UNO mwafwila kuzatako mulimo umwe muchikungulwilo tahi? Pamo mwasaka kukazatako mulimo umwe uze veji kuzatanga kuli ndumbwenu weka. Nyi pamo mwasaka kuzatako milimo yeka muliuka, chipwe kuzata milimo yize mwazachilenga hakavanga. Oloze jino muli nakuhona kuyizata mwomwo yaushinakaji, namisongo, nakukaluhwa chajimbongo chipwe mwomwo yakuzakama tanga. Nyi pamo mulimo mwazachilenga hamyaka yayivulu vali nakuuzata kuli ndumbwenu weka mwomwo yakwalumuka chavyuma muliuka. Munahase kwivwa ngwenu kamweshi nakuzachila kanawa Yehova nganomu mwasakako. Echi chinahase kumilingisa mulivwe kupwa vamokomoko. Vyuma muka navimikafwa muhone kulivwa kupwa vamokomoko? Chuma muka nachimikafwa mutwaleho lika kupwa vakuwahilila?

Tunahase kutwalaho kupwa vakuwahilila hakukavangiza chakutalilaho chaYowano Muka-kumbapachisa. Yowano alivwishilenga kuwaha kuzata milimo yayivulu, kaha kashinganyekele ngwenyi kulutwe vyuma navikalumukako. Kashinganyekele ngwenyi mwakatwama myaka yayivulu munjele kuhambakana myaka yize azachile mumulimo wakwambululako. Numba tuhu apwile muukalu kana, oloze apwile lika wakuwahilila mukuyoya chenyi chosena. Vyuma muka vyamukafwile? Kaha tunahase kutwalaho ngachilihi kupwa vakuwahilila numba nge vyuma kavyeshi nganomu twashinganyekeleko?

Kafwe mu April mumwaka wa 29 C.E., Yowano aputukile mulimo vamuhanyine kuli Yehova wakulweza vatu vyakwiza chaMeshiya. Avalwezelenga ngwenyi: “Pihililenu nakwalumuka mwomwo Wangana wamelu unapandama kwakamwihi.” (Mateu 3:2; Luka 1:12-17) Vatu valingile nge muze avalwezelenga. Kaha vavavulu vafuminenga kuvihela vyakwakusuku nakwiza nakwivwilila kumazu ahanjikilenga, ngocho vapihililile nakwalumuka nakuvambapachisa. Yowano ahamukile hakuhuhumuna vatwamina vamukwitava vaze valimwene kupwa vakwoloka hakuvalweza ngwenyi kusopesa chapwile nakwiza hali vakiko nge kaveshi kupihilila nakwalumukako. (Mateu 3:5-12) Kuheta kafwe mu October 29 C.E, amwene omu mulimo wenyi wazovolokele omu ambapachishile Yesu. Kufuma vene haze, Yowano alwezele tumbaji twenyi vamwe vakavangize Yesu, Meshiya uze vashikile.—Yowa. 1:32-37.

Hakuwana nge Yowano azachilenga mulimo wakulipwila, chalingishile Yesu ahanjike ngwenyi: “Hali vaze vasemuka kuli mapwevo kaheshi weka wakuhambakana Yowano Muka-kumbapachisako.”  (Mateu 11:11) Twafwelela ngwetu Yowano alivwishile kuwaha kuzata milimo amuhanyine Yehova. Nayetu makumbi ano tweji kwivwanga kuwaha kuzata milimo eji kutuhananga Yehova. Chakutalilaho, tushimutwilenu hali ndumbwetu Terry napuwenyi Sandra, vaze vanazate mumulimo washimbu yosena hamyaka yakuhambakana 50. Terry ambile ngwenyi: “Ngunazate milimo yakulisezaseza yakufwana nge upayiniya, kuzachila haMbetele, upayiniya wakulipwila, kalama wakujinguluka nakalama wangalila. Oholyapwa nguli nakuzata cheka upayiniya wakulipwila. Tweji kwivwanga kuwaha kuzata milimo yamuliuka, oloze ngana muze chapwile kuli Yowano hakusaka tutwaleho lika kupwa vakuwahilila numba nge vyuma vinalumuka, twatela kuzata nangolo.

Chuma chalingishile Yowano Muka-kumbapachisa atwaleho lika kupwa wakuwahilila shina kumona mulimo vamuhanyine kupwa waulemu. Tutalenu chakutalilaho, kufuma haze vambapachishile Yesu, mulimo waYowano wapwile nakukehelako oloze mulimo waYesu wapwile nakutohwelako. Tumbaji vaYowano valizakaminyine nakumulweza ngwavo: ‘Mutu uze unambululanga vyaikiye, ali nakumbapachisa vatu, kaha vatu vosena vali nakuya kuli ikiye.’ (Yowa. 3:26) Yowano avakumbulwile ngwenyi: “Weshowo ali namwenga ikiye ivene mwenyamwenga. Oloze sepa lyamwenyamwenga, omu mwemana nakwivwa mwenyamwenga ali nakuhanjika, mwawahilila chikuma hakwivwa lizu lyenyi. Shikaho ngunawahilila jino chikuma.” (Yowa. 3:29) Yowano kapwile nakusaka kulipecha naYesuko, kaha nawa kamwene ngwenyi milimo yenyi yinapu jino yamavokovoko hakuyesekesa kumilimo azachile Yesuko. Oloze Yowano apwile lika wakuwahilila mwomwo atachikijile ngwenyi apwile “sepa lyamwenyamwenga.”

Muchima asolwele Yowano wamukafwile apwenga wakusuuluka numba tuhu mulimo kana wapwile waukalu. Chakutalilaho, Yowano apwile kanajili kufuma vene hakusemuka chenyi, ngocho kavamwitavishile kunwa vinyoko. (Luka 1:15) Yesu ambile ngwenyi: “Yowano ejile, kalilengako, kanwinengako.” Oloze Yesu natumbaji twenyi kavavakanyishile kulya nakunwako. (Mateu 11:18, 19) Kaha Yowano nawa kalingilenga vyuma vyakukomwesako oloze ejivile ngwenyi tumbaji twenyi natumbaji twaYesu navakavahana ngolo jakulinga vyuma vyakukomwesa. (Mateu 10:1; Yowa. 10:41) Chipwe ngocho, Yowano kechelelele vyuma kana vimuhombeseko, atwalileho lika nakuzata mulimo amuhanyine Yehova.

Nayetu nawa nge natumona mulimo tuli nakuzata muliuka lyaYehova kupwa waulemu, kaha natutwalaho lika kupwa vakuwahilila. Terry uze twavulukanga ambile ngwenyi: “Ngwazachilenga natwima kala mulimo uze vanguhanyine.” Omu eji kushinganyekanga milimo nazate mumulimo washimbu yosena eji kwambanga ngwenyi: “Kangwaliveya numba hahandendeko, ngweji kwivwanga kaha kuwaha kushinganyeka milimo ngunazate.”

Tunahase kuwahilila nge natushinganyeka ovyo vinalingisa mulimo kana kupwa waulemu. Chapwa hikutokwa chikuma kupwa “tuvaka-kuzachila hamwe naKalunga.” (Koli. 1, 3:9) Ngana muze tweji kulamanga chinoma chandando yayinene mangana chisolokenga chaulangaji, mukiko chatela kupwa nakuli yetu, nge natusaka tutwaleho lika kupwa vakuwahilila kaha twatela kushinganyekanga hakutokwa twatwama nacho hakupwa vaka-kuzachila hamwe naKalunga. Katweshi kwesekesa milimo yetu kumilimo veji kuzatanga vakwetuko, chipwe kumona milimo yetu kupwa yamokomoko hakuyesekesa nayize vazata vakwetuko.—Ngale. 6:4.

Yowano ejivile ngwenyi mulimo wenyi wakwambulula kaweshi kutwalililahoko, oloze pamo kejivile mujila naukakuminamoko. (Yowa. 3:30) Jino kuheta mu 30 C.E., omu mwahichile tukweji 6 kufuma haze ambapachishile Yesu, vamuhakile mukamenga kuli Mwangana Helote. Numba tuhu apwile mukamenga, oloze awanyinengako jijila jakwambulwilamo mujimbu. (Mako 6:17-20) Chuma muka chamukafwile atwaleho lika kupwa wakuwahilila numba tuhu apwile muukalu kana? Chuma chamukafwile shina kuhaka muchima kuvyuma vize amona Yehova kupwa vyavilemu.

Omu Yowano apwile mukamenga, atambwile mujimbu wakuvuluka milimo azachilenga Yesu. (Mateu 11:2; Luka 7:18) Yowano ejivile ngwenyi Yesu apwile Meshiya, oloze pamo ashinganyekele ngwenyi mwakatesamo ngachilihi vyuma vyosena vize vavuluka muVisoneka ngwavo mwakatesamo Meshiya. Pamo alihulishile ngwenyi, hakuwana nge Meshiya navakamuhana  wangana, uno chiyulo chaYesu kalinwomu chiputuke tahi? Uno mwangufumisa mukamenga tahi? Hakusaka kutachikiza mashina namasongo, Yowano atumine tumbaji twenyi vavali vakahulise Yesu ngwavo: “Ove yove Uze vambile ngwavo ali nakwiza tahi, nyi twatela kutalililako weka?” (Luka 7:19) Twafwelela ngwetu omu vakindulukile, Yowano atela evwililile kanawa omu vamulwezele ngwavo, Yesu apwanga nakuka vatu mujila yakukomwesa. Kaha navashiki valweze Yowano ngwavo: “Tupuputa vali nakumona, vitonji vali nakutambuka, vaka-mbumba vali nakuvatomesa, tujika matwitwi vali nakwivwa, vafu vali nakuvasangula, kaha vaka-kuhutwa vali nakuvambulila mujimbu wamwaza.”—Luka 7:20-22.

Twafwelela ngwetu mujimbu vamulwezele wamukolezezele chikuma. Wasolwele hatoma nge Yesu ateselemo upolofweto wahanjika hali Meshiya. Numba tuhu kwiza chaYesu kachalingishile Yowano vamufumise mukamengako, oloze Yowano atachikijile ngwenyi milimo azachile kayayile mwanganaveneko. Mujimbu kana wamulingishile awahilile numba tuhu apwile mukamenga.

Nayetu nawa nge natuhaka michima kumilimo yaYehova, kaha natumika nakupwa lika vakuwahilila. (Kolo. 1:9-11) Chuma nachitukafwa shina kutanganga Mbimbiliya nakushinganyeka havyuma natutanga, echi nachitukafwa tumone ngwetu kala milimo tweji kuzachilanga Yehova kayeshi yakulishina tuhuko. (Koli. 1, 15:58) Sandra ambile ngwenyi: “Kutanga kapetulu umwe muMbimbiliya hakumbi hakumbi chinangukafwe ngupandame chikuma kuli Yehova. Chinangukafwe nawa ngushinganyekenga hali ikiye muchishishisa chakushinganyeka hali ami ivene.” Twatela nawa kushinganyekanga hamijimbu yize yinakuhanjikanga hamilimo vali nakutesamo vandumbwetu echi nachitukafwa tuhone kushinganyeka chikuma hali etu vavene. Sandra ahanjikile nawa ngwenyi: “Kutala jipolongalamu ha JW Broadcasting^® kakweji hikakweji chinatukafwe tupandame chikuma kuliuka, jeji kutukafwanga nawa tutwaleho lika kupwa vakuwahilila hakuzata mulimo wetu.”

Lwola luze Yowano Muka-kumbapachisa azachile mulimo wenyi akilikichile nangolo “nashipilitu ngana yaElija,” kaha nawa ngana muze chapwile kuli Elija, naYowano “evwilenga nganomu tweji kwivwanga nayetu.” (Luka 1:17; Yako. 5:17) Nge natumulondezeza nakuhaka vyuma vyakushipilitu kulutwe ngana muze alingile, kaha nayetu natutwalaho lika kupwa vakuwahilila hakuzata milimo yaWangana chamokomoko naukalu natumona mukuyoya chetu.