CHIHANDE CHAKULINANGULA 32
Zangi Yenu Yitohwenga Lika
“Echi chikiko ngweji kulombelanga lika, mangana ngwami zangi yenu yitohwenga lika.”—FWILI. 1:9.
MWASO 106 Pwenunga naZangi
VYUMA NATUSHIMUTWILA *
1. Veya vatungile chikungulwilo muFwilipi?
OMU kaposetolo Paulu, naShilase, naLuka naChimoteu vahetele munganda yaFwilipi, vawanyine vatu vavavulu vaze vetavilile mujimbu wamwaza waWangana. Shikaho ava vandumbwetu vawana vatwima vatungile chikungulwilo, kaha tumbaji vosena vaputukile kulikungulwila hamwe, chasoloka nge valikungulwililenga muzuvo yaLuchiya uze apwilenga wazumbu.—Vili. 16:40.
2. Ukalu muka vamwene vatu muchikungulwilo kana?
2 Echi chikungulwilo chachihya chamuFwilipi chaputukile kumona ukalu. Satana alingishile vaka-kole jaKalunga vafumbukile vaze vapwile nakwambulula mujimbu wamwaza. Paulu naShilase vavakashile nakuvaveta jimbwechi, kufumaho vavatwalile mukamenga. Kahomu vavalowele mukamenga, vayile kuli vandumbwavo nakuvakolezeza. Kufumaho, Paulu, naShilase naChimoteu vafumine muze munganda, oloze Luka pamo asalile. Vyuma muka vyasolokele kuli vandumbwetu muchikungulwilo kana? Yehova avakafwile nashipilitu yenyi yajila, kaha vatwalileho kuzata natwima. (Fwili. 2:12) Echi chevwishile Paulu kuwaha.
3. Vyuma muka vize alombele Paulu kweseka namazu ahali Wavaka-Fwilipi 1:9-11?
3 Omu mwahichile myaka 10, Paulu asonekele mukanda kuchikungulwilo chamuFwilipi. Mumukanda kana mwatwama mazu aze asolola omu Paulu azangile vandumbwenyi. Asonekele ngwenyi: “Nguli nakufwila kupwa nayenu muvosena hamwe hazangi yami nge yize atwama nayo Kulishitu Yesu.” (Fwili. 1:8) Avalwezele ngwenyi eji kuvalombelangako. Eji kulombanga Yehova avakafwe mangana zangi yavo yitohwenga lika, nakukekesa vamone vyuma vyavilemu, nakuzeneka kupwa nakatenga, nakuzeneka kuhukanyisa vakwavo nakwima mihako yakwoloka. Mazu asonekele Paulu anahase kutukafwa nayetu makumbi ano. Tutangenu mazu aze asonekelele vaka-Fwilipi. (Tangenu Wavaka-Fwilipi 1:9-11.) Natushimutwila vishina ahanjikile nakumona omu tunahase kuvizachisa.
ZANGI YENU YITOHWENGA LIKA
4. (a) Yehova asolola ngachilihi nge atuzanga kweseka namazu ahali WaYowano 1, 4:9, 10? (b) Uno natusolola ngachilihi ngwetu twazanga chikuma Kalunga?
4 Yehova asolwele zangi yenyi yayinene hakutuma Mwanenyi kwiza hano hamavu nakufwila jishili jetu. (Tangenu WaYowano 1, 4:9, 10.) Zangi yenyi yeji kutulingisanga tumuzange. (Loma 5:8) Shikaho, twatela kuzanga chikuma Yehova. Yesu alwezele vaFwaliseu ngwenyi: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.” (Mateu 22:36, 37) Twatela kuzanga Kalunga namichima yetu yosena, kaha hakumbi hakumbi zangi kana yatela kutohwelako lika. Paulu alwezele vaka-Fwilipi ngwenyi, ‘zangi yavo yitohwenga lika.’ Vyuma muka twatela kulinga mangana tutwaleho lika kuzanga Kalunga?
5. Uno natutwalaho ngachilihi kuzanga Kalunga?
5 Twatela kutachikiza Yehova numba jino tumuzange. Mbimbiliya yamba ngwayo: “Weshowo azeneka kuzanga vakwavo katachikiza Kalungako, mwomwo Kalunga ikiye zangi.” (Yowa. 1, 4:8) Kaposetolo Paulu ambile ngwenyi, natutwalaho lika kuzanga Kalunga kachi nge natupwa “nachinyingi chakwoloka, nakunangakana chosena” chakutachikiza Kalunga. (Fwili. 1:9) Omu twaputukile kulinangula Mbimbiliya, twazangile Yehova numba tuhu katwatachikijile muchano wauvuluko. Oloze omu twatwalilileho kulinangula Mbimbiliya, twamuzangile jino chikuma. Echi chikiko chatulingisa tumone kutanga Mbimbiliya hakumbi hakumbi nakushinganyeka havyuma natutanga kupwa chachilemu chikuma mukuyoya chetu.—Fwili. 2:16.
6. Kweseka namazu ahali WaYowano 1, 4:11, 20, 21, mwomwo ika twatela kuzanga chikuma vandumbwetu?
6 Hakuwana nge Kalunga atuzanga, nayetu twatela kuzanga vandumbwetu. (Tangenu WaYowano 1, 4:11, 20, 21.) Tunahase kushinganyeka ngwetu kacheshi kupwa chachikalu kuzanga vandumbwetuko. Mwomwo tuvosena tweji kulemesanga Yehova nakufwila kulondezeza vilinga vyenyi vyamwaza. Kaha nawa tweji kukavangizanga chakutalilaho chaYesu uze atuzangile chikuma nakutufwila. Oloze shimbu jimwe chinahase kupwa chachikalu kukavangiza lushimbi lwakuzanga vakwetu. Tutalenu chuma chasolokele muchikungulwilo chamuFwilipi.
7. Vyuma muka natulinangula kuli Paulu mujila ahuhumwinyinemo Yuwochiya naSunduke?
7 Yuwochiya naSunduke vapwile vandumbwetu vatwima vaze ‘vakilikichilenga hamwe’ nakaposetolo Paulu. Oloze kavatwalilileho kulikatako, pamo mwomwo yakuhona kulivwasana. Omu Paulu asonekele mukanda kuchikungulwilo vapwile ava vandumbwetu vamapwevo, avahuhumwine “vapwenganga navishinganyeka vyovimwe.” (Fwili. 4:2, 3) Ngocho ahuhumwine nawa chikungulwilo chosena ngwenyi: “Lingenunga lika vyuma vyosena chakuzeneka kutatwoka nakulipula jipami.” (Fwili. 2:14) Shikaho kuvahuhumuna mujila kaneyi kachakafwile kaha ava vandumbwetu vamapwevo vavaliko, oloze chakafwile chikungulwilo chosena chilinunge hamwe.
Mwomwo ika twatela kutwalaho kumonanga vandumbwetu mujila yamwaza? (Talenu palangalafu 8) *
8. Mwomwo ika shimbu jimwe chinahase kutukaluhwila kuzanga vandumbwetu, kaha tunahase kuhonesa ngachilihi muchima kana?
8 Ngana muze chapwile kuli Yuwochiya naSunduke, nayetu chinahase kupwa chachikalu kulivwasana navakwetu mwomwo yakulitala hatutenga. Tuvosena tweji kulimbenjanga. Kachi nge natutalanga hatutenga twavakwetu, kaha nachipwa chachikalu kuvazanga. Chakutalilaho, kachi nge ndumbwetu uze twatelanga kuwahisa nenyi haZuvo yaWangana kejileko, chinahase kutwivwisa kupihya. Nge natushinganyekanga havyuma vyosena vize ali nakulimbenjanga ndumbwetu, kaha tunahase kwivwa kupihya chikuma nakuhona jino kumuzanga. Kachi nge nayenu mukiko mweji kwivwanga, kaha mwatela kushinganyeka hamazu akwamba ngwavo, Yehova eji kumonanga tutenga twetu natutenga twavandumbwetu. Oloze tuvosena atuzanga numba tuhu twatwama natutenga. Shikaho twatela kulondezeza Yehova mangana tuzangenga vandumbwetu numba tuhu veji kulimbenjanga. Nge natuzanganga vandumbwetu, kaha natulinunga hamwe chikuma.—Fwili. 2:1, 2.
“VYUMA VYAVILEMU”
9. Vyuma muka vyaliweza ‘havyuma vyavilemu’ vize avulukile Paulu hakusoneka mukanda kuli vaka-Fwilipi?
9 Shipilitu yajila yatwaminyinyine Paulu akafwe vaka-Fwilipi, navaka-Kulishitu vosena makumbi ano ‘mangana vahase kukekesa vamone vyuma vyavilemu.’ (Fwili. 1:10) Hali evi vyuma vyavilemu haliweza nakujilika lijina lyaYehova, nakutesamo vyuma ajina, nakutwama mukuunda nakulinunga muchikungulwilo. (Mateu 6:9, 10; Yowa. 13:35) Kachi nge natumona vyuma kanevi kupwa vyavilemu, kaha natusolola ngwetu twazanga Yehova.
10. Vyuma muka twatela kulinga mangana vatumone kupwa vakuzeneka katenga?
10 Paulu ahanjikile nawa ngwenyi, twatela ‘kupwa vakuzeneka katenga.’ Echi kachalumbununa nge twatela kupwa vakukupukako. Katweshi kuhasa kupwa vakuzeneka katenga ngana mwaYehova Kalungako. Oloze Yehova mwatumona kupwa vakuzeneka katenga kachi nge natuzata nangolo mangana tuzamise zangi yetu nakukekesa tumone vyuma vyavilemu chikuma. Jila yimwe tweji kusolwelangamo zangi yetu, shina hakuzata nangolo mangana tuhone kuhukanyisa vandumbwetu.
11. Mwomwo ika katwatela kuhukanyisanga vandumbwetuko?
11 Mazu aze vatulweza ngwavo kanda kuhukanyisa vakwenuko apwa amalemu chikuma. Uno tunahase kuhukanyisa ngachilihi vakwetu? Tunahase kuvahukanyisa kweseka navyakuhemahema natusakula, nauvwalo natusakula chipwe milimo natusakula kuzata. Vyuma natusakula pamo kavyeshi kupwa vyakuhengako. Oloze navipwa vyakuhenga, nge navihukanyisa vandumbwetu nakulemeka vivezu vyavo. Yesu ambile ngwenyi nachiwaha mutu kana kumukashilila lilwola lyalilemu mushingo yenyi, nakumumbila hamwambe wamukalungalwiji nge mwahukanyisa umwe hali mikoko jenyi.—Mateu 18:6.
12. Chuma muka tunalinangula kuli vapayiniya vaze valimbata?
12 Uno lunga napuwenyi vaze vapwa vapayiniya vakavangijile ngachilihi awa mazu aYesu? Ou lunga napuwenyi vapwile muchikungulwilo muze mwapwile lunga weka napuwenyi vaze vapwile vavahya mumuchano, vaze vafumine mujitanga muze kavavetavishile kulinga vyuma vimwe vize vasakilengako. Valikomokelele hakutachiza ngwavo vaze vapayiniya vayile nakutala jivindiyo. Kufumaho vaze vapayiniya valitwaminyinyine kuyanga nakutala jivindiyo palanga nomu vaze vaka-kwambulula vavahya vanangwile vivezu vyavo nakutachikiza vyuma vyakwoloka nevi vyakuhenga. (Hepe. 5:14) Vyuma valingile ava vapayiniya vyasolwele nge vazangile ava vandumbwavo muvilinga namumuchano.—Loma 14:19-21; Yowa. 1, 3:18.
13. Uno tunahase kukunyula ngachilihi ndumbwetu alinge shili?
13 Jila yikwavo tunahase kuhukanyishilamo vandumbwetu shina nge natuvakunyula valinge shili. Uno tunahase kulinga ngachilihi ngocho? Achitalenu hachakutalilaho chino. Mutu uze ali nakulinangula Mbimbiliya nakilikita nangolo chikuma hatando yayisuku mangana echenga kunwa wala. Jino omu neche wala, mwamona ngwenyi katela kunwa numba tuwala twatundendeko. Omu nalumunako vilinga vyenyi mwatamo jino kumumbapachisa. Mukuhita chalwola, ndumbwetu umwe mwamusanyika kuzuvo yenyi vakalihizumune, kaha mwamushinjila mangana anwenga wala. Mwamulweza ngwenyi: “Unapu jino umuka-Kulishitu, ngocho uli nashipilitu yajila. Kaha muhako umwe washipilitu yajila shina muchima wakulikanyisa. Nge mupwa namuchima kana, kaha unahase tuhu kunwako tuwala twatundende.” Kachi nge ou ndumbwetu mwevwilila mazu kana nakuputuka cheka kunwa wala, kaha chikupu vene nachimunehela ukalu.
14. Uno kukunguluka chavaka-Kulishitu cheji kutukafwanga ngachilihi tukavangize mazu ahali Wavaka-Fwilipi 1:10?
14 Kukunguluka chetu cheji kutukafwanga tukavangize mazu atwama hali Wavaka-Fwilipi 1:10 mujijila jakulisezaseza. Chatete, vihande tweji kulinangulanga kukukunguluka vyeji kutukafwanga tumone vyuma vize amona Yehova kupwa vyavilemu. Chamuchivali, tweji kufwilanga kukavangiza vyuma tweji kulinangulanga mangana tuzeneke kupwa nakatenga. Kaha chamuchitatu, tweji kusololanga “zangi navilinga vyamwenemwene.” (Hepe. 10:24, 25) Kulikolezeza navandumbwetu cheji kutulingisanga tuvazange chikuma nakuzanga nawa Kalunga. Kuzanga Kalunga navandumbwetu, nachitukafwa tuhone kuhukanyisanga vandumbwetu.
TWALENUHO “KUZALA NAMIHAKO YAKWOLOKA”
15. Uno vaka-Fwilipi vatelelele kulinga vyuma muka numba ‘vazale namihako yakwoloka’?
15 Paulu alombeleleleko chikuma vaka-Fwilipi mangana ‘vazale namihako yakwoloka.’ (Fwili. 1:11) Vaka-Fwilipi vatelelele kulinga vyuma vyakufwana nge kuzanga Yehova navatu jenyi, nakulwezako vakwavo vyalutalililo lwavo nakwambulula mujimbu wakuvuluka Yesu. HaChisoneka chaWavaka-Fwilipi 2:15 vavulukaho chakutalilaho chikwavo chakwamba ngwavo, ‘munyikenunga nge manongo mukaye.’ Mazu kana akutamo mwomwo Yesu avulukile tumbaji twenyi ngwenyi “enu mwapwa mumumunyi wakaye.” (Mateu 5:14-16) Kaha nawa alwezele vaka-kumukavangiza vanangulenga vatu “vakapwe tumbaji.” Ambile nawa ngwenyi “namukapwanga muvinjiho . . . kuvihela vyakwakusuku vyahamavu.” (Mateu 28:18-20; Vili. 1:8) Tweji kwimanga ‘mihako yakwoloka’ kachi nge natuzata nangolo mumulimo kanou.
Paulu ali nakusonekela mukanda chikungulwilo chamuFwilipi halwola vamukashile muzuvo yenyi muLoma. Numba tuhu kavamuhanyine lisesa lyakuya mumembo nakwambululako, oloze ambulililenga vaka-kumulama navatu vaze vejilenga nakumumeneka. (Talenu palangalafu 16)
16. Uno Chisoneka chaWavaka-Fwilipi 1:12-14 chasolola ngachilihi nge tunahase kumunyika nge manongo chamokomoko naukalu? (Talenu muvwimbimbi wahalipapilo lyahelu.)
16 Chamokomoko navyuma tuli nakuhitamo, tunahase kumunyika nge manongo. Shimbu jimwe vyuma vize navisoloka nge navituhonesa kwambulula mujimbu wamwaza, vinahase kutulingisa tuwane jijila jeka jakwambulilamo. Chakutalilaho, kaposetolo Paulu asonekele mukanda kuli vaka-Fwilipi halwola vamukashile muzuvo yenyi muLoma. Oloze kumukasa kachamuhonesele kwambulila vangeji vaze vamutambukililenga namaswalale vaze vapwile nakumulamako. Paulu atwalileho lika kwambulula natwima chamokomoko naukalu kanou, echi chalingishile vandumbwetu vapwenga vakumika “nakuhanjika mazu aKalunga chakuzeneka woma.”—Tangenu Wavaka-Fwilipi 1:12-14; 4:22.
Lwola lwosena wanenungako jijila najimikafwa mwambulule chikuma mujimbu (Talenu palangalafu 17) *
17. Vandumbwetu vamwe vatwalileho ngachilihi kwambulula numba tuhu chapwile chachikalu?
17 Vandumbwetu vavavulu vali nakulondezeza Paulu hakupwa vakumika. Vandumbwetu kana vatwama mumafuchi muze vavakanyisa kwambulula, shikaho veji kuwanangako jijila jeka jakwambulwilamo mujimbu wamwaza. (Mateu 10:16-20) Mulifuchi limwe muze vakanyisa mulimo wetu, kalama wakujinguluka ambile ngwenyi, muka-kwambulula himuka-kwambulula atela kwambulila vausoko wenyi, navatu alihata navo, navakwavo vaka-shikola, navakwavo muvazachila namasepa jenyi. Mumyaka yivali kaha, vikungulwilo vyavulile muchihanda kanechi. Pamo twatwama mulifuchi muze kavakanyisa mulimo wetuko. Oloze tunahase kulinangula chishina chachilemu chikuma kuli ava vandumbwetu. Lwola lwosena wanenungako jijila najimikafwa mwambulule chikuma mujimbu, nakufwelela ngwenu Yehova mwamihana ngolo jasakiwa muhonese kala ukalu.—Fwili. 2:13.
18. Vyuma muka twatela kufwila kulinga?
18 Omu tunakuyoyela mumakumbi ano akukuminyina, tufwilenu kukavangiza mazu akuhuhumuna aze vahwiminyinyine Paulu asonekele vaka-Fwilipi. Shikaho twatela kukekesa tumone vyuma vyavilemu, nakuzeneka kupwa nakatenga, nakuzeneka kuhukanyisa vakwetu nakwima mihako yakwoloka. Kahechi nachitulingisa tutohwese zangi yetu nakuneha kavumbi hali Setu wazangi Yehova.
MWASO 17 “Ngunasake Vene”
^ par. 5 Luno hilwola twatela kuzanga chikuma vandumbwetu. Mukanda vasonekelele vaka-Fwilipi nautukafwa tumone omu tunahase kutohwesa zangi yetu numba nge tunakumona ukalu.
^ par. 54 MAZU AKULUMBUNUNA MUVWIMBIMBI: Omu vanakuwahisa muZuvo yaWangana, ndumbu Joe neche kuzata mangana ahanjike nandumbwetu walunga namwanenyi. Echi chinevwisa kupihya ndumbu Mike uze anakukomba. Anakushinganyeka ngwenyi ‘Joe atelanga kuzata keshi kushimutwila navatuko.’ Kufumaho Mike ali nakutala omu Joe anakukafwa ndumbwetu wakashinakaji. Echi chinalingisa Mike ashinganyeke havilinga vyamwaza vyandumbwenyi.
^ par. 58 MAZU AKULUMBUNUNA MUVWIMBIMBI: Mulifuchi muze vakanyisa mulimo waVinjiho, ndumbwetu ali nakwambulila sepa lyenyi mukuzangama. Kufumaho ou ndumbwetu ali nakwambulila mukwavo muvazachila, halwola lwakunoka.
