VANGAMBA jaYehova makumbi ano vali nakusakiwa chikuma kupwa namuchima wakutalilila chikoki mwomwo tuli nakuyoyela ‘mumakumbi akukuminyina.’ (Chimo. 2, 3:1-5) Twatwama mukaye kavatu vaze valizanga vavene, kaveshi kwitavila vivwasanoko, kaha nawa kavatwama namuchima wakulikanyisako. Vatu kana kavatwama namuchima wakutalilila chikokiko. Shikaho muka-Kulishitu atela kulihulisa ngwenyi: ‘Kutala kangwatwama namuchima wakutalilila chikoki ngana mwavatu vamukayeko tahi? Uno kutalilila chikoki chapwa kulinga ika? Vyuma muka ngwatela kulinga mangana ngupwenga namuchima kana?’

MuMbimbiliya, lizu kutalilila chikoki kalyalumbununa kaha kwechelela vyuma vilingiweko. Mutu uze atwama namuchima wakutalilila chikoki ejiva ovyo vyeji kumulingisanga atwaleho kumika. Mutu kana kahaka kaha mangana kuukalu wenyiko oloze eji kushinganyekanga nawa hali vakwavo numba tuhu vanamufutwisa kumuchima. Shikaho, nge vanamufutwisa kumuchima, eji kutwalangaho kupwa nalutalililo mwomwo yakutachikiza ngwenyi vyuma navikapwa kanawa kulutwe. Evi vikiko Mbimbiliya yavulukila chatete “kutalilila chikoki “ havilinga vize vyeji kwizanga mwomwo yakupwa nazangi. * (Koli. 1, 13:4) Kaha nawa yamba ngwayo muchima kana watwama hamukana “[wa]mihako yashipilitu.” (Ngale. 5:22, 23) Jino vyuma muka navitukafwa tupwenga namuchima wakutalilila chikoki?

Hakusaka tupwenga namuchima wakutalilila chikoki, twatela kulombanga Yehova atuhane shipilitu yenyi yize eji kuhananga kuli vaze navamulombayo nakupendamina hali ikiye. (Luka 11:13) Numba tuhu shipilitu yatwama nangolo, oloze etu nawa twatela kulingako vyuma vimwe mangana vyuma natulinga vilitombole nakulomba chetu. (Samu 86:10, 11) Echi chalumbununa nge twatela kukilikita nangolo numba tutwaleho kupwa namuchima wakutalilila chikoki. Chipwe ngocho, kuli vyuma vyeka vize navitukafwa tupwenga namuchima kana. Jino vyuma muka venyovyo?

Tunahase kupwa namuchima wakutalilila chikoki nge natukekesanga chakutalilaho chaYesu nakufwila kumulondezeza. Kaposetolo Paulu vamuhwiminyine asoneke vilinga “[vya]mutu wamuhya” kaha havilinga kana hatwama ‘namuchima wakutalilila chikoki’. Kufumaho atukolezezele ngwenyi twatela kwitavila “kuunda chaKulishitu chiyulenga mumichima [yetu].” (Kolo. 3:10, 12, 15) Tunahase kwitavila kuunda chaYesu “chiyule” michima yetu kachi nge natulondezezanga lufwelelo lwenyi lwakukola nakutalilila ngwetu Kalunga mwakolola vyuma halwola lwakutamo. Shikaho, nge natulondezeza chakutalilaho chaYesu, kaha nayetu tunahase kupwa namuchima wakutalilila chikoki chamokomoko navyuma navitusolokela.—Yowa. 14:27; 16:33.

 Numba tuhu tuli nakutalilila kukapwa mulifuchi lyalihya lize atushika Kalunga, oloze twatela kupwa namuchima wakutalilila chikoki ngana muze Yehova eji kututalililanga chikoki. Visoneka vyatufwelelesa ngwavyo: “Yehova keshi kulangisa kutesamo lushiko lwenyiko, nge omu vamona vatu vamwe ngwavo nalangisa, oloze namitalilila chikoki, mwomwo kazanga mutu numba umwe akanongeko, oloze azanga vosena vapihilile nakwalumuka.” (Petu. 2, 3:9) Kushinganyeka hamuchima atwama nawo Yehova wakututalilila chikoki, nachitulingisa nayetu tutalililenga vakwetu chikoki. (Loma 2:4) Jino lwola muka chinahase kutukaluhwila kupwa namuchima wakutalilila chikoki?

Kuli vyuma vyavivulu vize vinahase kutulingisa tuhone kupwa namuchima wakutalilila chikoki. Chakutalilaho, kachi nge kuli vyuma vimwe vyavilemu muli nakusaka kuhanjika, mwatela kupwa namuchima wakutalilila chikoki kuchina namuvatwijiza vakwenu. (Yako. 1:19) Mwatela nawa kutalililanga chikoki vandumbwenu vaze vakwechi vilinga vimwe vize kavyamisuulwisako. Muchishishisa chakwivwa kupihya havyuma kana, oloze mwatela kushinganyeka omwo Yehova naYesu veji kwivwanga havyuma tweji kulimbenjanga. Kavasaka kutuwanyina milongako. Oloze veji kutalanga kaha havyuma vyamwaza vize tweji kulinganga namuchima wetu wakufwila kuzachila hatutenga twetu.—Chimo. 1, 1:16; Petu. 1, 3:12.

Chuma chikwavo chinahase kutuhonesa kupwa namuchima wakutalilila chikoki shina nge mukwetu mwatulweza ngwenyi tunalimbenje havyuma twalinganga chipwe twahanjikanga. Echi chinahase kutulingisa tupihilile washi nakufwila kulihakwila. Oloze Mbimbiliya yatulweza ngwayo: “Kupwa namuchima wakutalilila chikoki chinawahe kuhambakana kupwa namuchima wakulipambula. Kanda naupihilila washiko, mwomwo kupihilila washi chatwama mujitulo javiheu.” (Kwambu. 7:8, 9) Numba tuhu vanamivangijikila vyuma vyamakuli oloze mwatela kupwa namuchima wakutalilila chikoki nakuwana mwakukumbulwila. Yesu alingile mwomumwe omu vamuvangijikilile.—Mateu 11:19.

Visemi nawa vatela kupwa namuchima wakutalilila chikoki kachi nge vanamono ngwavo mwanavo naputuka kutanguka nakufwila vyuma vyakuhenga. Achitalenu chakutalilaho chaMattias uze azachila haMbetele yaScandinavia. Omu apwile mukweze, vakwavo vaka-shikola vamusekelekelenga mwomwo yavyuma afwelela. Hakavanga visemi jenyi kavejivile ukalu wamwanavoko. Oloze mukuhita chalwola, vamumwenenga naputuka kukakasana numba nge vyuma alinangwile vyamuchano nyi chiku. Gillis ise yaMattias ambile ngwenyi: “Ukalu kana wasakiwilenga etu visemi kupwa namuchima wakutalilila chikoki. Mattias atuhulishilenga ngwenyi: ‘Uno Kalunga ikiye iya? Uno chikupu vene Mbimbiliya yapwa mazu aKalunga tahi? Uno twatachikiza ngachilihi ngwetu Kalunga asaka tumwononokenga?’” Shimbu jimwe ahulishilenga ise ngwenyi: “Tata, uno nachipwa chakuhenga nge kangweshi kufwelela vyuma mwafwelelako tahi?”

Gillis ambile ngwenyi: “Shimbu jimwe mwanetu ahulishilenga oku napihilila hamuchano alinangwile mwomwo ashinganyekelenga ngwenyi vyuma alinangwile vyamunehelele ukalu.” Uno Gillis akafwile ngachilihi mwanenyi? Ambile ngwenyi: “Ngwatwaminenga nakushimutwila nenyi halwola lwalusuku. Kakavulu ngwamwivwilililenga nakumuhulisa vihula vyavindende kaha mangana ngwijive omu ali  nakwivwa navyuma ali nakushinganyeka. Shimbu jimwe ngwamulwezelenga vyuma vimwe mangana ashinganyekeho likumbi lyosena lyamuundu numba jino tuvishimutwile. Shimbu jikwavo nawa ngwamulwezelenga anguhaneko makumbi mangana ngushinganyeke havyuma nangulweze nakuwana mwakumukumbulwila. Kushimutwila mujila kana chakafwile Mattias etavile jino vyuma yanangula Mbimbiliya handando yakusokola, nawata waKalunga nazangi atwama nayo Yehova. Numba tuhu chambachile lwola lwalusuku kaha nawa chapwile chachikalu kumukafwa, oloze kutwala muze aputukile kuzanga Yehova namuchima wenyi wosena. Ami napuwami twawahilila hakutachikiza ngwetu kutalilila mwanetu chikoki chinanehe nganyo yayinene chikuma mwomwo twamukafwile nakumuheta hamuchima.”

Gillis napuwenyi vafwelelele ngwavo Yehova mwavakafwa vanangule mwanavo. Gillis ambile ngwenyi: Kakavulu ngwalwezelenga Mattias ngwami twamuzanga kahechi chatulingishile tulombe chikuma Yehova amukafwe mangana evwishise muchano.” Ava visemi vapwa vakuwahilila mwomwo vasolwele muchima wakutalilila chikoki.

Numba tuhu vaka-kulishitu vatela kukafwa vakwavo kushipilitu, oloze vatela kupwa namuchima wakutalilila chikoki kachi nge vali nakuvijisa vausoko wavo chipwe masepa. Tuchitalenu chakutalilaho chaHelen * wamulifuchi lyaScandinavia.

Kafwe myaka 8 kunyima, musongo wakalepa wakwachile lunga lyaHelen mapapa kavali nakwenyeka wongo wenyi. Musongo kana wamulingisa apwenga wakuzeya lwola lwosena. Ukalu kana wamutohwelele Helen. Ambile ngwenyi: “Ngunayande halwola lwalusuku kaha nawa ngweji kulombanga kakavulu.” Ambile nawa ngwenyi: “Chisoneka cheji kungukafwanga chikuma shina chaWavaka-Fwilipi 4:13 chize chamba ngwacho: ‘Ngunajikiza muvyuma vyosena kuhichila muli ou eji kunguhananga ngolo.’” Eji ngolo jikiko jakafwile Helen mangana apwenga namuchima wakutalilila chikoki nakupendamina hali Yehova.—Samu 62:5, 6.

Yehova atuhana chakutalilaho chamwaza chakupwa namuchima wakutalila chikoki, shikaho twatela kumulondezezanga. (Petu. 2, 3:15) MuMbimbiliya mwatwama mijimbu yayivulu yavatu vaze Yehova atalililenga chikoki. (Nehe. 9:30; Isa. 30:18) Chakutalilaho, Yehova alingile ngachilihi omu Apalahama ahuhwasanyine ovyo asakilile kunongesa nganda yaSotome? Yehova kavatwijijile Apalahama omu apwile nakuhanjikako, oloze amwivwililile kanawa omu apwile nakumuhulisa. Yehova asolwele muchima wakutalilila chikoki hakuhilukila mazu ahanjikile Apalahama nakumufwelelesa ngwenyi keshi kunongesa nganda kanako numba vene nge mwawanamo vatu vakwoloka 10. (Kupu. 18:22-33) Chikupu vene, chakutalilaho chaYehova chatela kutukafwa tupwenga namuchima wakutalilila chikoki nakuhona kukwatanga washi matoto.

Muchima waKalunga wakutalilila chikoki watwama havilinga vyamutu wamuhya uze vatela kuvwala vaka-Kulishitu vosena. Nge natufwila kupwanga namuchima wakutalilila chikoki, kaha natuvumbika Setu wamwilu uze atwama namuchima kana. Kulinga ngocho nachitulingisa tupwenga hamukana wavatu “vaze vanaswane vyuma vashika hakupwa nalufwelelo namuchima wakutalilila chikoki.”—Hepe. 6:10-12.