Echi hichihande chimwe havihande vize vaka-kole jaYesu vamuvangijikililenga ikiye natumbaji twenyi. MuJishimbi jaMose mwapwile jishimbi jajivulu jize jahanjikilenga hakulitomesa kumajilo, nakumbumba, namwakulingila mijimba yakufwa. Vahanjikile nawa namwakumbilila tuji. Vatu valitomeselenga hakuhana mawana, hakusana, chipwe hakusapwila.—Levi., kapetu. 11-15; Kula., kapetu. 19.

VaLapi vavaYuleya vakavangijilenga munona munona jishimbi josena. Mukanda umwe wavuluka ngwawo, valapi “vakekeselenga hakala vyuma vinahase kuneha musongo nomu vanahase kuukumishilamo kuchina naukwata vatu veka. Vakekeselenga nawa vyuma vyakuzachisa kachi nge vanakusaka kuka mutu nakwachiwa musongo kana, novyo atela kulinga numba atome.”

Vaka-kole jaYesu vamuhulishile ngwavo: “Mwomwo ika tumbaji twove kaveshi kukavangiza visemwa vyavakakuluka jetuko, oloze veji kulyanga namavoko avo akujiluluka?” (Mako 7:5) Ava vatwamina kavapwile nakulumbununa nge tumbaji twaYesu vanahase kuviza hakulya chakuhona kusana kumavokoko. Jishimbi jachisemwa chavo javulukile nge mutu atela kumwangila meya kumavoko shimbu kanda alyenga. Mukanda twavulukanga hakavanga wambile nawa ngwawo: “Kwapwile lilonga lyakulipwila lyakuzachisa hakulisangilila, nameya akuzachisa, namutu wakusangilila vakwavo, noho atela kukumina hakusana kumavoko.”

Oloze Yesu avakumbulwile mujila yayashi. Alwezele vatwamina vamukwitava vamulikulukaji lyamyaka lyakulivanga ngwenyi: “Isaya apolofwetele kanawa vyayenu vaka-kulyonga, kweseka namuze vasoneka ngwavo, ‘Vatu kana ava veji kunguvumbikanga kaha namivumbo yavo, oloze michima yavo yili kwakusuku nayami. Kulemesa veji kungulemesanga cheji kuyanga mwamokomoko, mwomwo veji kunangulanga jishimbi javatu kupwa nge himazu aKalunga.’ Enu mweji kusezanga Jishimbi jaKalunga nakulinjilila kuvisemwa vyavatu.”—Mako 7:6-8.