1, 2. (a) Mukanda waIsaya 60:22 unakutesamo ngachilihi mumakumbi ano akusongo? (b) Vyuma muka vinakusakiwa muliuka lyaYehova lyahamavu?

“VAVANDENDE navakapwa likombakaji, kaha vavapululu navakapwa lifuchi lyangolo.” (Isa. 60:22) Upolofweto kana uli nakutesamo makumbi ano akukuminyina. Chakutalilaho, mumwaka wamulimo wa 2015, vaka-kwambulula Wangana vakuheta ku 8,220,105 vanazatenga chikuma mumulimo wakwambulula mukaye kosena. Chihanda chamakumishilo chaupolofweto kana chatela kukunyula vaka-Kulishitu vosena, mwomwo Setu wamwilu atulweza ngwenyi: “Ami Yehova yami nangukachanguhwisa halwola lwacho.” Nganomu vatu vali muminyau navamona ngwavo minyau yinakulaha chikuma, nayetu tunakumona omu mulimo wakunangula vatu unakuzovoloka chikuma. Uno tunakuzata ngachilihi mulimo kana? Kutala tuli nakuzata ou mulimo natwima hakupwa tuvaka-kwambulula Wangana tahi? Vandumbwetu vavavulu vali nakulisonekesa upayiniya washimbu yosena nou wakukafwa. Tweji kuwahililanga hakumona vandumbwetu vavavulu vali nakuya nakuzachila kuze kunakusakiwa kukafwa chikuma, chipwe kuzata milimo yeka yamuliuka.

² Chipwe ngocho kuli nakusakiwa lika vaka-kuzata vavavulu. Mwaka himwaka kunakupwanga vikungulwilo vyavihya  kafwe 2,000. Kachi nge chikungulwilo hichikungulwilo nachipwa natulama 5, kaha vaka-kuzachila 10,000 vatela kutamo vavatongole kupwa tulama mwaka himwaka. Echi chinakulumbununa nge vandumbwetu vamalunga vavavulu vatela kutesamo vyuma vyasakiwa mangana vavatongole kupwa vaka-kuzachila. Oloze tuvosena muchikungulwilo, malunga namapwevo tuli “navyuma vyavivulu vyakuzata mumulimo waMwata.”—Koli. 1, 15:58.

3, 4. Kuzovoloka kushipilitu chalumbununa ika?

³ Tangenu WaChimoteu 1, 3:1. Lizu lyachiHelase valumuna ngwavo “kusaka” lyalumbununa kwolovela chuma, chipwe vene kuchizundukila. Kaposetolo Paulu hakuzachisa lizu kana, asolwele nge kuzovoloka kushipilitu chasakiwa kukilikita. Achishinganyekenu ndumbwetu walunga anakushinganyeka kukazata chikuma muchikungulwilo. Halwola kana keshi muka-kuzachilako, oloze namono ngwenyi atela kuzovoloka nakupwa navilinga vyamwaza. Chatete, atela kutamo kupwa muka-kuzachila, kufumaho mwashinganyeka kuzovoloka nakupwa kalama. Shikaho atela kuzata nangolo atesemo vyuma vyasakiwa hakuzata milimo kaneyi muchikungulwilo.

⁴ Chochimwe nawa vandumbwetu vaze vanakusaka kupwa vapayiniya, kuzachila haMbetele, chipwe kuzata mulimo wakulisakila wakutunga jiZuvo jaWangana, vatela kukilikita numba vatesemo milimo kana. Tutalenu jino omu Mazu aKalunga atukolezeza tuvosena tuzovoloke kushipilitu.

5. Vakweze vanahase kuzachisa ngachilihi ngolo javo mumilimo yaWangana?

⁵ Vakweze vatwama nangolo jakuzata chikuma milimo yaYehova. (Tangenu Vishimo 20:29.) Vandumbwetu vamwe vavakweze haMbetele veji kuzatanga milimo yakupulita jiMbimbiliya namikanda yahanjika haMbimbiliya. Veka nawa veji kuzatanga milimo yakutunga jiZuvo jaWangana nakujiwahisa. Nge kunasoloka ukalu wakulijila, vandumbwetu vavakweze veji kuzachilanga hamwe navandumbwetu vavakulwane hakuya nakukafwa kuze kuli ukalu. Kaha nawa vapayiniya vavakweze veji kuyanga nakwambulula mujimbu wamwaza kuvihela vyakwakusuku nakumafuchi vazachisa lilimi lyeka.

6-8. (a) Mukweze umwe alingile ngachilihi hakusaka kuzachila kanawa Kalunga, kaha vyuma muka vyafuminemo? (b) Tunahase kumakila ngachilihi ‘nakumona ngwetu Yehova apwa wamwaza’?

⁶ Chasoloka nge mwatachikiza kulema chakuzachila Kalunga namuchima wosena. Nyi ngachilihi nge mweji kwivwa ngana muze evwilenga ndumbwetu Aaron? Ou ndumbwetu asemukila mutanga yaVinjiho, oloze ahanjikile ngwenyi, “Ngwevwilenga uli kuya kukukunguluka namumulimo wamuwande.” Asakile kuzachila Kalunga nakuwahilila oloze kawahilililengako. Uno alingile ngachilihi?

⁷ Ou ndumbwetu alitomenene vyakulinga, vyakufwana nge kutanga Mbimbiliya, kuwahisa vyakukunguluka, nakuhanjikangaho. Kutwala muze alombelenga lwola lwosena. Kaha azangile chikuma Yehova nakuputuka jino kuzovoloka kushipilitu. Kufuma vene haze Aaron aputukile kuzata upayiniya nakuzachila hamwe navandumbwenyi mumulimo wakukafwa kuze kuli ukalu wakulijila, nakwambulwila kulifuchi lyeka. Oholyapwa apwa kalama kaha nawa anakuzachila haMbetele. Ali nakwivwa ngachilihi havyuma asakula kulinga? Ahanjikile ngwenyi: “‘Ngunamakila nakumona ngwami Yehova apwa wamwaza.’ Ngunakumusakwilila chikuma Yehova hakungukisula, kaha ngunakufwila kuzata nangolo mumulimo wenyi mangana atwaleho lika kungukisula.”

⁸ Muka-kwimba jisamu ambile ngwenyi: “Vaze vali nakutondatonda Yehova kaveshi  kuzeneka chuma chamwaza numba chimweko.” (Tangenu Samu 34:8-10.) Pundu vene, Yehova keshi kusuvilila vaze veji kumuzachilanga natwimako. Tuvosena tweji ‘kumakila mangana tumone ngwetu Yehova apwa wamwaza’ omu tweji kuzatanga nangolo mumulimo wenyi. Shikaho kuzachila Kalunga namwono wetu wosena cheji kutulingisanga tuwahilile chikuma.

9, 10. Mwomwo ika chapwila chamwaza kupwa namuchima ‘wakuvandamina’?

⁹ Omu muli nakufwila kutesamo vyuma munalitomena mwatela kupwa namuchima ‘wakuvandamina.’ (Mika 7:7) Yehova eji kukafwanga vangamba jenyi vakushishika, numba tuhu namuhita lwola. Ashikile Apalahama ngwenyi mwamuhana mwana walunga, oloze Apalahama atelele kupwa nalufwelelo nakutalilila chikoki. (Hepe. 6:12-15) Apalahama afwelelele lika numba tuhu avandaminyine ou mwana hatando yayisuku, kaha Yehova kamwivwishile sonyiko.—Kupu. 15:3, 4; 21:5.

¹⁰ Kuvandamina chapwa chachikalu. (Vishi. 13:12) Nge namushinganyeka havyuma munahono kutesamo kaha namuhomba chikuma. Oloze nachipwa chamwaza kukilikita mangana tuzovoloke. Tushimutwilenu hajijila jitatu tunahase kulingilamo ngocho.

11. Vilinga muka twatela kupwa navyo, kaha mwomwo ika vyapwila vyavilemu?

¹¹ Pwenunga navilinga vyakushipilitu. Nge namutanganga Mazu aKalunga nakushinganyekangaho, kaha namupwa namangana, nakunangakana, nakulinga mwaya chiyulo, nachinyingi, nauhashi wakushinganyeka. Vilinga kanevi vyapwa vyavilemu kuli vaze vali nakutwaminyina muvikungulwilo. (Vishi. 1:1-4;  Chitu. 1:7-9) Kaha nawa omu natutanga mikanda yahanjika vyamuMbimbiliya natumona mwaya vishinganyeka vyaKalunga. Hakumbi hakumbi tweji kusakulanga vyakulinga vyakufwana nge, kuhemahema, kuvwala nakulilenga, mwakuzachishila jimbongo namwakutwamina kanawa navakwetu. Nge natukavangiza vyuma tweji kulinangulanga muMbimbiliya kaha natusakula vyuma vize navivwisa Yehova kuwaha.

12. Vatu muchikungulwilo vanahase kusolola ngachilihi kupwa vakushishika?

¹² Pwenunga vakushishika. Tuvosena malunga namapwevo twatela kufwila kuzata chikuma milimo yaWangana. Chakutalilaho, nguvulu Nehemiya vamuhanyine mulimo wakutongola vatu vazate milimo yaKalunga. Uno atongwele vatu vakufwana ngachilihi? Atongwele vatu vaze vevwilenga Kalunga woma, vakashishi, kaha nawa wamwenemwene. (Nehe. 7:2; 13:12, 13) Makumbi ano nawa “chuma vatonda muli tuselwa shina kupwa vakushishika.” (Koli. 1, 4:2) Pundu vene, Kalunga eji kumona vaze veji kumuzachilanga mukashishi.—Tangenu WaChimoteu 1, 5:25.

13. Mwatela kulondezeza ngachilihi chakutalilaho chaYosefwe nge vakwenu vanamilingi mwamupi?

¹³ Itavilenu Yehova amitomese. Mwatela kulinga ngachilihi nge vakwenu vanamilingi mwamupi? Pamo munahase kufwila kwolola vyuma hahaze vene. Oloze anukenu ngwenu, lwola lumwe kulinga ngocho chinahase kutohwesa ukalu. Chakutalilaho, Yosefwe vamulingile mwamupi kuli vandumbwenyi, oloze kavalaminyinyine kokoko. Kaha kuze ayile, vamukashililile chihande nakumuhaka mukamenga. Oloze Yosefwe apendaminyine hali Yehova amukafwe. Vyuma muka vyafuminemo? “Mazu enyi [Yehova] akiko amutomesele.” (Samu 105:19) Omu vize vyeseko vyakumine, Yosefwe atelemo jino kuzata mulimo vamuhanyine. (Kupu. 41:37-44; 45:4-8) Omu namulipikanga naukalu wamukuyoya, mwatela kulomba Yehova amijikijise, nakumihana mangana, nakuhanjika mujila yakuunda. Enga, Yehova mwamikafwa.—Tangenu WaPetulu 1, 5:10.

14, 15. (a) Mwomwo ika twatela ‘kuhaka muchima’ kujila tweji kwambulwilangamo? (b) Twatela kwambulula ngachilihi kweseka nakwalumuka chavyuma? (Talenu muvwimbimbi wakulivanga nalipwata lyakwamba ngwavo “ Kutala Namuzachisako Jila Yeka Tahi?”)

¹⁴ Paulu alwezele Chimoteu ngwenyi: “Lihakeho lika kutangilanga kumeso avatu, nakulembelelanga vakwenu, nakunangulanga . . . Lilamenga ove ivene, nakuhaka muchima kukunangula chove.” (Chimo. 1, 4:13, 16) Numba tuhu halwola kana Chimoteu apwile wakulindunuka, oloze vamulwezele ‘ahake muchima’ kukunangula chenyi numba azovoloke. Katelele kushinganyeka ngwenyi vatu navevwilinga kumujimbu wenyi kuzachisa jila yimwe kaha yakuvambulwilamoko. Atelele kuzachisa jijila jeka numba ahase kuvaheta hamichima. Nayetu twatela kulinga mwomumwe hakwambulula mujimbu.

¹⁵ Lwola lumwe omu tweji kuyanga nakwambulwila kuzuvo hizuvo katweshi kuwana vatu hamemboko. Kuvihela vimwe chapwa chachikalu kuheta kujizuvo jimwe mwomwo kwatwama vipango. Nge nayenu mweji kumonanga ukalu kana, kaha mwatela kwalumunako jijila jakwambulwilamo.

16. Uno kwambulwila kuvihela vyasanga chawahila halihi?

¹⁶ Kwambulwila kuvihela vyasanga hijila yimwe yamwaza yakutandakanyishilamo mujimbu wamwaza. Vinjiho vavavulu vanakulivwisa kuwaha kwambulula hakuzachisa jila kaneyi. Veji kwambulwilanga kuvisakano, mujisacha, kwakunyinyina jiminyau nakuvihela vyeka. Hakusaka kuwana jila yakushimutwila namutu, veji kuvangila kuhanjika havyuma vinakusoloka mulifuchi, chipwe  kumusangejeka havana venyi, chipwe kumuhulisa hamilimo eji kuzatanga. Omu navatwalaho kushimutwila, muka-kwambulula eji kuhanjika jino haChisoneka nakumona omu mwakumbulwila. Jila mwakumbulwilamo yinahase kulingisa vatwaleho kushimutwila vihande vyamuMbimbiliya.

17, 18. (a) Vyuma muka navimikafwa mwazane mumulimo wakwambulwila hasanga? (b) Muchima waNdavichi wakwalisa Yehova naumikafwa ngachilihi omu namwambululanga mujimbu?

¹⁷ Kachi nge jila kana yeji kumikaluhwilanga kaha kanda namuzeyako. Eddie, payiniya wakuNew York, chamukaluhwililenga kushimutwila navatu kuvihela vyasanga. Oloze mukuhita chalwola ahashile jino. Vyuma muka vyamukafwile? Ambile ngwenyi: “Hakulemesa Kalunga mwatanga, yami napuwami twahehwojwelenga mumikanda tuwane mwakukumbulwila vihula vatuhulishilenga. Twahulishilenga nawa vandumbwetu vatukafwe mwakulingila.” Oholyapwa jino Eddie azanga kwambulwila kuvihela vyasanga.

¹⁸ Omu namutachikiza kanawa mwakwambulwila mujimbu wamwaza, vatu navamona ngwavo muli nakuzovoloka kushipilitu. (Tangenu WaChimoteu 1, 4:15.) Kaha nawa namwalisa Setu wamwilu ngana muze alingile Ndavichi uze ambile ngwenyi: “Nangwalisanga Yehova lwola lwosena. Mivumbo yami nayimwalisanga shimbu yosena. Nangulisashilanga muli Yehova. Kahomu navevwako vavavwovu navawahilila.” (Samu 34:1, 2) Kwambulula chenu natwima nachikafwa vavavwovu navakiko vezenga nakulemesa Kalunga.

19. Mwomwo ika ngamba yaYehova atela kuwahilila numba tuhu ali nakumona ukalu?

¹⁹ Ndavichi embile ngwenyi: “Ove Yehova, milimo yove yosena nayikutohwesanga, vatu jove vakushishika navakwalisanga. Navavilikanga upahu wawangana wove, navahanjikanga vyangolo jove, mangana vajimbwile vatu milimo yove yangolo naukelenga wawangana wove.” (Samu 145:10-12) Omu mukiko vatela kwivwa naVinjiho jaYehova vosena. Nyi ngachilihi nge misongo naushinakaji vili nakumihonesa kuzata chikuma muwande? Anukenu ngwenu nge namwambulila vatu vaze vanakumimenekelanga, kaha munakutohwesa Kalunga. Kachi nge vamikasa mukamenga mwomwo yalufwelelo lwenu, munahase kushimutwila navatu nge chinahase, kaha namwivwisa muchima waYehova kuwaha. (Vishi. 27:11) Omu mukiko vatela kulinga vaze vatwama mutanga yakwitava chakulihandununa. (Petu. 1, 3:1-4) Enga munahase kwalisa Yehova nakuzovoloka kushipilitu namulwola lwaukalu.

20, 21. Vandumbwenu vanahase kunganyala ngachilihi nge munakuzata chikuma muliuka lyaYehova?

²⁰ Yehova mwamikisula nge namutwalaho lika kuzovoloka kushipilitu. Nge namwalumunako lwola lwakwambulula mujimbu wamwaza nakwalumunako nawa vyuma vimwe mukuyoya chenu, kaha namuzata chikuma mulimo wakunangula vatu muchano waKalunga. Kaha nawa kuzovoloka chenu namuchima wenu wakulisuula navinganyalisa vandumbwenu. Kulinyisa chenu nachilingisa vandumbwenu vazanga Yehova vamizange, nakumisakwilila nakumikundwiza.

²¹ Tuvosena tunahase kuzovoloka kushipilitu numba tunazachila Yehova hamyaka yayivulu chipwe hatukweji vavandende kaha. Uno vaka-Kulishitu vakuhya kushipilitu vanahase kukafwa ngachilihi vavahya mangana vazovoloke? Chihula kana natuchishimutwila muchihande chinakavangizaho.