1. Uno vatu jaYehova mulikulukaji lyamyaka lyakulivanga lyalingilenga ngachilihi vyuma mukulonga?

 NGE Yehova nahane vatu jenyi mulimo, asaka vautesemo mujila yaKulonga. (Koli. 1, 14:33) Chakutalilaho, Kalunga ajina ngwenyi mujimbu wamwaza vatela kukawambulula hamavu hosena. (Mateu 24:14) Yehova atongola Yesu mangana atwaminyine mulimo kana. Yesu nalongesa vyuma mangana mulimo kana vauzate mujila yakulonga. Omu vikungulwilo vavitungile kuvihela vyakulisezaseza mulikulukaji lyamyaka lyakulivanga, vatongwele vakulwane mangana vahanenga jindongi nakutwaminyina mulimo kana. (Vili. 14:23) Lizavu lyavakulwane muYelusalema, muze mwapwile vaposetolo navakulwane lyahanyinenga vikungulwilo vyosena jishimbi jize vakashile mangana vatu vajikavangize. (Vili. 15:2; 16:4) Mwomwo yakukavangiza jindongi vatambwilenga, “vikungulwilo vyazaminenga lika mulufwelelo, kaha hakumbi hakumbi vatu vapwile nakuvulilako lika.”—Vili. 16:5.

2. Uno Yehova natwaminyinanga ngachilihi vatu jenyi nakuvahana kulya chakushipilitu kufuma vene mumwaka wa 1919?

² Namakumbi ano, Yehova ali nakutwalaho lika kulongesa vatu jenyi. Kufuma vene mumwaka wa 1919, Yesu nazachisanga lizavu lyalindende lyamalunga vawavisa, mangana valongese kanawa vyuma kutalisa kumulimo wakwambulula nakuhana vaka-kumukavangiza kulya chakushipilitu. a (Luka 12:42) Chikupu vene, Yehova nakisula mulimo wavo.—Isa. 60:22; 65:​13, 14.

3-4. (a) Lumbununenu omwo tweji kunganyalanga mwomwo yakutulongesa kanawa. (b) Vyuma muka natushimutwila muchihande chino?

³ Nge kaveshi kutulongesa kanawako, kaha katweshi kuhasa  kutesamo mulimo uze atuhana Yesuko. (Mateu 28:​19, 20) Chakutalilaho, achishinganyekenu nge kavatuhanyinenga jingalila jakwambulwilako, kachi mutu himutu mwambulila kala kweshokwo nasake. Jingalila jimwe vanahase kujambulwila mapapa kakavulu kuli vaka-kwambulula vakulisezaseza, kaha jeka nawa vanahase kujiliula nakuhona kujambulwilako. Kutala munahase kwanukako jijila jikwavo tweji kunganyalanga hakupwa tuvatu valongesa kanawa tahi?

⁴ Ngana muze Yesu alongeselenga kanawa vaka-kumukavangiza omu apwile hano hamavu, mukiko ali nakulinga nawa nakuli etu makumbi ano. Muchihande chino, natushimutwila hachakutalilaho chize atusela Yesu nomwo liuka lyetu lili nakukavangiza chakutalilaho kana. Natushimutwila nawa vyuma twatela kulinga vize navisolola nge twafwelela liuka lyaYehova.

LIUKA LYETU LYEJI KUKAVANGIZANGA CHAKUTALILAHO CHAYESU

5. Jila muka yimwe tweji kulondezezelangamo Yesu? (Yowano 8:28)

⁵ Yesu alinangwilenga kuli Ise wamwilu vyuma atela kulinga navize atela kuhanjika. Liuka lyaYehova lyeji kukavangizanga chakutalilaho chaYesu hakupendamina haMazu aKalunga omu veji kunangulanga nakuhana jindongi. (Tangenu Yowano 8:28; Chimo. 2, 3:​16, 17) Lwola lwosena veji kutulwezanga tutangenga Mazu aKalunga nakuwakavangiza. Uno tweji kunganyalanga ngachilihi hakukavangiza lundongi kana?

6. Jila muka yayilemu chikuma yize tweji kunganyalanga hakulinangula Mbimbiliya?

⁶ Tweji kunganyalanga chikuma omu tweji kulinangulanga Mbimbiliya kuzachisa mikanda yetu. Chakutalilaho, tweji kwesekesanga vyuma yanangula Mbimbiiya, najindongi tweji kutambulanga kuliuka. Tweji kufwelelanga chikuma liuka lyaYehova, kachi nge tunamono ngwetu jindongi tunatambula jinapendamina haVisoneka.—Loma 12:2.

7. Mujimbi muka ambulwilenga Yesu, kaha liuka lyaYehova linakavangizanga ngachilihi chakutalilaho chenyi?

⁷ Yesu ambulwilenga “mujimbu wamwaza waWangana waKalunga.” (Luka 4:​43, 44) Yesu alwezele nawa tumbaji twenyi vambululenga vyaWangana. (Luka 9:​1, 2; 10:​8, 9) Namakumbi ano vosena vaze valikata naliuka lyaYehova veji kwambululanga mujimbu waWangana chamokomoko nokwo vatwama chipwe nakuvula chamilimo vazata muliuka.

8. Kutokwa muka twatwama nacho?

⁸ Twapwa vakutokwa chikuma kulwezako vakwetu muchano waWangana waKalunga. Kutokwa kana kachapwa chavatu vosenako. Chakutalilaho, omu Yesu apwile hano hamavu, ketavishile vashipilitu vakuhuka vambulule unjiho waikiyeko. (Luka 4:41) Makumbi ano, mutu atela kutesamo vyuma vyasakiwa numba apwenga nakutokwa chakuzachila hamwe navatu jaKalunga mulimo wakwambulula. Shikaho, tweji kusololanga ngwetu twamona mulimo kanou kupwa waulemu hakuuzata kala kweshoko tuli, kaha nawa kala lwola tunahase kulinga ngocho. Chuma tweji kufwilanga kutesamo shina, kutumba nakutukumwina mbuto jaWanganga jamuchano mumichima yavatu, ngana muze alingilenga Yesu.—Mateu 13:​3, 23; Koli. 1, 3:6.

9. Uno liuka lyetu linalingisa ngachilihi lijina lyaKalunga valitachikize?

⁹ Yesu alingishile lijina lyaKalunga valitachikize. Omu Yesu alombele kuli Ise wamwilu ambile ngwenyi: “Ami ngunalingisa lijina lyove valitachikize.” (Yowa. 17:26) Liuka lyaYehova lyeji kulondezanga Yesu hakuzata nangolo mangana vakafwe vatu vatachikize lijina lyaKalunga. Mbimbiliya yaVisoneka vyaKaye Kakahya, yinazate mulimo waunene chikuma hakukindulwisa lijina lyaKalunga haze lyatela kupwa. Eyi Mbimbiliya yamuundu chipwe yachihanda, yili jino mumalimi akuzomboka 270. Kachi nge namutala Vihande Vyakuhakilako A4 naA5 muMbimbiliya kana, namuwana vyuma  vyavivulu vanalumbununa kutalisa kukukindulwisa lijina lyaKalunga muMbimbiliya. Vihande Vyakuhakilako C, vize vyatwama muMbimbiliya Yakulinangula yaChingeleshi, yasolola hatoma nge lijina lyaKalunga lyatela kusoloka muVisoneka VyachiHelase vyaVaka-Kulishitu mapapa 237.

10. Vyuma muka munalinangula kumuchima asolwele pwevo uze atwama muMyanmar?

¹⁰ Twasaka kukafwa vatu vavavulu vatachikize lijina lyaKalunga ngana muze alingile Yesu. Pwevo umwe wamyaka yakusemuka 67 wamuMyanmar, alilile omu atachikijile ngwenyi Kalunga atwama nalijina, kaha ambile ngwenyi: “Elu lukiko lwola lwatete kutachikiza lijina lyaKalunga. . . . Unangunangula chuma chachilemu chize kangwatachikijile mukuyoya chamiko.” Nganomu unasolola ou mujimbu, kukafwa vatu vakuwahilila vatachikize lijina lyaKalunga, chinahase kuvakafwa mukukoya chavo.

TWALENUHO LIKA KUFWELELA CHIKUMA LIUKA LYETU

11. Uno vakulwane vanahase kusolola ngachilihi ngwavo vafwelela liuka lyaYehova? (Talenu nawa muvwimbimbi.)

¹¹ Jila muka yimwe yize vakulwane muchikungulwilo vanahase kusolola ngwavo vafwelela liuka lyaKalunga? Nge vakulwane vanatambula jindongi, kaha vatela kujitanga kanawa nakujikavangiza kweseka noho hanakumina ngolo javo. Chakutalilaho, veji kutambulanga jindongi jamwakuhanjikila vihande, namwakulombela hakukunguluka namwakuzakamina mikoko jaKulishitu. Vakulwane vaze veji kukavangizanga jindongi jakufuma kuliuka, veji kukafwanga vandumbwetu valivwe kupwa vakukingiwa kaha nawa vamone ngwavo Yehova avazanga.

12. (a) Mwomwo ika twatela kuzachila hamwe navaze vali nakutwaminyinyina? (WavaHepeleu 13:​7, 17) (b) Mwomwo ika twatela kushishikila havilinga vyamwaza vyavaze vali nakutwaminyina?

¹² Nge vakulwane vanatuhane jindongi , kaha twatela kujikavangiza namuchima wetu wosena. Kulinga ngocho, nachikafwa vaze vali nakutwaminyina vazate kanawa mulimo wavo. Mbimbiliya yatukolezeza twononokenga vaze vali nakutwaminyina nakuliluula kuli vakiko. (Tangenu WavaHepeleu 13:​7, 17.) Oloze shimbu jimwe chinahase kupwa chachikalu kulinga ngocho. Mwomwo ika? Mwomwo ava malunga kavakupukako. Shikaho nge natushishika hatutenga twavo, nakuhona kushishika havilinga vyavo vyamwaza, kaha nachisoloka kwijiva nge tuli nakukafwa vaka-kole jetu. Mujila muka? Vaka-kole jetu vanahase kutulingisa tuhuhwasane jila liuka lyetu lyeji kututwaminyinangamo. Vyuma muka twatela kulinga mangana tutachikize mijimbu yamakuli vanahase kuhanjika vaka-kole jetu nakuyikana?

KANDA KWECHELELA VAKWENU VAMIHONESE KUFWELELA LIUKA LYAYEHOVAKO

13. Uno vaka-kole jaKalunga veji kusakanga kulingisa ngachilihi liuka lyenyi lisoloke kupwa lyalipi?

¹³ Vaka-kole jaKalunga veji kusakanga kulingisa vyuma vyamwaza lyeji kulinganga liuka lyenyi visoloke kupwa vyavipi. Chakutalilaho, twalinangula muVisoneka ngwetu, Yehova asaka vaka-kumulemesa, vapwenga vatoma kumujimba, namuvilinga nakushipilitu. Asaka ngwenyi weshowo mwahona kupihilila nakwalumuka nakufwila kutwalaho kulinga vyuma vyavipi, vatela kumufumisa muchikungulwilo. (Koli. 1, 5:​11-13; 6:​9, 10) Shikaho, tweji kukavangizanga elu lushimbi lwamuVisoneka. Oloze vaka-kole jetu veji kuzachisanga lushimbi kana hakutuvangijikila ngwavo, katwatwama namuchima wakuzakamako, kaha nawa tweji kusopesanga vakwetu nakuhona kuvasolwela zangi.

14. Iya ali nakulingisa vatu vahanjike vyuma vyamakuli haliuka lyaYehova?

¹⁴ Tachikizenu owo ali nakufumbukila liuka. Satana Liyavolo ikiye ali nakulingisa vatu vahanjike vyuma vyamakuli kutalisa kuliuka lyetu. Liyavolo apwa “ise yamakuli.” (Yowa. 8:44;  Kupu. 3:​1-5) Shikaho, twatela kutachikiza ngwetu Satana mwazachisa vaka-kumukundwiza, mangana vahanjike vyuma vyamakuli haliuka lyaYehova. Omu mukiko chapwile namulikulukaji lyamyaka lyakulivanga.

15. Vyuma muka valingile vatwamina vamukwitava kuli Yesu nakuli vaka-kumukavangiza?

¹⁵ Mulikulukaji lyamyaka lyakulivanga, vaka-kukundwiza Satana vahanjikilenga vyuma vyamakuli havyakukomwesa alingilenga MwanaKalnga uze apwile wakukupuka. Chakutalilaho, vatwamina vamukwitava valwezelenga vatu ngwavo “muka-kuyula vandemone,” ikiye ahanyinenga ngolo Yesu jakulovola vandemone. (Mako 3:22) Omu Yesu apwile hachitondo chakumuyanjishila, vatwamina vamukwitava vamuvangijikilile ngwavo, nasaula Kalunga ngocho vakunywile vatu mangana vamujihe. (Mateu 27:20) Mukuhita chalwola, omu vaka-kukavangiza Yesu vambulwilenga mujimbu wamwaza, vaka-kole javo “vasowangijile vatu” mangana vayanjise ava vaka-Kulishitu. (Vili. 14:​2, 19) Kaposhi Kakutalila waDecember 1, 1998, ahanjikile kutalisa kuchisoneka chaVilinga 14:2 ngwenyi: “Shikaho, vaze vaYuleya hakole yavo vakanyine mujimbu nakutwala lusongi kuli Vaka-mafuchi eka mangana vemanyine vaka-Kulishitu nakole.”

16. Chuma muka twatela kwanuka kachi nge tunevu mijimbu yamakuli?

¹⁶ Satana kalitwaminyinyine kuhanjika vyuma vyamakuli mulikulukaji lyamyaka lyakulivangako. Namakumbi ano, ali nakutwalaho lika “kuhungumwisa vatu vosena hamavu.” (Kuso. 12:9) Shikaho, nge namwivwa mijimbu yamakuli kutalisa kuliuka lyetu chipwe hali vandumbwetu vaze vali nakutwaminyina, kaha mwatela kwanuka omwo vaka-kole jaYehova vahanjikilenga vyuma vyamakuli hali Yesu nahali tumbaji vamulikulukaji lyamyaka lyakulivanga. Makumbi ano, vatu  jaYehova vali nakuvayanjisa nakuvavangijikila ngana muze Mbimbiliya yahanjikilile chimweza. (Mateu 5:​11, 12) Kachi nge natutachikiza owo ali nakuneha makuli nakuzata nangolo mangana tulikinge, kaha katweshi kuhungumuka namijimbu yamakuliko. Chuma muka twatela kulinga?

17. Vyuma muka twatela kulinga mangana tulihende kukutuhungumwisa kumijimbu yamakuli? (WaChimoteu 2, 1:13) (Talenu nawa lipwata lyakwamba ngwavo “ Vyuma Twatela Kulinga Nge Tunevu Mijmbu yaMakuli.”)

¹⁷ Kanenu mijimbu yamakuli. Kaposetolo Paulu atulweza vyuma twatela kulinga kachi nge tunevu mijimbu yamakuli. Akolezezele Chimoteu ‘akande vatu vamwe vahone kuhaka michima yavo kuvihande vyamakuli, nakukana vihande vyamakuli, vyamokomoko.” (Chimo. 1, 1:​3, 4; 4:7) Numba tuhu kanyike wamundende nahase kunona kala chuma nakuchihaka mukanwa kenyi, oloze mutu wakukola uze atachikiza ponde yatwamaho keshi kuhasa kulinga ngochoko. Shikaho, tweji kukananga mijimbu yamakuli, mwomwo twatachikiza okwo kweji kufumanga mijimbu kana. Tweji kukakachilanga ‘kumazu amwenemwene’ amuchano.—Tangenu WaChimoteu 2, 1:13.

18. Natusolola ngachilihi ngwetu twafwelela liuka lyaYehova?

¹⁸ Kuli jijila jajivulu jize liuka lyaKalunga lyeji kulondezezelangamo Yesu, oloze hano tunashimutwilako kaha jijila jitatu. Shikaho, omu namulinangula Mbimbiliya, fwilenu kuwanako jijila jikwavo jize liuka lyeji kulondezezelangamo chakutalilaho Yesu. Kafwenu vakwenu muchikungulwilo chenu vafwelele chikuma liuka lyaYehova. Kaha nawa twalenuho lika kusolola ngwenu mwafwelela liuka hakuzachila Yehova nakashishi nakukakachila kuliuka lize ali nakuzachisa, mangana atesemo mwaya muchima wenyi. (Samu 37:28) Shikaho, tutwalenuho lika kumona kutokwa twatwama nacho, chakulikata navatu jaYehova vazangi kaha nawa vakushishika kupwa chachilemu.