1. Chuma muka vatela kulinga vaka-Kulishitu mangana vatwaleho kulaha palanga nakusongo?

VAKA-KULISHITU vosena vali nakulaha chakuya kukuyoya. Numba nge tunaputuka kulaha kalinwomu chipwe twaputukile lyehi, oloze tuvosena twatela kulaha nakuheta kusongo. Mazu akukolezeza aze Paulu asonekelele vaka-Kulishitu muFwilipi anahase kutukafwa mangana tulahe nakuheta kusongo. Vaka-Kulishitu vamwe muchikungulwilo kana vazachililile Yehova hamyaka yayivulu shimbu kanda vatambule mukanda avasonekelelele Paulu. Vapwile nakulaha kanawa, chipwe ngocho Paulu avakolezezele mangana vatwaleho kulaha nalukakachila. Asakile mangana vamulondezeze “nakufwila kuheta kusongo.”—Fwili. 3:14.

2. Mwomwo ika natwambila ngwetu Paulu akolezezele vandumbwenyi muFwilipi halwola lwakutamo?

² Paulu akolezezele vandumbwenyi muFwilipi halwola lwakutamo. Kufuma vene halwola luze valwezele Paulu naShilase ngwavo ‘zaukenu muno muMasetonya,’ kafwe mu 50 C.E, vatu muchikungulwilo chamuFwilipi vaputukile kuvayanjisa. (Vili. 16:9) Omu vayile kuze vakawanyineko pwevo walijina lyaLuchiya uze “apwile nakwivwilila, kaha Yehova asokolwele mumuchima wenyi mangana evwilile” kumujimbu wamwaza. (Vili. 16:14) Nakushimbula chiku vamumbapachishile hamwe kaha navaka-tanga yenyi. Oloze Satana kawahililileko. Vatu vamunganda vakwachile Paulu naShilase nakuvatwala kuli vaka-kuyula nakuvavangijikila ngwavo vapwile nakuneha pindangano munganda. Kufumaho Paulu naShilase vavavetele nakuvatwala mukamenga, kaha mukuhita chalwola vavalwezele vafume munganda. (Vili. 16:16-40) Uno vazeyele kushipilitu tahi? Nduma. Nyi ngachilihi  vandumbwetu vaze vapwile muchikungulwilo chachihya, uno vazeyele tahi? Nduma, navakiko vomikile. Chikupu vene, Paulu naShilase vakolezezele ava vandumbwetu hakuvasolwela chakutalilaho chamwaza.

3. Paulu atachikijile chuma muka, kaha vihula muka natushimutwila?

³ Paulu asakile chikuma kutwalaho lika kuzachila Yehova. (Koli. 2, 4:16) Atachikijile ngwenyi hakusaka alahe nakuheta kusongo atela kushishika hafweto. Vyuma muka natulinangula kuli Paulu? Vyakutalilaho muka vyamakumbi ano vize navitukafwa tumike chamokomoko naukalu? Kaha vyuma twatalilila navitukafwa ngachilihi tutwaleho lika kuzachila Yehova chakuzeneka kuzeya?

4. Uno Paulu atwalileho ngachilihi kuzata natwima chamokomoko naukalu?

⁴ Shinganyekenu haukalu apwile nakuhitamo Paulu halwola asonekelele mukanda vaka-Fwilipi. Vamukashile muzuvo yenyi muLoma, kaha nawa kapwile nalisesa lyakuya nakwambululako. Oloze atwalilileho lika kwambulila vatu vaze vejilenga nakumumeneka, nakusonekela mikanda kuvikungulwilo vyakwakusuku. Namakumbi ano nawa, vaka-Kulishitu vaze vatwama muluuta veji kufwilanga kwambulila vatu vaze veji kuvamenekelanga. Kaha nawa veji kusonekelanga mikanda vatu vaze katwawana hamembo avoko.

5. Kweseka namazu ahali Wavaka-Fwilipi 3:12-14, vyuma muka vyakafwile Paulu atwaleho lika kulaha?

⁵ Paulu kechelelele vyuma vyavipi alingile chipwe vyuma vyamwaza ateselemo kunyima vimutanguleko. Ambile ngwenyi chapwa chachilemu “[ku]vulyama vyuma vyakunyima, nakwolovela vyuma vili kulutwe,” kulumbununa kulaha nakuheta kusongo. (Tangenu Wavaka-Fwilipi 3:12-14.) Kwapwile vyuma vimwe vyasakile kutangula Paulu. Chatete, vyuma vyamwaza ateselemo mukwitava chavaYuleya. Oloze vyuma kana avimwene “kupwa nge majilo.” (Fwili. 3:3-8) Chamuchivali, kushinganyeka omu ayanjishilenga vaka-Kulishitu kunyima, kachi chamulingishile alitwamine kuzachila Yehova. Chamuchitatu, kashinganyekele ngwenyi nazachila lyehi Yehova milimo yayivuluko. Paulu azachile mulimo wakwambulula natwima chamokomoko nakumukasa mukamenga, nakumuveta, nakumwasa malolwa, nakuvomba nawato, nakuhona vyakulya navyakuvwala. (Koli. 2, 11:23-27) Chamokomoko naukalu amwene navyuma ateselemo, Paulu atachikijile ngwenyi atelelele kutwalaho lika kulaha. Omu mukiko chatela kupwa nakuli yetu.

6. ‘Vyuma muka vyakunyima’ vize twatela kuvulyama?

⁶ Tunahase kulondezeza ngachilihi Paulu “[haku]vulyama vyuma vyakunyima”? Etu vamwe twatela kuhonesa muchima wakulihana milonga etu vavene mwomwo yashili twalingile kunyima. Tunahase kulinga ngocho, hakulinangula vihande vyahanjika handando yakusokola yaKulishitu hachilongesa chauka. Nge natulinangula, nakushinganyeka nakulomba hachihande kana, kaha nachitukafwa tuhone kulizakamina hashili twalingile kunyima. Katweshi kulihana nawa milonga hashili yize Yehova atukonekela lyehiko. Tutalenu chishina chikwavo natulinangula kuli Paulu. Vandumbwetu vamwe vaseza milimo yajimbongo jajivulu mangana vahake Wangana kulutwe. Kachi nge mukiko twalingile nayetu, kaha katwatela kuliveya havyuma twasele kunyimako. (Kula. 11:4-6; Kwambu. 7:10) “Vyuma vyakunyima,” vinahase kupwa kala milimo twateselemo chipwe vyeseko vize twomikile. Chipwe ngocho, kushinganyeka omu Yehova atukafwile nakutukisula chinahase kutukafwa tupandame chikuma kuli ikiye. Oloze katwatela kushinganyeka ngwetu milimo tunazachila Yehova  yinavulu lyehi, kaha twatela jino kuhwimako.—Koli. 1, 15:58.

7. Kweseka namazu ahali Wavaka-Kolinde 1, 9:24-27, vyuma muka vyasakiwa numba tulahe nakuheta kusongo? Lumbununenu.

⁷ Paulu atachikijile mwalumbunukilile mazu ahanjikile Yesu ngwenyi: “Kilikitenu chikuma.” (Luka 13:23, 24) Paulu amwene ngwenyi atelele kukilikita chikuma palanga nakukufwa chenyi ngana muze alingile Yesu. Shikaho, afwanyishile chiyoyelo chavaka-Kulishitu kuli vaka-kulaha. (Tangenu Wavaka-Kolinde 1, 9:24-27.) Muka-kulaha keshi kutala kuvyuma vize vinahase kumutangula mangana ahone kuheta kusongoko. Chakutalilaho, vaka-kulaha vamwe veji kulahilanga mumikwakwa yize yatwama navitanda navyuma vyeka vize vinahase kuvatangula. Kutala muka-kulaha uze anakusaka kutapa vakwavo nahase kwimana nakutala vyuma vanatanjika tahi? Nduma. Nayetu nawa omu tuli nakulaha chakuya kukuyoya, twatela kulihenda kuvyuma vize vinahase kututangula. Nge natushishika hafweto nakukilikita chikuma ngana muze alingile Paulu, kaha natukatambula fweto.

8. Vyuma muka vitatu natushimutwila?

⁸ Tutalenu havyuma vitatu vize vinahase kutulingisa tuzeye kushipilitu. Chatete, nge vyuma twatalilila kavyateselemoko, chamuchivali, kachi nge mujimba unazeye mwomwo yamisongo chipwe ushinakaji, chamakumishilo, kachi nge tunakuyanda navyeseko. Natunganyala hakumona omu vandumbwetu vanomikanga muukalu kanou.—Fwili. 3:17.

9. Vyuma muka vinahase kusoloka kachi nge vyuma twatalilila kavyateselemoko?

⁹ Nge vyuma twatalilila kavyateselemoko. Tuvosena twafwila kukamona vyuma vyamwaza atushika Yehova. Chakutalilaho, omu kapolofweto Hambakuke alyonyingile nakulweza Yehova afumise vilinga vyavipi muYuta, Yehova amulwezele ngwenyi “chivandaminenga.” (Hamba. 2:3) Chochimwe nawa, nge vyuma twatalilila kavyateselemoko, kaha tunahase kuhomba nakuzeya kushipilitu. (Vishi. 13:12) Chuma kana chasolokele nakuli vandumbwetu mumwaka wa 1914. Mumwaka kana, vaka-Kulishitu  vawavisa vavavulu vatalililile kuya mwilu. Oloze omu vyuma vatalililile vyahonene kutesamo, vyuma muka valingile?

10. Vyuma muka alingile ndumbwetu walunga napuwenyi omu vyuma vatalililile vyahonene kutesamo?

¹⁰ Tutalenu hali vandumbwetu vavali vakushishika vaze vahonesele ukalu kanou. Ndumbu Royal Spatz vamumbapachishile mu 1908 omu apwile namyaka 20. Afwelelele chikupu ngwenyi kalinwomu ayenga mwilu. Ngocho omu ahuhwile pwevo walijina lyaPearl mu 1911, amulwezele ngwenyi: “Unatachikiza vyuma navisoloka mu 1914. Shikaho twatela kulimbata washi.” Uno ava vandumbwetu valitwaminyine kulaha chakutwala kukuyoya omu vahonene kuya mwilu mu 1914 tahi? Nduma, mwomwo chuma vafwililile shina kuzachila Yehova nakashishi, keshi kusaka kuya kaha mwiluko. Vafwililile kutwalaho kulaha nalukakachila. Chikupu vene, ndumbu Royal napuwenyi Pearl vatwalileho kuzachila Yehova natwima hamyaka yayivulu palanga nomu vakumishile kuyoya chavo hano hamavu. Nayenu mwafwila kukamona omu Yehova mwakajilika lijina lyenyi nawata wenyi, nakutesamo vyuma ashika. Tachikizenu ngwenu Yehova mwatesamo vyuma kana halwola atongola. Shikaho, omu tuli nakuvandamina lwola kana, tutwalenuho lika kuzachila Yehova, kanda tuzeya kushipilitu kachi nge vyuma twatalilila kavyateselemo halwola twashinganyekeleko.

11-12. Mwomwo ika twatela kutwalaho kuzachila Yehova numba tuhu mujimba unazeye? Hanenu chakutalilaho.

¹¹ Nge mujimba unazeye. Kuzachila Yehova nakashishi kachapendamina hakupwa vakulikangula kumujimba ngana muze chapwa kuli vaka-kulahako. Vandumbwetu vavavulu vaze vanazeye mwomwo yaushinakaji, vali nakutwalaho kuzachila Yehova kweseka noho hakumina ngolo javo. (Koli. 2, 4:16) Chakutalilaho, ndumbu Arthur Secord * wamyaka yakusemuka 88, azachililile haMbetele hamyaka 55, oloze mujimba wenyi wazeyele mwomwo yamisongo. Likumbi limwe nase uze apwile nakumuzakama ayile kukahela kenyi. Amutalile nakumulweza ngwenyi: “Ndumbu Secord, unazachila Yehova milimo yayivulu mukuyoya chove.” Oloze ndumbu Arthur kapwile nakutala hamilimo azachililile Yehova kunyimako. Ngocho, atalile uze nase, kaha amwesele kukanwa nakumulweza ngwenyi: “Eyo, unahanjika muchano. Oloze chuma chachilemu shina kupwa vakashishi oholyapwa palanga nakusongo. Keshi kutala kaha hamilimo twazachile kunyimako.”

¹² Pamo nayenu munazachila Yehova hamyaka yayivulu, oloze oholyapwa muli nakuhona  kuzata ngana muze mwazachilenga mwomwo yakuhona kulikangula kumujimba. Nge mukiko, kaha kanda kulizakaminako. Tachikizenu ngwenu, Yehova keshi kuvulyama milimo yenu mwazachile kunyimako. (Hepe. 6:10) Tachikizenu nawa ngwenu, kuzachila Yehova namuchima wosena kachapendamina hakuvula chamilimo natuzata muliukako. Oloze tweji kuzachilanga Yehova namuchima wosena hakuzata kweseka noho hakumina ngolo jetu. (Kolo. 3:23) Yehova atachikiza hakumina ngolo jetu, ngocho katulweza tulinge vyuma vize katweshi kuhasako.—Mako 12:43, 44.

13. Vyuma muka ahichilemo Anatoly naLidiya, kaha vyuma kana navitukafwa ngachilihi tutwaleho kuzachila Kalunga chamokomoko navyeseko?

¹³ Nge tunakuyanda navyeseko. Vangamba jaKalunga vamwe vanomikanga muvyeseko vyakulisezaseza hamyaka yayivulu. Chakutalilaho, Anatoly Melnik apwile namyaka 12 omu ise vamukwachile nakumukasa mukamenga, kufumaho vamutwalile kuSiberia, kafwe jikilomita 7,000 kufuma kuMoldova kuze kwapwile tanga yenyi. Omu mwahichile mwaka umwe, Anatoly nanaye, navakaka jenyi navakiko vavatwalile kuSiberia. Kutwala muze vaputukile kuyanga nakukunguluka kungalila yize yapwililile kwakusuku kafwe jikilomita 30, numba tuhu kungalila kana kwapwile kututa chikuma. Mukuhita chalwola, ndumbu Melnik vamukashile mukamenga hamyaka yitatu, ngocho asele puwenyi Lidiya namwanenyi wapwevo uze apwile namwaka umwe. Ndumbu Anatoly Melnik natanga yenyi vatwalileho kuzachila Yehova chamokomoko nakumona ukalu hamyaka yayivulu. Anatoly ali jino namyaka 82, kaha atwama muKomiti yaMutango wamuCentral Asia. Ngana mwaAnatoly naLidiya, nayetu nawa tutwalenuho lika kuzachila Yehova nalukakachila.—Ngale. 6:9.

14. Vyuma muka atelele kulinga Paulu mangana akatambule fweto?

¹⁴ Paulu afwelelele ngwenyi mwatwalaho kulaha palanga nakusongo. Hakuwana nge apwile muka-Kulishitu wakuwavisa, atalililile kukatambula “fweto yakusanyika chaKalunga chamwilu.” Atachikijile ngwenyi hakusaka akatambule fweto atelele ‘kufwila kuheta kusongo.’ (Fwili. 3:14) Paulu azachishile chakutalilaho chavaka-kulaha mangana akafwe vaka-Fwilipi vatwaleho kushishika hafweto.

15. Uno Paulu akafwile ngachilihi vaka-Kulishitu muFwilipi mangana ‘vafwile kuheta kusongo’?

¹⁵ Paulu anukishile vaka-Fwilipi vyalutalililo lwavo lwamwilu. (Fwili. 3:20) Mwomwo ika avanukishilile vyalutalililo kana? Hamyaka  kana vatu vafwililile kupwa vaLoma mwomwo vanganyalililengaho. * Oloze vaka-Kulishitu vakuwavisa vapwile nalutalililo lwamwaza luze nalukavanganyalisa mwamunene kuhambakana vaLoma. Echi chikiko chalingishile Paulu akolezeze vaka-Fwilipi ngwenyi: “Twamenunga nganomu mwatela mujimbu wamwaza wakuvuluka Kulishitu.” (Fwili. 1:27) Vaka-Kulishitu vawavisa makumbi ano veji kuhananga chakutalilaho chamwaza hakukilikita nangolo mangana vafwile kuheta kusongo vakatambule fweto mwilu.

16. Numba nge twatalilila kukayoyela mwilu chipwe hamavu, vyuma muka twatela kutwalaho kulinga kweseka namazu ahali Wavaka-Fwilipi 4:6, 7?

¹⁶ Numba nge twatalilila kukayoyela mwilu chipwe hamavu, oloze tuvosena twatela kufwila kukilikita nakuheta kusongo. Chamokomoko navyuma natuhitamo, katwatela kutala kunyima chipwe kwechelela kala vyuma vituhonese kuzovoloka kushipilituko. (Fwili. 3:16) Vyuma twatalilila vinahase kusoloka nge kavyeshi nakutesamo washiko, kaha nawa mujimba unahase kuzeya. Nyi pamo tunomikanga muvyeseko vyakulisezaseza hamyaka yayivulu. Chamokomoko naukalu muli nakuhitamo “kanda namulizakamina hachuma numba chimweko.” Oloze hakulomba nahakulembelela, mulwezenunga Kalunga vyuma munakusaka, kaha mwamihana kuunda chize chahambakana vishinganyeka vyenu.—Tangenu Wavaka-Fwilipi 4:6, 7.

17. Vyuma muka natushimutwila muchihande nachikavangizaho?

¹⁷ Ngana mwamuka-kulaha uze eji kulikakanga nangolo jenyi josena mangana ahete kusongo, nayetu tufwilenu lika kushishika hafweto nakutwalaho lika kulaha chakutwala kukuyoya palanga nomu natukaheta kusongo. Shikaho tutwalenuho lika kuzata kweseka noho hakumina ngolo jetu mangana tukalivwise kuwaha vyuma vyamwaza vili kulutwe. Vyuma muka navitukafwa mangana tushinganyekenga lika hafweto? Chihande nachikavangizaho nachitukafwa tumone vyuma twatela kuhaka kulutwe mukuyoya chetu nomu tunahase ‘kukekesa tumone vyuma vyavilemu.’—Fwili. 1:9, 10.