1. Uno palachise yakushipilitu yapwa chuma muka, kaha vyuma muka twatela kufwila kulinga?

 MAKUMBI ano, hamavu hali palachise yize yili navatu vavavulu vaze vali nakuzata milimo yayivulu. Mwazala navatu vaze vali nakulivwisa kuwaha kuunda chamwenemwene. Vaze vali lyehi mupalachise kana, veji kukilikitanga mangana vahone kuyiseza. Kaha vasaka nawa vatu vavavulu vapwenga muchihela kanechi chakulipwila. Uno chihela muka vene ocho? Chihela kana shina palachise yakushipilitu. a

2. Vyuma muka vyalingisa palachise yakushipilitu kupwa yakukomwesa?

² Yehova natenge chihela chachifwanyisa chakuunda, chize chili mukaye kaSatana muze munalisale chijindo navatu vakuhuka navilinga vyavipi. (Yowa. 1, 5:19; Kuso. 12:12) Kalunga ketu wazangi namono vyuma vyavipi vize vili mukatwamino kamyaka yino vize vinahase kutwenyeka, kaha natuhane vyuma vize navitukinga mangana tufukile kushipilitu. Mazu enyi alumbununa palachise yakushipilitu kupwa chihela ‘chakuswamamo’ kaha nawa “milemba yakutukumwina kanawa meya.” (Isa. 4:6; 58:11) Vaze vatwama mupalachise kana veji kufukilanga hakuvakisula kuli Yehova mumakumbi ano akukuminyina amakalu.—Isa. 54:14; Chimo. 2, 3:1.

3. Uno upolofweto vasoneka hali Isaya 65 wateselemo ngachilihi kunyima?

³ Yehova ahanjikile kuhichila muli kapolofweto Isaya omwo chiyoyelo nachikapwa kuli vaze navakatwamanga mupalachise yakushipilitu. Munahase kuwana upolofweto kana hali Isaya kapetulu 65, uze wateselemo kunyima mu 537 B.C.E. halwola kana, vaYuleya vaze vapihililile nakwalumuka vavafumishile muufunge muMbavilone nakukinduluka kulifuchi lyavo. Yehova akiswile vatu jenyi nakuvakafwa vatungulule nganda yaYelusalema nakuyilingisa kupwa yamwaza cheka nakuwahisa tembele yipwenga cheka chihela  chachinene chakulemesela Kalunga wamuchano muIsalele.—Isa. 51:11; Zeka. 8:3.

4. Uno upolofweto watwama hali Isaya 65 uli nakutesamo ngachilihi makumbi ano?

⁴ Upolofweto waIsaya waputukile kutesamo kamuchivali mu 1919 C.E. omu vaka-kulemesa Yehova vamakumbi ano vasokokele muundungo waMbavilone Yayinene. Kufumaho, palachise yakushipilitu yaputukile kutanda mukaye kosena. Vaka-kwambulula Wangana vatwima vaputukile kutunga vikungulwilo vyavivulu nakuputuka kupwa navilinga vyamwaza. Vatu vavavulu vaze vapwilenga navilinga vyaukenyai, vaputukile “[kuvwala] mutu wamuhya uze vatengele kweseka nomu mwaya muchima waKalunga.” (Efwe. 4:24) Chipwe ngocho, vyuma vyavivulu vyamwaza vize ahanjikile kapolofweto Isaya navikatesamo kulutwe mukaye kakahya. Oloze noholyapwa kuli vyuma vyavivulu vize tuli nakulivwisa kuwaha. Tushimutwilenu jino omwo palachise yakushipilitu yakwata hakuyoya chetu, novyo katwatela kuyisezelako.

VYUMA VEJI KULIVWISANGA KUWAHA VAZE VATWAMA MUPALACHISE YAKUSHIPILITU

5. Vyuma muka tweji kulivwisanga kuwaha mupalachise yakushipilitu kweseka namuze vatushika hali Isaya 65:13?

⁵ Veji kulyanga kanawa kushipilitu kaha nawa vapwa vakuhizumuka. Upolofweto waIsaya walumbununa kanawa chihandwa chatwama hachiyoyelo chavatu vaze vatwama mupalachise yakushipilitu nachavaze kavatwamamoko. (Tangenu Isaya 65:13.) Yehova eji kuhananga vaka-kumulemesa vyuma vyavivulu vasakiwa kushipilitu. Eji kutuhananga shipilitu yenyi yajila, naMazu enyi vasoneka, nakulya chakushipilitu mangana ‘tulyenga, . . . nakunwa, . . . nakuwahilila.’ (Esekesenuko Kusoloka 22:17.) Oloze vaze kavatwama mupalachise yakushipilituko, veji ‘kufwanga zala . . . , nakufwa lipwila . . . , nakwivwa sonyi.’ Vatu kana kaveshi nausepa wakukola naYehovako.—Amo. 8:11.

6. Uno hali Yowele 2:​21-24 valumbununa ngachilihi kulya chakushipilitu, kaha tunahase kunganyala ngachilihi kuchikiko?

⁶ Kapolofweto Yowele ahanjikile havyuma vyakuyoya vyakufwana nge jimbuto jamanona, navinyo, namaji amilive mangana asolole ngwenyi Yehova eji kuhananga vatu jenyi vyuma vize vasakiwa kuhakilako vene nakulya chakushipilitu. (Yowe. 2:​21-24) Yehova eji kulinganga ngocho kuhichila muMbimbiliya, namikanda yetu yahanjika vyamuMbimbiliya, nakayela yetu, nakukunguluka chachikungulwilo, nachachihanda nechi changalila. Tunahase kulyanga echi kulya chakushipilitu hakumbi hakumbi, nakutulingisa tupwenga vakulikangula nakuhizumuka.

7. Vyuma muka vyeji kutulingisanga twivwenga “kuwaha mumichima”? (Isaya 65:14)

⁷ Kupwa vakuwahilila nakusuuluka. Vatu jaKalunga “navakatwanga jingunda,” mwomwo navakasakwililanga Yehova. (Tangenu Isaya 65:14.) Muchano wamuMazu aKalunga najishiko jatwamamo, nalutalililo lwetu luze lwazama handando yakusokola yaKulishitu vyeji kutulingisanga twivwenga “kuwaha mumichima.” Shikaho, kuhanjikanga vyuma kanevi navandumbwetu vakushipilitu, nachitulingisa tuwahilile.—Samu 34:8; 133:​1-3.

8. Vyuma muka vivali vyavinene chikuma vize vyatwama mupalachise yakushipilitu?

⁸ Zangi nakulinunga vatwama navyo vatu jaYehova, hivyuma vivali vyavinene chikuma vize vyatwama mupalachise yakushipilitu. Echi ‘kulinunga’ kana chatukafwa tutachikize omwo nachikapwa chiyoyelo mukaye kakahya, muze vangamba jaYehova navakalizanganga chikuma nakupwa vakulinunga kuhambakana omu chili makumbi ano. (Kolo. 3:14) Ndumbwetu umwe wapwevo ahanjikile vyuma amwene hali vatu jaYehova omu avawanyine halwola lwatete, ambile ngwenyi: “Kangwatachikijile mwakupwila wakuwahilila, chipwe vene mutanga yami. Lwola lwatete ngwamwene vatu navalisolwela zangi navakwavo shina omu ngwaliwanyine naVinjiho  jaYehova.” Shikaho, vatu vaze navasaka kupwa vakuwahilila chipwe vakusuuluka, vatela kupwa mupalachise yakushipilitu. Chamokomoko nakala vyuma kano kaye nakashinganyeka hali vangamba jaYehova, oloze tachikizenu ngwenu vatu kana vavavumbika, chipwe ngwetu vakwechi puho yamwaza nayeyi tanga yakushipilitu.—Isa. 65:15.

9. Uno chisoneka chaIsaya 65:​16, 17 chatushika vyuma muka kutalisa kuukalu uze tweji kumonanga?

⁹ Kuhona kulizakamina nakuunda muchima. Chisoneka chaIsaya 65:14 chahanjika kutalisa kuvatu vaze vasakula kupwa kuweluka wapalachise yakushipilitu ngwacho ‘navakatetanga miteto mwomwo yakwivwa kukola kumichima yavo, nakukalilanga jimbimbi mwomwo yakulyonyinga mumichima yavo.’ Nyi ngachilihi vyuma vyosena vize vinevwisanga vatu jaKalunga kupihya kumuchima nakuvahombesanga? Mukuhita chalwola, vyuma kana ‘kaveshi kukavyanuka chekako. Kaha nawa kavyeshi kukasoloka cheka kumeso aKalungako.’ (Tangenu Isaya 65:​16, 17.) Yehova mwakafumisako ukalu wosena uze tuli nakumona, kaha mukuhita chalwola, kukola chize tweji kwivwanga katweshi kukachanuka chekako.

10. Mwomwo ika munashinganyekele ngwenu chapwa hikutokwa chikuma kulikata navandumbwetu vavaka-Kulishitu? (Talenu nawa muvwimbimbi.)

¹⁰ Namakumbi ano, tweji kuundanga kachi nge tunayi nakukunguluka, kuze tweji kuhonanga kulizakamina havyuma vize vyeji kutuhombesanga mukaye kano kakuhuka. Tweji kulingisanga echi chihela chakushipilitu chipwenga chakuunda kachi nge natupwa nazangi, nakuwahilila, nakuunda nalikoji nakuvova, vyuma vize vyapwa mihako yashipilitu yaKalunga. (Ngale. 5:​22, 23) Chikupu vene, twatokwa chikuma kulikata naliuka lyaKalunga. Vatu vaze veji kutwalangaho kupwa mupalachise yakushipilitu navakamona kutesamo chajishiko jaKalunga jakutalisa “[ku]melu amahya namavu amahya.”

11. Kweseka nachisoneka chaIsaya 65:​18, 19, uno palachise yakushipilitu yize Yehova natenge yatela kutukafwa ngachilihi?

¹¹ Kupwa namuchima wakusakwilila nakuwahilila. Isaya atwalileho lika kuhanjika ovyo vyatulingisa ‘tuwahililenga’ mupalachise yakushipilitu. Echi chihela chapwa hichihela chize vatenga kuli Yehova. (Tangenu Isaya 65:​18, 19.) Echi chikiko Yehova ali nakutuzachishile mangana tufumise vatu mumauka amuno mukaye aze kawanangula vatu muchano wahali Kalungako, nakuvakafwa vezenga mupalachise yakushipilitu yamwaza. Twawahilila chikuma havyuma vyamwaza tweji kulivwisanga kuwaha mwomwo yakupwa mumuchano, kaha echi cheji kutulingisanga tulwezeko vakwetu vyuma kana.—Yele. 31:12.

12. Mweji kwivwanga ngachilihi hajishiko vasoneka hali Isaya 65:​20-24, kaha mwomwo ika?

¹² Twasakwilila nawa Yehova nakupwa vakuwahilila  halutalililo luze twatwama nalwo, hakupwa mupalachise yakushipilitu. Achishinganyekenu havyuma vyosena vize natukamona nakulinga mukaye kakahya kaKalunga. Mbimbiliya yatushika ngwayo: “Kamweshi kukapwa kemba uze mwakayoya makumbi amandendeko, chipwe mukulwane uze mwakayoya chakuzeneka kutesamo makumbi enyiko.” Kaha nawa ‘natukatunga jizuvo jetu, nakukatwamangamo. Natukalimanga mande amivinyo, kaha natukalyanga mihako yayo.’ Katweshi “kukafulyangila chawanako,” mwomwo ‘navakatukisula kuli Yehova.’ Atushika chiyoyelo chamwaza kaha nawa chakukingiwa. ‘Shimbu kanda vamusanyike,’ mwakatachikiza vyuma mwakasakiwa mutu himutu “nakwikuchisa vyuma vyakuyoya vyosena.”—Isa. 65:​20-24; Samu 145:16.

13. Uno Chisoneka chaIsaya 65:​25, chalumbununa ngachilihi vyuma veji kwalumunangako vatu mukuyoya nge vanaputuka kuzachila Yehova?

¹³ Kuunda nakupwa vakukingiwa. Shipilitu yaKalunga yinakafwe vatu vavavulu vaze vapwilenga navilinga vyaunyama valumune vilinga vyavo. (Tangenu Isaya 65:25.) Vanakilikitanga mangana vambile vilinga vyavo vyavipi. (Loma 12:2; Efwe. 4:​22-24) Kaha etu vatu jaKalunga tuchili lika vakuhona kukupuka, shikaho natutwalaho lika kulimbenjanga. Chipwe ngocho, Yehova nanungu “vatu vosena,” kulumbununa vatu vakufuma kumiyachi yosena vaze vamuzanga nakulizanga navakwavo. Kaha echi chinalingisa vatu kana vatwame mukuunda navakwavo nakupwa vakulinunga (Chitu. 2:11) Echi hichuma chakukomwesa chize vanahase kulinga kaha kuli Kalunga wangolo josena.

14. Uno chisoneka chaIsaya 65:​25, chateselemo ngachilihi kuli ndumbwetu umwe?

¹⁴ Kutala vatu vanahase kwalumunako vilinga vyavo tahi? Achishinganyekenu hachakutalilaho chino. Mukweze umwe walunga uze vanakasenga mukamenga mapapa kakavulu apwilenga navilinga vyavipi kaha nawa chikenya. Kahomu ahetele myaka yakusemuka 20, vilinga kana vyapihilileko chikuma. Vamukashilenga mukamenga mwomwo yakwiva minyau, nakupupa jizuvo nakuvulumuna milonga yeka yayinene. Ou mukweze apwilenga wandombo. Oloze omu evwile muchano wamuMbimbiliya halwola lwatete, nakuputuka kukunguluka naVinjiho jaYehova, akunyikile ngwenyi nawane chuma chachilemu mukuyoya. Chuma kana shina, palachise yakushipilitu. Kaha omu apwile jino Chinjiho wakumbapachisa, ashinganyekelenga omu chisoneka chaIsaya 65:25 chateselemo kuli ikiye. Alumukile kufuma kumutu waulyanyi kwijiva nge ndumba, nakupwa jino mutu wakuunda kwijiva nge mukoko.

15. Mwomwo ika tuli nakufwila kulwezako vakwetu vezenga mupalachise yakushipilitu, kaha tunahase kulinga ngachilihi ngocho?

¹⁵ Mukanda waIsaya 65:13 waputuka namazu ano ngwawo: “Mwata Wakulitulaho Yehova nambe ngwenyi.” Kaha vesi 25 yakuma namazu ano ngwawo: “Omu mukiko mwanambe Yehova.” Chikupu vene, vyuma eji kushikanga Yehova vyeji kutesangamo. (Isa. 55:​10, 11) Palachise yakushipilitu kuyili lyehi oholyapwa. Yehova natuhane tanga yakulipwila yavatu vaze veji kumulemesanga. Hakuwana nge twapwa vamutanga kaneyi, ngocho twapwa vakuunda kaha nawa tweji kulivwanga kupwa vakukingiwa mukaye kano kaulyanyi. (Samu 72:7) Echi chikiko cheji kutulingisanga tufwile kukafwa vatu vavavulu vezenga mutanga kana eyi. Tunahase kulinga ngocho hakushishika hamulimo wakunangula vatu vapwenga tumbaji.—Mateu 28:​19, 20.

MWAKUKAFWILA VAKWETU VEZENGA MUPALACHISE YAKUSHIPILITU

16. Vyuma muka vyeji kukafwanga vatu vezenga mupalachise yakushipilitu?

¹⁶ Tuvosena tukwechi mulimo waulemu wakulingisa palachise yakushipilitu vayizange kuli vakwetu. Tunahase kutesamo mulimo kana kachi nge natulondezeza Yehova. Kashinjila vatu vezenga muliuka lyenyiko, kachi nge vavene kavasakileko. Oloze eji ‘kukokanga’ vatu vezenga kuli ikiye. (Yowa. 6:44; Yele. 31:3) Vatu  vamwaza michima vaze veji kulinangulanga vilinga vyamwaza vyaYehova nomwo apwa, vakiko eji kukokanga kuli ikiye. Uno vilinga vyetu vyamwaza natwamiso yetu, vinahase kulingisa ngachilihi vatu vezenga mupalachise yakushipilitu?

17. Tunahase kukafwa ngachilihi vatu vezenga mupalachise yakushipilitu?

¹⁷ Jila yimwe tunahase kukafwilamo vatu vezenga mupalachise yakushipilitu shina, kusolwelanga vandumbwetu zangi nalikoji. Nge vatu vavahya vaneza nakukunguluka nayetu, twasaka vatu kana vakukulule ngana muze vakukulwile vatu vaze pamo vapwile kukunguluka muKolinde yakushikulu vaze kavapwile vaka-kwitavako. Vatu kana vambile ngwavo: “Chikupu vene Kalunga ali muli enu.” (Koli. 1, 14:​24, 25; Zeka. 8:23) Shikaho, twatela kukavangizanga lushimbi luze vatulweza ‘lwakutwamanga mukuunda navakwetu.’—Teso. 1, 5:13.

18. Vyuma muka vinahase kukoka vatu vezenga muliuka lyetu?

¹⁸ Lwola lwosena twatela kumonanga vandumbwetu nganomu avamona Yehova. Tweji kulinganga ngocho, hakushishikanga havilinga vyavo vyamwaza, keshi hatutenga twavo tuze natukakuma mukuhita chalwolako. Twatela kukumisanga vikokwojola mujila yazangi, hakusolwelanga vakwetu ‘likoji nakulikonekelanga namuchima wakusuuluka.’ (Efwe. 4:32) Kaha palachise yakushipilitu nayikoka vatu vaze vasaka kuvalingila vyuma kanevi. b

TWALENUHO LIKA KUTWAMA MUPALACHISE YAKUSHIPILITU

19. (a) Ngana muze vanasolola mulipwata lyakwamba ngwavo, “ Vasezele Muchano, Kaha Vanakinduluka,” Vyuma muka vanahanjika vatu vamwe vaze vanakinduluka mupalachise yakushipilitu? (b) Vyuma muka twatela kufwila kulinga? (Talenu nawa muvwimbimbi.)

¹⁹ Twasakwilila chikuma Yehova hakutuhana  eyi palachise yakushipilitu. Palachise kana yili nakuwahilako chikuma, kaha nawa yili jino navatu vavavulu vaze veji kwalisanga Yehova kuhambakana muze chapwile kunyima. Shikaho, tutwalenuho lika kwalisa Yehova hapalachise natutengela. Shikaho, vatu vosena vaze vanakusaka kupwa vakuhizumuka, nakusuuluka nakuunda muchima, nakupwa vakukingiwa, vatela kutwama mupalachise yakushipilitu nakuhona kuyiseza. Mwatela kupwa vakuvanguluka, mwomwo Satana ali nakuzata kweseka noho hakumina ngolo jenyi, mangana atuhungumwise tuseze eyi palachise. (Petu. 1, 5:8; Kuso. 12:9) Katweshi kumwitavila atufungululeko. Shikaho tutwaleho lika kukinga kuwaha chayeyi palachise yakushipilitu, nakutoma chayo nakuunda chayo.