1. Mwomwo ika Yehova atengelele vyuma vyakuyoya?

SHIMBU KANDA vyuma vyosena vipwengako, Yehova apwilenga ukawenyi. Oloze kevwilenga uliko, mwomwo apwa wakuwahilila shimbu yosena. Chipwe ngocho, Yehova ajinyine kutenga vyuma vyakuyoya mangana navikiko vilivwise kuyoya. Zangi yikiko yamulingishile aputuke kutenga vyuma kana.—Samu 36:9; Yowa. 1, 4:19.

2. Uno Yesu navangelo vevwile ngachilihi hakumona vyuma vize atengele Yehova?

² Yehova avangilile kutenga Mwanenyi Yesu. Kufumaho, azachishile ou Mwana watwatwa mangana atenge “vyuma vyeka vyosena,” kuhakilako namakombakaji avangelo. (Kolo. 1:16) Yesu awahililile chikuma kuzachila hamwe naIse. (Vishi. 8:30) Vangelo nawa vawahilile chikuma. Vamwene omu Yehova naMwanenyi Yesu uze apwa Kuluwa Muka-kuzata vapwile nakutenga melu namavu. Chuma muka valingile? “Vaputukile kulikuwa nakusakwilila jikushi” omu vatengele mavu, kaha tunafwelela ngwetu vatwalileho lika kusakwilila omu Yehova atengele chuma hichuma, swi nahalwola atengele vatu. (Yopa 38:7; Vishi. 8:31, kwinyikila chamwishi) Vyuma vyosenevi atengele Yehova vyasolola nge atwama nazangi namangana.—Samu 104:24; Loma 1:20.

3. Kweseka nachisoneka chaWavaka-Kolinde 1, 15:21, 22, uno ndando yakusokola yazata mulimo muka?

³ Yehova ajinyine ngwenyi vatu valivwisenga kuwaha kuyoya hamavu. Oloze omu Alama naEve valikangile kuli Sevo wamwilu,  chavalingishile vahone kupwa nakuyoya chahaya myaka yosena. (Loma 5:12) Jino Yehova alingile ngachilihi? Hahaze vene avulukile jila mwakazachisa mangana akasokole vatu. (Kupu. 3:15) Ajinyine kuhana ndando yakusokola vana vaAlama kushili nakukufwa. Kufumaho ahanyine nawa mutu himutu lisesa lyakulisakwila kumuzachila nakukawana kuyoya chamyaka yosena.—Yowa. 3:16; Loma 6:23; tangenu Wavaka-Kolinde 1, 15:21, 22.

4. Vihula muka natushimutwila muchihande chino?

⁴ Kalunga ashika ngwenyi mwakasangula vafu, kahechi chaneha vihula vyavivulu chikuma. Chakutalilaho tunahase kulihulisa ngwetu, uno kusanguka nachikapwa ngachilihi? Kutala natukatachikiza vatu twazanga omu navakasanguka tahi? Uno kusanguka nachikaneha ngachilihi kuwahilila? Kaha kushinganyeka hakusanguka nachitukafwa ngachilihi tumusakwilile Yehova hazangi yenyi namangana enyi namuchima wenyi wakutalilila chikoki? Tushimutwilenu jino vihula kana.

5. Mwomwo ika nachipwila chakutamo kwamba ngwetu vafu navakavasangula mujila yakulonga, kaha nawa keshi halwola lwolumweko?

⁵ Chinahase kupwa chakutamo kwamba ngwetu, omu Yehova mwakazachisa Mwanenyi akasangule makombakaji avafu, keshi kukavasangula halwola lwolumweko. Mwomwo ika? Mwomwo nge vosena navakasangukila hamwe, kaha nakukapwa chimbalanganyi. Yehova kalinga vyuma muliwayangako, mwomwo atachikiza ngwenyi, vyuma vyatela kutambuka kanawa numba kupwenga kuunda. (Koli. 1, 14:33) Shimbu kanda kutenga vatu, Yehova azachile hamwe naMwanenyi mumeso akuunda hakutenga mavu navyuma vyatwamaho. Shikaho omu Yesu mwakayula haMyaka Likombakaji mwakasolola muchima woumwe hakuzachila  hamwe navaze navakayovoka haAlamangetone mangana vakawahise mavu nakupwa vakulizanga kutambula vaze navakasanguka.

6. Kweseka naVilinga 24:15, veya navakapwa hali vaze navakasanguka?

⁶ Mulimo waunene navakazata vaze navakayovoka haAlamangetone shina kunangula vaze navakasanguka vyaWangana waKalunga navyuma asaka Yehova. Mwomwo ika? Mwomwo havatu vaze navakasanguka, vavavulu navakapwa “vaka-kuhenga.” (Tangenu Vilinga 24:15.) Vatu kana vatela kukalumuna vilinga vyavo numba vakanganyale kundando yakusokola yaKulishitu. Kunangula vatu kana vakatachikize muchano waKalunga nachikapwa himulimo waunene chikuma. Uno mutu himutu mwakapwa namuka-kumunangula, ngana muze tuli nakutetekela vilongesa vyaMbimbiliya makumbi ano tahi? Uno vaze navakalivanga kusanguka navakavahaka muvikungulwilo mangana vakavanangule mwakunangwila vakwavo vaze navakasanguka tahi? Tuvandaminenu tukamone omu nachikapwa. Olozenyi twatachikiza ngwetu kuheta kusongo yaChiyulo chaKulishitu chaMyaka Likombakaji, “hamavu hosena nahakazala nachinyingi chakumutachikiza Yehova.” (Isa. 11:9) Chikupu vene, natukalivwisa kuwaha kuyoya nakukazata nawa mulimo waunene.

7. Mwomwo ika vatu jaKalunga vatela kukapwila namuchima wakeke hakunangula vaze navakasanguka?

⁷ MuChiyulo chaKulishitu chaMyaka Likombakaji, vana vaYehova vosena navakasakiwa kwalumunako vilinga mangana tukamwivwise kuwaha. Vosena navakalinangula kupwa namuchima wakeke uze naukavalingisa vakakafwe vaze navakasanguka mangana vakambile tutenga twavo nakwononoka jishimbi jaYehova. (Petu. 1, 3:8) Chakuzeneka kukakasana, vaze navakasanguka navakafwila kukalikata chikuma navatu jaYehova vaze navakiko navakapwa ‘nakuzachila ulwilo wavo.’—Fwili. 2:12.

8. Mwomwo ika nachipwila chakutamo kwamba ngwetu vatu navakatachikiza vausoko javo vaze navakasanguka?

⁸ Kuli vyuma vimwe vyatulingisa tufwelele ngwetu, nachikapwa chachashi kutachikiza vatu twazanga vaze navakasanguka. Chakutalilaho, mijimbu yavatu vaze asangwilenga Yehova yasolola nge omu mwakasangula vafu, navakasoloka, nakuhanjika, nakushinganyeka ngana muze vapwile shimbu kanda vafwenga. Anukenu ngwenu Yesu afwanyishile kufwa kukusavala tulo, kaha kusanguka achifwanyishile kukuhinduka hatulo. (Mateu 9:18, 24; Yowa. 11:11-13) Omu vatu veji kuhindukanga hatulo veji kusolokanga, nakuhanjika, nakushinganyeka ngana muze vapwanga shimbu kanda vasavale. Chakutalilaho, hahichile makumbi awana kufuma haze afwile Lazalu nakuheta halikumbi vamusangwile, ngocho mujimba wenyi waputukile kupola. Oloze omu Yesu amusangwile, vandumbwenyi vamapwevo kavamuvulyamineko kaha ikiye nawa avanukile.—Yowa. 11:38-44; 12:1, 2.

9. Mwomwo ika vaze navakasanguka navakahonena kusanguka namijimba yakukupuka?

⁹ Yehova ashika ngwenyi vosena vaze navakapwa muchiyulo chaKulishitu kaveshi kukamba ngwavo vali nakuvizako. (Isa. 33:24; Loma 6:7) Ngocho vaze navakasanguka navakapwa namijimba yakulikangula. Chipwe ngocho kaveshi kukakupuka hahaze veneko. Mwomwo kachi nge navakakupuka hahaze vene, kaha vanahase kukavavulyama kuli vausoko namasepa javo. Chasoloka nge vatu navakakupuka chindende chindende muChiyulo chaKulishitu chaMyaka Likombakaji. Vatu navakakupuka kusongo yamyaka likombakaji omu Yesu mwakakondola Wangana kuli Ise. Halwola kana Wangana jino hiunatesamo lyehi mulimo wawo, kuhakilako vene nakulingisa vatu  kupwa vakukupuka.—Koli. 1, 15:24-28; Kuso. 20:1-3.

10. Uno kusanguka chavafu nachikamilingisa mukevwe ngachilihi?

¹⁰ Achishinganyekenu hakuwaha namukevwa omu namukasambilila vausoko wenu vaze vafwa. Uno kuwaha namukevwa nachikamilingisa mukasehe, nyi mukalile? Uno namukawahilila nakukemba myaso yakwalisa Yehova tahi? Kuhanjika muchano nachikamilingisa mukazange chikuma Yehova naMwanenyi hakumisangwila vatu mwazanga.

11. Kweseka naYowano 5:28, 29, chuma muka nachikasoloka kuli vaze veji kwononokanga jishimbi jaKalunga?

¹¹ Vaze navakasanguka nawa navakawahilila omu navakazula mutu wamwaka nakwononoka jishimbi jaKalunga jakwoloka. Vaze navakazula mutu wamwaka vakiko navakayoya haya myaka yosena. Oloze Yehova keshi kukechelela vatu vakulikanga vakatwaleho kuyoyako, mwomwo vanahase kukalingisa muPalachise mukazeneke kupwa kuunda.—Isa. 65:20; tangenu Yowano 5:28, 29.

12. Yehova mwakakisula ngachilihi vosena vaze navakapwa hano hamavu?

¹² Omu naukayula Wangana, vatu jaKalunga vosena navakamona omu nachikatesamo chisoneka chaVishimo 10:22 chize chahanjika ngwacho: “Kukisula chaYehova chikiko cheji kuhetesanga mutu luheto, kaha keshi kuhakilako luyandoko.” Shipilitu yaYehova nayikavakafwa vakapwe navilinga ngana vize apwile navyo Kulishitu, nakupwa nawa vakukupuka. (Yowa. 13:15-17; Efwe. 4:23, 24) Hakumbi hakumbi navakahindukanga namijimba yakulikangula, kaha nawa navakapwa vatu vamwenemwene. Chikupu vene chiyoyelo nachikawaha. (Yopa 33:25) Uno kushinganyeka halutalililo lwakusanguka nachimikafwa ngachilihi oholyapwa?

13. Kweseka naSamu 139:1-4, uno kusanguka nachikasolola ngachilihi nge Yehova atutachikiza kanawa?

¹³ Ngana muze tunashimutwila, Yehova mwakasangula vafu navishinganyeka navilinga vize vapwile navyo shimbu kanda vafwenga. Echi chasolola nge Yehova amizanga chikuma, ngocho eji kutachikizanga nakwanuka vyuma mweji kushiganyekanga, nomwo mweji kwivwanga, navyuma mweji kuhanjikanga nakulinga. Shikaho omu mwakamisangula nachikapwa chachashi kumikindulwishila vishinganyeka, navilinga vyenu, navyuma vize mwatachijile. Mwangana Ndavichi ejivile ngwenyi Yehova atuzakama tuvosena mutu himutu. (Tangenu Samu 139:1-4.) Uno tweji kwivwanga ngachilihi hakutachikiza ngwetu Yehova atutachikiza kanawa?

14. Kutachikiza ngwetu Yehova atutachikiza kanawa nachitukafwa ngachilihi?

¹⁴ Numba tuhu Yehova atutachikiza kanawa, oloze katwatela kulizakamina ngwetu asaka kutuwanyina tutengako. Mwomwo ika? Anukenu ngwenu Yehova atuzakama chikuma. Amona mutu himutu kupwa wamulemu. Ejiva ovyo vyeji kutulingisanga tulinge vyuma vimwe. Mazu kana akutuvendejeka chikupu. Katwatela kushinganyeka ngwetu tuli ukawetuko. Lwola lwosena Yehova eji kupwanga hakamwihi nayetu mangana atukafwe.—Miji. 2, 16:9.

15. Uno kusanguka chasolola ngachilihi nge Yehova atwama namangana?

¹⁵ Vatu vaze vevwa woma kufwa, veji kulinganga kala vyuma navavalweza kuli vaka-kole javo mwomwo yakuvevwisa woma ngwavo nge navakana navavajiha. Aka kakiko kafuta veji kuzachisanga vatu vamukaye kaSatana, hakushinjila vakwavo vasolole masepa javo chipwe kulinga vyuma vize vanejiva ngwavo vyakuhenga. Oloze kafuta kana kakeshi kuhasa kuzata  kuli etuko, mwomwo tunejiva ngwetu numba nge vaka-kole jetu navatujiha, Yehova mwakatusangula. (Kuso. 2:10) Twakunyuka chikupu ngwetu kakweshi chuma navalinga chize nachituhandununa kuli ikiyeko. (Loma 8:35-39) Chikupu vene Yehova asolola mangana hakutushika ngwenyi mwakatusangula. Echi chatulingisa tuhone kwivwa woma kutujiha kuli vatu jaSatana nakutukafwa nawa tupwenga vakumika chikuma.

16. Vihula muka mwatela kulihulisa, kaha jila namuvikumbulwilamo nayisolola ika?

¹⁶ Kachi nge vaka-kole jaYehova navamivwisa woma ngwavo navamijiha, kutala namufwelela ngwenu Yehova mwakamisangula tahi? Munejiva ngachilihi ngwenu namukamufwelela halwola lwakufwana ngana? Jila yimwe shina kulihulisa ngwenu, ‘Uno vyuma ngweji kusakulanga kulinga hakumbi hakumbi vyeji kusololanga nge ngwafwelela Yehova tahi?’ (Luka 16:10) Chihula chikwavo shina echi, ‘Kutala jila ngweji kuzachishilangamo lwola lwami najimbongo jami yasolola nge ngwafwelela ngwami Yehova mwangukafwanga nguwane vyakulikafwa navyo, kachi nge nangutondanga chatete Wangana wenyi tahi?’ (Mateu 6:31-33) Kachi nge namukumbulula ngwenu eyo kuvihula kanevi, kaha namusolola ngwenu mwamufwelela, kaha nawa namupwa vakulizakanga kufungulula kala vyeseko namumona.—Vishi. 3:5, 6.

17. (a) Uno kusanguka chasolola ngachilihi nge Yehova atwama namuchima wakutalilila chikoki? (b) Natusolola ngachilihi ngwetu twamusakwilila Yehova hamuchima kana?

¹⁷ Yehova asakula likumbi nalwola lwakukafumisako katwamino kamyaka yimo. (Mateu 24:36) Numba tuhu afwila kusangula vafu, oloze atwama namuchima wakutalilila chikoki, ngocho keshi kukalusuka kulinga chuma kana shimbu kanda lwola atongolako. (Yopa 14:14, 15) Ali nakuvandamina kukavasangula halwola lwakutamo. (Yowa. 5:28) Twatela kumusakwilila Yehova hamuchima wenyi wakutalilila chikoki. Muchima kana unalingisa etu vavavulu ‘tupihilile nakwalumuka.’ (Petu. 2, 3:9) Yehova asaka vatu vavavulu vakayoye haya myaka yosena. Jino natusolola ngachilihi ngwetu twamusakwilila Yehova hamuchima wenyi wakutalilila chikoki? Hakuzata nangolo mangana tutondetonde vatu “[vamichima] yamwaza yakusaka kuyoya chahaya myaka yosena,” nakuvakafwa vamuzange nakumuzachila. (Vili. 13:48) Ngocho navakiko navanganyala  kumuchima waYehova wakutalilila chikoki ngana muze tunanganyala etu.

18. Mwomwo ika twatela kutalililanga vakwetu chikoki?

¹⁸ Yehova mwatwalaho lika kutuzachisa swi nakusongo yamyaka likombakaji omu natukapwa vakukupuka. Oloze oholyapwa mwatwalaho kutukonekelanga jishili jetu. Nayetu twatela kumulondezeza hakutalilila vakwetu chikoki nakuhona kutokomenyanga hatutenga twavo. Chakutalilaho, lunga lyandumbwetu umwe aputukile kuviza musongo wakulizakaminanga chikuma uze wamulingishile echenga nakuya nakukunguluka. Ambile ngwenyi: “Ukalu kana wangutohwelelele. Twahonene kulinga vyuma vize twalivwasanyine kulingila hamwe mwatanga.” Chipwe ngocho ou ndumbwetu atalilile chikoki lunga lyenyi. Atwalileho kumukafwa nakupendamina hali Yehova. Kahakile mangana kuukalu apwile nakumonako, oloze ashinganyekelenga kaha havyuma vyamwaza alingilenga lunga lyenyi. Kutwala muze ambile ngwenyi: “Lunga lyami atwama navilinga vyamwaza, kaha ali nakukilikita mangana akeheseko ukalu wenyi wakulizakamina.” Omu mukiko twatela kulinga kuli vausoko wetu chipwe vandumbwetu muchikungulwilo vaze vali nakulipika naukalu waunene.

19. Chuma muka twatela kufwila kulinga?

¹⁹ Yesu navangelo vawahililile omu mavu vawatengele. Achishinganyekenu hakuwaha navakevwa omu navakamona hamavu hanazale navatu vakukupuka vaze navakazanga Yehova nakumuzachila. Achishinganyekenu nawa hakuwaha navakevwa vaze navakayula naKulishitu omu navakamona vatu vali nakunganyala kuchiyulo chavo. (Kuso. 4:4, 9-11; 5:9, 10) Achishinganyekenu omu nachikapwa chiyoyelo nge kulila namisongo nakulishona nakufwa vanavifumisako. (Kuso. 21:4) Oloze oholyapwa fwilenu kulondezeza Senu wazangi namangana uze nawa atwama namuchima wakutalilila chikoki. Nge namulinga ngocho, kaha namupwa vakuwahilila chamokomoko navyeseko namumona. (Yako. 1:2-4) Chikupu vene twawahilila chikuma mwomwo Yehova atufwelelesa ngwenyi “nakukapwa kusanguka.”—Vili. 24:15.