1. Uno vatu vamwe veji kwivwanga ngachilihi kushimutwila navatu vaze veji kuwananga muwande? (Talenu nawa muvwimbimbi.)

 ETU vatu jaYehova tweji kwambulilanga vakwetu mujimbu wamwaza, mwomwo twazanga Setu wamwilu nakusaka nawa kukafwa vakwetu vamutachikize. Vavavulu veji kulivwisanga kuwaha kuzata mulimo wakwambulula. Oloze vamwe cheji kuvakaluhwilanga kulivwisawo kuwaha. Mwomwo ika? Vamwe vatwama chikuma nasonyi kaha nawa kavalifwelelako. Veka nawa cheji kuvakaluhwilanga kuya hamembo ambala kachi nge kavavasanyikileko. Vamwe veji kulizakaminanga ngwavo kaveshi kuvevwililako. Vamwe vavanangula ngwavo kavatela kwivwisanga vakwavo kupihyako. Numba tuhu ava vandumbwetu vazanga chikuma Yehova, oloze cheji kuvakaluhwilanga kwambulula mujimbu wamwaza kuvatu vaze kavatachikizako. Chipwe ngocho, vatachikiza kulema chamulimo kanou, ngocho veji kuyanga lwola lwosena muwande. Chikupu vene, Yehova eji kuvevwilanga kuwaha.

2. Mwomwo ika kamwatela kuhombelako kachi nge chili nakumikaluhwila kulivwisa kuwaha mulimo wakwambulula?

² Kutala nayenu cheji kumikaluhwilanga kupwa vakuwahilila mumulimo wamuwande mwomwo yavyuma tunavuluka tahi? Nge mukiko, kaha kanda kuhombako. Muchima wenu wakuhona kulifwelela unahase kusolola nge mwapwa vakulikehesa kaha nawa kamwasaka vatu vahake mangana kuli yenuko, kaha kamwasaka kulipula jipami navakwenuko. Kaha nawa twatachikiza ngwetu vatu vosena vasaka kuvevwilila, chikumanyi nge vali nakulingila vakwavo vyuma vyamwaza. Shikaho tachikizenu ngwenu, Senu wamwilu atachikiza kanawa ukalu muli nakuhitamo, kaha nawa asaka kumikafwa. (Isa. 41:13) Muchihande chino, natushimutwila havyuma vitanu vize navimikafwa muwane mwakuhonesela  ukalu kana, namwakulivwishila kuwaha mulimo wakwambulula.

ITAVILENU MAZU AKALUNGA AMIJIKIJISE

3. Vyuma muka vyakafwile kapolofweto Yelemiya ambulile vakwavo?

³ Putu vene kunyima, mujimbu waKalunga unajikijisanga vangamba jenyi kachi nge vali namulimo waukalu uze vali nakusaka kutesamo. Achitalenu hachakutalilaho chakapolofweto Yelemiya. Evwile woma omu Yehova amuhanyine mulimo wakwambulula. Yelemiya ambile ngwenyi: “Ami kangwatachikiza kuhanjikako mwomwo ngukanyike wamundende.” (Yele. 1:6) Uno Yelemiya ahonesele ngachilihi ukalu wakuhona kulifwelela? Mazu aKalunga amujikijishile. Ahanjikile kutalisa kumazu aKalunga ngwenyi: “Apwile nge kakahya kaze vanasokelela muvifuwa vyami, kaha ngwahonene kulyungumika kulu.” (Yele. 20:​8, 9) Numba tuhu ngalila apwile nakwambulwila Yelemiya yapwile yayikalu, oloze mujimbu uze vamulwezele kuya nakuvilika wamujikijishile atesemo mulimo wenyi.

4. Vyuma muka navisoloka kachi nge natutanganga Mazu aKalunga nakushinganyeka havyuma tunatange? (Wavaka-Kolose 1:​9, 10)

⁴ Mujimbu watwama muMazu aKalunga weji kujikijisanga vaka-Kulishitu. Omu kaposetolo Paulu asonekelele chikungulwilo chavaka-Kolose ambile ngwenyi, kupwa nachinyingi chakwoloka nachikafwa vandumbwenyi “[vatambukenga] muze mwatela kumeso aYehova,” omu navatwalaho lika “nakwima mihako mumilimo yamwaza yosena.” (Tangenu Wavaka-Kolose 1:​9, 10.) Eyi milimo yamwaza mwaliweza nakwambulula mujimbu wamwaza. Shikaho, nge natutanganga Mazu aKalunga nakushinganyeka havyuma tunatange, kaha natufwelela Yehova nakumona hatoma kulema chakwambulula mujimbu waWangana.

5. Uno tunahase kunganyala ngachilihi hakutanganga Mbimbiliya nakulinangulayo?

⁵ Hakusaka Mazu aKalunga atunganyalise, katwatela kuwatanganga lumbushiko chipwe kulinangulawo nakuwashinganyeka mulumbushiko. Pwenu nalwola lwaluvulu. Nge munahete hachisoneka chize kamwevwishishileko, kaha kanda namuchizombokelako. Oloze zachisenu Watch Tower Publications Index, chipwe Chinoma chaKukafwa Vinjiho jaYehova Kuhehwojola mangana muwane omwo vanalumbununa chisoneka kana. Nge namumbatanga lwola lwaluvulu hakulinangula, kaha namufwelela chikuma muchano wamuMazu aKalunga. (Teso. 1, 5:21) Nge namukunyuka chikuma havyuma munalinangula, kaha namulivwisa kuwaha chikuma kulweza vakwenu vyuma kana.

 LIWAHISENUNGA KANAWA VYAMULIMO WAKWAMBULULA

6. Mwomwo ika twatela kuwahishila kanawa vyuma natukashimutwila muwande?

⁶ Nge namuwahisanga kanawa vyuma namukahanjika muwande, kahomu namukashimutwilanga navatu namukapwa vakukasunuka. Yesu akafwile tumbaji twenyi valiwahishilenga chimweza shimbu kanda avatume mumulimo wakwambulula. (Luka 10:​1-11) Hakuwana nge tumbaji vakavangijile vyuma avanangwile, vevwile kuwaha chikuma havyuma vateselemo.—Luka 10:17.

7. Tunahase kuliwahishila ngachilihi chimweza vyamulimo wakwambulula? (Talenu nawa muvwimbimbi.)

⁷ Tunahase kuliwahishila ngachilihi chimweza vyamulimo wakwambulula? Twatela kushinganyeka havyuma tuli nakusaka kuhanjika, nakuvihanjika mumazu etu. Twatela nawa kushinganyekela chimweza hajijila vatu navakwilamo kumujimbu wetu nomwo twatela kuvakumbulwilamo. Kaha nge tunawane vatu, natuunda muchima, nakumwesa kukanwa nakuhanjika navo mujila yayivwovu.

8. Mujila muka vaka-Kulishitu vavafwanyishila kumilondo yauma vavuluka muchakutalilaho chakaposetolo Paulu?

⁸ Kaposetolo Paulu alumbunwine mulimo twatwama nawo mumulimo wakwambulula hakwamba ngwenyi: “Tuli naluheto kanelu mumilondo yauma.” (Koli. 2, 4:7) Uno elu luheto lwapwa luka? Wapwa mulimo wakuyovola vatu wakwambulula mujimbu waWangana. (Koli. 2, 4:1) Nyi milondo yauma yemanyinako ika? Yemanyinako vangamba jaKalunga vaze veji kwambulilangako vakwavo mujimbu wamwaza. Mumakumbi aPaulu, vaka-kusekasana vazachishilenga milondo yauma mangana vambachilemo vyuma vyavilemu vyakufwana nge vyakulya, navinyo najimbongo. Chochimwe nawa, Yehova atuhana mulimo waulemu uze wapwa mujimbu wamwaza. Yehova nahase kutujikijisa mangana tuvilike ou mujimbu nakashishi.

LOMBENUNGA YEHOVA AMIKAFWE MUPWENGA VAKUHAMUKA

9. Munahase kuhonesa ngachilihi ukalu wakwivwa vatu woma? (Talenu nawa muvwimbimbi.)

⁹ Shimbu jimwe tunahase kwivwa woma wavatu. Tunahase kuhonesa ngachilihi ukalu kana? Shinganyekenu havyuma valombele vaposetolo omu vavakanyishile kwambulula. Muchishishisa chakulitwamina kwambulula mwomwo yakwivwa woma, oloze valombele Yehova avakafwe “vahanjikenga lika mazu [enyi] nakumika.”  Hahaze vene, Yehova akumbulwile kulomba chavo. (Vili. 4:​18, 29, 31) Nayetu nawa twatela kulombanga Yehova atukafwe kachi nge shimbu jimwe tunalizakamina mwomwo yakwivwa vatu woma. Lombenu Yehova amikafwe mupwenga nazangi yakuzanga vatu mangana muhone kwivwa woma kwambulila vatu mujimbu wamwaza.

10. Uno Yehova nahase kutukafwa ngachilihi tutesemo mulimo wetu hakupwa tuVinjiho jenyi? (Isaya 43:​10-12)

¹⁰ Yehova atutongola kupwa tuVinjiho jenyi, kaha nawa atufwelelesa ngwenyi mwatukafwa tupwenga vakuhamuka. (Tangenu Isaya 43:​10-12.) Achishinganyekenu hajijila jiwana eji kulingilangamo ngocho. Jila yatete, Yesu eji kupwanga nayetu kala lwola natwambulula mujimbu wamwaza. (Mateu 28:​18-20) Yamuchivali, Yehova atongola vangelo vatukafwe. (Kuso. 14:6) Yamuchitatu, Yehova atuhana shipilitu yenyi yajila mangana yitukafwe twanuke vyuma tunalinangula. (Yowa. 14:​25, 26) Yamuchiwana, Yehova atuhana vandumbwetu vaze tweji kuzatanga navo. Tuli navyuma vyavivulu navitukafwa tufukile mumulimo wakwambulula, mwomwo Yehova mwatukafwa hamwe kaha navandumbwetu.

ASHIWISENUNGA MUCHIMA NAKUMONA VYUMA MUJILA YAMWAZA

11. Munahase kuwana ngachilihi vatu vavavulu nge muli mumulimo wakwambulula? (Talenu nawa muvwimbimbi.)

¹¹ Kutala mweji kuhombanga nge munawane vatu vavandende kaha tahi? Nge mukiko, kaha lihulisenu ngwenu: ‘Uno oholili vatu vamungalila yami vanayi kulihi?’ (Vili. 16:13) ‘Uno vanayi kumilimo tahi, nyi kuvitanda?’ Nge mukiko chili, kaha esekenu kuwana vatu vavavulu hakwambulwila mumukwakwa? Ndumbwetu Joshua ambile ngwenyi: “Cheji kungwashiwilanga kwambulula nge nguli nakutambuka kuvitanda nakuvihela vyakukunjikila jiminyau.” Ikiye napuwenyi Bridget veji kuwananga vatu vavavulu hamembo hakuvatambukila nachingoloshi, kuhakilako vene nakuvatambukila lyaSondo namusana.—Efwe. 5:​15, 16.

12. Vyuma muka navitukafwa tutachikize vyuma vafwelela vatu chipwe vize vanalizakamina?

¹² Nge vatu natwambulila kavazangile mujimbu tuli nakuvambulilako, kaha twatela kuwana vyuma vafwelela chipwe ovyo vanalizakamina. Joshua napuwenyi Bridget veji kuzachisanga chihula chatwama helu lyatalakiti hakuputuka kushimutwila navatu. Chakutalilaho, nge vali  nakuzachisa talakiti yakwamba ngwavo Mbimbiliya Mwayimona Ngachilihi? veji kuhanjikanga ngwavo: “Vatu vamwe veji kumonanga Mbimbiliya kupwa himukanda waKalunga, kaha veka kavayimona ngochoko. Enu mwashinganyeka ngachilihi?” Echi cheji kuvakafwanga vaputuke kushimutwila namutu.

13. Mwomwo ika tweji kufukilanga mumulimo wakwambulula numba tuhu vatu kaveshi kwivwilila kumujimbu wetuko? (Vishimo 27:11)

¹³ Kufukila chetu mumulimo wakwambulula kachapendamina havyuma navifumamoko. Mwomwo ika? Mwomwo etu tunahane unjiho, chuma chize Yehova naMwanenyi vasaka etu tulinge. (Vili. 10:42) Shikaho, tachikizenu ngwenu numba tuhu katweshi kuwana vatu vakushimutwila navoko, chipwe nge vatu navakana mujimbu natuvalweza, tunahase kupwa vakuwahilila mwomwo tunatachikiza ngwetu tuli nakwivwisa Setu wamwilu kuwaha.—Tangenu Vishimo 27:11.

14. Mwomwo ika twatela kuwahilila kachi nge mukwetu muka-kwambulula nawane mutu wakuwahilila mungalila yakwambulwila?

¹⁴ Tunahase nawa kuwahilila kachi nge mukwetu muka-kwambulula nawane mutu wakuwahilila mungalila tweji kwambulwilanga. Uno Kaposhi Kakutalila nafwanyisa mulimo wetu kukutondatonda mwana wakujimbala. Vatu vavavulu veji kupwanga namulimo wakutondatonda ou kanyike noku noku. Nge uze mwana vanamuwane, vatu vosena veji kupwanga vakuwahilila, keshi uze namuwane kahako. Chochimwe nawa, namulimo wakunangula vatu vapwenga tumbaji wasakiwa kuzachila hamwe. Vaka-kwambulula vosena vasakiwa kwazanamo mangana vambulwile ngalila yosena, kaha nawa vosena veji kuwahililanga nge mutu umwe naputuka kukunguluka.

SHISHIKENUNGA HAZANGI YAKUZANGA YEHOVA NAVAKWENU VATU

15. Uno kukavangiza mazu ahali Mateu 22:​37-39 nachitukafwa ngachilihi tutohwese twima yetu yakwambulula? (Talenu nawa muvwimbimbi .)

¹⁵ Twima yetu yakuzata mulimo wakwambulula yinahase kutohwelako hakushinganyekanga hazangi yakuzanga Yehova navakwetu vatu. (Tangenu Mateu 22:​37-39.) Achishinganyekenu kuwaha eji kwivwanga Yehova nge natumono tuli nakwambulula nakuwaha veji kwivwanga vatu nge vanaputuka kulinangula Mbimbiliya. Shinganyekenu nawa haulwilo uze navakapwa nawo vatu vaze veji kwitavilanga mujimbu tweji kuvambulilanga.—Yowa. 6:40; Chimo. 1, 4:16.

16. Tunahase kulivwisa ngachilihi kuwaha mumulimo wakwambulula kachi nge tuli muluuta? Hanenu vyakutalilaho.

 ¹⁶ Kutala kamweshi nakuhasa kutambuka mwomwo yavyuma vimweko tahi? Nge mukiko, kaha shinganyekenu havyuma munahase kulinga mangana musolole ngwenu mwazanga Yehova navakwenu vatu. Omu kwapwile musongo wachihita waCOVID-19, Samuel napuwenyi Dania vatwaminenga kaha hembo lyavo. Mulwola elu lwalukalu ngana, vambulwilenga kuzachisa jishinga, nakusonekela vatu mikanda, nakutetekela vilongesa vyaMbimbiliya kuzachisa Zoom. Samuel ambulililenga vatu vaze awanyinenga kuchipatela kuze ayilenga omu apwilenga nakutambula vitumbo vyamusongo wakasa. Ambile ngwenyi: “Nge tuli nakuhita muukalu, tunahase kulizakamina nakuhomba, kaha nawa lufwelelo lwetu vanahase kulweseka. Shikaho twasakiwa kupwa vakuwahilila mumulimo wetu wakuzachila Yehova.” Omu vapwile muukalu kanou, Dania aholokele, kaha apwile muluuta hatukweji vatatu. Kaha asakiwile kutwama hachitwamo chakushindumuna hatukweji 6. Dania ambile ngwenyi: “Ngwazachilenga nangolo nakulinga vyuma kweseka nomu chapwilenga chiyoyelo chami. Ngwambulililenga nase uze angutambukilililenga navatu vaze vangunehelelenga vyuma kuzuvo yami. Kaha ngwashimutwililenga nawa hashinga namutu uze azachilenga kukapani yakulanjisa vitumbo.” Numba tuhu Samuel naDania kavazachilenga ngana muze vazachilenga hakavangako, oloze vesekele kuzata nahakumina ngolo javo, ngocho vapwile vakuwahilila.

17. Tunahase kunganyala ngachilihi nge natuzachisa vyuma tunashimutwila muchihande chino?

¹⁷ Shikaho, esekenu kukavangiza vyuma vyosena vitanu tunashimutwila muchihande chino. Chuma hichuma tunashimutwila chinapu nge vyelu nalupa vize natuzachisa hakutunga chindanda. Nge natufutula kanawa vyuma vyosenevi, kaha chindanda nachiyema. Shikaho, nge natukavangiza vyuma vyosena evi tunashimutwila, kaha natupwa vakulizanga kuhonesa vishinganyeka vyakuhenga nakulivwisa kuwaha mumulimo wakwambulula.