OMU George Young apwile mumbopolo nakuya kuEurope, awahililile chikuma hakushinganyeka kuzovoloka chamulimo waWangana uze azachile mulifuchi lyaBrazil. * Oloze kutwala muze, aputukile jino kushinganyeka hamulimo mwakazata kuSpain nakuPortugal kuze vamutumine. Ashinganyekele ngwenyi nge nahete kuze, kaha mwakupangila vatu jitalakiti 300,000 nakalongesa nawa vyuma mangana Ndumbu J. F. Rutherford akeze nakuhanjika chihande.

Omu Ndumbu Young ahetele muLisbon mu 1925, awanyine mulifuchi muli chimbalanganyi. Mu 1910, kwapwile liuka lize lyafumishileko chiyulo chawangana kahechi chalingishile vaka-Chachi yaKatolika vahone kupwa nalisesa lyakulinga vyuma vyavivulu. Numba tuhu vatu vapwile nalisesa lyakulilingila vyuma vasakile, oloze mulifuchi kamwapwile kuundako.

Halwola luze Ndumbwetu Young apwile nakulongesa vyakwiza chaNdumbu Rutherford, fulumende yahakileko lushimbi lwakukanyisa vatu kulikungulwila hamwe chipwe kutambuka ufuku mwomwo kwapwile lizavu lyavatu vaze vasakile kufumisa twamina hachiyulo. Muka-kusoneka waliuka lyaBritish and Foreign Bible Society ahuhumwine Young ngwenyi mwamona luyanjisa lwalunene chikuma. Chipwe ngocho, alombele kufulumende mangana vamwitavise kuzachisa zuvo yakuhemena yahaShikola yayinene yaCamões, kaha vamwitavishile.

Kuheta haMay 13, Ndumbu Rutherford ejile jino nakuhanjika chihande chenyi. Vatu vapwile nakuvandamina kwiza chenyi mwomwo yamapapilo aze valamikile hajimbango namapapilo amijimbu aze apwile nakuhanjika vyakwiza chenyi. Rutherford ejile nakuhanjika chihande chakwamba ngwavo, “How to Live on the Earth Forever.” Nakushimbula chiku, vaka-kole vamumauka akwitava vasonekele chihande mulipapilo lya mijimbu mangana valweze vatu ngwavo Vinjiho vapwa “vapolofweto vamakuli.” Ava vaka-kole vejile kuchikolo chazuvo yakuhemena nakupangila vatu tumikanda tuze twapwile nakuhanjika vyuma vyamakuli vyakuvangijikila Ndumbu Rutherford.

Chipwe ngocho, kwapwile vatu 2,000 vaze vengilile nakwivwilila kuchihande, kaha vatu vakwavo 2,000 vakindulukile mwomwo muzuvo vakungulukilile mwazalile. Vatu vamwe vatwamine hajindalo jakuhemena, kaha veka vatwamine havikungo. Veka nawa vashinganyekele ngwavo pamo Ndumbu Rutherford apwile nakulanjisa maji akulingisa mutu ayoye myaka yayivulu.

Vyuma kavyatambukile kanawako. Vaze vaka-kole vapwile nakutambakana nakuchika vitwamo. Chipwe ngocho, Ndumbu Rutherford aunjile muchima, kaha anyinyine hamesa mangana vatu vamwivwe. Kahomu alingile hanakumisa lyehi kuhanjika chihande chenyi mukachi kaufuku, vatu vakuwahilila vakuheta ku 1,200 vasonekele majina avo najikeyala javo nakumuhana mangana vatambule mikanda yahanjika haMbimbiliya. Omu kwachele, mulipapilo lyamijimbu lyaO Século vasonekelemo vyachihande chize ahanjikile Ndumbu Rutherford.

 Kuheta muSeptember 1925, mangazini yaKaposhi Kakutalila yamulilimi lyaPortuguese vaputukile kuyituma mulifuchi lyaPortugal. (Mangazini kana yavangilile kulovoka mulifuchi lyaBrazil.) Halwola kana, hakiko ndumbwetu Virgílio Ferguson aputukile kushinganyeka vyakuya kuPortugal nakutandakanyisa mulimo waWangana. Ferguson azachilenga hamwe naNdumbu Young hamutango wamuBrazil. Ndumbu Ferguson ayile napuwenyi Lizzie mangana vakazachile hamwe naNdumbu Young. Ndumbu Ferguson ahetelele halwola lwamwaza mwomwo ndumbu Young apwile hakamwihi nakumutuma kuya nakuzachila kuSoviet Union.

Omu maswalale vatambwile chiyulo, lifuchi jino lyapwile muukalu waunene, kaha nawa vandumbwetu vaputukile kuvayanjisa chikuma. Chipwe ngocho Ndumbu Ferguson omikile nakukinga vandumbwenyi nakuvakolezeza vapwenga natwima yakuzata mulimo wakwambulula. Alombele lisesa kufulumende mangana vakungulukilenga hembo lyenyi. Lisesa kana vamuhanyinelyo muOctober 1927.

Hamwaka watete wachiyulo chamaswalale, vatu vakuheta ku 450 mulifuchi lyaPortugal valisonekesele mangana vatambulenga jimangazini jaKaposhi Kakutalila. Kaha nawa vandumbwetu vazachishilenga jitalakiti natumikanda mangana vatandakanyise muchano kumafuchi akufwana nge Angola, naAzores, naCape Verde, naEast Timor, naGoa, naMadeira naMozambique kuze vahanjika lilimi lyaPortuguese.

Kuheta mu 1929, Manuel da Silva Jordão uze apwile muka-kulima litepa ayile kuLisbon. Shimbu kanda afume muBrazil evwililile kuchihande chaNdumbu Young. Manuel amwene vyuma evwile kupwa vyamuchano, ngocho afwililile kuya vakalikafwe naNdumbu Ferguson kutandakanyisa mujimbu wamwaza. Hakusaka Manuel atesemo mulimo kana aputukile kuzata upayiniya. Omu mulimo wakupulita nakupangila mikanda wakwachile ngolo, chikungulwilo chize vasokolwele muLisbon chaputukile kuzovoloka.

Kuheta mu 1934, Ndumbu Ferguson napuwenyi vakindulukile kuBrazil. Chipwe ngocho vavangilile kukuva mbuto jamuchano. Numba tuhu muEurope kamwapwile kuundako mwomwo yajita yakulitala hamiyachi yize yapwile mulifuchi lyaSpain naJita yaKaye yamuchivali, oloze vandumbwetu vatwalileho kupwa vakuzama kushipilitu. Numba tuhu ava vandumbwetu halwola lumwe kavapwile natwima chikumako, oloze kuheta mu 1947 omu kamishonali John Cooke ejile uze afumine kushikola yaNgileyate, vaputukile cheka kuzovoloka chikuma. Mukuhita chalwola, vaka-kwambulula mujimbu wamwaza vaputukile kuvulilako chikuma. Numba tuhu fulumende yakanyishile mulimo waVinjiho jaYehova mu 1962, oloze vaka-kwambulula vapwile nakuvulilako lika. Kaha kuheta mu 1974 Vinjiho jaYehova vavetavishile kuzata mulimo wavo. Halwola kana mulifuchi mwapwile vaka-kwambulula 13,000.

Makumbi ano, vaka-kwambulula vakuzomboka 50,000 vali nakwambulula mujimbu wamwaza waWangana waKalunga mulifuchi lyaPortugal nahamatungu amavulu haze vatu veji kuzachisanga lilimi lyaPortuguese kuhakilako nalitungu lyaAzores naMadeira. Hali ava vaka-kwambulula hali navazukulu javaze vevwililile kuchihande chakulipwila ahanjikile Ndumbu Rutherford mu 1925.

Tweji kusakwililanga Yehova navandumbwetu vakushishika vaze vomikile nakutwaminyina mulimo hakupwa ‘vangamba jaKulishitu Yesu vakuzachila vaka-mafuchi eka.’—Wavaka-Loma 15:15, 16.—Mijimbu yetu yayilemu yakunyima muPortugal.