1. Uno vyuma atenga Yehova vyasolola ngachilihi nge atwama nazumbu?

NUMBA tuhu hakavanga Yehova apwilenga ukawenyi shimbu kanda atenge vyuma vyosena, oloze kapwilenga namuchima walifwiko. Atengele vangelo navatu kaha avahanyine wana wakuyoya. Yehova uze apwa ‘Kalunga wakuwahilila’ atwama nazumbu. (Chimo. 1, 1:11; Yako. 1:17) Hakuwana nge asaka tuwahililenga, ngocho eji kutunangulanga mwakupwila nazumbu.—Loma 1:20.

2, 3. (a) Mwomwo ika kuhana cheji kunehanga kuwahilila? (b) Vyuma muka natushimutwila muchihande chino?

² Kalunga atengele mutu muchifwanyisa chenyi. (Kupu. 1:27) Echi chili nakulumbununa nge atutenga mangana tulondezezenga vilinga vyenyi. Shikaho, hakusaka tupwenga tuvakuwahilila, twatela kulondezeza Yehova hakuzakama vatu nakuvakafwa namuchima wakusuuluka. (Fwili. 2:3, 4; Yako. 1:5) Mwomwo ika? Mwomwo omu mukiko Yehova atenga vatu vosena. Numba tuhu katwakupukako, oloze tunahase kulondezeza Yehova hakusolwela vakwetu likoji.

³ Mbimbiliya yatulweza vyuma navitukafwa tupwenga tuvaka-kuhana namuchima wakusuuluka. Tukekesenu tumone vishina natulinangula  kuvisoneka vimwe vize vyahanjika hachihande kanechi. Natumona omu kupwa namuchima wakuhana nachikafwa mutu vamwivwile kuwaha kuli Kalunga nomu chinahase kutukafwa tutesemo kuzata mulimo uze atuhana. Natumona nawa ovyo muchima wakuhana weji kunehelanga mutu kuwahilila novyo chapwila chachilemu kupwa nawo.

4, 5. Yehova naYesu vatuhana chakutalilaho muka, kaha natuvalondezeza ngachilihi?

⁴ Yehova asaka vatu vamulondezezenga. Shikaho eji kwivwanga kuwaha nge mwatumona tuli nakusolwela vakwetu likoji. (Efwe. 5:1) Jila yakukomwesa atutengelamo Kalunga navyuma vyamwaza vyosena vize atenga vyasolola nge asaka tuwahililenga mukuyoya chetu. (Samu 104:24; 139:13-16) Shikaho, nge natukilikita nangolo mangana twivwisenga vakwetu kuwaha, kaha tuli nakutohwesa Kalunga.

⁵ Vaka-Kulishitu vamuchano veji kulondezezanga Kulishitu, uze atuhana chakutalilaho chakukupuka chize nachikafwa vatu vapwenga namuchima walikoji. Yesu ambile ngwenyi: “Mwanamutu kejile mangana vamuzachilenga milimoko, oloze mangana azachile vatu milimo nakuhana mwono wenyi kupwa ndando yakusokola vavavulu.” (Mateu 20:28) Kaposetolo Paulu nawa alwezele vaka-Kulishitu ngwenyi: “Pwenunga namuchima uze apwilenga nawo Kulishitu Yesu . . . [Ikiye] alilingishile kupwa wamokomoko nakulifwanyisa nandungo.” (Fwili. 2:5, 7) Shikaho twatela kulihulisa ngwetu: ‘Vyuma muka ngwatela kulinga mangana ngukavangize chikuma Yesu kuhambakana omu nguli nakulinga oholyapwa?’—Tangenu WaPetulu 1, 2:21.

6. Chishina muka natulinangula kuchifwanyisa chakaSamaliya? (Talenu muvwimbimbi wakulivanga.)

⁶ Nge natulondezezanga Yehova naYesu hakusolwelanga vakwetu likoji nakuvazakama, kaha Kalunga mwatwivwila kuwaha. Yesu azachishile chifwanyisa chakaSamaliya mangana akafwe vaka-kumukavangiza vasolwelenga vatu vosena likoji kuhakilako navatu vakuvisemwa vyeka. (Tangenu Luka 10:29-37.) Kutala muli nakwanuka chihula vamuhulishile Yesu kuli kaYuleya numba ahanjike echi chifwanyisa tahi? Amuhulishile ngwenyi: “Uno iya chikupu napu mukwetu?” Kukumbulula chaYesu chasolola nge hakusaka vatwivwile kuwaha kuli Kalunga, twatela kulondezeza uze kaSamaliya hakusolwelanga vakwetu likoji.

7. Uno kupwa namuchima walikoji chipwe wakulinganyalisa etu vavene chakwata ngachilihi hachihande chize akatwile Satana?

⁷ Kuli vyuma vyavivulu vize vyeji kulingisanga vaka-Kulishitu vasolwele vakwavo likoji. Chakutalilaho, kusolola muchima kana cheji kukumbululanga chihande chakufumbukila wata waYehova chize akatwile Satana mumilemba yaEtene. Mujila muka? Satana ashinganyekele ngwenyi Alama naEve kuhakilako navatu vosena, vanahase kupwa vakuwahilila kachi nge navalizakama vavene nakuhaka vyuma vafwila kulutwe muchishishisa chakwononoka Kalunga. Eve afwililile kulinganyalisa ivene hakusaka kulifwana naKalunga. Alama nawa apwile namuchima wakusaka kusuulwisa kaha puwenyi. (Kupu. 3:4-6) Vyuma vasakwile kulinga vyaneha ukalu waunene. Kufwila kulinganyalisa kacheshi kuneha kuwahililako. Shikaho, nge natusolwelanga vakwetu likoji, kaha natusolola nge twafwelela chikupu ngwetu twamona vyuma eji kutulwezanga Kalunga kupwa vyanganyo kuli etu.

8. Mwomwo ika Alama naEve vatelelele kupwa namuchima wakuzakama vakwavo?

⁸ Numba tuhu Alama naEve vapwilenga ukawavo mumilemba yaEtene, oloze Kalunga  avahanyine jindongi jakuvakafwa mangana vazakamenga vakwavo. Yehova avakiswile, kaha avalwezele vaseme nakuzalisa hamavu nakuwalamanga. (Kupu. 1:28) Visemi jetu vatete vatelelele kuzakama kuyoya chavana vavo mangana vawahililenga ngana muze Tengi eji kuzakamanga vatu mangana vawahilile. Alama naEve vatelelele kulingisa hamavu hosena hapwenga Palachise mangana vana vavo vosena vapwenga vakuwahilila. Mulimo kana wasakiwile Alama natanga yenyi kuzachila hamwe numba vautesemo.

9. Chuma muka chatelelele kulingisa vatu vapwenga vakuwahilila?

⁹ Numba tuhu vapwile vakukupuka oloze vatelelele kwononoka Yehova nakuzachila hamwe naikiye mangana vatesemo vyuma ajina hakulingisa hamavu hosena kupwa Palachise, numba jino vengile mukunoka chenyi. (Hepe. 4:11) Nge vateselemo mulimo kana kachi vapwile vakuwahilila chikuma. Kaha nawa nge vazakamine vakwavo, kachi Kalunga avakiswile nakuvalingisa jino vapwenga vakusuuluka mukuyoya chavo.

10, 11. Natuhasa kutesamo ngachilihi mulimo vatuhana wakwambulula nakunangula vatu vapwenga tumbaji?

¹⁰ Makumbi ano, Yehova ahana vatu jenyi mulimo wakwambulula mujimbu wamwaza nakunangula vatu vapwenga tumbaji. Hakusaka tutesemo mulimo kana, twatela kuzakamanga vakwetu. Kaha nawa twatela kuzanga Kalunga navakwetu vatu numba tuhase kutwalaho kuzata mulimo kana natwima.

¹¹ Paulu ambile ngwenyi ikiye navakwavo apwile navo mulikulukaji lyamyaka lyakulivanga, vapwile “vaka-kuzachila hamwe naKalunga” mwomwo yamulimo vazachilenga wakutumba nakutukumwina mbuto jaWangana. (Koli. 1, 3:6, 9) Nayetu tunahase kupwa ‘tuvaka-kuzachila hamwe naKalunga’ kachi nge natuzachisa lwola lwetu, naluheto lwetu, nangolo jetu mangana tutandakanyise mulimo wakwambulula. Mulimo kana wapwa wamwaza chikupu!

12, 13. Nganyo muka yeji kufumanga hakuzata mulimo wakunangula vatu vapwenga tumbaji?

¹² Kuzachisa lwola lwetu nangolo jetu mumulimo wakwambulula nakunangula vatu vapwenga tumbaji cheji kunehanga kuwahilila chamwenemwene. Vandumbwetu vaze veji kutwaminyinanga vilongesa vyaMbimbiliya vatachikiza ngwavo kakweshi chuma cheka chize chinahase kunehela mutu kuwahililako. Chuma chachinene cheji kuvalingisanga vawahilile shina kumona omu vilongesa javo vali nakuzovoloka kushipilitu, nakwalumuna chiyoyelo chavo nakuputuka kulwezako vakwavo vyuma vize vanalinangula. Yesu nawa evwile mwomumwe omu amwene tumbaji twenyi 70 ‘vanakinduluka nakuwahilila’ havyuma vyamwaza valivwishile kuwaha kuze avatumine.—Luka 10:17-21.

¹³ Vaka-kwambulula mukaye kosena veji kuwahililanga hakumona omu mujimbu wamwaza uli nakwalumuna kuyoya chavatu. Tutalenu chakutalilaho chandumbwetu Anna uze ali  kuEastern Europe kuze kwapwile nakusakiwa chikuma vaka-kwambulula. * Asonekele ngwenyi: “Kuno nguneza ngunawane vatu vavavulu vaze vali nakusaka kulinangula Mbimbiliya, kahechi cheji kungwivwisanga kuwaha chikuma. Nge ngunakinduluka hembo, kangwashinganyeka haukalu wamiko. Ngweji kushinganyekanga kaha havatu ngweji kulinangulanga navo, nakufwila kuwana jijila jakuvakolezezelamo nakuvalingilako vyuma vimwe. Chikupu vene ngwafwelela ngwami ‘kuhana cheji kunehanga kuwahilila chikuma kuhambakana kutambula.’”—Vili. 20:35.

14. Munahase kupwa ngachilihi vakuwahilila numba nge vatu vamungalila yenu kavakula kanawa kumulimo wetuko?

¹⁴ Tunahase kupwa vakuwahilila kachi nge natwambulila vatu mangana valisakwile vavene kwivwilila kumujimbu wamwaza chipwe chiku. Mulimo wetu walifwana nauze azachile kapolofweto Ezekele. Yehova amulwezele ngwenyi: “Ukavalweza mazu ami, numba vakevwilila chipwe vakakana kwivwilila.” (Ezeke. 2:7; Isa. 43:10) Numba tuhu vatu vamwe kaveshi kwitavila kuvambulilako, oloze Yehova amona milimo tweji kumuzachilanga kupwa yayilemu. (Tangenu WavaHepeleu 6:10.) Ndumbwetu umwe asonekele kutalisa kumulimo wakwambulula ngwenyi, “Etu tunatumbu, nakutukumwina, kaha tuli nakulomba Yehova asokese.”—Koli. 1, 3:6.

15. Vatu vavavulu veji kwakulanga ngachilihi kumuchima wetu wakuhana? Nge kavakwile kanawako twatela kulinga ngachilihi?

¹⁵ Yesu asaka tupwenga tuvakuwahilila hakusolwelanga vakwetu likoji. Vatu vavavulu veji kuwahililanga nge navavasolwela likoji. Yesu ambile ngwenyi: “Pwenunga muvaka-kuhana, kaha vatu navakamihana nayenu nawa. Navakahingunwina mujisweko jenu chesekelo chamwenemwene, chakujinda, chakunyukumuna, chakuzalilila. Mwomwo chesekelo chize muli nakwesekelanga nacho vakwenu, chikiko navakamyesekela nacho nayenu nawa.” (Luka 6:38) Vatu vamwe veji kwakulangako kanawa. Oloze vakwavo kavakulako kanawako. Chipwe ngocho tweji kuwahililanga navatu vaze  navatusakwilila. Shikaho, twatela kupwa namuchima wakuhana numba tuhu vatu navatusakwilila chipwe chiku. Tachikizenu ngwenu muchima wenu wakuhana unahase kukafwa chikuma vatu.

16. Chuma muka chatela kutulingisa tusolwelenga vakwetu likoji?

¹⁶ Vaka-kuhana namuchima wakusuuluka, kavahana mangana vanganyalilehoko. Yesu ambile ngwenyi: “Omu nauwahisa chiwanyino chakulya, lanyako vaka-kuhutwa, navaka-kumbilikita, navitonji, natupuputa, kaha mukapwa uwakuwahilila, mwomwo kaveshi navyuma vyakukushishishilamoko.” (Luka 14:13, 14) Yehova ahwiminyinyine muka-kusoneka umwe asoneke ngwenyi: “Muka-kuhana navakamukisula.” Kaha ahwiminyinyine mukwavo nawa asoneke ngwenyi: “Awahilila mutu uze eji kuzakamanga muka-kukalikiza.” (Vishi. 22:9; Samu 41:1) Chikupu vene twatela kukafwanga vakwetu mwomwo kulinga ngocho cheji kutunehelanga kuwahilila.

17. Mujijila muka tunahase kusolwelamo vakwetu likoji mangana tuwahililenga?

¹⁷ Paulu hakuhanjika mazu aYesu akwamba ngwavo, “Kuhana cheji kunehanga kuwahilila chikuma kuhambakana kutambula,” kapwile nakulumbununa kuhana kaha vyuma vyakulikafwa navyo mukuyoyako, oloze hakukolezezanga vakwetu, nakuvatwaminyina nakukafwa vosena vaze vali nakusakiwa kukafwa. (Vili. 20:31-35) Vyuma ahanjikilenga Paulu navize alingilenga vyatunangula tuzachisenga lwola lwetu, nangolo jetu hakukafwa vakwetu nakuvazanganga.

18. Vyuma muka vasonekele vaka-kuhehwojola hachihande chakusolola likoji?

¹⁸ Vaka-kuhehwojola vyachiyoyelo chavatu vawana ngwavo kuhana cheji kulingisanga vatu vapwenga vakuwahilila. Muchihande chimwe vasonekelemo ngwavo, “vatu veji kuwahililanga chikuma kachi nge vanakafwe uze apwanga muukalu.” Vasonekele nawa ngwavo kukafwa vakwetu “chinahase kutukafwa tupwenga nakuyoya chamwenemwene.” Evi vikiko veji kutukolezezelanga ngwavo tulisuulenga kulingila vatu vyuma vyamwaza mangana tupwenga vakulikangula kumujimba. Omu mukiko cheji kupwanga kuli vaze vamona Mbimbiliya kupwa hiMazu akufuma kuli Tengi yetu Yehova.—Chimo. 2, 3:16, 17.

19, 20. Vyuma muka vyeji kumilingisanga musolwelenga vakwenu likoji?

¹⁹ Chinahase kutukaluhwila kusolwelanga vakwetu likoji, mwomwo twatwama navatu vaze vasaka kulinganyalisa vavene. Chipwe ngocho, Yesu ambile ngwenyi jishimbi jivali jajilemu shina kuzanga Yehova namichima yetu yosena, namyono yetu yosena, navishinganyeka vyetu vyosena, nangolo jetu josena nakuzanga nawa vakwetu nganomu twalizanga etu vavene. (Mako 12:28-31) Nganomu tunalinangula muchihande chino, vaze vazanga Yehova veji kumulondezezanga. Yehova naYesu vapwa vaka-kuhana, kaha vasaka nayetu tulingenga mwomumwe mangana tuwahililenga. Shikaho, nge natulisuula kuzachila Kalunga nakulingila vakwetu vyuma vyamwaza, kaha natuvumbika Yehova nakunganyala mwamunene chikuma hamwe navakwetu.

²⁰ Chikupu vene tunatachikiza ngwetu mweji kulingilanga vakwenu vyuma vyamwaza chikumanyi vandumbwenu. (Ngale. 6:10) Shikaho nge namutwalaho lika kulinganga ngocho, vatu navamizanga nakumivumbika, kahechi nachimilingisa muwahilile chikuma. Hali Vishimo 11:25 vasonekaho ngwavo: “Muka-kuhana mwakafukila, kaha muka-kuhizumuna vakwavo naikiye navakamuhizumuna.” Chipwe ngocho kuli jijila jajivulu jize vaka-Kulishitu vanahase kusolwelamo vakwavo likoji nakupwa vakuwahilila. Chihande nachikavangizaho nachishimutwila hajijila kana.