Vakweze vavavulu hambetele veji kungusanyikanga ngwavo, “TATA” chipwe “KAKA” chipwe “NATU.” Hakuwana nge nguli namyaka yakusemuka 89 chapwa chakutamo kungusanyika mujila kaneyi. Mazu veji kungusanyikanga eji kungulingisanga ngumone ngwami eyi hijila yimwe nangukiswilamo Yehova hakumuzachila mumulimo washimbu yosena hamyaka yoseneyi 72. Hakuwana nge ngunashimbula mumulimo kanou, ngocho ngweji kukolezezanga ava vakweze ngwami, ‘Yehova mwakamifweta hamilimo yenu nge kamweshi kuzeula mavoko enuko.’—Miji. 2, 15:7, kwinyikila chamwishi.

Visemi jami vafumine kuUkraine nakuya nakutwama mumbaka yaRossburn munganda yaManitoba mulifuchi lyaCanada. Twasemuka malunga 8 mapwevo nawa 8, kaha ami yami wamuchi 14. Tata azangile chikuma kutanga Mbimbiliya, kaha atutangililengayo lyasondo chimene hichimene. Chipwe ngocho, amwenenga mauka akwitava kupwa hijila yimwe yakutondelamo jimbongo. Shimbu jimwe ahanjikilenga mukuseseka ngwenyi, “Kangwatachikiza nowo afwetelenga Yesu hamulimo wakwambulula nawakunangula uze azachilengako.”

Mukuhita chalwola vandumbwami vamalunga vawana navava vamapwevo nawa vawana vetavilile muchano. Yayami wapwevo Rose azachilenga upayiniya palanga nakukufwa chenyi. Atukolezezelenga tuvosena mangana tuhake mangana kuvyuma yanangula Mbimbiliya. Atulwezelenga ngwenyi, “Nguli nakusaka kukamimona cheka mulifuchi lyalihya.” Yayami mukwavo walunga Ted apwilenga muka-kunangula muchachi. Sondo hiSondo nachimene atahwokelenga hachisaji chahapeho, nakwonga vaka-kumwivwilila ngwenyi vaka-shili vosena navakavocha muchijiva chakakahya haya myaka yosena. Oloze mukuhita chalwola, ou yayami apwile jino ngamba yaYehova wakushishika.

Likumbi limwe mu 1944 omu ngwafumine kushikola, ngwawanyine kamukanda kakwamba ngwavo, The Coming World Regeneration * kali hamesa mukapete kakulila. Ngocho ngwakanonele nakuputuka kukatanga, kaha ngwakakumishile mulwola lwalundende kaha. Omu ngwakumishile kutanga, ngwashinganyekele jino ngwami ngwatelelele kuzachila Yehova ngana muze alingile Yesu.

Uno iya anehele kaze kamukanda muzuvo yetu? Yayami walunga steve ambile ngwenyi, kwezanga malunga vavali vapwanga ‘nakulanjisa’ mikanda,  shikaho ngunalandeko kamwe mwomwo kakiko katanga mujimbongo ngwapwanga najo. Chalumingo chakavangijileho vaze malunga veji cheka. Vatulwezele ngwavo vapwile Vinjiho jaYehova, kaha nawa vazachishilenga Mbimbiliya hakukumbulula vihula vahulishilenga vatu. Hakwivwa ngocho, twawahililile chikuma mwomwo visemi jetu vatukafwilenga tumone Mazu aKalunga kupwa amalemu. Ava malunga vatulwezele nawa ngwavo kwasalile kaha makumbi amandende nakuya kukukunguluka changalila munganda yaWinnipeg muze apwile nakutwama yayami wapwevo Elsie. Omu ngwevwile ngocho, ngwashinganyekele kuya kukukunguluka kana.

Ngwavuwile kinga tunda yajikilomita kafwe 320 hakuya kuWinnipeg, kahomu ngwahetele mumbaka yaKelwood muze vapwile nakutwama vaze Vinjiho vejile kuzuvo yetu, ngwashinganyekele kwimanako mumbaka kana. Halwola ngwapwile kuze, ngwayile nakukunguluka, kaha ngwatachikijile jino omu chapwa chikungulwilo. Ngwatachikijile nawa ngwami vatu vosena vatela kuzata mulimo wakwambulwila kuzuvo hizuvo ngana muze alingilenga Yesu.

Omu ngwehetele muWinnipeg, ngwaliwanyine nayaya walunga Jack uze ejile kukunguluka changalila kufuma kunorthern Ontario. Halikumbi lyatete lyakukunguluka changalila, ndumbwetu umwe avilikile ngwenyi nakupwa lumbapachiso. Hakwivwa ngocho, ami nayaya twafwililile kutumbapachisa hakukunguluka vene chize. Tuvosena twafwililile kuputuka kuzata upayiniya hanyima yakutumbapachisa. Omu chakumine kukunguluka changalila Jack aputukile kuzata mulimo washimbu yosena. Halwola kana ami ngwapwile namyaka yakusemuka 16, shikaho ngwatelele kukinduluka kushikola. Mwaka wakavangijileho ngwaputukile kuzata upayiniya washimbu yosena.

Ngwaputukile kuzata upayiniya nandumbu Stan Nicolson mumbaka yaSouris munganda yaManitoba. Mukuhita chalwola ngwatachikijile jino ngwami mulimo waupayiniya kawapwa wawashi lwola lwosenako. Numba tuhu katwapwilenga najimbongo jakulikafwa najoko, oloze twatwalileho lika kwambulula. Lwola lumwe omu twambulwile likumbi lyosena lyamuundu twevwile zala, kaha katwapwile natujimbongo chipwe twatundende twakulanda vyakulyako. Oloze omu twahetele kuzuvo twawanyine vanatukunjila njeke yavyakulya kuchikolo. Kufuma vene likumbi lize nakuheta kulelo, katwatachikiza owo ahakile yize njeke yavyakulya kuchikoloko. Ngunakwanuka likumbi lize twalile nakwikuta. Chikupu vene, Yehova atukiswile hakuhona kuzeula mavoko etu. Ngunakwanuka mukakweji kana ngwatohwele chikuma kuhambakana omu ngwapwile hakavanga.

Omu mwahichile tukweji vavandende, vatulwezele kuya nakuzachila mumbaka yaGilbert Plains, kafwe jikilomita 240 kufuma kuSouris. Halwola kana vikungulwilo vyapwilenga nachati yakusolola milimo nazate mutu himutu muwande yize vahakilenga kuutenda kusongo yakakweji. Nge ngunamono ngwami vatu kavazachile kanawako, kaha ngwahanjikilenga chihande nakuvanukisa ngwami vatela kuzata nangolo. Likumbi limwe hanyima yakukunguluka, payiniya umwe wapwevo wakashinakaji uze asombokele kuli lunga uze kapwile Chinjihoko angulwezele oku ali namasoji hameso ngwenyi, “Ngwesekanga noho hakumina ngolo jami, oloze vyuma kaha vikiko vyakaluhwanga.” Hakwivwa ngocho, nayami ngwaputukile kulila, kufumaho ngwalikonekelele kuli ikiye.

Ngana muze chapwile kuli ami, vakweze vanahase kulimbenja mujila kaneyi mwomwo yaunyike, nakwivwa jino kupihya kumuchima. Oloze ngunalinangula ngwami chapwa chamwaza kulinangula kuvyuma natulimbenja nakuhona kuzeula mavoko. Ngunalinangula nawa ngwami vatu vakushishika navakavakisula mwamunene.

Omu ngwapwile namyaka yakusemuka 21, vangusanyikile kuya kushikola yaNgileyate yize yakumine muFebruary 1950. Vavavulu mushikola kana vavatumine mungalila yaQuebec muCanada muze Vinjiho vavayanjishilenga chikuma kuli vakulwane vamumauka akwitava. Ami vangutumine mumbaka yaVal-d’Or muze vafulilenga ulu. Likumbi limwe, omu twayile nakwambulwila mungalila yaVal-Senneville, kapilishitu umwe wamuchachi atulweze ngwenyi mwatukambila vatu vatuvete nge katweshi kufuma washi mungalila kanako. Ngocho twamutwalile kuzango yakusopela kaha vamuhanyine mulonga. *

 Vakulwane vamukwitava muQuebec vatuyanjishilenga mapapa kakavulu. Ngalila yaQuebec yapwilenga mumavoko avaka-Katolika hamyaka yakuzomboka 300. Shikaho, vaka-Katolika vazachililenga hamwe navaka-mapolitiki mangana vayanjise Vinjiho jaYehova. Halwola kana chiyoyelo chakaluhwilenga chikuma kaha nawa twapwile tuvavandende. Chipwe ngocho, katwazewile mavoko etuko. Echi chakafwile vatu vamwaza michima vevwilile kumujimbu twapwile nakwambulula. Vilongesa jami vavavulu vetavilile muchano. Chakutalilaho, chilongesa chami umwe apwile navatu 10 mutanga yenyi, kaha vosena valumukile nakupwa Vinjiho jaYehova. Chakutalilaho chavo chakafwile vavavulu vafume muchachi yaKatolika. Twatwalileho kwambulula, kaha kutwala muze vechele kutuyanjisa.

Kuheta mu 1956, vangulwezele kuya nakuzachila kuHaiti. Vamishonali vavavulu chavakaluhwililenga kulinangula lilimi lyaFrench. Chipwe ngocho, vatu vapwilenga nakwivwilila. Kamishonali umwe walijina lyaStanley Boggus ambile ngwenyi: “Twalikomokelele chikuma hakumona vatu navatukafwa mangana tutwaleho kuzata.” Hakavanga ami kachangukaluhwilileko mwomwo ngwavangilile kulinangula lilimi lyaFrench halwola ngwapwile muQuebec. Oloze kutwala muze twamwene jino ngwetu vandumbwetu vavavulu vahanjikilenga kaha lilimi lyaCreole. Shikaho vamishonali vatelele kulinangula lilimi kana numba vahase kuzata kanawa mulimo wavo wakunangula. Omu mukiko twalingile, kaha mwafumine nganyo yayinene chikuma.

Kutwala muze Lizavu Lyakutwaminyina lyatwitavishile twalumune mangazini ya Kaposhi Kakutalila namikanda yeka mulilimi lyaCreole. Echi chalingishile vatu vaputuke kukunguluka chikuma mulifuchi lyosena. Mu 1950, muHaiti mwapwile kaha vaka-kwambulula 99. Oloze kuheta mu 1960 vaka-kwambulula vavulile nakuheta ku 800. Lwola kana vangulwezele kuya nakuzachila haMbetele. Kuheta mu 1961, vangutongwele kupwa muka-kunangula muShikola yaMulimo waWangana. Mushikola kana twanangwile vatu 40. Havatu kana hapwile tulama vamuvikungulwilo navapayiniya vakulipwila. Omu twapwile kukukunguluka changalila muJanuary 1962 twakolezezele vandumbwetu vamalunga vatohwese mulimo wavo, kaha vavavulu vavatongwele kupwa vapayiniya vakulipwila. Vandumbwetu kana vavatongwelele halwola lwamwaza mwomwo luyanjisa lwatohwele chikuma.

 Kuheta haJanuary 23, 1962, omu chakumine kukunguluka changalila, ami nakamishonali walijina lyaAndrew D’Amico vatukwachile kutupokola nakututambula jimangazini jaTonenu! jamulilimi lyaFrench. Kwapwile mangazini yimwe muze mwapwile mazu lyahanjikile lipapilo lyamijimbu ngwavo muHaiti vatu valingilenga tufuta twavaka-kwitava chize vavulukilenga ngwavo voodoo. Vatu vavavulu kavazangile mujimbu kanako, kaha nawa vashinganyekele ngwavo twausonekelele hamutango. Mwahichile vyalumingo vyavindende, kaha vamishonali vosena vavafumishile mulifuchi lyaHaiti. * Chipwe ngocho, vandumbwetu vaze twanangwile vakiko jino vasalile nakutwalililaho kuzata mulimo. Makumbi ano, ngweji kuvasakwililanga hakumika chavo nakukilikita chavo vakilikichile mangana vazovoloke kushipilitu. Shikaho oholyapwa vali jino naMbimbiliya yaVisoneka vyaKaye Kakahya mulilimi lyaCreole yize kavashinganayekele ngwavo navakapwa navyoko.

Omu ngwafumine muHaiti, vangutumine kuya nakuzata mulimo waumishonali mulifuchi lyaCentral African Republic. Kutwala muze vangulwezele kuzata mwakalama wakutambwojoka, kufumaho ngwazachile mwakalama wamutango.

Hamakumbi kana kakwapwilenga jiZuvo jaWangana jamwazako. Shikaho ngwalinangwile mwakukambila mwila nakwambila jizuvo. Vatu vavavulu valikomokelele hakungumona nguli nakuzata mulimo kana. Echi chakolezezele nawa vandumbwetu vavavulu kulisuula kuzata mulimo wakutungatunga jiZuvo jaWangana nakujitungulula. Vakulwane vamukwitava vatusekelekelenga mwomwo vakiko jichachi javo japwile jamwaza kuhambakana jiZuvo jetu jaWangana. Oloze katwevwilenga sonyiko, twatwalileho kukungulukila mujiZuvo jetu jaWangana jamwila. Ava vaka-kole vechele kutusekeleka omu kwahichile peho yanyamanganda munganda yaBangui. Chachi yavo yatutukile nakuholokela mumukwakwa. Oloze jiZuvo jetu jaWangana jamwila kajatutukileko. Hakusaka mulimo waWangana utambuke kanawa, twatungile ofesi yamutango yayihya nazuvo yavamishonali mutukweji vatanu kaha. *

Mu 1976, mulimo waWangana vaukanyishile muCentral African Republic, shikaho vangutumine munganda N’Djamena yize yalihachile nalifuchi lyaChad. Oku kukiko ngwakaliwanyine naHappy payiniya watwima wakulifuchi lyaCameroon. Kuheta haApril 1 1978, twalimbachile. Mumwaka vene uze, mulifuchi kana mwepukile jita yakulitala hamiyachi, ngocho twachinyinyine kusulo yalifuchi kana. Omu yakumine yize jita twakindulukile, oloze twawanyine zuvo yetu vanayalumuna kupwa chikota chamaswalale. Vyuma vyetu vyavivulu vyalyenyekele kuhakilako namikanda yetu, nakanji yapuwami yawenga navikumba vize vatuhanyine hawenga wetu. Numba tuhu twajimbalishile vyuma kanevi, oloze katwazewile mavoko etuko. Twatwalileho lika kulikolezeza nakufwila kuzata mulimo wetu.

Omu mwahichile kafwe myaka yivali, mulimo wetu vawitavishile cheka muCentral African Republic. Ngocho twakindulukile nakuputuka kuzata mulimo wakutambwojoka. Halwola kana katwapwile nazuvoko, ngocho twatwaminenga muminyau yetu yize yapwilenga nakahela wakukoneka, nachindundu chachinene chize chalaminenga meya akuheta kujilita 200, nalikina lyakutuchisa vyakulya nalijiko lyakakahya kakezi. Chapwilenga chachikalu kutambuka. Chakutalilaho, ngunakwanuka lwola lumwe vatwimikile kutupokola mapapa 117.

Kulifuchi kana kwapwilenga kuzuma chikuma, kakavulu kwazuminenga najindingili 50. Shimbu jimwe chapwilenga chachikalu kuwana chijiva chakumbapachishila. Vandumbwetu vafululwilenga mutupila muze mwominenga, kaha mwaputukilenga kukeluka chindende chindende meya akuzachisa hakumbapachisa vatu. Kakavulu vatu vavambapachishililenga mumungomo waunene

Kuheta mu 1980 twayile nakuzachila kuNigeria. Twatwamineko myaka yivali nachimbwa, kaha twalongesele vyamulimo wakutunga Ofesi yamutango yamulifuchi kana. Vandumbwetu valanjile zuvo yayinene, kaha vayipuzwile nakutungaho jiofesi jetu. Likumbi limwe nachimene ngwanyinyine helu nakupuzula. Kuheta namusana ngwaputukile kusuluka futanyima. Ngwalyachile mulengelenge kaha ngwahosomokele nakuholoka. Ngwalizakaminyine  ngwami pamo ngunalikolesa chikuma. Oloze hanyima yakungupima ndotolo alwezele puwami ngwenyi: “Kanda naulizakaminako. Vifuhwa kaha vinasepunuka, oloze mwapwa kaha kanawa nge munahichi chalumingo chimwe.”

Mu 1986 twayile nakuzata mulimo wakutambwojoka muIvory Coast. Twatambukililenga nalifuchi lyaBurkina Faso. Kangwejivile ngwami limbo lyami nalikapwa muBurkina Fasoko.

Kufuma haze ngwafumine kuCanada mu1956, mwahichile myaka 47 numba jino ngutambukile cheka Mbetele yamuCanada mu 2003. Mapapilo eji kusololanga nge twapwa tuvaka-Canada, oloze etu vavene twamona ngwetu muAfrica mukiko mwimbo lyetu.

Mu 2007, omu ngwapwile namyaka yakusemuka 79 twakindulukile muAfrica. Vatulwezele kuzachila muBurkina Faso kaha ngwapwile muKomiti yaMutango. Kutwala muze mutango kana vawalumwine kupwa ofesi yakwalumwina mikanda, kaha milimo yamulifuchi kana vayitwaminyinyinenga kuli vaka-mutango wamuBenin. Shikaho kuheta muAugust 2013 vatunungulwilile kuBenin.

Numba tuhu kangwalikangula kanawa kumujimbako, oloze hanga ngwazangila mulimo wakwambulula. Hamyaka yitatu yinahichimo, puwami natulama muchikungulwilo vanangukafwenga mangana ngunangule vilongesa jami nakuvahetesa kulumbapachiso. Majina avo vakiko vaGédéon naFrégis. Oholyapwa vali jino nakuzachila Yehova natwima.

Halwola lumwe, ami napuwami vatutumine hamutango wamuSouth Africa mangana vakanguwanyineko vitumbo kweseka namisongo yami. Lifuchi lyaSouth Africa likiko lifuchi lyamuchi 7 ngunazachila muno muAfrica. Kuheta mu October 2017, Yehova atukiswile mujila yakulipwila. Vatusanyikile kuchilika chakukunjika chikota chetu chamuWarwick, New York. Katweshi kukavulyama vyuma twakalivwishile kuwahako.

Mukanda waYearbook wamu 1994 lifwo 255 wahanjikile ngwawo: “Tuli nakukolezeza enu muvosena munomikanga hamyaka yayivulu ngwetu: ‘Likolezezenunga, mavoko enu kanda akalinga mbwambwalako, mwomwo fweto yamilimo yenu kuyili, shikaho.’—Miji. 2, 15:7.” Ami napuwami Happy twafwila kukavangiza awa mazu nakukolezezako vakwetu nawa.