KAPOSETOLO PAULU vamuhwiminyinyine asoneke vilinga 9 vize vyeji kwizanga mwomwo yakupwa nashipilitu yajila. (Ngale. 5:22, 23) Alumbunwine ngwenyi vilinga kana vyapwa “mihako yashipilitu.” * Eyi mihako yikiko yeji kusololanga nge mutu navwale “mutu wamuhya.” (Kolo. 3:10) Nganomu mutondo weji kwimanga mihako nge vanakuuzakama, namutu nawa eji kusololanga mihako yashipilitu nge vali nakumutwaminyina nashipilitu yajila.—Samu 1:1-3.

Chuma chatete avulukile Paulu hamihako yashipilitu shina zangi. Uno zangi yalema ngachilihi? Paulu ambile ngwenyi, nge keshi nazangiko, kaha napu wamokomoko. (Koli. 1, 13:2) Uno zangi yapwa chuma muka? Vyuma muka navitukafwa tupwenga nayo? Kaha tunahase kuyisolola ngachilihi mukuyoya chetu?

Numba tuhu chapwa chachikalu kulumbununa lizu zangi, oloze Mbimbiliya yalumbununa omwo yapwa. Chakutalilaho, Mbimbiliya yamba ngwayo zangi “yeji kutalililanga chikoki kaha nawa yeji kutetelanga.” “Yeji kwivwilanga [nawa] kuwaha muchano. Yeji kufwikanga vyuma vyosena, nakwitavila vyuma vyosena, nakutalilila vyuma vyosena, nakukakachila muvyuma vyosena.” Zangi nawa yasakiwa kwivwila vakwetu keke, nakuvazakamanga nakupandama kuli vakiko. Oloze vilinga vyakufwana nge lwiso, nakulivwimba, nakulinga vyuma mwakuhingama, namuchima wakulizanga mutu yivene, namatoto, nakulama koko, vyeji kusololanga nge mutu katwama nazangiko. Ngocho zangi yalihandununa navilinga kanevi, mwomwo “kayeshi kufwila vyuma vyayo yiveneko.”—Koli. 1, 13:4-8.

“Kalunga ikiye zangi.” Chikupu vene, zangi yahambakana vilinga vyaYehova vyosena. (Yowa. 1, 4:8) Milimo yenyi yosena najila eji kuzachilangamo navatu vyasolola nge atwama nazangi. Jila yayinene asolwelelemo zangi shina hakutuma Yesu kwiza nakutufwila. Kaposetolo Yowano ahanjikile ngwenyi: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye. Eyi zangi yalumbununa nge, Kalunga ikiye atuzangile etu nakututumina Mwanenyi kupwa wana wakufwika hajishili jetu, keshi nge etu yetu twazangile Kalungako.” (Yowa. 1, 4:9, 10) Eyo, zangi yaKalunga yikiko yalingisa vatukonekele shili jetu, nakupwa nalutalililo, nakukapwa nakuyoya chahaya myaka yosena.

Yesu asolwele zangi yakuzanga vatu hakulisuula kulinga mwaya muchima waKalunga. Paulu asonekele ngwenyi: “[Yesu] ambile . . . ngwenyi: ‘Tala! Nguneza nakulinga mwaya muchima wove.’ . . . Omu ‘mwaya muchima’ mukiko vene vanatulingishila kupwa vajila kuhichila muwana wamujimba waYesu Kulishitu kamwe kaha kunahu.” (Hepe. 10:9, 10) Kakweshi mutu mwahasa  kusolola zangi kaneyiko. Yesu ambile ngwenyi: “Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.” (Yowa. 15:13) Kutala etu vatu vakuhona kukupuka tunahase kulondezeza Yehova naYesu hakusolola zangi tahi? Eyo. Tushimutwilenu omu tunahase kusolola zangi.

Paulu atulweza ngwenyi: “Londezezenunga Kalunga, hakupwa muvana venyi azanga, kaha tambukenunga lika muzangi nge muze nawa Kulishitu atuzangile nakulyecha ivene hali etu.” (Efwe. 5:1, 2) Tweji ‘kutambukanga lika muzangi’ hakufwila kuyisololanga mukuyoya chetu chosena. Zangi kana tweji kuyisololanga muvilinga keshi mukuhanjika kaha hakanwako. Yowano asonekele ngwenyi: “Enu vana vami ngwazanga, katwatela kuzanganga vakwetu namazu chipwe hakanwako, oloze muvilinga namumuchano.” (Yowa. 1, 3:18) Chakutalilaho, nge twazanga Kalunga navatu, kaha natwambulilanga vakwetu “mujimbu wamwaza waWangana.” (Mateu 24:14; Luka 10:27) Tweji kutambukanga nawa muzangi hakutalililanga vakwetu chikoki, nakuvatetela nakuvakonekela. Evi vikiko Mbimbiliya yahanjikila ngwayo: “Nge muze Yehova amikonekelele namuchima wakusuuluka, nayenu mwatela kulinga mwomumwe.”—Kolo. 3:13.

Oloze zangi kayalumbununa kwechelela vatu valinge tuhu vyuma vyavipi chakuhona kuvahuhumunako. Chakutalilaho, nge mwana ali nakulila, kaha chisemi katela kumuhana vyeshovyo mwatonda mangana aholeko. Oloze chisemi uze azanga mwanenyi eji kumutenukilanga nge chili nakusakiwa kulinga ngocho. Chochimwe nawa, numba tuhu Kalunga ikiye zangi oloze ‘eji kuzangamisanga vaze azanga.’ (Hepe. 12:6) Shikaho nge tuli nakutambuka muzangi, kaha natuhuhumunanga vaze vali nakusakiwa kuvahuhumuna. (Vishi. 3:11, 12) Chipwe ngocho twatela kwanuka ngwetu nayetu twapwa tuvaka-shili kaha tunahase kulimbenja. Ngocho kuli vyuma vimwe twatela kuzachilaho tuvosena numba tusololenga zangi yamwenemwene. Uno natuhasa kulinga ngachilihi ngocho? Tuchitalenu hajijila jino jitatu.

Chatete, lombenu Kalunga amihane shipilitu yenyi yize yeji kukafwanga vatu vapwenga nazangi. Yesu ambile ngwenyi, Yehova eji kuhananga “shipilitu yajila kuli vaze navamulombayo.” (Luka 11:13) Shikaho, nge natulombanga shipilitu yajila nakukilikita mangana ‘tutambukenga nashipilitu,’ kaha natusololanga zangi muvilinga vyetu. (Ngale. 5:16) Chakutalilaho, nge wapwa ukalama muchikungulwilo, kaha unahase kulomba shipilitu yajila mangana yikukafwe uhuhumune vandumbwove muzangi hakuzachisa Visoneka. Chipwe nge wapwa uchisemi, unahase kulomba shipilitu yaKalunga yikukafwe uhuhumunenga vana vove muzangi keshi namatotoko.

Chamuchivali, shinganyekenu omu Yesu asolwelelemo zangi halwola vamulingilenga mwamupi. (Petu. 1, 2:21, 23) Tunahase kushinganyeka hachakutalilaho chaKulishitu nge vanatuvulumuna kuli vakwetu. Halwola kanelu tunahase kulihulisa ngwetu: ‘Nge Yesu kwapwanga kachi nalingi ika?’ Kulihulisa chihula kana chakafwile ndumbwetu wapwevo Leigh ahone kulinga vyuma mukulusuka. Ambile ngwenyi: “Likumbi limwe mukwetu muka-milimo atumine mukanda kuli vakwetu veka ngwazachilenga navo uze wahanjikile mazu amapi hali yami. Chuma kana changukolele chikuma kumuchima. Oloze ngwalihulishile ngwami, ‘Nangulondezeza ngachilihi Yesu mangana nguhonese ukalu kanou?’ Kushinganyeka havyuma atelelele kulinga Yesu nge ikiye apwile muukalu wami, changukafwile ngumuliule uze angufutwishile kumuchima. Mukuhita chalwola vangulwezele ngwavo apwile nakuviza misongo yayinene chikuma kaha ahombele. Ngocho ngwatachikijile jino ngwami pamo vikiko vyamulingishile asoneke mazu amapi. Kushinganyeka hachakutalilaho chaYesu chakusolola zangi nahalwola vamulingile mwamupi, changukafwile ngusolwele uze mukwetu muka-milimo zangi.” Eyo, nge natulondezezanga Yesu, kaha lwola lwosena natusololanga zangi.

Chamuchitatu, fwilenu kupwa namuchima wakulisuula wakusolola zangi uze wapwa katachikijilo kavaka-Kulishitu vamuchano.  (Yowa. 13:34, 35) Visoneka vyatulweza tupwenganga “namuchima uze apwilenga nawo Kulishitu Yesu.” Hakulisuula kufuma mwilu, “alilingishile kupwa wamokomoko” hali etu “palanga nakukufwa.” (Fwili. 2:5-8) Nge natushinganyekanga hamuchima waKulishitu wakulisuula, kaha natupwa navishinganyeka ngana vize vyenyi, nakuhakanga kulutwe vyuma vasaka vakwetu. Nganyo muka yikwavo yeji kufumangamo?

Kusolola zangi cheji kunehanga nganyo yayinene chikuma. Tuchitalenu havyuma vino vivali tunahase kunganyala:

• KUPWA NAVANDUMBWETU VAMUKAYE KOSENA: Kulizanga navandumbwetu chatulingisa tufwelele ngwetu kala kuchikungulwilo natuya, vandumbwetu navatutambula nachisambo. Chapwa hikutokwa chachinene kutuzanga kuli ‘vandumbwetu vosena mukaye.’ (Petu. 1, 5:9) Vatu jaKalunga kaha vakiko vatwama nazangi kaneyi.

• KUTWAMA MUKUUNDA: ‘Kuliulanga tutenga twavakwetu muzangi’ cheji kutulingisanga ‘tulinunge hamwe mukuunda.’ (Efwe. 4:2, 3) Zangi kana tweji kuyimwenanga hakukunguluka chachikungulwilo nachachihanda nechi changalila. Kuunda kanechi chapwa chakulipwila mukaye kano kakuhona kuunda. (Samu 119:165; Isa. 54:13) Tweji kusololanga zangi kuli vakwetu hakutwama navo mukuunda, kahechi cheji kwivwisanga Setu wamwilu kuwaha.—Samu 133:1-3; Mateu 5:9.

Paulu asonekele ngwenyi: “Zangi yeji kutunganga.” (Koli. 1, 8:1) Mujila muka? Mumukanda Wavaka-Kolinde wakulivanga kapetulu 13 uze vavuluka vamwe ngwavo “Mwaso waZangi,” Paulu alumbunwine omu zangi yeji kututunganga. Chatete, yeji kutukafwanga tuhone kulinganyalisanga etu vavene. (Koli. 1, 10:24; 13:5) Kaha nawa hakuwana nge zangi yeji kutetelanga nakutalilila chikoki, ngocho yeji kulingisanga jitanga navikungulwilo vilinunge.—Kolo. 3:14.

Oloze zangi yakuzanga Kalunga ikiko yapwa yayilemu, mwomwo yeji kututunganga. Zangi kana yeji kukafwanga vatu vakuvisemwa namiyachi namalimi akulisezaseza mangana ‘valinunge hamwe nakuzachila Yehova.’ (Zefwa. 3:9) Shikaho, tufwilenu kusololanga zangi yize yatwama hamihako yashipilitu yajila yaKalunga hakumbi hakumbi.