MIJIMBU YETU YAYILEMU YAKUNYIMA
“Ngunakwaha Mihako Yakwalisa Yehova”
“JIJITA josena japwileko kunyima muEurope. . . japwile jajindende hakujesekesa kujita yimwe yasolokele.” Kaposhi Kakutalila waSeptember 1, 1915, avulukile jita yakaye yakulivanga kupwa yayinene chikuma mwomwo mafuchi 30 alizungishilenga. Vatu mukaye valijinjile, kaha ou Kaposhi Kakutalila ambile ngwenyi: “Echi chalingishile milimo [yaWangana] yihone kuya kulutwe chikumanyi mulifuchi lyaGermany naFrance.”
Hakuwana nge mukaye kosena mwapwile liwayanga, Vaka-Kulinangula Mbimbiliya kavatachikijile kanawa mwakulihendela kuvihande vyamafuchi nachiyulo. Chipwe ngocho, vafwililile kwambulila vatu mujimbu wamwaza. Kaha Wilhelm Hildebrandt atambwile mikanda yayivulu yaThe Bible Students Monthly mulilimi lyaFrench nakuyihana kuvatu mangana mujimbu wamwaza utandakane. Ou lunga kapwile muka-kwambulula mujimbu wamwazako, oloze apwile liswalale muGermany. Avwalile uvwalo wenyi wauswalale nakupangila mikanda kana kuvatu vahichilenga mangana vatu vaunde michima.
Mazu apwile muKaposhi Kakutalila asolwele nge Vaka-Kulinangula Mbimbiliya vavavulu muGermany navakiko vafwililile kwambulula mujimbu wamwaza omu vapwilenga maswalale. Ndumbwetu Lemke uze apwile liswalale, anangwilenga Mbimbiliya vakwavo maswalale vatanu muvazachililenga. Ambile ngwenyi: “Ngunakwaha mihako yakwalisa Yehova havatu nguli navo.”
Georg Kayser ayile kujita mwaliswalale, kaha akalinangwile muchano kuze. Uno alinangwilewo ngachilihi? Atambwile mukanda vasonekele Vaka-kulinangula Mbimbiliya, autangile nakuseza jino mulimo wauswalale. Kaha aputukile mulimo wakwambulula. Omu yakumine jita, apwile muka-kuzata mulimo washimbu yosena hamyaka yayivulu.
Numba tuhu Vaka-kulinangula Mbimbiliya kavatachikijile kanawa mwakulihandunwina kukaye hachihande chamafuchi nachiyulo, oloze vilinga natwamiso yavo yalihandunwine chikuma navaze vazanyinenga mujita. Vakulwane vamapolitiki navakulwane vajichachi vakundwijilenga jita, oloze Vaka-kulinangula Mbimbiliya vakundwijile “Mwata waKuunda.” (Isa. 9:6) Numba tuhu vandumbwetu vamwe vazanyine mujijita, oloze vetavilile mazu ahanjikile Muka-kulinangula Mbimbiliya Konrad Mörtter ngwenyi: “Ngunejiva ngwami, kweseka naMazu aKalunga, muka-Kulishitu katela kwazana mukujiha vatuko.”—Kulo. 20:13. *
Hans Hölterhoff ali nakalitemba kakushindumuna nakuvilika mangazini yaTonenu!
Mulifuchi lyaGermany, jishimbi javulukile ngwavo mutu wosena atela kuya nakwasa jita, oloze Vaka-Kulinangula Mbimbiliya vakuzomboka 20 vakanyine. Vandumbwetu vamwe vakufwana nge Gustav Kujath vavamwene ngwavo vapwile nakuviza muwongo, kaha vavahanyine vitumbo vyavaka-matachi. Hans Hölterhoff nawa vamutwalile mukamenga, kaha vakwavo vafunge vamuvetelenga nakumutengula mavoko namahinji. Omu vamwene ngwavo keshi nakwitavilako, vaputukile kumwivwisa woma ngwavo navamujiha. Oloze yikiye atwalileho lika kumika palanga nomu yakumine jita.
Vandumbwetu veka vaze vakanyine mulimo wakukwata kuuta, valombele vavahaneko milimo yeka. * Chakutalilaho, ndumbwetu Johannes Rauthe vamutwalile kukutunga njanji, Konrad Mörtter vamuhanyine mulimo wakutumbijeka vitumbo, Reinhold Weber apwile muka-kuhana vitumbo. August Krafzig asakwilile Yehova hakuwana nge vamuhanyine milimo yakuzeneka kukwata kuuta. Ava vaka-Kulinangula Mbimbiliya naveka vafwililile kuzachila Yehova mwomwo yakashishi kaha nawa vamuzangile.
Kukana kwazana mujita chalingishile vaka-jifulumende vafumbukile vaka-Kulinangula Mbimbiliya. Mumyaka yakavangijileho, vavatwalilenga kujizango jakusopela mwomwo yakwambulula mujimbu. Shikaho, ofesi yamutango yamuGermany yatungile lipatimende lyakusopa vihande muMagdeburg.
Mukuhita chamakumbi, Vinjiho jaYehova vaputukile kwivwishisa kanawa chihande chamafuchi nachiyulo. Omu jita yakaye yamuchivali yaputukile, kavazanyine mujitako. Kaha fulumende yaGermany yavahungile chikuma nakuvayanjisa. Chihande kanechi natukachishimutwila mumangazini yakulutwe hamutwe wakwamba ngwavo “Mijimbu Yetu Yayilemu Yakunyima.”—Mijimbu yetu yayilemu yakunyima muCentral Europe.
^ par. 7 Talenu mujimbu waVaka-Kulinangula Mbimbiliya muBritain haJita yaKaye yatete muKaposhi Kakutalila waMay 15, 2013, muchihande “[cha]Mijimbu Yetu Yayilemu Yakunyima—Vomikile ‘muLwola lwaVyeseko.’”
^ par. 9 Vyuma valingile ava vandumbwetu vavisonekele mumukanda the Millennial Dawn Volume VI (mu 1904) namuKaposhi Kakutalila alovokele muGermany waAugust 1906. Kaposhi Kakutalila waSeptember 1915 alumbunwine kanawa ngwenyi vaka-Kulinangula Mbimbiliya kavazana mujitako. Oloze chihande kanechi kachapwile mukaposhi uze alovokele muGermany.
