1. Numba tuhu vatu hakulimbata veji kuwahililanga, oloze vyuma muka vanahase kumona mukuhita chamakumbi? (Talenu muvwimbimbi wakulivanga.)

HALIKUMBI lyakulimbata, valunga napwevo veji kulizanga chikuma. Shimbu kanda valimbate, veji kuzamisanga zangi yavo hakulishikamisa nakuzachila vyuma hamwe omu navapandama kulikumbi lyawenga wavo. Kweji kupwanga vyuma vyavivulu vize valunga napwevo veji kwalumunanga mukuyoya chavo numba jino vatwame kanawa muulo wavo. Mbimbiliya yatwama najishimbi jamwaza jakukafwa vaze navalimbata, mwomwo Tengi uze ahakileko ulo asaka vatu vafukile nakulivwisa kuwaha ulo wavo. (Vishi. 18:22) Tuyokutuyoku nawa, Visoneka vyatulweza ngwavyo vaze valimbata “navamonanga luyando mumijimba yavo.” (Koli. 1, 7:28) Tunahase kukehesa ngachilihi luyando kana muulo? Vyuma muka vinahase kulingisa ulo wavaka-Kulishitu ufukile?

2. Miyachi yazangi muka vatela kusolola vaze valimbata?

² Mbimbiliya yavuluka miyachi yazangi yatwama muulo. Kulitetela (Greek, phi·liʹa) chapwa chachilemu muulo. Zangi yakulivwila  peha muulo (eʹros) yeji kunehanga kuwahilila, kaha zangi yakuzanga tanga (stor·geʹ) yapwa yayilemu nge muli jino navana. Oloze zangi yize yazama hajindongi jamuMbimbiliya (a·gaʹpe) yikiko yeji kulingisanga ulo ufukile. Kaposetolo Paulu ahanjikile hazangi kaneyi ngwenyi: “Mutu himutu azangenga pwevo lyenyi nganomu alizanga ivene. Kaha nawa pwevo atela kupwa nakalemesa chikuma kuli lunga lyenyi.”—Efwe. 5:33.

3. Uno valunga napwevo valimbata vatela kulizanga ngachilihi?

³ Paulu asonekele ngwenyi: “Enu malunga, twalenuho lika kuzanganga mapwevo jenu, nganomu Kulishitu nawa azangile chikungulwilo nakulyecha ivene hachikiko.” (Efwe. 5:25) Vaka-kukavangiza Yesu vatela kulizanga umwe namukwavo numbanyi valondezeze chakutalilaho chaYesu. (Tangenu Yowano 13:34, 35; 15:12, 13.) Valunga napwevo vaka-Kulishitu vatela kulizanga chikuma, numba vene kufwila mukwavo nge chinahase. Oloze chinahase kupwa chachikalu pwevo nalunga kulizanga chikumanyi nge vanalikokojwesa. Zangi ya a·gaʹpe “yeji kufwikanga vyuma vyosena, nakwitavila vyuma vyosena, nakutalilila vyuma vyosena, nakukakachila muvyuma vyosena.” Enga, “zangi kayakumako.” (Koli. 1, 13:7, 8) Kachi nge vaze valimbata navanuka lushiko valishikile lwakulizanga nakushishika kuli umwe namukwavo muulo, kaha nachivakafwa vazachile hamwe hakukavangiza jishimbi jaKalunga nakukumisa kala ukalu navamona.

4, 5. (a) Mulimo muka atwama nawo lunga hakupwa mutwe watanga? (b) Pwevo atela kumona ngachilihi mutwe watanga? (c) Vyuma muka valumwineko valunga napwevo muulo wavo?

⁴ Paulu ahanjikile hamulimo atela kuzata mutu himutu muulo ngwenyi: “Mapwevo valiluulenga kuli malunga javo nge kuli Mwata, mwomwo lunga apwa mutwe wapwevo nganomu nawa Kulishitu apwa mutwe wachikungulwilo.” (Efwe. 5:22, 23) Awa mazu kawasolola nge pwevo apwa wakukuminamo hakumwesekesa kuli lunga lyenyiko. Oloze nge pwevo mwakavangiza awa mazu, nachimukafwa atesemo vyuma ajinyine Kalunga hakutengela Alama pwevo. Kalunga ambile ngwenyi: “Kachawahile lunga [Alama] kutwama uka wenyiko. Nangumutengela muka-kumukafwako, apwenga wakulisoka nenyi.” (Kupu. 2:18) Ngana muze Kulishitu “mutwe wachikungulwilo” eji kusololanga zangi, nalunga muka-Kulishitu atela kutwaminyinanga zuvo yenyi muzangi. Nge mwalinga ngocho, kaha pwevo mwasuuluka nakuchiwana kupwa chachashi kulemesa lunga lyenyi, nakumukafwa, nakumwononoka.

⁵ Valunga napwevo vatela kwalumunako vyuma vimwe mukuyoya chavo. Ndumbwetu Cathy ^[1] ambile ngwenyi: “Omu ngwapwile ngumujike, ngwalimanyinyine kaha ngwalingilenga vyuma kala mweshomwo ngwasakile. Oloze omu ngwasombokele ngwasakiwile jino kupendamina hali lunga lyami. Chinapunga vene chachikalu kulinga ngocho, oloze kulinga vyuma kweseka nomu asaka Yehova chinazamisa ulo wetu.” Lunga lyenyi Fred ambile ngwenyi: “Chinangukaluhwilanga kusakula vyakulinga, mwomwo kala vyuma naulinga muulo watela kushinganyekelako muka-mahyove. Oloze kupendamina hali Yehova mukulomba nakwivwilila kuvishinganyeka vyapuwami chinatukafwe kutwama kanawa. Ngunamono ngwami tunakutwama kanawa nakuzachila hamwe muulo wetu.”

6. Uno zangi ‘yeji kununganga ngachilihi vatu hamwe mujila yakukupuka’ nge muulo muli ukalu?

⁶ Valunga napwevo vatela kulikonekelanga numba ulo wavo ufukile. Vatela ‘kwitavilanga lika tutenga twamuka-mahyavo nakulikonekelanga  namuchima wakusuuluka.’ Mutu wosena muulo eji kulimbenjanga. Oloze nge chuma kana chinasoloka, twatela kulinangulako chuma chimwe, nakulikonekela, nakulizanga mwomwo zangi “yikiko yeji kununganga vatu hamwe mujila yakukupuka.” (Kolo. 3:13, 14) Cheka nawa “zangi yeji kutalililanga chikoki kaha nawa yeji kutetelanga. . . . Kayeshi kulama kokoko.” (Koli. 1, 13:4, 5) Mwatela kukumisanga vikokojola washiwashi. Valunga napwevo vaka-Kulishitu vatela kutwama hamavu nakukumisa vikokojola shimbu kanda vasavale. (Efwe. 4:26, 27) Kuhanjika ngwenu “ngukonekeleko hakukwivwisa kupihya” chasakiwa kulinyisa nakumika, oloze cheji kulingisa ukalu ukume nakuzamisa ulo.

7, 8. (a) Mbimbiliya yahanjika ika hachihande chakulihana vyasakiwa muulo? (b) Mwomwo ika vaze valimbata vatela kulitetela?

⁷ Mbimbiliya yahanjika jindongi vatela kukavangiza vaze valimbata hakulihana vyasakiwa muulo. (Tangenu Wavaka-Kolinde 1, 7:3-5.) Chapwa chachilemu kulitetela nakushinganyeka omu ali nakwivwa mukwenu. Nge pwevo kaveshi nakumutetelako, nahase kuchiwana kupwa chachikalu kulisuula. Malunga vavalweza vatwamenga namapwevo javo “mwaya chinyingi.” (Petu. 1, 3:7) Kulihana vyamuulo kachatela kupwa chakushinjilako, oloze chatela kupwa chakufuma kumuchima. Lunga atela kwivwishisa puwenyi, kaha lwola kana lwatela kupwa lwamwaza kuli vosena vavali.

⁸ Numba tuhu Mbimbiliya kayahanjika vyuma vyosena vize lunga napwevo vatela kulinga hakulisolwela zangi muzuvoko, oloze chapwa chachilemu kulisolwela zangi nalikoji. (Mwaso 1:2; 2:6) Chapundu vene, vaka-Kulishitu valimbata vatela kulitetelanga umwe namukwavo nakulisolwelanga zangi.

9. Mwomwo ika chapwila chakuhenga kwivwila peha mutu uze kapwa muka-mahyetuko?

⁹ Nge natuzanga chikuma Kalunga kaha nachitukafwa tuzamise ulo wetu nakuzeneka kwitavila vyuma vyeka vitutangule muulo. Chakutalilaho, malo amwe anafunga mwomwo muka-mahyamutu natalenga mivwimbimbi yauselesele. Twatela kulihenda kuvyuma vyosena vize vinahase kusangumuna peha yakulinga ujila. Chapwa chachipi kusapula mujila yayipi namutu uze katwalimbata nenyiko. Twatela kwanukanga ngwetu Kalunga eji kwijivanga vyuma tunakushinganyeka, kahechi chatela kutulingisa tulingenga vyuma vyamwenemwene vize navimwivwisa kuwaha.—Tangenu Mateu 5:27, 28; WavaHepeleu 4:13.

10, 11. (a) Vyuma muka vinakusolokanga kumalo amavulu? (b) Mbimbiliya yahanjika vyuma muka hakulihandununa? (c) Ika nayikafwa vaze valimbata vahone kulihandununa?

¹⁰ Nge muulo muli ukalu waunene, chinahase kulingisa valunga napwevo valihandunune chipwe vene kulilukulula. Mumafuchi amwe, malo amavulu eji kufwanga. Vyuma kanevi kavyeshi nakusoloka chikuma muchikungulwilo chavaka-Kulishituko, oloze ukalu uze unakusoloka mumalo amavulu ukiko nautulingisa tushimutwila hachihande kana.

¹¹ Mbimbiliya yamba ngwayo: “Pwevo kanda ahandunuka kuli lunga lyenyiko. Oloze kachi nge mwahandunukako, kaha atwamenga lika chakuhona kusomboka, mokomoko ahiluke kuli lunga lyenyi. Kaha lunga katela kuseza pwevo lyenyiko.” (Koli. 1, 7:10, 11) Shikaho, vatu valimbata vatela kumona kulihandununa muulo kupwa mulonga nahawo. Numba tuhu lwola lumwe chinahase kupwa chakutamo kulihandununa, oloze mwatela kwanuka ngwenu cheji kulingisanga ukalu utohweleko. Omu Yesu akumishile kuhanjika ngwenyi  lunga mwakaseza ise nakuya nakulipanjika napwevo lyenyi, ambile ngwenyi: “Chuma chize Kalunga nanungu hamwe mutu kanda achihandununako.” (Mateu 19:3-6; Kupu. 2:24) Echi chalumbununa nge lunga chipwe pwevo katela ‘kuhandununa chuma chize Kalunga nanungu hamweko.’ Yehova asaka vatu vaze valimbata velile muulo wavo. (Koli. 1, 7:39) Hakutachikiza ngwetu mutu himutu mwakalyambulula ivene kuli Kalunga, chatela kulingisa vaze valimbata vahase kukumisanga washi ukalu muulo wavo shimbu kanda utohwe.

12. Vyuma muka vinahase kulingisa vatu muulo valihandunune?

¹² Ukalu umwe unakwizanga mumalo mwomwo valunga napwevo vafwelelele vyuma vimwe vize kavyasolokele muulo wavoko. Chakutalilaho, pamo mutu ashinganyekele ngwenyi omu mwakengila muulo mwakawahilila chikuma, oloze kuhetako chauchi. Echi cheji kulingisanga vatu kana vevwenga kupihya. Kaha nawa chisemwa chamutu nakulihandununa muvishinganyeka, najimbongo, navaka-ulo navana vinahase kuneha ukalu muulo. Oloze vaka-Kulishitu vavavulu veji kuwananga mwakukumishila ukalu kana, mwomwo veji kwitavilanga Kalunga avatwaminyine.

13. Vyuma muka vinahase kulingisa vatu valihandunune?

¹³ Shimbu jimwe vatu vanahase kumona ngwavo chinatemo kulihandununa. Chakutalilaho, nge mutu kaveshi nakumuzakama kuli muka-mahyenyiko, chipwe vali nakumupupulanga, chipwe kumukanyisa kulinga vyuma vyakushipilitu, kaha uze vali nakuyanjisa nahase kuhandunuka kuli mukwavo. Vaka-Kulishitu vaze vali naukalu muulo vatela kulweza vakulwane vavakafwe. Ava vakulwane vapwa vakuhya kushipilitu, kaha veji kukafwanga vaze vali muukalu vakavangize Mazu aKalunga. Nge natusaka kukumisa ukalu muulo wetu, twatela kulombanga shipilitu yaYehova yitukafwe, mangana tukavangize jindongi jamuMbimbiliya.—Ngale. 5:22, 23. ^[2]

14. Vyuma muka yahanjika Mbimbiliya havatu vaze valimbata navaze kavapwa vaka-kulemesa Yehovako?

¹⁴ Mbimbiliya yahana jindongi vatela kukakavangiza vatu kachi nge muka-mahyamutu kapwa ngamba yaYehovako. (Tangenu Wavaka-Kolinde 1, 7:12-14.) Muka-mahyamutu uze kapwa ngamba yaYehovako apwa “wajila” mwomwo ambata mutu alemesa Yehova, numba achitachikiza chipwe nduma. Kaha navana vavo navasema nawa vapwa “vajila” vavalemu kuli Kalunga. Paulu ambile ngwenyi: “Ove pwevo, ove kawatachikijile ngwove pamo mukalwila lunga lyoveko nyi? Chipwe ove lunga, ove kawatachikijile ngwove pamo mukalwila pwevo lyoveko nyi?” (Koli. 1, 7:16) Muvikungulwilo vyavivulu vyaVinjiho jaYehova mwatwama malo amavulu akwechi vatu vaze ‘valwila’ vaka-mahyavo.

15, 16. (a) Vyuma muka valweza vaka-Kulishitu vaze vasomboka kumalunga vaze kavazachila Kalungako? (b) Muka-Kulishitu atela kulinga vyuma muka kachi nge muka-mahyenyi “uze ketavako mwasaka kufumako”?

¹⁵ Kaposetolo Petulu alwezele vaka-Kulishitu vamapwevo vononokenga malunga javo, “mangana chipwe nge vamwe kaveshi kwononoka kumazuko, muhase kuvakoka chakuzeneka mazu hakumona twamiso yamwaza yayenu mapwevo javo, mwomwo yakumona twamiso yenu yamwaza nakalemesa kenu kakanene.” Nge pwevo mwapwa nashipilitu “yayivwovu yakuunda, yize yandando yayinene kumeso aKalunga,” kaha nahase kunganyala washi muka-mahyenyi kuhambakana kumutangila jindongi jamuvisoneka.—Petu. 1, 3:1-4.

¹⁶ Nyi ngachilihi nge muka-mahyamutu uze ketavako mwasaka kulukuluka? Mbimbiliya yamba ngwayo: “Kachi nge uze ketavako mwasaka kufumako, afumeko tuhu, kaha ndumbwetu walunga chipwe ou wapwevo  kakashiwile hachuma kanako, oloze enu Kalunga namihane kuunda.” (Koli. 1, 7:15) Echi kachalumbununa nge uze muka-Kulishitu nalihehwe kwingila muuloko, kaha nawa kacheshi kupwa chakutamo kushinjila mutu kana atwame lika namuka-mahyenyiko. Kulihandununa chinahase kulingisa mutu alihehweko kuukalu umwe. Kaha muka-Kulishitu nahase kufwelela ngwenyi uze muka-mahyenyi mwakinduluka cheka, mangana vazachile hamwe nakupwa naulo wakuwahilila nakufwelela nawa ngwenyi kulutwe mwakaputuka kuzachila Kalunga.

17. Vyuma muka vatela kuhaka kulutwe vaka-Kulishitu vaze valimbata?

¹⁷ Hakuwana nge tuli nakuyoyela “hamakumbi akukuminyina,” tuli nakumona ukalu wauvulu. (Chimo. 2, 3:1-5) Oloze tunahase kuhonesa ukalu kanou kachi nge natuzama kushipilitu. Paulu ambile ngwenyi: “Lwola lunalituluko lunakehe. Kufuma oholili, vaze vali namapwevo vapwenga nge kaveshi navoko, . . . kaha vaze vali nakuzachisa kaye kano, vapwenga nge vaze kaveshi nakukazachisa chikumako.” (Koli. 1, 7:29-31) Paulu kapwile nakulweza vaze valimbata vahone kuzakama vaka-mahyavoko. Oloze apwile nakuvalweza vahake vyuma vyakushipilitu kulutwe, mwomwo lwola lunasaleko lunakehe.—Mateu 6:33.

18. Mwomwo ika natwambila ngwetu vaka-Kulishitu vanahase kufukila muulo wavo nakupwa vakuwahilila?

¹⁸ Numba tuhu tunakuyoyela mulwola lwalukalu, kaha nawa malo amavulu anakufwa oloze tunahase kufukila muulo wetu nakupwa vakuwahilila. Vaka-Kulishitu vaze valimbata vanahase kulama “chuma chize Kalunga nanungu hamwe” nge navapwanga lika navatu jaKalunga, nakukavangizanga vyuma yahanjika Mbimbiliya nakwitavila shipilitu yajila yaYehova yivatwaminyine.—Mako 10:9.