luze amwene ndumbwetu Yershov lwanehele nganyo tahi? Eyo. Usoko wenyi naYehova unazaminako chikuma. Ambile ngwenyi: “Ami napwevo lyami tweji kulombelanga hamwe lwola lwosena. Ngwamwene ngwami kangweshi kuhasa kufungulula ukalu kana chakuzeneka kungukafwa kuli Yehovako.” Ambile nawa ngwenyi: “Chilongesa chauka cheji kungukafwanga nguhone kuhomba. Ngweji kuhunanananga havyakutalilaho vyavangamba jaYehova vakushishika vakushikulu. MuMbimbiliya mwatwama mijimbu yayivulu yize yasolola kulema chakuunda muchima nakufwelela Yehova.”

21. Vyuma muka tunalinangula muchihande chino?

²¹ Vyuma muka tunalinangula muchihande chino? Muno mukaye natumonanga ukalu wakwiza mukukasumuna. Chipwe ngocho, Yehova eji kukafwanga vangamba jenyi nge navapendamina hali ikiye. Ngana muze chinahanjika chisoneka chamutwe wachihande, “muka-kwoloka eji kumonanga ukalu wauvulu, oloze Yehova eji kumupulululanga muukalu wenyi wosena.” (Samu 34:19) Shikaho, tutwalenuho kushinganyekanga hangolo jaYehova jakutuzakama, keshi haukalu tweji kumonangako. Kaha nayetu tunahase kuhanjika ngana muze ahanjikile kaposetolo Paulu ngwenyi: “Ngunajikiza muvyuma vyosena kuhichila muli ou eji kunguhananga ngolo.”—Fwili. 4:13.