1, 2. Mwomwo ika twatela kunangula vavahya vafwile kuzata milimo yamuliuka?

YESU amwene mulimo wakwambulula mujimbu waWangana kupwa waulemu chikuma. Chipwe ngocho, awanyinengako lwola lwakunangula vakwavo vapwenga tufunga navalongeshi. (Mateu 10:5-7) Chakutalilaho, Fwilipu apwile namulimo wakwambulula mujimbu, oloze anangwile vana venyi vamapwevo vawana vatachikize mwakunangwila vakwavo muchano wamuVisoneka. (Vili. 21:8, 9) Uno mulimo wakunangula vakwetu walema ngachilihi makumbi ano?

² Vatu vavavulu mukaye vali nakwitavila muchano. Vaze vanakufwila kuvambapachisa vatela kumona kulinangula Mbimbiliya hauka kupwa chachilemu. Twatela nawa kuvanangula muchano namwakwambulwila mujimbu wamwaza. Kaha nawa muvikungulwilo vyetu muli vandumbwetu vamalunga vaze twatela kukolezeza mangana vatengamo kupwa vaka-kuzachila chipwe tulama. Nge vakulwane vakuhya navazachisa “jindongi jamwaza” hakuvakafwa, kaha navazovoloka kushipilitu.—Vishi. 4:2.

3, 4. (a) Paulu ahanjikile ngachilihi omu kulinangula Visoneka chinahase kutukafwa mumulimo wamuwande? (b) Twatela kulinga ika shimbu kanda tukolezeze uze tunakunangula atangenga Mbimbiliya hauka?

³ Uno kulinangula Visoneka hauka chalema ngachilihi? Mazu asonekele kaposetolo Paulu kuli vaka-Kulishitu vamuKolose akumbulula chihula kana. Asonekele ngwenyi: “Katwalitwamina kumilombelangako ngwetu muzale nachinyingi chakwoloka chakutachikiza mwaya muchima wenyi mumangana osena namukunangakana chakushipilituko, mangana mutambukenga muze mwatela kumeso aYehova nakumwivwisanga kuwaha chikuma, omu namutwalaho lika nakwima mihako mumilimo yamwaza yosena nakukula muchinyingi chakwoloka chakumutachikiza Kalunga.” (Kolo. 1:9, 10) Mazu kana akafwile vaka-Kushilitu muKolose vatambukenga “muze mwatela kumeso aYehova nakumwivwisanga kuwaha chikuma.” Echi chavakafwile vemenga “mihako mumilimo yamwaza,” chikumanyi hakwambulula mujimbu. Vangamba jaYehova vatela kutanganga Mbimbiliya hakumbi hakumbi mangana vazate natwima. Shikaho twatela kukafwa vilongesa vyetu vyaMbimbiliya vamone kulema chakulinga ngocho.

⁴ Shimbu kanda tukafwe vakwetu vamone kulema chakulinangulanga Mbimbiliya, twatela chatete kulinangula etu vavene. Twatela kupwanga nachilongesa chaMbimbiliya. Lihulisenu ngwenu: ‘Kachi nge mwenya zuvo mwahanjika vize vyalimbalaka naVisoneka chipwe mwanguhulisa chihula chachikalu, kutala ngunahase kumukumbulula naMbimbiliya tahi? Nge nangutanga mijimbu yahanjika omu Yesu naPaulu naveka vazachile natwima mumulimo wakwambulula, kutala ngweji kushinganyeka omu nayami ngunahase kuzata natwima mumulimo waYehova tahi?’ Tuvosena twasakiwa chinyingi nakutukafwa chakufuma muMazu aKalunga. Nge natulweza vakwetu omu tunanganyala hakulinangula Mbimbiliya hauka, kaha natuvakafwa navakiko vanganyale hakutanganga Visoneka.

5. Lumbununenu omu munahase kukafwa chilongesa chenu apwenganga nachilongesa chaMbimbiliya hauka.

⁵ Munahase kulihulisa ngwenu, ‘Nangukafwa ngachilihi chilongesa chami alinangulenga Mbimbiliya lwola lwosena?’ Vangilenu kumunangula mwakuwahishila chilongesa mweji kupwanga nacho. Mulwezenu atangenga vihande vyakuhakilako mumukanda waUno Chikupu Mbimbiliya Yanangula Vyuma Muka? hamwe kaha navisoneka vanenyikilako. Mukafwenu awahisenga vyuma namukalinangula kukukunguluka nakufwila kukahanjikaho. Mukolezezenu atangenga Kaposhi Kakutalila naTonenu! uze mwalovoka kakweji hikakweji. Mulwezenu nawa mwakuzachishila CHISETE CHAMIKANDA CHAHAINTERNET nge muli nayo mulilimi lyenu, mangana awane muvakumbulwila vihula vyahanjika haMbimbiliya. Hakumukafwa  mujila kaneyi, muka-kulilongesa Mbimbiliya mwalivwisa jino kuwaha kulinangula Mazu aKalunga hauka.

6. (a) Munahase kukafwa ngachilihi chilongesa chenu azange Mazu aKalunga? (b) Kachi nge muka-kulinangula mwazanga Mazu aKalunga kaha mwalinga vyuma muka?

⁶ Katwatela kushinjila mutu kutanga nakulinangula Mbimbiliyako. Oloze tuzachisenu vinoma vatuhana muliuka lyaYehova mangana vimukafwe azange kulinangula Mbimbiliya. Mukuhita chalwola, ou muka-kulinangula mwevwa ngana muze evwile muka-kwimba jisamu uze ambile ngwenyi: “Chinapu chamwaza kuli ami kupandama kuli Kalunga. Ngunalingisa Mwata Wakulitulaho Yehova kupwa uchinyino wami.” (Samu 73:28) Shipilitu yaYehova nayimukafwa hakupwa namuchima wakufwila kulinangula.

7. Yesu anangwile ngachilihi vatu vambulule mujimbu wamwaza? (Talenu muvwimbimbi wakulivanga.)

⁷ Hali Mateu kapetulu 10 hatwama jindongi jize Yesu ahanyine vaposetolo jenyi 12. Yesu kahichilenga mutenga hakuhanjikako, oloze ahanjikile havishina asakile vatu vatachikize. ^[1] Ava vaposetolo vevwililile omu Yesu avalwezelenga mwakwambulwila kanawa. Kufumaho vosena vayile muwande. Valondezezele jijila azachishilenga Yesu, kaha chavakafwile vapwenga jino vaka-kunangula Mazu aKalunga vakwipangweji. (Mateu 11:1) Nayetu nawa tunahase kukafwa vilongesa vyetu vapwenga vaka-kwambulula mujimbu vakwipangweji. Tushimutwilenu hajijila jivali tunahase kuvakafwilamo.

8, 9. (a) Yesu ahanjikilenga ngachilihi navatu mumulimo wamuwande? (b) Twatela kukafwa ngachilihi vaka-kwambulula vavahya vashimutwilenga navatu ngana muze alingile Yesu?

⁸ Shimutwilenunga navatu. Yesu ashimutwililenga navatu vyaWangana. Chakutalilaho, ashimutwilile napwevo umwe halishima lyaYakova kwakamwihi nanganda yaSukale. (Yowa. 4:5-30) Ashimutwilile nawa naMateu Levi uze apwile muka-kutambula mitelo. Mikanda yaMujimbu Wamwaza kayahanjika chikuma havyuma vashimutwilileko, oloze Mateu etavilile kupwa muka-kukavangiza Yesu. Mateu naveka vevwililile kuvyuma ahanjikile Yesu omu vapwile kuchiwanyino chakulya muzuvo yaMateu.—Mateu 9:9; Luka 5:27-39.

⁹ Halwola lweka nawa Yesu ashimutwilile naNatanyele uze apopolwele vatu vakufuma kuNazaleta. Echi chalingishile Natanyele alumune vishinganyeka apwile navyo havatu vakulifuchi kana. Kaha evwililile kuvyuma anangwilenga Yesu wakuNazaleta. (Yowa. 1:46-51) Shikaho twatela kunangula vaka-kwambulula vavahya vashimutwilenga navatu mujila yamwaza yize nayivalingisa vevwilile vyuma navahanjika. ^[2] Vatu vaze natunangula mujila kaneyi navawahilila hakumona omu vatu navakula kanawa kumujimbu wamwaza.

10-12. (a) Yesu akafwile ngachilihi vaze vapwile nalipwila lyakwivwilila kumujimbu wamwaza? (b) Twatela kukafwa ngachilihi vavahya vapwenga nauhashi wakunangula muchano wamuVisoneka?

¹⁰ Kafwenu vatu vapwenga napwipwi. Numba tuhu Yesu kapwile nalwola lwaluvulu lwakwambulula mujimbuko, oloze akafwilenga vatu vapwenga napwipwi yakwivwilila kumujimbu wamwaza. Chakutalilaho, Yesu emanyine muwato hakwambulula mangana vatu vavavulu vamwivwe. Halwola vene luze alingishile Petulu akwate vayishi vavavulu, kaha amulwezele ngwenyi: “Kufuma vene oholili naufutanga vatu.” Vyuma muka valingile hakwivwa mazu awa? Petulu namasepa jenyi “vakindulukile nakusulika mato avo kutunda, kaha vasezele vyuma vyosena, vamukavangijile [Yesu].”—Luka 5:1-11.

¹¹ Nyikotemu uze apwile hali vakulwane muSunendeline, azangile vyuma anangwilenga  Yesu. Oloze hakwivwa vatu woma kasakile kulinangula vyavivulu kuli Yesu musana weyeko. Yesu apwilenga wamuvwovu nakulisuula, shikaho etavilile kushimutwila naNyikotemu omu ejile naufuku. (Yowa. 3:1, 2) Vyuma muka natulinangula kuchihande kanechi? Mwana Kalunga awanyinengako lwola lwakukolezeza vatu vapwenga nalufwelelo lwakukola. Nayetu nawa twatela kuwanangako lwola lwakukindulukilanga kuvatu nakuvilongesa vyaMbimbiliya vaze vali napwipwi yakulinangula muchano.

¹² Nge natuzatanga hamwe navaka-kwambulula vavahya muwande, kaha navazovoloka mumulimo wakunangula vatu Mbimbiliya. Twatela kuvakafwa vatachikize ngwavo kavatela kuliula vatu vaze navasoloka nge kavasakile chikuma kulinangulako. Twatela kuyanga navaka-kwambulula vavahya kuvilongesa vyetu vyaMbimbiliya nakuvatu vaze twashikile. Kuvanangula mujila kana nachivakafwa vafwile kupwa navilongesa vyavo vavene. Navalinangula nawa kupwa naluzema muwande chakuzeneka kulitwamina.—Ngale. 5:22; talenu lipwata lyakwamba ngwavo “ Chapwa Chamwaza Kupwa Nalukakachila.”

13, 14. (a) Vyakutalilaho vyavatu vasoneka muMbimbiliya vaze valisuwile nakukafwa vakwavo vinamikafwe ngachilihi? (b) Munahase kukafwa ngachilihi vaka-kwambulula vavahya navanyike mangana vazangenga vandumbwavo?

¹³ Mijimbu yamuMbimbiliya yasolola mulimo twatwama nawo ‘wakuzanga vandumbwetu’ nakuvakafwa. (Tangenu WaPetulu 1, 1:22; Luka 22:24-27.) Mwana Kalunga alisuwile namwono wenyi wosena mangana akafwe vakwavo. (Mateu 20:28) Ndokase “azachilenga milimo yamwaza yayivulu nakuhananga mawana akutetela.” (Vili. 9:36, 39) Maliya wakuLoma ‘azachile milimo yayivulu’ yakukafwa vandumbwenyi muchikungulwilo. (Loma 16:6) Twatela kukafwa ngachilihi vavahya vamone kulema chatwama hakukafwa vandumbwavo muchikungulwilo?

¹⁴ Vaka-Kulishitu vakuhya vatela kuyanga navandumbwetu vavahya hakumenekela vaveji natushinakaji. Nge chinahase, omu visemi navayanga nakumenekela vandumbwetu vatela kuyanga hamwe navana vavo. Vakulwane muchikungulwilo vatela kuzachilanga hamwe navakwavo hakuzakama vandumbwetu vatushinakaji muchikungulwilo. Kachi nge natuzachilanga hamwe navaze vavahya mumilimo kaneyi, kaha navalinangula mwakusolwela likoji kuvandumbwavo. Chakutalilaho, mukulwane umwe muchikungulwilo amenekelelenga vandumbwenyi omu apwilenga mumulimo wamuwande. Kaha ndumbwetu wamukweze uze ayilenga nenyi alinangwile nge vatu vosena muchikungulwilo vatela kutachikiza ngwavo vavazanga.—Loma 12:10.

15. Mwomwo ika vakulwane muchikungulwilo vatela kukafwa vandumbwetu vamalunga vazovoloke?

¹⁵ Hakuwana nge Yehova eji kuzachisanga malunga mangana vanangule muchikungulwilo, ngocho vandumbwetu vamalunga vatela kupwa nauhashi wakunangula. Vakulwane vatela kuwanangako lwola lwakwivwilila muka-kuzachila omu mwahituluka muchihande chenyi. Ngocho hakumukafwa mwapwa nauhashi wakunangula kanawa Mazu aKalunga.—Nehe. 8:8. ^[3]

16, 17. (a) Paulu akafwile ngachilihi Chimoteu mangana azovoloke? (b) Vakulwane vatela kukafwa ngachilihi vandumbwetu vaze navakapwa tufunga muvikungulwilo?

¹⁶ Muvikungulwilo muli nakusakiwa chikuma tufunga, ngocho vandumbwetu vamalunga vatela kuvanangula mangana vakazate mulimo kana. Paulu asonekelele Chimoteu mukanda uze wasolola mwakunangwila, ambile ngwenyi: “Ove mwanami, kwatanga lika ngolo mulikoji  lyalinene lize lili muli Kulishitu Yesu, kaha vyuma vize wevwile kuli ami, vize vanakundwiza nakuli vinjiho vavavulu, valwezevyo vatu vakushishika vaze navakatamo kunangula vakwavo nawa.” (Chimo. 2, 2:1, 2) Chimoteu vamunangwile hakuzata hamwe nakaposetolo Paulu uze apwile mukulwane. Chimoteu jino azachishile jijila jakwambulula mujimbu jize amunangwile Paulu hakuzata mulimo wajila.—Chimo. 2, 3:10-12.

¹⁷ Paulu kechelele Chimoteu azate ukawenyiko, oloze azachilenga nenyi muwande. (Vili. 16:1-5) Navakulwane makumbi ano vatela kulondezeza Paulu hakumbatangako vaka-kuzachila vakuhya omu navayanga mumulimo waufunga. Vakulwane vatela kukafwa ava vandumbwetu mangana valinangule vilinga vyasakiwa kuli tulama vaka-Kulishitu vyakufwana nge kunangula kanawa, kuzama mulufwelelo, kupwa namuchima wakutalilila, nazangi. Jila kaneyi yapwa yamwaza kunangwilamo vaze navakapwa tufunga ‘vautanga waKalunga.’—Petu. 1, 5:2.

18. Mwomwo ika twatela kumona mulimo wakunangula vakwetu muliuka lyaYehova kupwa waulemu?

¹⁸ Chapwa chachilemu kunangula vakwetu mwomwo vatu vanakuvula muliuka lyaYehova. Yesu naPaulu vanangwile vakwavo, ngocho namakumbi ano kunangula vakwetu chapwa chachilemu. Yehova asaka vangamba jenyi vamakumbi ano vavanangule kanawa mangana vatesemo milimo yavo. Kalunga atuhana mulimo wakunangula vatu vaze vatwama nauhashi waundende, mangana vahase kuzata milimo muchikungulwilo. Omu vyuma vili nakupihilako muno mukaye, nomu mulimo wakwambulula uli nakutohwelako lika, chinapu chachilemu kunangula vatu mukapachapacha.

19. Mwomwo ika twatela kufwelela ngwetu natufukila omu tuli nakunangula vakwetu vazachila Yehova?

¹⁹ Kunangula vatu chasakiwa lwola nakukilikita. Oloze Yehova naMwanenyi navatukafwa nakutuhana mangana akunangula vakwetu. Natuwahilila chikuma hakumona vatu vaze twanangwile ‘vali nakuzata nangolo nakulihakaho chikuma.’ (Chimo. 1, 4:10) Shikaho tutwalenuho lika kuzovoloka kushipilitu omu natuzata mulimo wajila waYehova.