1. Vyuma muka vize twasaka vausoko wetu valinge?

NDUMBWETU wapwevo Pauline * ambile ngwenyi: “Kufuma vene halwola ngwalinangwile muchano, ngwafwililile ngukapwe navausoko wami vosena mupalachise, chikumanyi ngwasakile lunga lyami Wayne namwanetu walunga tukazachile hamwe Yehova.” Uno mwatwama navausoko vaze kavazachila Yehovako tahi? Nge mukiko, kaha twafwelela ngwetu mweji kwivwanga ngana muze evwile Pauline.

2. Vihula muka natushimutwila muchihande chino?

² Katweshi kuhasa kushinjila vausoko wetu vetavile mujimbu wamwazako. Chipwe ngocho, tweji kuvakafwanga vetavile Mazu amuMbimbiliya. (Chimo. 2, 3:14, 15) Mwomwo ika twatela kwambulila vausoko wetu? Mwomwo ika twatela kuvevwila keke? Vyuma muka twatela kulinga mangana tukafwe vausoko wetu vazange Yehova nganomu twamuzanga etu? Kaha vandumbwetu muchikungulwilo vanahase kutukafwa ngachilihi?

3. Kweseka namukanda WaPetulu 2, 3:9, mwomwo ika twatela kwambulila vausoko wetu?

³ Kalinwomu Yehova anongese vatu vakuhuka muno mukaye. Vaze vatwama “namichima yamwaza yakusaka kuyoya chahaya myaka yosena” vakiko kaha navakayovoka. (Vili. 13:48) Tweji kuzachisanga lwola lwetu nangolo jetu hakwambulila vatu vaze kavapwa vausoko wetuko, shikaho twasaka navausoko wetu vatachikize Yehova nakumuzachila. Setu wazangi Yehova “kazanga  mutu numba umwe akanongeko, oloze azanga vosena vapihilile nakwalumuka.”—Tangenu WaPetulu 2, 3:9.

4. Tunahase kulimbenja ngachilihi hakwambulila vausoko wetu?

⁴ Twatela kutachikiza ngwetu tunahase kwambulula mujimbu mujila yamwaza chipwe yayipi. Chakutalilaho, tweji kwambulilanga vatu vaze kavapwa vausoko wetuko mujila yakuzangama, oloze tunahase kwambulila vausoko wetu mujila yayipi.

5. Vyuma muka twatela kushinganyekaho shimbu kanda twambulile vausoko wetu?

⁵ Etu vamwe nge natwanuka lwola lwatete twesekele kwambulila vausoko wetu, pamo tweji kuliveyanga nakwamba ngwetu mazu twazachishile kawapwile kanawako, nakushinganyeka ngwetu kachi twazachishile mazu eka. Kaposetolo Paulu ahuhumwine vaka-Kulishitu ngwenyi: “Mazu enu apwenganga akukokweza shimbu yosena, akutova mungwa, mangana mutachikize omu mwatela kukumbulula mutu himutu.” (Kolo. 4:5, 6) Twatela kwanukanga mazu kana kachi nge tuli nakusaka kwambulila vausoko wetu, nge chiku, kaha natuvevwisanga kupihya muchishishisa chakuvakunyula.

6-7. Hanenu chakutalilaho chize chinasolola ovyo chasakiwila kuzakama muka-mahyamutu uze kapwa Chinjihoko.

⁶ Vevwilenu keke. Ndumbu Pauline uze twavulukanga hakavanga ambile ngwenyi: “Hakavanga ngwasakilenga kaha kuhanjika nalunga lyami havyuma vyakushipilitu. Oloze katwashimutwililenga mujila yakuundako.” Hakuwana nge lunga lyaPauline katachikijile chinyingi chamuMbimbiliyako, ngocho kevwishishile vyuma ahanjikilenga puwenyiko. Wayne ashinganyekelenga ngwenyi vyuma amwene puwenyi kupwa  vyavilemu shina kuhanjika kaha vyakwitava chenyi. Alizakaminyine chikuma nakushinganyeka ngwenyi puwenyi mwapwa muponde hakulikata naliuka kana.

⁷ Ndumbu Pauline ahanjikile ngwenyi kakavulu nachingoloshi ayilenga nakushikama, nakukunguluka nakwambulula, kaha nawa kusongo yachalumingo alingilenga mwomumwe. Ahanjikile nawa ngwenyi: “Shimbu jimwe lunga lyami omu ejilenga hembo kawanyinengaho mutuko.” Chikupu vene ou lunga evwilenga uli hakuwana nge puwenyi namwanenyi kavapwilenga hembo kakavuluko. Katachikijile vatu valikachilenga natanga yenyiko, kaha ashinganyekele nawa nge puwenyi amwene masepa jenyi kupwa vavalemu kuhambakana ikiye. Ou lunga asakile kulukulula puwenyi. Kachi nge yenu mwapwanga Pauline kachi vyuma muka munalingi mangana musolole ngwenu mwazanga muka-mahyenu?

8. Kweseka namazu ahali waPetulu 1, 3:1, 2, vilinga muka vinahase kwivwisa vausoko wetu kuwaha?

⁸ Vahanenu chakutalilaho chamwaza kuhichila muvilinga vyenu. Kakavulu vausoko wetu veji kutalanga havyuma tweji kulinganga keshi havyuma tweji kuhanjikangako. (Tangenu WaPetulu 1, 3:1, 2.) Ndumbu Pauline etavilile chishina kanechi. Ambile ngwenyi: “Ngwatachikijile jino ngwami lunga lyami Wayne anguzangile chikuma, kaha nawa azangile mwanenyi, ngocho katelelele kushinganyeka vyakulilukululako. Kaha ngwashinganyekele kukavangiza jindongi jaYehova jize jahanjika haulo. Muchishishisa chakuhanjika chikuma hamuchano ngwalinangwile, ngwatelele kuhana chakutalilaho chamwaza kuhichila muvilinga vyami.” Pauline alitwaminyinyine kushinjila lunga lyenyi alinangule Mbimbiliya, oloze aputukile kushimutwilanga nenyi havihande vyeka. Wayne amwene jino vilinga vyamwaza asolwelenga puwenyi,  kaha nawa mwanenyi apwile jino nakalemesa chikuma. (Vishi. 31:18, 27, 28) Omu Wayne amwene ngwenyi Mbimbiliya yinalingisa vaka-tanga yenyi vapwenga navilinga vyamwaza, aputukile kuzanga jino Mazu aKalunga.—Koli. 1, 7:12-14, 16.

9. Mwomwo ika twatela kutwalaho lika kukafwa vausoko wetu?

⁹ Twalenuho kukafwa vausoko wenu. Yehova atuhana chakutalilaho chamwaza. Nahanenga vatu lwola “mapapa kakavulu” mangana vetavile mujimbu wamwaza nakupwa nakuyoya chahaya myaka yosena. (Yele. 44:4) Kaha nawa kaposetolo Paulu alwezele Chimoteu atwaleho lika kukafwa vakwavo. Mwomwo ika? Mwomwo kulinga ngocho mwalilwila ivene nakulwila vaze navamwivwilila. (Chimo. 1, 4:16) Twazanga vausoko wetu, shikaho twasaka vatachikize muchano wamuMazu aKalunga. Vilinga asolwele ndumbu Pauline namazu ahanjikilenga vyakafwile tanga yenyi. Kaha makumbi ano Pauline ali jino nakulivwisa kuwaha kuzachila Yehova hamwe nalunga lyenyi. Vosena vali nakuzata upayiniya, kaha lunga lyenyi Wayne apwa jino kalama.

10. Mwomwo ika twatela kutalilila chikoki vausoko wetu?

¹⁰ Vatalililenu chikoki. Kachi nge tunaputuka kukavangiza jindongi jamuMbimbiliya, vausoko wetu vanahase kutujinda. Kakavulu veji kumonanga jino ngwavo katweshi nakulikata navo muvilika vyamukwitavako, kaha nawa katweshi kwazana navo muvihande vyamapolitikiko. Vausoko wetu vamwe vanahase kupihilila nayetu. (Mateu 10:35, 36) Oloze katwatela kulitwamina kuvakafwako. Kachi nge natulitwamina kuvakafwa, kaha nachisolola nge tunavasopesa lyehi ngwetu kavatelemo kukapwa nakuyoya chahaya myaka yosenako. Yehova katuhana mulimo wakusopesa vatuko, oloze mulimo kana auhana kuli Yesu. (Yowa. 5:22) Kachi nge natutalilila vausoko wetu chikoki, kaha navevwilila kumujimbu natuvambulila.—Talenu lipwata lyakwamba ngwavo, “ Zachisenu Keyela Yetu haKunangula.”

11-13. Vyuma muka munalinangula kuli Alice mujila ayoyelelemo navisemi jenyi?

¹¹ Pwenu vakumika hakulumbununa vyuma mwafwelela. (Vishi. 15:2) Tutalenu chakutalilaho chaAlice. Alinangwile muchano omu apwile nakutwama kulifuchi lize lyapwililile kwakusuku navisemi jenyi, vaze vazanyinenga chikuma mumapolitiki kaha nawa kavafwelela Kalungako. Amwene ngwenyi atelele kulweza washi visemi jenyi vyuma vyamwaza apwile nakulinangula. Ambile ngwenyi: “Kachi nge muvandamina hahite lwola lwalusuku numba ulweze vausoko wove muchano unawane, kaha vatanga jove navapihilila chikuma.” Ngocho asonekelelenga visemi jenyi mikanda nakuvalwezako vihande vimwe vyamuMbimbiliya vize ashinganyekele ngwenyi navivevwisa kuwaha. (Koli. 1, 13:1-13) Asakwilililenga visemi jenyi hakumulela nakumuzakama mukuyoya, ngocho avatuminyinyinenga wana. Omu ayile nakumeneka visemi jenyi, akafwile chikuma naye milimo yahazuvo. Hakavanga omu alwezele visemi jenyi vyamuchano alinangwile kavawahililileko.

¹² Omu Alice apwile navisemi jenyi, atwalileho lika kutanganga Mbimbiliya hakumbi hakumbi. Ambile ngwenyi: “Kutanga Mbimbiliya hakumbi hakumbi chakafwile mama amone nge ngwamwene Mbimbiliya kupwa yayilemu.” Oloze ise asakile kutachikiza vyavivulu haMbimbiliya mangana amone vyuma vinalingisa mwanenyi etavile vyuma kana, nakufwila nawa kuwanyina Mbimbiliya tutenga. Alice ambile nawa ngwenyi: “Ngwahanyine tata Mbimbiliya, muze ngwasonekele mazu amwaza aze ngwashinganyekele ngwami nawamuheta kumuchima.” Kulinga chuma kana chanehele nganyo muka? Mukutela kuwanyina Mbimbiliya tutenga, oloze jino tata alivwishile kuwaha vyuma atangilenga.

¹³ Nayetu nawa twatela kupwa vakumika hakulumbunwina vausoko wetu vyuma twafwelela numba tuhu natuhita muvyeseko. (Koli. 1, 4:12b) Chakutalilaho, Alice  vamufumbukilile kuli naye. Ambile ngwenyi: “Omu vangumbapachishile mama angwambilenga ngwenyi, ‘mwana wakulikanga.’” Uno Alice alingile ngachilihi? Ambile ngwenyi: “Numba tuhu mama ahanjikilenga mazu amapi, oloze ngwatwalileho lika kumuvumbika nakumulweza ngwami ngunalisakwila lyehi ami yavene kupwa nguChinjiho chaYehova, kaha kangweshi kwalumuna vishinganyeka vyamiko. Ngwamulwezelenga ngwami ngwamuzangile chikuma. Tuvosena twalilile, kufumaho ngwamutelekelele vyakulya vize azanga chikuma. Kufuma vene haze mama atachikijile jino ngwenyi, Mbimbiliya yangulingishile ngupwenga navilinga vyamwaza.”

14. Mwomwo ika katwatela kwitavila vausoko wetu vatuhonese kuzachila Yehovako?

¹⁴ Chinahase kumbata lwola numba vausoko wetu vakatachikize ngwavo twamona kulemesa Yehova kupwa chachilemu. Chakutalilaho, omu Alice asakwile kuzata upayiniya muchishishisa chakuzata milimo vamusakwililile visemi jenyi, naye alilile cheka. Oloze Alice atwalileho lika kumika. Kaha ambile ngwenyi: “Kachi nge nawitavila vausoko wove vakushinjile ulinge chuma chimwe, kaha navakakushinjila cheka ukalinge vyuma vikwavo nawa. Oloze nge naumika nakuvalumbunwina vyuma wafwelela, kaha vausoko wove vamwe vanahase kukwivwilila.” Omu mukiko chapwile kuli Alice. Visemi jenyi vosena vali nakuzata upayiniya, kaha ise apwa jino kalama.

15. Kweseka naMateu 5:14-16, naWaPetulu 1, 2:12, uno ‘vilinga vyamwenemwene’ vyavandumbwetu vinahase kukafwa ngachilihi vausoko wetu?

¹⁵ Yehova eji kukokanga vatu kuhichila ‘muvilinga vyamwenemwene’ vyavangamba jenyi muchikungulwilo chavaka-Kulishitu. (Tangenu Mateu 5:14-16; WaPetulu 1, 2:12.) Nge muka-mahyenu  kapwa Chinjiho chaYehovako, kutala atachikiza vandumbwenu muchikungulwilo chenu tahi? Pauline uze twavulukanga, asanyikile vandumbwetu kuzuvo yenyi mangana lunga lyenyi avatachikize. Lunga lyenyi Wayne, eji kwanukanga omu ndumbwetu umwe amukafwile mangana atachikize Vinjiho. Ambile ngwenyi: “Ou ndumbwetu alombele likumbi limwe kumilimo nakulisuula kwiza mangana tutalile hamwe ngunja kuzuvo yami. Echi changukafwile ngutachikize ngwami kumana naikiye eji kulihizumunanga.”

16. Mwomwo ika twatela kusanyika vausoko wetu vezenga nakukunguluka nayetu?

¹⁶ Jila yimwe yamwaza yakukafwilamo vausoko wetu shina kuvasanyika vezenga tukunguluke navo. (Koli. 1, 14:24, 25) Kukunguluka chatete ayileko Wayne, shina chaKwanuka Kufwa chaMwata mwomwo alingile hanakotoka lyehi kumilimo, kaha nawa kukunguluka kana kachambachile lwola lwalusukuko. Ambile ngwenyi: “Kangwevwishishile kanawa chihandeko, oloze ngweji kwanukanga kaha vatu. Vangutambwokesele nakungunyaka mumavoko. Ngwatachikijile jino ngwami vatu kana vapwa vachisambo.” Kwapwile lunga napuwenyi vaze vakafwilenga puwami namwanetu walunga kukukunguluka namumulimo wamuwande. Shikaho, omu Wayne asakile kutachikiza vyavivulu havyuma apwile nakulinangula puwenyi Pauline, alwezele lunga wamutanga yize yakafwile puwenyi namwanavo walunga mangana vaputuke kumunangula Mbimbiliya.

17. Mwomwo ika katwatela kulihana mulonga nge vausoko wetu kavate kuzachila Yehova, kaha mwomwo ika katwatela kuzeya kuvakafwako?

¹⁷ Twafwelela ngwetu kulutwe vausoko wetu navakeza nakuzachila Yehova hamwe nayetu. Kaha tunahase kuzata nangolo tuvakafwe vazachile Yehova, oloze pamo kaveshi kukeza mumuchanoko. Nge mukiko, kaha katwatela kulihana mulongako. Anukenu ngwenu katwashinjila mutu etavile vyuma twafwelelako. Chipwe ngocho, tachikizenu ngwenu omu vausoko wenu navamimona muvakuwahilila hakuzachila Yehova, chinahase kukavalingisa navakiko vakaputuke kuzachila Yehova. Valombelenungako nakuvambulila mukuzangama. Kanda namuzeya kuvakafwako. (Vili. 20:20) Tachikizenu ngwenu Yehova mwamikisula. Nge vausoko wenu navamivwilila kaha navakavalwila.