1, 2. (a) Vyuma muka navitulingisa tuhulise ngwetu: “Palanga nakumwaka uka”? (b) Chakutalilaho chavangamba jaYehova vakushikulu nachitukafwa ngachilihi?

KAPOLOFWETO ISAYA naHambakuke vahulishile ngwavo, “palanga nakumwaka uka?” (Isa. 6:11; Hamba. 1:2) Mwangana Ndavichi hakusoneka Samu 13, ahulishile mapapa kawana ngwenyi: “Palanga nakumwaka uka?” (Samu 13:1, 2) NaMwata wetu Yesu Kulishitu ahulishile chihula kanechi omu vamuhulishile kuli vatu vaze kavapwile nalufweleloko. (Mateu 17:17) Shikaho kacheshi kupwa chakuhengako nge nayetu natuhulisa chihula kana.

² Uno vyuma muka navitulingisa tuhulise ngwetu: “Palanga nakumwaka uka?” Tunahase kuhulisa chihula kana kachi nge tuli nakuhita muukalu. Nyi pamo tuli nakulipika naukalu waushinakaji namisongo, chipwe tunakuyanda mwomwo yakuyoyela muno ‘mulwola lwalukalu.’ (Chimo. 2, 3:1) Pamo nawa tunahase kuhulisa chihula kana nge tunahombo mwomwo yavilinga vyavipi vyavatu twatunga navo. Kala vyuma navitulingisa tuhulise chihula kana, twatela kwijiva ngwetu navangamba jaYehova vakushishika vakushikulu vakasunukile kuhulisa, kaha nawa kavavatenukilileko.

3. Vyuma muka navitukafwa nge tuli muukalu?

 ³ Chuma muka nachitukafwa nge tuli nakuhita muukalu? Kambaji Yakova, songo yaYesu, vamuhwiminyinyine asoneke ngwenyi: “Enu vandumbwami, undenunga michima palanga nakukupwako chaMwata.” (Yako. 5:7) Eyo, tuvosena twasakiwa kuunda muchima chipwe ngwetu kutalilila chikoki. Uno echi chalumbununa ika?

4, 5. (a) Vyuma vyeka muka vyasakiwa hakutalilila chikoki? (b) Kambaji Yakova alumbunwine ngachilihi muchima wakutalilila chikoki? (Talenu muvwimbimbi wakulivanga.)

⁴ Mbimbiliya yamba ngwayo, mutu keshi kuhasa kupwa namuchima wakutalilila chikokiko chakuhona shipilitu yajila yaKalunga. Muchima wakutalilila chikoki wapwa wana wakufuma kuli Kalunga, kaha kupwa namuchima kana nachisolola nge twamuzanga nakuzanga vakwetu nawa. Vatu kaveshi kulizanga nakulinungako nge kaveshi kupwa namuchima wakutalilila chikokiko. (Koli. 1, 13:4; Ngale. 5:22) Hakusaka tusolole muchima wakutalilila chikoki, twatela kupwa navilinga vyeka nawa vize vyasakiwa kuli vaka-Kulishitu. Chakutalilaho, twasakiwa kupwa nalukakachila, luze lweji kutukafwanga tulipike naukalu oku nawa tunaundu muchima. (Kolo. 1:11; Yako. 1:3, 4) Kutalilila chikoki chapwa nawa kuunda nakuhona kulinga sambanjinga nge vanatufutwisa kumuchima. Kaha nawa Mbimbiliya yatukolezeza tuvandamine namuchima wakusuuluka. Muchima kanou vausolola hali WaYakova 5:7, 8. (Tangenu.)

⁵ Mwomwo ika twatela kulisuula kuvandamina Yehova atesemo vyuma ashika? Yakova afwanyishile ukalu wetu kuli njimi. Njimi eji kulimanga wande nakutumba jimbuto, oloze keshi kupwa nangolo jakuneha vula chipwe kulingisa jimbuto jisoke washiko. Kaha nawa keshi kujanguhwisa mangana jihyenga washiko. Oloze atachikiza ngwenyi atela kuvandamina. Chochimwe nawa, nayetu tuli nakuhita muukalu wakulisezaseza uze katweshi kuhasa kukumisa mungolo jetuko, omu tuli nakuvandamina Yehova atesemo jishiko jenyi. (Mako 13:32, 33; Vili. 1:7) Shikaho twatela kuvandamina nganomu njimi eji kuvandaminanga jimbuto jenyi.

6. Vyuma muka natulinangula kuli kapolofweto Mika?

⁶ Tuli nakuyoyela mumyaka ngana yize ayoyelelemo kapolofweto Mika. Ayoyelele muchiyulo chaMwangana wakuhuka Ahaze, muze mwapwile vilinga vyavipi sulumunu. Vatu vavavulu vejililile “kulinga vyuma vyavipi.” (Tangenu Mika 7:1-3.) Ngocho Mika ejivile ngwenyi keshi kuhasa kufumisako vyuma kana mungolo jenyiko. Jino alingile ngachilihi? Ambile ngwenyi: “Ami kwami nangutalililanga Yehova, nanguvandaminanga Kalunga muka-kungulwila. Kalunga kami mwangwivwa.” (Mika 7:7) Shikaho nayetu twatela kupwa namuchima ‘wakuvandamina’ ngana uze apwile nawo Mika.

7. Mwomwo ika twatela kulisuula kuvandamina Yehova atesemo jishiko jenyi?

⁷ Nge natupwa nalufwelelo ngana luze lwaMika, kaha natulisuula kuvandamina Yehova. Etu katwapwa ngana mwafunge uze eji kuvandaminanga vamujiheko. Funge eji kulizakaminanga mwomwo yaukalu naumuwana, oloze etu tuli nakuvandamina vyuma vyamwaza. Shikaho katwalizakaminako mwomwo twatachikiza ngwetu Yehova mwatesamo jishiko jenyi nakutuhana kuyoya chahaya myaka yosena. Ngocho tweji “kukakachila chikuma namuchima wakutalilila chikoki nakuwahilila.” (Kolo. 1:11, 12) Oloze nge natuvandamina oku tuli nakuyayavala nakushinganyeka ngwetu Yehova nalangisa kutesamo jishiko jenyi, kaha natwivwisa Kalunga kupihya.—Kolo. 3:12.

8. Mwomwo ika twatela kushinganyeka havyakutalilaho vyavangamba jaYehova vakushishika vakushikulu?

⁸ Natulisuula kuvandamina kachi nge natushinganyeka hali vangamba jaYehova vakushishika vaze vamuvandaminyine atesemo jishiko jenyi. (Loma 15:4) Omu natushinganyeka havyakutalilaho vyavo, twatela kushinganyeka hakuvula chamyaka vavandaminyine, novyo vyavalingishile vavandamine, nanganyo vawanyine hakuvandamina chavo.

9, 10. Uno Apalahama naSala vavandaminyine Yehova atesemo jishiko jenyi hamyaka yingahi?

⁹ Tuchitalenu hachakutalilaho chaApalahama naSala. Vavalavila hali “vaze vanaswane vyuma vashika hakupwa nalufwelelo namuchima wakutalilila chikoki.” Visoneka vyatulweza ngwavyo, “omu Apalahama asolwele muchima wakutalilila chikoki,” atambwile lushiko lwakumulweza ngwavo Yehova mwamukisula nakuvulisa vaka-tanga yenyi. (Hepe. 6:12, 15) Mwomwo ika Apalahama atelelele kusolola muchima kanou? Mwomwo hatelelele kuhita myaka yayivulu numba vyuma vamushikile vitesemo. Lushiko luze Yehova ashikile Apalahama lwaputukile kutesamo haNyisane 14, 1943 B.C.E. Aha hakiko ikiye naSala hamwe kaha natanga yavo vazaukile Kalwiji Yufwalate nakwingila muLifuchi lyaLushiko. Apalahama avandaminyine myaka 25 numba mwanenyi Isaka asemuke mu 1918 B.C.E., kaha avandaminyine cheka myaka 60 numba vazukulu jenyi vaEsau naYakova vasemuke mu 1858 B.C.E.—Hepe. 11:9.

¹⁰ Uno Apalahama vamuhanyine lifuchi lipwa halihi? Mbimbiliya yamba ngwayo: “[Yehova] kamuhanyine [Apalahama] uswana mulifuchi kaneliko, chipwe vene hamwe hakulyata chilyachilo chenyiko. Oloze amushikile kukamuhanalyo akalihete, navaka-tanga yenyi vaze  navakamukava munyima yenyi, okunyi ikiye kanda achiseme mwana.” (Vili. 7:5) Mwahichile myaka 430 kufuma halwola Apalahama azaukile kalwiji Yufwalate numba jino vaka-tanga yenyi vavatongole kupwa muyachi uze jino wejile nakuswana lifuchi.—Kulo. 12:40-42; Ngale. 3:17.

11. Mwomwo ika Apalahama alisuwilile kuvandamina Yehova atesemo vyuma ashikile, kaha nganyo muka mwakawanamo?

¹¹ Apalahama alisuwile kuvandamina, mwomwo afwelelele muli Yehova. (Tangenu WavaHepeleu 11:8-12.) Alisuwile kuvandamina numba tuhu vyuma vamushikile kavyateselemo mumakumbi enyiko. Twafwelela chikupu ngwetu Apalahama mwakawahilila chikuma omu navakamusangula nakukayoyela mupalachise hano hamavu. Mwakalikomokela hakwivwa ngwavo muMbimbiliya vasonekelemo mijimbu yenyi nayavaka-tanga yenyi. * Achishinganyekenu ocho kuwaha mwakevwa hakutachikiza ngwenyi vyuma alingile vyateselemo kujina chaYehova kupandama kuli muka-tanga! Chapundu vene, mwakejiva ngwenyi chapwile chakutamo kupwa namuchima wakuvandamina.

12, 13. Mwomwo ika Yosefwe atelelele kulisuula kuvandamina, kaha muchima muka wamwaza apwile nawo?

¹² Yosefwe kakwatambuli kaApalahama nayikiye asolwele muchima wakutalilila chikoki. Vamufumbukilile mujila yayipi. Chatete, vandumbwenyi vamulanjishile muundungo omu apwile namyaka 17. Kaha nawa pwevo lyakaka yenyi amuvangijikilile ngwenyi asakile kumupika, ngocho vamukashile mukamenga. (Kupu. 39:11-20; Samu 105:17, 18) Chasolokele nge Kalunga kapwile nakumukisulako, oloze omu mwahichile myaka 13, vyuma vyalumukile. Vamufumishile muze mukamenga, nakumutongola kupwa muhato wamutu wamulemu chikuma muEjipitu.—Kupu. 41:14, 37-43; Vili. 7:9, 10.

¹³ Hakuwana nge Yosefwe ahichile muukalu wauvulu, kutala asulakanyine tahi? Uno alitwaminyine kufwelela muli Yehova tahi? Nduma. Chuma muka chamukafwile avandamine namuchima wakusuuluka? Lufwelelo lwenyi muli Yehova lukiko lwamukafwile. Ejivile ngwenyi Yehova ikiye amukafwilenga. Ahanjikile kuli vandumbwenyi ngwenyi: “Kanda namwivwa womako. Ami yami Kalunga numba? Numba tuhu mwasakile kungulinga mwamupi, oloze Kalunga ajinyine ngwenyi vyuma viwahe mangana alwile vatu vavavulu, nge omu ali nakulinga oholyapwa.” (Kupu. 50:19, 20) Chapundu vene, Yosefwe amwene ngwenyi chapwile chakutamo kuvandamina.

14, 15. (a) Mwomwo ika muchima waNdavichi wakuvandamina wapwila wakulipwila? (b) Vyuma muka vyakafwile Ndavichi apwenga namuchima wakuvandamina?

¹⁴ Mwangana Ndavichi nayikiye vamufumbukilile mukuyoya chenyi. Numba tuhu Yehova amuwavishile halwola apwile kanyike mangana akapwe mwangana wavaIsalele kulutwe, oloze avandaminyine myaka 15 numba jino vamuswanyise hawangana. (Samwe. 2, 2:3, 4) Mumyaka vene yize apwile nakuvandamina, Mwangana Saulu uze apwile wakuhona kushishika asakile kumujiha. * Ngocho, Ndavichi apwile nakulumbwangila namumafuchi eka, kaha shimbu jimwe aswaminenga mumena akusendeveka mupambo. Nahalwola vene vajihile Saulu mujita, Ndavichi avandaminyine lika kafwe myaka 7 numba jino vamuswanyise kupwa mwangana wamuyachi wosena wavaIsalele.—Samwe. 2, 5:4, 5.

¹⁵ Mwomwo ika Ndavichi alisuwilile kuvandamina namuchima wakusuuluka? Atulweza ovyo  vyamulingishile avandamine kweseka namazu ahanjikile muSamu 13, muze ahulishile mapapa kawana ngwenyi: “Palanga nakumwaka uka?” Kaha ambile ngwenyi: “Ami nangufwelela muzangi yove yakwilila. Muchima wami nauwahilila mwomwo yavilinga vyove vyaulwilo. Nangwimbila Yehova mwaso, mwomwo nangulingila vyuma vyamwaza.” (Samu 13:5, 6) Chapundu vene, Ndavichi afwelelele muzangi yaYehova yakwilila. Atalililile kuli Yehova akamusokole, nakushinganyeka omu amukafwilenga kunyima. Eyo, Ndavichi amwene ngwenyi chapwile chakutamo kupwa namuchima wakuvandamina.

16, 17. Uno Yehova Kalunga naYesu Kulishitu vatuhana chakutalilaho muka chamwaza chakulisuula kuvandamina?

¹⁶ Numba tuhu Yehova asaka tutalililenga chikoki, oloze kasaka tulinge vyuma vize kasaka kulinga ikiyeko. Atuhana chakutalilaho chamwaza chakusolola muchima wakutalilila chikoki. (Tangenu WaPetulu 2, 3:9.) Yehova navandaminanga hamyaka yayivulu numba akavatule chihande chize vakatwile mumilemba yaEtene. Ali ‘nakutalilila chikoki nakuvandamina’ lwola luze lijina lyenyi navakalilingisa kupwa lyajila. Kaha vaze vali ‘nakumutalilila’ navakavakisula chikuma.—Isa. 30:18; kwinyikila chamwishi.

¹⁷ Yesu nayikiye nalisuulanga kuvandamina. Numba tuhu apwile wakulonga nakutesamo mulimo vamuhanyine hano hamavu nakuhana wana wandando yakusokola mu 33 C.E., oloze atelelele kuvandamina palanga naku 1914 numba jino aputuke kuyula. (Vili. 2:33-35; Hepe. 10:12, 13) Kaha nawa vaka-kole jenyi vosena navakavanongesa omu chiyulo chenyi chaMyaka Likombakaji nachikakuma. (Koli. 1, 15:25) Chapundu vene mwavandaminanga halwola lwalusuku, oloze kuvandamina chenyi nachikaneha vyuma vyamwaza chikuma.

18, 19. Vyuma muka navitukafwa tulisuule kutalilila chikoki?

¹⁸ Chakuhona kukakasana, tuvosena twatela kulisuula kuvandamina nakusolola muchima wakutalilila chikoki. Uno vyuma muka navitukafwa tusolole muchima kana? Twatela kulomba Kalunga atuhane shipilitu yenyi. Twatela kwanuka ngwetu muchima wakutalilila chikoki wapwa muhako washipilitu. (Efwe. 3:16; 6:18; Teso. 1, 5:17-19) Shikaho, twatela kulomba Yehova mangana atukafwe tumike nakupwa namuchima wakutalilila chikoki.

¹⁹ Chuma muka chakafwile Apalahama, naYosefwe naNdavichi mangana vavandamine Yehova atesemo jishiko jenyi? Chuma chavakafwile shina kufwelela muli Yehova nakushinganyeka omu avakafwilenga kunyima. Kavashinganyekele kaha haukalu wavo nahavyuma vyavavendejekeleko. Ngocho kushinganyeka havyuma vyafuminemo hamuchima wavo wakutalilila chikoki nachitukafwa tupwenga namuchima kana.

20. Vyuma muka twatela kufwila kulinga?

²⁰ Shikaho, numba tumona tuhu ukalu ngachilihi twatela kupwa namuchima ‘wakuvandamina.’ Shimbu jimwe tunahase kuhanjika ngwetu: ‘Ove Yehova, uno palanga nakumwaka uka?’ (Isa. 6:11) Oloze hakutukafwa kushipilitu yenyi yajila, natufwila kuhanjika mazu ahanjikile Yelemiya ngwenyi: “Yehova ikiye chazano chami, shikaho nangumutalililanga.”—Lungu. 3:21, 24.