1, 2. (a) Mwomwo ika twafwelela ngwetu tunahase kuvwala mutu wamuhya? (b) Vilinga muka vyamutu wamuhya vyatwama hali Wavaka-Kolose 3:10-14?

MAZU akwamba ngwavo “mutu wamuhya,” asoloka mapapa kavali muMbimbiliya yaVisoneka vyaKaye Kakahya. (Efwe. 4:24; Kolo. 3:10) Mazu kana atalisa kumutu “uze vatengele kweseka nomu mwaya muchima waKalunga.” Tuvosena tunahase kuvwala mutu kana. Mwomwo ika? Mwomwo Yehova atutengele muchifwanyisa chenyi, shikaho tunahase vene kusolola vilinga vyenyi vyamwaza.—Kupu. 1:26, 27; Efwe. 5:1.

² Chipwe ngocho, tweji kulimbenjanga mwomwo twaswana shili kuli visemi jetu vakulivanga. Kaha shimbu jimwe nawa tweji kulimbenjanga mwomwo yakutuhungumwisa kuvatu twatunga navo. Oloze Yehova mwatukafwa mangana tupwenga vatu vavilinga vyamwaza vize asaka. Natushimutwila havilinga vyamutu wamuhya vize vahwiminyinyine kaposetolo Paulu asoneke, mangana vitukafwe tupwenga vatu vaze azanga Kalunga. (Tangenu Wavaka-Kolose 3:10-14.) Natushimutwila nawa omu tunahase kusolola vilinga kanevi mumulimo wamuwande.

3. Jila yimwe muka natusolwelamo ngwetu tunavwale mutu wamuhya?

³ Omu Paulu akumishile kutukolezeza tuvwale mutu wamuhya, ambile nawa ngwenyi katwatela kupwa nakahandununako. Asonekele ngwenyi: “Kakweshi chihandwa hali kaHelase, chipwe kaYuleya, chipwe ngalami, chipwe chilima, chipwe muka-lifuchi lyeka, chipwe Sukute, chipwe ndungo, chipwe muka-kulihehwako.” * Mwomwo ika katwatela kulitala hamiyachi, nahamafuchi chipwe hachiyoyelo muchikungulwiloko? Mwomwo vaka-kukavangiza Kulishitu vosena vapwa “umwe kaha.”—Kolo. 3:11; Ngale. 3:28.

4. (a) Uno vangamba jaYehova vatela kumona ngachilihi vakwavo? (b) Vyuma muka vinahase kulingisa vaka-Kulishitu vahone kulinunga?

⁴ Vatu vaze vavwala mutu wamuhya veji kumonanga vandumbwavo navatu veka kupwa vavalemu, chamokomoko nokwo vafuma chipwe chiyoyelo chavo. (Loma 2:11) Oloze mumafuchi amwe chapwa chachikalu kusolola muchima kana. Chakutalilaho, muSouth Africa Vinjiho vavavulu vatwama mujingalila muze mwapwilenga vatu velava kaha, veka muze mwapwilenga mahando kaha, vakwavo muze mwapwilenga vatu vamiyachi navikova vyakulisezaseza. Hakusaka kukolezeza vandumbwetu ‘vatohwese zangi yavo,’ muOctober 2013 Lizavu Lyakutwaminyina lyanonekele vyuma mangana vakafwe vandumbwetu valitachikize kanawa navakwavo. (Koli. 2, 6:13, kwinyikila chamwishi) Uno vyuma muka vanonekele?

5, 6. (a) Vandumbwetu vanonekele vyuma muka mangana vakafwe vatu jaKalunga mulifuchi limwe valinunge hamwe? (Talenu muvwimbimbi wakulivanga.) (b) Vyuma muka vinafumumo?

⁵ Vandumbwetu vanonekele vikungulwilo vyazachisa malimi akulihandununa valikungulwilenga hamwe vivali vivali kusongo yavyalumingo vimwe. Vandumbwetu vosena valivwishile kuwaha kuzachila hamwe mumulimo wamuwande, nakukungulukila hamwe, nakulila hamwe vyakulya kujizuvo javandumbwavo. Vikungulwilo vyavivulu vyakundwijile kunoneka kana, kaha ofesi yamutango yatambwile mijimbu yayivulu yakusolola nganyo yafuminemo. Navatu vaze kavapwa Vinjihoko vatuminenga mikanda. Chakutalilaho, mukulwane umwe wamuliuka lyakwitava ambile ngwenyi, “Ami kangwapwa nguChinjihoko, oloze ngunamono ngwami mwanoneka kanawa jila mweji kwambulwilangamo, kaha nawa kamwalitala hamiyachiko.” Uno vandumbwetu vanganyalile ngachilihi?

⁶ Chakutalilaho, ndumbwetu wapwevo Noma uze ahanjika lilimi lyaXhosa alimwene kupwa wakukalikiza, ngocho chamukaluhwililenga kusanyika vandumbwetu vavindele muchikungulwilo chazachisa Chingeleshi kwiza hembo lyenyi. Oloze likumbi limwe omu azachile muwande hamwe navandumbwetu vavindele, vayile nenyi kuzuvo yavo kaha vamusolwelele chisambo, ngocho ambile ngwenyi, “Kumana navindele vapwa vatu ngana mwayetu.” Jino omu lwahetele lwola lwavandumbwetu vamuchikungulwilo chazachisa Xhosa mangana vazumbule vandumbwetu vazachisa Chingeleshi, ou ndumbwetu awahishile vyakulya nakusanyika ava vangeji. Hali vaze vangeji asanyikile hapwile nakalama wachindele. Ndumbwetu Noma ambile ngwenyi, “Ngwalikomokelele hakumona ou ndumbwetu wachindele nalisuula kutwama hakileti.” Chikupu vene vyuma kanevi vanonekele vinakafwe vandumbwetu vatunge masepa vavahya, kaha nawa vali nakufwila kutwalaho lika kutohwesa zangi yavo.

7. Mwomwo ika twatela kutwalaho kusolola keke?

⁷ Natutwalangaho lika kumonanga vyeseko mukaye kano kaSatana swi nomu navakakanongesa. Oholyapwa tunakumona ukalu wakuhona milimo, misongo, luyanjisa, ukalu wakulijila,  kutwiva vikumba vyetu naukalu weka. Hakusaka tulikafwe navakwetu muukalu kanou, twatela kupwa namuchima wakeke. Kwivwila vakwetu keke nachitukafwa tuvasolwele likoji. (Efwe. 4:32) Kupwa navilinga kanevi vyamutu wamuhya nachitukafwa tulondezeze Kalunga hakuvendejeka vakwetu.—Koli. 2, 1:3, 4.

8. Vyuma muka vinahase kufumamo kachi nge natusololanga likoji kuvatu vosena muchikungulwilo? Hanenu chakutalilaho.

⁸ Natusolola ngachilihi ngwetu twazakama vamwiza navaka-kukalikiza vaze vali muchikungulwilo chetu? Twatela kulikata navo chikuma, mangana vamone ngwavo navakiko vapwa vavalemu muchikungulwilo. (Koli. 1, 12:22, 25) Tuchitalenu vyuma vyasolokele kuli Dannykarl uze afumine kuPhilippines nakuya kuJapan. Vakulwane jamilimo kuze azachilililenga kavamumwene kupwa wamulemu ngana mwavakwavoko. Oloze likumbi limwe ayile nakukunguluka naVinjiho jaYehova. Dannykarl ambile ngwenyi, “Vatu vavavulu vapwilemo vapwile vaJapanese, oloze vangutambwokesele nachisambo kwijiva nge vangwijivile lyehi.” Vatwalileho lika kumusolwela likoji, kahechi chamukafwile azovoloke kushipilitu. Mukuhita chalwola vamumbapachishile, kaha makumbi ano apwa jino kalama muchikungulwilo. Vakwavo tulama vapwa vakuwahilila kupwa muchikungulwilo hamwe naDannykarl napuwenyi Jennifer. Tulama veji kuhanjikanga hali ava vapwevo nalunga ngwavo, “Hakupwa vapayiniya chiyoyelo chavo kachapwa chauhandoko, kaha vahana chakutalilaho chamwaza chakutonda chatete Wangana.”—Luka 12:31.

9, 10. Hanenu vyakutalilaho vyakusolola nganyo yeji kufumanga hakwivwila vatu keke mumulimo wamuwande.

⁹ Kwambulila vatu mujimbu waWangana, cheji kutukafwanga tulinge “vyuma vyamwaza kuli vosena.” (Ngale. 6:10) Vinjiho vavavulu vanakulinangulanga malimi eka mangana vanangule vamwiza vaze vahanjika malimi kana mwomwo yakuvevwila keke. (Koli. 1, 9:23) Chuma kana chinanehe nganyo yayinene chikuma. Chakutalilaho, ndumbwetu wapwevo Tiffany wamuAustralia uze apwa payiniya alinangwile lilimi lyaSwahili mangana akafwe chikungulwilo chize chazachisa Swahili munganda yaBrisbane. Numba tuhu chapwile chachikalu kulinangula lilimi kana, oloze Tiffany apwa wakusuuluka mukuyoya chenyi. Ambile ngwenyi: “Nge muli nakusaka kulivwisa kuwaha mulimo wakwambulula, kaha zachilenu muchikungulwilo chize chazachisa lilimi lyeka. Nachipwa kwijiva nge munayi kulifuchi lyeka. Kaha namulitachikiza navandumbwetu vavavulu nakumona omu twalinunga hamwe mukaye kosena.”

¹⁰ Achitalenu nawa vyuma vyasolokele kutanga yimwe muJapan. Mwanavo wapwevo Sakiko ambile ngwenyi: “Kafwe muji 1990, twawanyinenga vatu vafuminenga kuBrazil omu twapwilenga mumulimo wamuwande. Omu twavatangilililenga  visoneka vyakufwana nge Kusoloka 21:3, 4 chipwe Samu 37:10, 11, 29 kuzachisa Mbimbiliya yamulilimi lyavo, vevwilililenga chikuma kaha vamwe valililenga mwomwo mazu avahetelenga kumuchima.” Eyi tanga yalingileko vyuma vyeka nawa. Sakiko ambile ngwenyi: “Omu twamwene muchima wavo wakusaka kulinangula, tanga yetu yosena yaputukile kulinangula Portuguese.” Mukuhita chalwola, eyi tanga yasokolwele chikungulwilo chaPortuguese. Hamyaka yayivulu, eyi tanga yinakafwe matunduke vapwenga vangamba jaYehova. Sakiko ambile nawa ngwenyi: “Numba tuhu chapwile chachikalu kulinangula Portuguese, oloze chaneha nganyo yayinene chikuma. Twasakwilila Yehova hakutukafwa.”—Tangenu Vilinga 10:34, 35.

11, 12. (a) Chuma muka chatela kutulingisa tuvwale mutu wamuhya? (b) Vyuma muka navitukafwa tupwenga vakulinyisa?

¹¹ Twafwila kuvwala mutu wamuhya mangana tuvumbike Yehova, keshi mangana vatwalise kuvatuko. Twatela nawa kutachikiza ngwetu naSatana uze apwile kangelo wakukupuka alingile shili mwomwo yakulivwimba. (Esekesenuko Ezekele 28:17.) Echi chasolola nge chapwa chachashi kuli vatu vakuhona kukupuka kulivwimba nakulitohwesa. Chipwe ngocho tunahase kupwa vakulinyisa. Vyuma muka navitukafwa tulinge ngocho?

¹² Kachi nge natusaka tupwenga vakulinyisa, kaha twatela kuwanangako lwola lwakushinganyekanga havyuma vize natutanganga muMazu aKalunga hakumbi hakumbi. (Lushi. 17:18-20) Twatela kushinganyeka havyuma anangwilenga Yesu navyuma alingilenga. (Mateu 20:28) Yesu asanyishile vaposetolo jenyi kumahinji. (Yowa. 13:12-17) Twatela nawa kulombanga shipilitu yaKalunga yitukafwe tulihende kumuchima wakumona vakwetu kupwa vakukuminamo.—Ngale. 6:3, 4; Fwili. 2:3.

13. Kachi nge natupwa vakulinyisa, kaha nganyo muka nayifumamo?

¹³ Tangenu Vishimo 22:4. Vaka-kulemesa Kalunga vamuchano vosena vatela kupwa vakulinyisa, kaha kulinga ngocho cheji kunehanga nganyo. Kulinyisa nachitukafwa tupwenga vakuunda nakulinunga muchikungulwilo. Kachi nge natupwa vakulinyisa, kaha Kalunga mwatusolwela likoji lyenyi lyalinene. Kaposetolo Petulu ambile ngwenyi: “Muvosena linyisenunga kuli vakwenu, mwomwo Kalunga eji kwimanyinanga vaka-kulivwimba nakole, oloze eji kusolwelanga vaka-kulinyisa likoji lyalinene.”—Petu. 1, 5:5.

14. Iya apwa chakutalilaho chamwaza chakusolola kuvova nakutalilila chikoki?

¹⁴ Makumbi ano vatu vaze vapwa vakuvova nakutalilila vakwavo chikoki vavamona kupwa vakuhehela. Oloze mazu kana apwa amakuli, mwomwo vilinga kana vyafuma kuli mutu wamulemu chikuma mwilu nahamavu. Yehova Kalunga ikiye apwa chakutalilaho chamwaza chakusolola kuvova nakutalilila chikoki. (Petu. 2, 3:9) Achitalenu omu akumbulwile Apalahama naLote kuhichila muvangelo jenyi. (Kupu. 18:22-33; 19:18-21) Kaha nawa hamyaka yakuzomboka 1,500, Yehova atalilililenga chikoki muyachi wavaIsalele omu valimbenjelenga.—Ezeke. 33:11.

15. Chakutalilaho muka atusela Yesu chakusolola muchima wauvwovu nakutalilila chikoki?

¹⁵ Yesu nawa apwa ‘wamuvwovu.’ (Mateu 11:29) Atalililenga chikoki vaka-kumukavangiza omu valimbenjelenga. Omu Yesu azachilenga mulimo wakwambulula, vamutolekelenga kuli vaka-kole vamukwitava. Chipwe ngocho apwile wamuvwovu nakuvatalilila chikoki swi nakukufwa chenyi. Kaha nawa omu apwile hachitondo chakumuyanjishila, alombele Ise akonekele vaze vapwile nakumujiha hakwamba ngwenyi, “kavatachikijile chuma vali nakulingako.” (Luka 23:34) Chapundu vene, Yesu atusela  chakutalilaho chamwaza chakusolola muchima wauvwovu nakutalilila chikoki namulwola lwavyeseko.—Tangenu WaPetulu 1, 2:21-23.

16. Tunahase kusolola ngachilihi kuvova nakutalilila chikoki?

¹⁶ Uno tunahase kusolola ngachilihi muchima wakuvova nakutalilila chikoki? Paulu avulukile jila yimwe omu asonekelele vakwavo vaka-kwitava ngwenyi: “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe.” (Kolo. 3:13) Chapundu vene chasakiwa kupwa vakuvova nakutalilila chikoki numba tukavangize lushimbi kana. Nge natupwa namuchima wakukonekelanga vakwetu, kaha muchikungulwilo namupwa kuunda.

17. Mwomwo ika kupwa vakuvova nakutalilila chikoki chapwila chachilemu?

¹⁷ Vaka-Kulishitu vosena vatela kupwa vakuvova nakutalilila chikoki. Vilinga kana vikiko vyasakiwa numba vakatulwile. (Mateu 5:5; Yako. 1:21) Kaha nawa kupwa navilinga kana nachitukafwa tuvumbike Yehova nakukafwa vakwetu vakavangize jindongi jamuMbimbiliya.—Ngale. 6:1; Chimo. 2, 2:24, 25.

18. Uno kuhona kutala vatu kumeso chatambukila ngachilihi hamwe nazangi?

¹⁸ Vilinga vyosenevi tunashimutwila vyatambukila hamwe nazangi. Chakutalilaho, kambaji Yakova ahuhumwine vandumbwenyi mwomwo vapwile nakuhakwila vapichi nakuhana milonga vihutu. Avalwezele ngwenyi muchima kana walimbalakile nalushimbi lwawangana lwakwamba ngwavo: “Zangenunga vakwenu nganomu mwalizanga enu vavene.” Kaha ambile nawa ngwenyi: “Kachi nge namutalanga lika vatu kumeso, kaha muli nakulinga shili.” (Yako. 2:8, 9) Kaha nawa zangi nayitukafwa tulihende kumuchima wakahandwa wakumona vatu vamwe kupwa vavalemu mwomwo yakutanga chavo, chipwe muyachi chipwe chiyoyelo chavo. Vilinga vyetu vyatela kutusolola chikupu nge katwatwama namuchima wakutala vatu kumesoko, keshi kuhanjika kaha hakanwako.

19. Mwomwo ika chapwila chachilemu kusolola zangi?

¹⁹ Zangi nawa “yeji kutalililanga chikoki kaha nawa yeji kutetelanga,” “kayeshi kulivwimbako.” (Koli. 1, 13:4) Twatela kupwa namuchima wakutalilila chikoki, nakutetela nakulinyisa numba tutwaleho kwambulula mujimbu waWangana kuli vakwetu twalihata navo. (Mateu 28:19) Vilinga kanevi vyeji kutukafwanga nawa tulivwasane kanawa navandumbwetu vosena muchikungulwilo. Vyuma vyeka muka tunahase kunganyala? Vikungulwilo vyeji kupwanga vyakulinunga nakulingisa vatu vavumbike Yehova, nakulingisa nawa vavahya vazange kulinangula muchano. Shikaho Mbimbiliya hakuzachisa lizu mutu wamuhya yatukolezeza ngwayo: “Kuvyuma vyosenevi, vwalenunga zangi, mwomwo yikiko yeji kununganga vatu hamwe mujila yakukupuka.”—Kolo. 3:14.

20. (a) Vihula muka twatela kulihulisa, kaha mwomwo ika? (b) Tuli nakutalilila vyuma muka?

²⁰ Tuvosena mutu himutu twatela kulihulisa ngwetu, ‘Vyuma vyeka muka ngwatela kulinga mangana nguzule mutu wamwaka nakumumbila?’ Twatela kulomba Kalunga atukafwe nakuzata nangolo tuhonese vilinga vize navikatuhonesa kuswana Wangana waKalunga. (Ngale. 5:19-21) Kaha nawa twatela kulihulisa ngwetu, ‘Kutala nguli nakutwalaho lika kupwa nguwamuhya muvishinganyeka vyamumuchima wami tahi?’ (Efwe. 4:23, 24) Vaka-Kulishitu vosena vatela kutwalaho lika kuvwala mutu wamuhya nakumulama palanga nomu navakapwa vakukupuka. Achishinganyekenu ocho kuwaha natukevwa omu vatu vosena navakapwa vakukupuka enu vayaya!