Mujimbu asonekele Mateu wahanjika omu evwile Yosefwe hakutachikiza ngwenyi Maliya ali nalijimo, nomu kangelo ejile kuli ikiye muchilota nakumulumbunwina vyalijimo lyaMaliya, nomu etavilile vyuma vamulwezele. (Mateu 1:19-25) Mateu asonekele nawa havyuma alotele Yosefwe omu kangelo amulwezele achinyine kuEjipitu, nomu vayile natanga yenyi, nomu kangelo amulwezele akinduluke kuIsalele, nomu akindulukile, navyuma vyamulingishile atwame natanga yenyi muNazaleta. (Mateu 2:13, 14, 19-23) Mutupetulu vavali vamaputukilo mumukanda waMujimbu Wamwaza waMateu, Yosefwe vamuvuluka mapapa 9, oloze Maliya mapapa 5 kaha.

Oloze Luka asonekele vyomu Maliya vamutambukilile kuli kangelo Ngavalyele, nomu ayile kuli kausoko kenyi Elizaveta, nomu Maliya alishile Yehova. (Luka 1:26-56) Luka ahanjikile nawa hamazu aze ahanjikile Shimeyone kuli Maliya haluyando mwakamona Yesu. Asonekele nawa hamazu ahanjikile Maliya omu vayile natanga yenyi kutembele halwola Yesu apwile namyaka 12, keshi aze ahanjikile Yosefweko. Luka ahanjikile ngwenyi Maliya ashinganyekelenga chikuma havyuma vyasolokelenga. (Luka 2:19, 34, 35, 48, 51) Mutupetulu vavali vamaputukilo mumukanda waMujimbu Wamwaza waLuka, Maliya vamuvuluka mapapa 14, oloze Yosefwe vamuvuluka mapapa katatu kaha. Mateu asonekele chikuma hali Yosefwe, oloze Luka asonekele chikuma hali Maliya.

Vyuma vasonekele ava vatu vavali, vikiko vyalingisa valiseze hakusoneka vyachisemunwino chaYesu. Mateu asonekele vyachisaka chaYosefwe nakusolola ngwenyi Yesu mwanaYosefwe wakulela apwile swana muwangana waNdavichi kweseka najishimbi. Mwomwo ika? Mwomwo Yosefwe apwile wamuchisaka chaMwangana Ndavichi kuhichila muli Solomone mwanaNdavichi. (Mateu 1:6, 16) Oloze Luka asonekele vyachisaka chaMaliya nakusolola ngwenyi Yesu apwile swana muwangana waNdavichi kweseka nachisemwa. (Loma 1:3) Mwomwo ika asonekelele mujila kaneyi? Mwomwo Maliya apwile wamuchisaka chaMwangana Ndavichi kuhichila muli Natane mwanaNdavichi. (Luka 3:31) Kaha mwomwo ika Luka ahonene kusoneka ngwenyi Maliya apwile mwanaHeli? Mwomwo kweseka najishimbi, kumyaka hakulava vatu vavulukilenga kaha malunga vamutanga keshi mapwevoko. Shikaho omu Luka asonekele ngwenyi Yosefwe apwile mwanaHeli, vatu vatachikijile vene ngwavo Yosefwe apwile isewenu yaHeli.—Luka 3:23.

Vyuma asonekele Mateu naLuka vyasolola hatoma nge Yesu apwile Meshiya uze vashikile. Kaha nawa mijimbu yakuvuluka chisaka chaYesu yapwa yamuchano mwomwo navaFwaliseu navaSatuse vayitachikijile. Makumbi ano mijimbu asonekele Mateu naLuka yichili lika yayilemu, kaha nawa yasolola nge vyuma ashika Kalunga vyapwa vyamuchano, kaha navikatesamo chikupu.