1. Mujijila muka tunahase kuzachila hamwe naYehova?

TENGI yetu Yehova ajinyine ngwenyi vatu vakukupuka vazachilenga hamwe naikiye mangana vatesemo vyuma ajina. Shikaho vatu vakushishika vanahase kuzachila hamwe naYehova hakumbi hakumbi, chamokomoko nakuhona kukupuka. Chakutalilaho, tweji ‘kuzachilanga hamwe naKalunga’ hakwambulula mujimbu wamwaza waWangana nakunangula vatu vapwenga tumbaji. (Koli. 1, 3:5-9) Achishinganyekenu hakutokwa twatwama nacho chakutuvuluka kupwa tuvaka-kuzachila hamwe naTengi wangolo josena mumulimo uze wapwa waulemu chikuma. Chipwe ngocho, kuli milimo yayivulu yize tunahase kuzachila hamwe naYehova, keshi kwambulula nakunangula vatu vapwenga tumbaji kahako. Muchihande chino, natushimutwila omu tunahase kuzachila hamwe naYehova hakukafwa vaka-tanga yetu navandumbwetu muchikungulwilo, nahakusololanga chisambo, nahakulisuula kuzata milimo yamuliuka nakutohwesa mulimo wetu wakwambulula.—Kolo. 3:23.

2. Mwomwo ika chapwila chakuhenga kulyesekesa kuli vakwetu hakuzachila Yehova?

² Omu natushimutwila chihande chino, kanda kulyesekesa kuli vakwenu hajila veji kuzachilanga Yehova nomu mweji kumuzachilangako. Tachikizenu ngwenu tweji kuzachilanga Yehova mujijila jakulisezaseza  kweseka namyaka yakusemuka tuli nayo, nakulikangula chamujimba, nauhashi twatwama nawo nomwo chapwa chiyoyelo chetu. Kaposetolo Paulu vamuhwiminyinyine asoneke ngwenyi: “Mutu himutu akekese vilinga vyenyi, kaha mwawahilila navyuma vyenyi ivene, keshi hakulyesekesa kumutu mukwavoko.”—Ngale. 6:4.

3. Mwomwo ika natwambila ngwetu mutu uze mwazakama vaka-tanga yenyi ali nakuzachila hamwe naKalunga?

³ Yehova asaka vangamba jenyi vazakamenga jitanga javo. Chakutalilaho, munahase kuvatondela vyuma vyakulikafwa navyo. Visemi vamapwevo vavavulu nawa veji kutwamanga hamembo mangana vazakame vana vavo vavakemba. Kaha nawa vana vaze vanakolo lyehi veji kuzakamanga visemi javo vaze vaviza. Milimo kana yapwa yayilemu mwomwo Mazu aKalunga amba ngwavo: “Kachi nge mutu keshi kuhana vaze venyi vyuma vyasakiwako, chikumanyi vaze vakuzuvo yenyi, kaha mutu kana nakane lufwelelo, ngocho napihi chikuma kuhambakana mutu uze keshi nalufweleloko.” (Chimo. 1, 5:8) Kachi nge nayenu mwatwama namulimo kana, kaha chinahase kumikaluhwila kuwana lwola lwakuzata chikuma milimo yamuliuka. Oloze tachikizenu ngwenu Yehova eji kuwahililanga nge mwamimona muli nakutondela vaka-tanga yenu vyuma vyasakiwa.—Koli. 1, 10:31.

4. Visemi veji kusololanga ngachilihi nge vahaka vyuma vyakushipilitu kulutwe, kaha nganyo muka yeji kufumangamo?

⁴ Visemi vaka-kulishitu veji kuzachilanga hamwe naYehova hakukafwa vana vavo valitomene kuzata milimo yakushipilitu. Visemi vavavulu vaze vanakafwenga vana vavo mujila kaneyi, vanakunyula vana vavo vayenga nakuzata mulimo washimbu yosena kuvihela vyeka. Vamwe vali jino vamishonali, veka vali nakuzata upayiniya kuze kuli nakusakiwa chikuma vaka-kwambulula, kaha vakwavo nawa vali nakuzachila haMbetele. Echi cheji kuvalingisanga vapwenga kwakusuku natanga yavo. Chipwe ngocho, visemi vaze vakwechi muchima wakulisuula veji kukolezezanga vana vavo vatwaleho kuzata natwima. Mwomwo ika? Mwomwo veji kuwahililanga hakumona vana vavo vali nakuhaka chatete Wangana kulutwe mukuyoya chavo. (Yowa. 3, 4) Pamo ava visemi veji kwivwanga ngana muze evwile Hana uze ‘ahanyine’ mwanenyi Samwele kuli Yehova. Vamona mulimo wakuzachila hamwe naYehova kupwa waulemu. Ngocho kavasaka vana vavo vahone kuzachila Kalungako.—Samwe. 1, 1:28.

5. Mujijila muka tunahase kukafwilamo vandumbwetu? (Talenu muvwimbimbi wakulivanga.)

⁵ Kachi nge kamweshi namulimo wakuzakama tangako, kaha munahase kukafwa vandumbwenu vaze vaviza chipwe vaze veji kulamanga vausoko wavo vakuviza, chipwe vatushinakaji chipwe vaze vali muukalu weka. Kekesenunga muchikungulwilo chenu mumone nge muli vatu vaze vali nakusakiwa kukafwa. Pamo munahase kukafwa ndumbwenu wapwevo hakuzakama chisemi chenyi wakashinakaji mangana ikiye apwenga nalwola lwakuzatako milimo yeka. Munahase nawa kukafwa vandumbwenu vavifwayi hakuvambata nakuya navo nakukunguluka, chipwe kuvachavila jikunyi nakuvaswichilako meya. Kulinga vyuma kana nachisolola nge muli nakuzachila hamwe naYehova, ngocho mwamikisula.—Tangenu Wavaka-Kolinde 1, 10:24.

6. Jila muka tunahase kusolwelamo chisambo?

⁶ Vaka-kuzachila hamwe naKalunga vavatachikijila hachisambo chavo. MuVisoneka VyachiHelase vyaVaka-Kulishitu, lizu “chisambo” lyalumbununa “kusolwelanga vangeji likoji.” (Hepe. 13:2; kwinyikila chamwishi.) MuMbimbiliya mwatwama mijimbu yayivulu yavatu vaze vasolwelenga chisambo. (Kupu. 18:1-5) Shikaho, twatela kutondatondanga jijila jakusolwelamo vakwetu chisambo numba vapwa vatu “vaze twalikata navo mulufwelelo” chipwe chiku.—Ngale. 6:10.

7. Mwomwo ika mwatela kusolwelanga chisambo vandumbwetu vamumulimo washimbu yosena vaze navamitambukila?

 ⁷ Kutala namulisuula kuzachila hamwe naKalunga hakusolwelanga chisambo vandumbwetu vazata mulimo washimbu yosena vaze navamitambukila tahi? (Tangenu WaYowano 3, 5, 8.) Kulinga chuma kana cheji kukafwanga vatu ‘mangana valikolezeze’ navandumbwavo. (Loma 1:11, 12) Chakutalilaho, Olaf eji kwanukanga omu kalama wakujinguluka wamujike atambukilile chikungulwilo chavo. Kakwapwile ndumbwetu alitavilile kutwama nenyi kuzuvo yenyiko. Jino Olaf alombele visemi jenyi vaze kavapwile Vinjihoko mangana vetavise kalama ezenga nakutwama kuzuvo yavo. Visemi jaOlaf vetavilile, oloze vamulwezele ngwavo nge kalama mweza, kaha ikiye atelelele kumusela kahela kenyi nakusavala muchitwamo. Olaf etavilile vyuma vamulwezele. Ambile ngwenyi: “Muchalumingo kana ngwanganyalile chikupu. Ami nakalama twahindukilenga chimenemene nakushimutwila vyuma vyakushipilitu oku tuli nakulya kulya chachimene. Mazu enyi akungukolezeza angukafwile ngufwile kuzata mulimo washimbu yosena.” Olaf nazate mulimo waumishonali hamyaka 40.

8. Mwomwo ika mwatela kutwalaho kusolwelanga vatu chisambo numba tuhu hakavanga kaveshi kusolola kusakwililako? Hanenu chakutalilaho.

⁸ Munahase kusolwela chisambo vangeji mujijila jakulisezaseza numba tuhu hakavanga kaveshi kumona vyuma namuvalingila kupwa vyavilemuko. Chakutalilaho, omu ndumbwetu umwe wakuSpain apwile nakulinangula naYesica uze afumine kuEcuador, ou ndumbwetu amwene Yesica ali nakulila. Omu amuhulishile, Yesica ambile ngwenyi omu vapwilenga kwimbo lyavo vapwile vakuhutwa chikuma. Ambile ngwenyi likumbi limwe kapwile navyakulya vyakuhana mwanenyiko, shina meya kaha. Yesica ongejekele mwanenyi mangana asavale, kufumaho alombele kuli Kalunga. Nakushimbula chiku, kwejile Vinjiho vavali, oloze Yesica kavatambwile nachisamboko kaha apulile jimangazini vamuhanyine. Avatenukilile ngwenyi: Uno mwanami mwalya jimangazini numba? Ava vandumbwetu vesekele kumuvendejeka oloze kavevwililileko. Mukuhita chamakumbi, Yesica awanyine vandumbwetu vanamusela chizuma chavyakulya kuchikolo. Yesica alikomokelele halikoji vamusolwelelele. Shikaho vikiko apwile nakulila mwomwo ahonene kulikehesa omu Kalunga akumbulwile kulomba chenyi. Halwola kana afwililile jino kuzachila Yehova. Eyi yikiko nganyo yeji kufumanga hakusolwela vatu chisambo nazumbu.—Kwambu. 11:1, 6

9, 10. (a) Lwola muka vaIsalele vazachilenga milimo yize yasakiwile vatu vakulisuula? (b) Milimo muka veji kuzatanga vandumbwetu vamalunga makumbi ano?

⁹ Lwola lumwe vaIsalele vazachilenga milimo yize yasakiwilenga kuyizata kuli vatu vakulisuula. (Kulo. 36:2; Miji. 1, 29:5; Nehe. 11:2) Namakumbi ano kuli milimo yize yasakiwa enu kulisuula kuzachisa lwola lwenu navikumba vyenu nauhashi wenu mangana mukafwe vandumbwenu. Echi nachiminehela kuwahilila chachinene chikuma nakisu yakufuma kuli Kalunga mwomwo yakulisuula chenu.

¹⁰ Mazu aKalunga eji kukolezezanga malunga vazachile hamwe naYehova hakuzata nangolo mangana vatengamo kuvazachisa muliuka. (Chimo. 1, 3:1, 8, 9; Petu. 1, 5:2, 3) Vaze veji kulinganga ngocho veji kukafwanga vakwavo kushipilitu chipwe hakuvahana vyuma vyakulikafwa navyo. (Vili. 6:1-4) Kutala vakulwane vamilwezaho lyehi muzate milimo yakufwana nge kupwa muka-kukafwa muchikungulwilo chipwe kuzachila kumikanda chipwe kupula jingalila jakwambulwila chipwe kuwahisa vyuma vize vinalyenyeka chipwe milimo yeka tahi? Vandumbwetu vaze veji kuzatanga milimo kana vapwa vakuwahilila chikuma mwomwo veji kuzachilanga vandumbwavo.

11. Ndumbwetu umwe nanganyala ngachilihi hakupwa namasepa vaze natungunga omu nazatenga milimo yamuliuka?

 ¹¹ Vandumbwetu vaze veji kulisuulanga kuzata milimo yamuliuka veji kutunganga masepa vavahya vavavulu. Chakutalilaho, ndumbwetu Margie nazate mulimo wakutunga jizuvo jawangana hamyaka 18. Hamyaka yayivulu nanangulanga vandumbwetu vavakweze mwakuzachila mulimo kana. Margie nawane jino ngwenyi eyi hijila yamwaza yakulikolezezelamo navandumbwenyi. (Loma 1:12) Halwola eji kupwanga muvyeseko, masepa vaze natungunga omu nazatenga mulimo wakutungatunga vakiko veji kumukolezezanga. Kutala mwalisuulaho lyehi kuzata mulimo wakufwana ngana tahi? Kutala namuhasa kulisuula kumizachisa numba mukwechi uhashi chipwe chiku tahi?

12. Namuhasa kukafwa ngachilihi vaze vali muukalu wakulijila?

¹² Nge kunasoloka ukalu wakulijila, vatu jaKalunga veji kupwanga namulimo wakukafwa vandumbwavo vyuma vyakulikafwa navyo. Chakutalilaho, veji kuvahananga jimbongo. (Yowa. 13:34, 35; Vili. 11:27-30) Jila yikwavo yakukafwilamo vaze vali muukalu shina kuvawahishila jizuvo javo chipwe kujitungulula. Chakutalilaho, zuvo yandumbwetu Gabriela wakuPoland yalyenyekele nalivaji. Oloze awahililile hakumona omu vandumbwenyi vejile nakumukafwa. Ambile ngwenyi: “Kangweshi nakusaka kuhanjika havyuma ngwajimbalishileko mwomwo vize vinapu kaha vikwata. Oloze ngunakusaka kumilweza vyuma ngwanganyalile. Chuma valingile vandumbwami changulingishile ngumone ngwami kupwa muchikungulwilo chavaka-Kulishitu cheji kunehanga kuwahilila chamwenemwene.” Vatu vaze veji kuhitanga muukalu veji kupwanga vakuwahilila chikuma hanyima yakuvakafwa. Kaha nawa vaze veji kuzachilanga hamwe naYehova hakukafwa vatu kana, navakiko veji kupwanga vakuwahilila.—Tangenu Vilinga 20:35; Wavaka-Kolinde 2, 9:6, 7.

13. Uno kulisuula kuzata milimo yamuliuka chinahase kuzamisa ngachilihi usoko wetu naYehova? Hanenu chakutalilaho.

¹³ Stephanie navakwavo vawahililile hakuzachila hamwe naKalunga hakukafwa vandumbwavo vamatunduke vaze vejile muUnited States. Vavakafwile hakuvatondela jizuvo nakulanjilamo vikumba mangana vavafumise kuvihela kuze kwasolokelele ukalu. Stephanie ambile ngwenyi: Chuma  chatwivwishile kuwaha shina muchima wakusakwilila vasolwele ava vandumbwetu hakuvakafwa kuli vandumbwavo vamukaye kosena. Ava vandumbwetu vamatunduke vashinganyekele ngwavo etu yetu twavakolezezele, olozenyi vakiko vatukolezezele. Zangi yavandumbwetu nakulinunga chavo nalufwelelo lwavo vinatujikijisa tuzange chikuma Yehova nakusakwilila chikuma vyuma vize liuka lyenyi lili nakulinga.”

14, 15. (a) Muchima muka apwile nawo kapolofweto Isaya? (b) Vaka-kwambulula Wangana makumbi ano vanahase kulondezeza ngachilihi Isaya?

¹⁴ Kutala muli nakusaka kuzachila chikuma hamwe naYehova tahi? Kutala namulisuula kuya nakumuzachila kuze kuli nakusakiwa chikuma vaka-kuzata tahi? Echi kacheshi nakulumbununa nge vangamba jaKalunga vatela kuseza membwavo numba vasolole nge vatwama namuchima wakuhanako. Chipwe ngocho, vandumbwetu vamwe veji kuhasanga kuya nakuzachila kwakusuku kweseka nachiyoyelo chavo. Vandumbwetu kana vatwama namuchima ngana uze apwile nawo kapolofweto Isaya. Omu Yehova ahulishile ngwenyi, “Iya nangutuma? Iya mwatuyilako?” Ikiye akumbulwile ngwenyi, “Yami uno. Ngutume.” (Isaya 6:8) Kutala muli nakufwila kulinga mwomumwe nge vanamilweze kuzata milimo yamuliuka tahi? Uno milimo muka yili nakusakiwa vaka-kuzata?

¹⁵ Yesu ahanjikile vyamulimo wakwambulula nawakunangula vatu vapwenga tumbaji ngwenyi: “Mulimo wakwaha unatoho, oloze vaka-kuzata vanapu vavandende. Shikaho mulombenu Mwenyamulimo wakwaha mangana atume vaka-kuzata vayenga mumulimo wenyi wakwaha.” (Mateu 9:37, 38) Nge mwapwa muvapayiniya, kutala namulisuula kuya nakuzachila kuze kuli nakusakiwa chikuma vaka-kwambulula, chipwe kukafwako ndumbwenu weka alinge mwomumwe tahi? Vandumbwetu vavavulu vamona ngwavo jila yimwe yakusolwelamo nge twazanga Kalunga navakwetu vatu shina kuzata upayiniya nakuya kujingalila kuze kuli nakusakiwa vaka-kwaha vavavulu. Kutala kuliko jijila jeka munahase kutohweselamo mulimo wenu wakwambulula tahi? Chikupu vene, kuzata mulimo kana cheji kunehanga kuwahilila.

16, 17. Chuma muka nachimikafwa mutohwese mulimo wenu wakuzachila Yehova?

¹⁶ Kutala namulisuula kuzachila haMbetele, chipwe kukafwa mumulimo wakutungatunga, chipwe kuzachila hambetele kufuminyina kujizuvo jenu tahi? Makumbi ano, kuli nakusakiwa chikuma vandumbwetu vakulisuula kuzachila Yehova mukala mulimo, nakala kuchihela navavatuma. Echi chili nakulumbununa nge vanahase kuvatuma kuze kuli nakusakiwa kukafwa numba tuhu kuli milimo yeka yize vatachikiza. Yehova eji kusakwililanga vatu jenyi hakulisuula chavo mangana vavatume kwosena kuze kuli nakusakiwa kukafwa.—Samu 110:3.

¹⁷ Kutala mwasaka kuminangula mangana mutengamo kupwa vaka-kuzata vakwipangweji mumulimo wajila tahi? Nge mukiko, kaha kilikitenu mutengamo kuya kuShikola yaVaka-Kwambulula Wangana. Shikola kana yeji kunangulanga vandumbwetu vakuhya kushipilitu vaze vatwama mumulimo washimbu yosena mangana vatohwese mulimo wavo. Vaze veji kulisonekesanga kuya kushikola kana vatela kupwa vakulizanga kuvatuma kukala chihela hakukumisa kuvanangula. Kutala namulisuula kuzata milimo yayinene yamuliuka tahi?—Wavaka-Kolinde 1, 9:23.

18. Vyuma muka munakufwila kunganyala hakuzachila hamwe naYehova hakumbi hakumbi?

¹⁸ Hakupwa tuvatu jaYehova twafwila kupwa namuchima wakuhana. Echi cheji kusololanga nge tukwechi zangi, nalikoji kaha nawa tweji kuzakamanga vakwetu hakumbi hakumbi. Kupwa namuchima kana nachitulingisa twimenga mihako yakufwana nge kuwaha, kuunda nakuwahilila. (Ngale. 5:22, 23) Kala mweshomwo chili chiyoyelo chenu, munahase kupwa vakuwahilila kachi nge namulondezeza Yehova uze apwa muka-kuhana nakufwila kuzachila hamwe naikiye.—Vishi. 3:9, 10.