VAKA-KULINANGULA Mbimbiliya tunahase kuvafwanyisa kuli vaze veji kuyanga nakutonda malolwa aulu. Vatela kuzata nangolo nakutwalaho lika kutondatonda chinyingi chamuVisoneka numba vawane mangana. Tukekesenu hajijila jitatu veji kuwanyinangamo ulu, mangana tumone vyuma natulinangulako.

Twambenga ngwetu muli nakutambuka kungenge yakalwiji, kaha namumona kachuma kamwe kali nakumunyika. Omu namukanona namumona jino ngwenu lilolwa lyaulu. Kalilolwa kana kakandende, oloze kandando yayinene chikuma. Kaha namutalatala ngwenu pamo namuwanako namalolwa akwavo.

Chochimwe nawa, munahase kwanuka likumbi limwe omu Chinjiho chaYehova ejile hembo lyenu nakumyambulila mujimbu walutalililo uze watwama muMbimbiliya. Pamo munakwanuka vyuma vyamwaza mwalinangwile halikumbi lyatete vize tunahase kufwanyisa kuulu. Hakutanga Mbimbiliya mwamwene lijina lyaKalunga Yehova halwola lwatete. (Samu 83:18) Mwalinangwile nawa nge munahase kupwa sepa lyaYehova. (Yako. 2:23) Hahaze vene mwamwene ngwenu munawane vyuma vyavilemu kuhambakana ulu. Kaha mwafwililile kutwalaho lika kulinangula vyavivulu.

Tuvihanda twatundende twamalolwa aulu tweji kuwanyiwanga chikuma kumihongi nakutulwiji. Vaka-kutondatonda ulu veji kukungululanga vihanda kanevi vyaulu hatukweji vavandende, kaha vyeji kufwikanga jimbongo jajivulu chikuma.

Omu mwaputukile kulinangula Mbimbiliya naVinjiho jaYehova, pamo mwevwile nge mutu uze nawane lilolwa lwaulu. Kushinganyeka hajivesi jamuMbimbiliya chawezeleleko kuchinyingi chenu chakulinangula vyakushipilitu. Omu mwashinganyekele chikuma hamuchano wamuMbimbiliya mwawanyine, mwamwene omu munahase kupandama kuli Yehova nakutwama muzangi yenyi oku muli nakuvandamina kuyoya chahaya myaka yosena.—Yako. 4:8; Yuta 20, 21.

Ngana muze muka-kutondatonda ulu eji kufwilanga awane malolwa kana, nayenu nawa mwatela kufwila kuwana chinyingi chachilemu  chakushipilitu. Omu mwalinangwile muchano, mwalihanyine kuli Yehova nakumimbapachisa.—Mateu 28:19, 20.

Lwola lumwe muka-kutondatonda malolwa eji kupazulanga malolwa numba awane malolwa kana. Malolwa amwe apwa akukola kaha chasakiwa kuhundangana numba apazuke. Lwola lumwe chapwa chachikalu kutachikiza nge hamalolwa kana hali aulu. Mwomwo ika? Mwomwo hamulumba wamalolwa hanahase kupwa kaha kaulu kakandende. Chipwe ngocho, muka-kutonda ulu eji kuhundangana kutondatonda mwomwo atachikiza kulema chamalolwa kana.

Mutu atela kuzata nangolo kufuma hakumulongesa “kunangula chamaputukilo chakuvuluka Kulishitu.” (Hepe. 6:1, 2) Mwatela kuzata nangolo mangana mulinangule vyuma vyavihya hachilongesa chenu chaMbimbiliya. Vyuma muka mwatela kulinga mangana munganyale kuchilongesa chenu chaMbimbiliya, numba tuhu munalinangulanga hamyaka yayivulu?

Mwatela kupwa namuchima wakufwila kulinangula nakulama vishina. Nge namulinga ngocho, kaha namuwana chinyingi chachilemu chamuVisoneka chize nachimikafwa mukuyoya. (Loma 11:33) Zachisenunga vinoma vatuwahishila vyakutukafwa kuhehwojola mangana mutachikize vyavivulu. Fwilenu kuwana muvakumbulwila vihula vyamuMbimbiliya. Shimutwilenunga navakwenu vamilweze vihande naVisoneka vize vyeji kuvakafwanga nakuvakolezeza. Valwezenu vishina munalivwisa kuwaha hakulinangula chenu Mazu aKalunga.

Kamwatela kaha kufwila kupwa nachinyingi mangana mulisase nachoko, nduma. Kaposetolo Paulu ambile ngwenyi: “Chinyingi cheji kunehanga kulivwimba.” (Koli. 1, 8:1) Shikaho, fwilenu kupwa vakulinyisa nakuzama mulufwelelo. Pwenunga nakulemesa Kalunga mwatanga, nachilongesa chahauka, mangana chimikafwe mulame jishimbi jaYehova nakukafwa vakwenu. Kaha namuwahilila mukuyoya chenu mwomwo munawane chuma chachilemu chikuma kuhambakana ulu.—Vishi. 3:13, 14.