LUFWELELO lweji kutuhananga ngolo chikuma. Chakutalilaho, Satana asaka kutujiha kushipilitu, oloze lufwelelo lweji kutukafwanga “kujimisa mivwi yakakahya yosena yayauze wakuhuka.” (Efwe. 6:16) Kachi nge tuli nalufwelelo, kaha tunahase kumika mukala ukalu tunahase kuhitamo. Yesu alwezele tumbaji twenyi ngwenyi: “Kachi nge muli nalufwelelo lwakweseka hamwe nalinona lyamusetale, munahase kwamba kupili yino ngwenu, ‘Tutuka hano nakuya haze,’ kaha nayitutuka.” (Mateu 17:20) Hakuwana nge lufwelelo lweji kutukafwanga kushipilitu, shikaho twatela kushimutwila havihula vino: Uno lufwelelo lwapwa chuma muka? Uno vishinganyeka vyetu vyasolola ngachilihi lufwelelo twatwama nalwo? Uno tunahase kujikijisa ngachilihi lufwelelo lwetu? Uno twatela kufwelela iya?—Loma 4:3.

Kupwa nalufwelelo kachalumbununa kufwelela chipwe kwitavila kaha muchanoko, mwomwo “navandemone nawa vetavila [ngwavo Kalunga kwatwama], kaha veji kulichikiminanga.” (Yako. 2:19) Jino lufwelelo chuma muka?

Mbimbiliya yalumbununa ngwayo, “lufwelelo lwapwa kuvandamina namuchima wakukunyuka vyuma vize twatalilila.” (Hepe. 11:1a) Kachi nge muli nalufwelelo kaha namukunyuka nakwitavila ngwenu vyuma vyosena eji kuhanjikanga Yehova vyapwa vyamuchano, kaha navikatesamo. Chakutalilaho, Yehova alwezele vaIsalele ngwenyi: “Kachi nge namuhasa kujiha lushiko ngwalishika ngwami kupwenganga lika musana nalushiko ngwalishika ngwami kupwenganga lika ufuku, mangana muhonese musana naufuku kupwako halwola lwavyo, kahanyi nalushiko lwami luze ngwalishikile nangamba yami Ndavichi nalufwa.” (Yele. 33:20, 21) Uno mwalizakaminaho lyehi ngwenu lwola lumwe likumbi kalyeshi kukatutukako chipwe kulauka nakulingisa kuhone kupwa ufuku namusana tahi? Nge kamwalizakamina hajishimbi javyuma vyakutenga vize vyeji kulingisanga pulaneti yamavu yitwaleho lika kunyengumuka kulikumbi muuhichilo wayo, kahechi chatela kumilingisa mufwelele ngwenu Tengi uze atengele vyuma vyosenevi mwakatesamo mazu enyi.—Isa. 55:10, 11; Mateu 5:18.

Mbimbiliya yalumbununa nawa ngwayo, lufwelelo lwapwa “hiunjiho wakusolola hatoma vyuma vivene vize katwamweneko.” Lufwelelo valuvuluka ngwavo, “hiunjiho wakusolola hatoma” chipwe “hiunjiho wakutamo” wavyuma vize katwamonako oloze vyapwa vyamuchano. (Hepe. 11:1b; kwinyikila chamwishi) Tutalenu chakutalilaho chize nachitukafwa twitavile chishina kanechi. Kachi nge mwana mwamihulisa ngwenyi, ‘Uno mwatachikiza ngachilihi ngwenu peho kuyatwama?’ Numba tuhu kanda mumonengaho lyehi peho, oloze munahase kumulweza vyuma vyakumona nameso vyakufwana nge kupekumuka chamafwo kumutondo chipwe chavyuma vananyika navyuma vyeka vyangana. Nge mwana mwakunyuka naunjiho kana, kaha mwetavila ngwenyi vyuma vize katwamona namesoko kuvyatwama chikupu. Chochimwe nawa, lufwelelo lwazama havyuma vize twamona.—Loma 1:20.

Hakuwana nge lufwelelo lwapendamina haunjiho, ngocho hakusaka mutu apwenga nalwo atela chatete  kupwa “nachinyingi chakwoloka chakutachikiza muchano.” (Chimo. 1, 2:4) Oloze kwasakiwa vyavivulu. Kaposetolo Paulu asonekele ngwenyi: “Mutu eji kusololanga lufwelelo namuchima wenyi.” (Loma 10:10) Mutu atela kufwelela muchano nakuumona kupwa waulemu. Nge mwalinga ngocho, kaha mwasolola lufwelelo, kulumbununa nge mwayoya mujila yize nayivwisa Kalunga kuwaha. (Yako. 2:20) Mutu uze kamona muchano kupwa waulemuko, nahase kukana unjiho wamuchano nakukakachila kaha kuvyuma vize atachikiza lyehi chipwe kulinga vyuma nasake. (Petu. 2, 3:3, 4; Yuta 18) Numba tuhu vatu vavavulu kushikulu vamwene vyuma vyakukomwesa oloze vamwe kavapwile nalufweleloko. (Kula. 14:11; Yowa. 12:37) Shipilitu yaKalunga yeji kukafwanga vatu vaze vasaka muchano vapwenga nalufwelelo.—Ngale. 5:22; Teso. 2, 2:10, 11.

Mwangana Ndavichi vamulavila havatu vaze vapwile nalufwelelo lwakukola. (Hepe. 11:32, 33) Oloze vamwe mutanga yenyi kavapwile nalufwelelo kanako. Chakutalilaho, shinganyekenu hali Elyave yaya yaNdavichi. Omu Ngolyate apwile nakusaula vaIsalele, Ndavichi apihililile chikuma, oloze Elyave atenukililile Ndavichi omu amumwene napihilila, echi chasolola nge Elyave kapwile nalufweleloko. (Samwe. 1, 17:26-28) Kakweshi mutu asemuka nalufwelelo, chipwe kuluswana kuli visemi jenyiko, shikaho lufwelelo lwaNdavichi lwapendaminyine hausoko wenyi naKalunga.

Hali Samu 27, (vesi 1) Ndavichi avuluka vyuma vyamulingishile apwenga nalufwelelo lwakukola. (Vesi 2, 3) Ndavichi ashinganyekelenga havyuma ahichilemo kunyima nomu Yehova amukingile kuli vaka-kole jenyi. (Vesi 4) Asakwililile chikuma Yehova hakuhakako tembele. (Vesi 6) Ndavichi alemeselenga Kalunga hatavanaku hamwe kaha navakwavo vaka-kufwelela. (Vesi 7, 8) Alombelenga Yehova namuchima wenyi wosena. (Vesi 11) Asakilenga Yehova amunangule jijila jenyi. (Vesi 13) Ndavichi amwene lufwelelo kupwa lwalulemu chikuma, kaha ambile ngwenyi kachi nge kapwile nalufweleloko kachi kahashile kumikako.

Munahase kupwa nalufwelelo ngana luze lwaNdavichi kachi nge namupwa navilinga vize apwilenga navyo vasoneka hali Samu 27. Hakuwana nge lufwelelo lwapendamina hakupwa nachinyingi chakwoloka, shikaho nge namulinangulanga Mazu aKalunga nakutanganga mikanda yahanjika haMbimbiliya, kaha nachipwa chachashi kupwa namuhako kanou washipilitu. (Samu 1:2, 3) Shikaho mwatela kuwanangako lwola lwakushinganyekanga havyuma munalinangula. Kushinganyeka havyuma namulinangula nachimikafwa muzange Yehova nakumulemesa muchikungulwilo nakulwezako vakwenu vyuma mwafwelela. (Hepe. 10:23-25) Kaha nawa tweji kusololanga lufwelelo kachi nge natutwalaho lika “kulombanga lwola lwosena chakuzeneka kuzeya.” (Luka 18:1-8) Shikaho, “lombenunga shimbu yosena” kuli Yehova, nakufwelela ngwenu “amizakama.” (Teso. 1, 5:17; Petu. 1, 5:7) Lufwelelo lweji  kutulingisanga tulinge vyuma vyakwoloka, kaha kulinga vyuma vyakwoloka cheji kujikijisanga lufwelelo lwetu.—Yako. 2:22.

Haufuku wakukokela kukufwa chenyi, Yesu alwezele tumbaji twenyi ngwenyi: “Fwelelenu muli Kalunga, fwelelenu nawa muli ami.” (Yowa. 14:1) Shikaho twatela kufwelela Yehova naYesu. Uno munahase kufwelela ngachilihi Yesu? Tushimutwilenu jijila jitatu.

Yatete, monenunga ndando yakusokola kupwa wana uze Kalunga ahana kuli mutu himutu. Kaposetolo Paulu ahanjikile ngwenyi: “Nguli nakuyoyela halufwelelo nguli nalwo muli MwanaKalunga, uze anguzangile ami nakulyecha ivene hali ami.” (Ngale. 2:20) Kachi nge namufwelela muli Yesu, kaha namwitavila ngwenu ndando yakusokola vayihanyine hali enu nakumilingisa vamikonekele jishili jenu, nakumihana lutalililo lwakuyoya chahaya myaka yosena. Vyuma vyosenevi vyasolola nge Yehova amizanga. (Loma 8:32, 38, 39; Efwe. 1:7) Echi nachimikafwa muhone kulimona kupwa vamokomoko.—Teso. 2, 2:16, 17.

Yamuchivali, pandamenu kuli Yehova mukulomba kuhichila mundando yakusokola yaYesu. Ndando yakusokola yatulingisa tulombe kuli Yehova “nakuhanjikanga nakukasunuka, mangana vatutetele nakutusolwela likoji lyalinene lyakutukafwa halwola lwakutamo.” (Hepe. 4:15, 16; 10:19-22) Kulomba cheji kutukafwanga tuhonese cheseko chize nachitulingisa tulinge shili.—Luka 22:40.

Yamuchitatu, ononokenu Yesu. Kaposetolo Yowano asonekele ngwenyi: “Ou mwafwelela Mwana ali nakuyoya chahaya myaka yosena, ou mwalikanga kuli Mwana keshi kukamona kuyoyako, oloze utenu waKalunga naupwa hali ikiye.” (Yowa. 3:36) Yowano ambile ngwenyi kusolola lufwelelo chalihandununa nakulikanga. Shikaho mweji kusololanga lufwelelo muli Yesu kachi nge namumwononoka. Kaha mweji kwononokanga Yesu hakukavangiza “lushimbi lwaKulishitu,” kulumbununa vyuma vyosena vize anangwile. (Ngale. 6:2) Mweji kwononokanga nawa Yesu hakukavangiza jindongi jize eji kutuhananga kuhichila muli “ndungo wakushishika wakuzangama.” (Mateu 24:45) Nge namwononoka Yesu, kaha namupwa nangolo jakuhonesa kala ukalu naumiwana.—Luka 6:47, 48.

Lunga umwe ambile kuli Yesu ngwenyi: “Lufwelelo nguli nalwo! Ngukafwe oho ngunazeneka lufwelelo!” (Mako 9:24) Ou lunga apwile nalufwelelo oloze amwene ngwenyi asakiwile kutohwesako lufwelelo lwenyi. Nayetu nawa lwola lumwe twasakiwa kutohwesako lufwelelo lwetu. Kaha tuvosena tunahase kulinga ngocho oholyapwa. Nganomu tunashimutwila, tweji kujikijisanga lufwelelo lwetu hakulinangula Mazu aKalunga nakuwashinganyekanga, echi nachitulingisa tuzange chikuma Yehova. Tunahase nawa kujikijisa lufwelelo lwetu kachi nge natulemesanga Yehova hamwe navandumbwetu, nakulwezako vakwetu vyuma twatalilila nakutwalaho lika kulomba. Kaha nawa kujikijisa lufwelelo lwetu, nachitulingisa vatukisule chikuma. Mazu aKalunga atukolezeza ngwawo: “Enu ngwazanga, litungenu mulufwelelo lwenu lwajila chikuma. . . mangana mutwamenga muzangi yaKalunga.”—Yuta 20, 21.