MUNOVEMBER 1932 muNganda yaMexico, vatu vakuhambakana hamiliyoni yimwe vawahililile chikuma hakumona nganda yosena yinamunyika manongo. Oloze nakushimbula chiku, kwapwile vyuma vyeka vize vyevwishile vatu kuwaha. Mapapilo amijimbu amulifuchi kana ahanjikilenga kaha havyuma kana. Vinjiho jaYehova valikungulwilile hachitulilo chaminyau nakuvandamina ngeji yavo. Ngeji kana apwile Joseph F. Rutherford uze apwile nakutwaminyina liuka lyaWatch Tower Society. Ava Vinjiho vawahilile chikuma kutambula ou ngeji, uze ejile kukukunguluka chachinene.

Echi chalingishile mangazini yaThe Golden Age yize tunakuvuluka jino ngwetu Tonenu! vasonekemo ngwavo, “echi kukunguluka navakachanukanga lika mulifuchi lyaMexico mwomwo chinakafwe vatu vatwaleho kulinangula muchano.” Mwomwo ika echi kukunguluka chevwakanyine kuvatu vavavulu chikuma okunyi chapwile navatu 150 kaha?

Shimbu kanda chize kukunguluka, mulimo wetu muMexico kawazovolokelengako. Kuputuka mu 1919, Vinjiho mulifuchi kana vapwilenga nakukunguluka chachivulu, oloze vikungulwilo vyapwile nakukehelako lika. Omu vasokolwele ofesi yamutango muNganda yaMexico mu 1929, chasolokele nge vyuma navipwa jino kanawa. Chipwe ngocho kwapwilenga ukalu weka. Chakutalilaho, liuka lyetu lyahuhumwine ngwalyo Vinjiho hakupwa vaka-kwambulula kavatela kundupukila mukusekasana chamuno mukayeko. Ngocho payiniya umwe hakwivwa mazu kana apihililile kaha afumine muliuka nakuputuka kaliuka kenyi. Kaha nawa mukuhita chalwola, kalama wamutango ahokwele jishimbi jamuvisoneka ngocho vamufumishile hamulimo wenyi nakushishisaho weka. Shikaho Vinjiho vakushishika muMexico vasakiwile kuvakafwa chikuma kushipilitu.

Omu ndumbu Rutherford avatambukilile, ahanjikile vihande vivali hakukunguluka changalila navihande 5 hachisaji chahapeho vize vyavakolezezele chikuma. Lwola kana lukiko lwapwile lwatete muMexico kuzachisa chisaji chahapeho hakutandakanyisa mujimbu wamwaza. Omu chakumine kukunguluka, kalama wamutango uze vatongwele awahishile vyuma, kaha Vinjiho hakukinduluka kumembwavo vapwile natwima yakuzata, ngocho Yehova avakiswile.

Mwaka wakavangijileho, mulifuchi mwapwile kukunguluka changalila chivali, chimwe munganda yaVeracruz kaha chikwavo muNganda yaMexico. Kuzata chavo nangolo chaputukile kwima mihako. Mu 1931 muMexico mwapwile vaka-kwambulula 82. Oloze omu mwahichile myaka likumi vapwile jino 820. Vatu kafwe 1,000 vejile kukukunguluka chachinene chapwile muNganda yaMexico mu 1941.

Mu 1943, Vinjiho valisukikile mapapilo atutachikijilo akulweza vatu vyakukunguluka chachinene chakwamba ngwavo “Free Nation’s” chize chapwilile mujinganda 12 jamuMexico. * Vandumbwetu valisukikilenga  mapapilo avali mushingo, limwe kunyima likwavo kulutwe. Eyi yikiko jila vazachishilenga Vinjiho hakuvilika mujimbu kuputuka mu 1936.

Mangazini yaLa Nación yahanjikile havandumbwetu vaze valisukikilenga mapapilo atutachikijilo muNganda yaMexico ngwayo: “Halikumbi lyatete [hakukunguluka], [Vinjiho] vavalwezele vayenga nakulanya vatu vavavulu. Shikaho likumbi lyakavangijileho vatu vavulile chikuma.” Chipwe ngocho, chuma kana kachasuulwishile vaka-Chachi yaKatolikako, ngocho vaputukile kulweza vatu vakane kuvambulila kuli Vinjiho. Oloze chamokomoko nakuvafumbukila, vandumbwetu vakumika vatwalileho kwambulula. Yize mangazini yambile nawa ngwayo: “Vatu vosena vamwene . . . malunga namapwevo vanalisukika ‘mapapilo’ akulanya vatu.” Mumangazini kana vakopelemo muvwimbimbi wavandumbwetu vali muNganda yaMexico. Kaha vasonekeleho mazu akulumbununa muvwimbimbi ngwavo: “Mayevuyevu avatu mumikwakwa.”

Hamakumbi aze, Vinjiho vavavulu muMexico valisuwilenga mwamunene hakuya kukukunguluka changalila. Vatu vavavulu vafuminenga kuvihela vyakwakusuku chikuma kuze kakwahetelenga jimasuhwa chipwe jiminyauko. Chikungulwilo chimwe chasonekele ngwacho, “Kuno kakwaheta jimasuhwako.” Shikaho, vandumbwetu vatambukilenga havimbulu chipwe hamavu numba vakahete kuchitulilo chamasuhwa kuze jino vakanyinyinyinenga masuhwa nakuya kukukunguluka.

Vinjiho vavavulu vapwilenga vakuhutwa, ngocho kavapwilenga najimbongo jakufweta kumasuhwako. Omu vahetelenga, vatulililenga kujizuvo javandumbwavo kaha vavatambwilenga nachisambo. Veka vasavalilenga mujiZuvo jaWangana. Halwola lumwe, vandumbwetu 90 vatulililile hamutango kaha “mutu himutu asavalilenga havikasha 20 vyamikanda.” Yearbook yahanjikile ngwayo vandumbwetu kana vawahililile chikuma kaha vambile ngwavo, “aha hanawahe chikuma kuhambakana kusavala hamavu.”

Vandumbwetu vaze vejilenga kukukunguluka vawahililile chikuma hakupwa hamwe navandumbwavo numba tuhu vamwenenga ukalu hakutambuka. Makumbi ano vaka-kwambulula muMexico vanakuvulilako kaha vali nakukokela kumiliyoni yimwe, ngocho vachili lika nakukilikita natwima. * Lipoti lyamutango wamuMexico lyamumwaka wa 1949 lyahanjikile hali vandumbwetu ngwalyo: “Numba tuhu vali nakumona ukalu oloze kawavazeyesele kushipilituko mwomwo hanyima yakukunguluka veji kushimutwilanga havyuma veji kulivwisanga kuwaha. Ngocho veji kuhulisanga ngwavo, Likumbi muka natukapwa nakukunguluka chikwavo?” Kaha omu mukiko chili namakumbi ano.—Mijimbu yetu yayilemu yakunyima muCentral America.