CHIHANDE CHAKULINANGULA 34
Mwapwa Muvavalemu muChikungulwilo chaYehova
“Nganomu mujimba wapwa umwe kaha, oloze watwama navilyo vyavivulu, kaha vilyo vyosena vyamujimba kana, numba tuhu vyapwa vyavivulu, vinapu mujimba umwe kaha, ngocho omu mukiko mwanapu naKulishitu nawa.”—KOLI. 1, 12:12.
MWASO 101 Kuzachila Hamwe Mukulinunga
VYUMA NATUSHIMUTWILA *
1. Kutokwa muka twatwama nacho?
CHAPWA hikutokwa chachinene kupwa muchikungulwilo chaYehova. Tweji kulemeselanga hamwe Kalunga navandumbwetu mukuunda nakuwahilila. Uno milimo muka mwatwama nayo muchikungulwilo?
2. Chifwanyisa muka azachishile Paulu mumikanda yayivulu yize asonekelenga?
2 Kaposetolo Paulu azachishile chifwanyisa chimwe omu asonekelenga mikanda yayivulu. Chifwanyisa kana nachitukafwa kushimutwila echi chihande. Mumikanda kana Paulu afwanyishile chikungulwilo kumujimba wamutu. Afwanyishile nawa vatu vatwama muchikungulwilo kuvilyo vyamujimba.—Loma 12:4-8; Koli. 1, 12:12-27; Efwe. 4:16.
3. Vishina muka vitatu vize natulinangula muchihande chino?
3 Muchihande chino, natumona vishina vitatu vyavilemu vize natulinangula kuchifwanyisa ahanjikile Paulu. Chatete, mutu himutu muchikungulwilo chaYehova apwa wamulemu. * Chamuchivali, natushimutwila vyuma twatela kulinga kachi nge tuli nakulivwa kupwa tuvamokomoko. Chamuchitatu, natushimutwila ovyo twatela kuzachila nangolo mangana tutesemo mulimo twazata muchikungulwilo chaKalunga.
TUVOSENA TUKWECHI MILIMO MUCHIKUNGULWILO
4. Chishina muka natulinangula kuchisoneka chaWavaka-Loma 12:4, 5?
4 Chishina chatete natulinangula kuchifwanyisa ahanjikile Paulu shina echi: Tuvosena twapwa tuvavalemu kuli Yehova. Paulu ambile ngwenyi: “Nganomu tuli navilyo vyavivulu kumujimba umwe, vilyo vyosena evi kavyeshi kuzata mulimo woumweko, ngocho nayetu nawa, numba tuhu tuvavavulu, tunapu mujimba umwe muli Kulishitu, oloze tuvosena mutu himutu tunapu tuvilyo vanungila hamwe navakwetu.” (Loma 12:4, 5) Uno chishina muka apwile nakulumbununa Paulu? Numba tuhu twazata milimo yakulisezaseza, oloze tuvosena tuvavalemu.
Tuvosena twapwa tuvavalemu numba tuhu twazata milimo yakulisezaseza muchikungulwilo (Talenu palangalafu 5-12) *
5. Uno “wana” muka uze Yehova ahana muvikungulwilo?
5 Tuvosena twejiva ngwetu vatu vatwama namilimo chikuma muchikungulwilo shina vaze vali natwaminyina. (Teso. 1, 5:12; Hepe. 13:17) Chikupu vene Yehova eji kuzachisanga Kulishitu mangana atongole “malunga kupwa wana” muchikungulwilo. (Efwe. 4:8) “Malunga” kana shina vaze vamuLizavu lyaKutwaminyina namuKomiti yaMutango natulama vakujinguluka navaka-kunangula mashikola amuliuka, navakulwane muchikungulwilo navaka-kuzachila. Vandumbwetu kana vavatongola nashipilitu yajila mangana vazakame mikoko jaYehova nakujikijisa vikungulwilo.—Petu. 1, 5:2, 3.
6. Kweseka naWavaka-Tesolonyika 1, 2:6-8, vyuma muka vafwila kulinga malunga vatongola?
6 Vandumbwetu vamalunga veji kuvatongolanga nashipilitu yajila mangana vazate milimo yakulisezaseza yamuliuka. Ngana muze vilyo vyamujimba vyakufwana nge mavoko navilyachilo vyeji kunganyalisanga mujimba wosena, navandumbwetu vamalunga vaze vatongola nawa veji kuzatanga nangolo mangana vanganyalise vandumbwavo muchikungulwilo. Kavafwila ulemuko, oloze vafwila kaha kutunga vandumbwavo nakuvakolezeza. (Tangenu Wavaka-Tesolonyika 1, 2:6-8.) Twamusakwilila Yehova hakutuhana malunga vakuhya kushipilitu vaze kavafwila kulinganyalisa vaveneko.
7. Vyuma muka vyamwaza veji kulivwisanga kuwaha vaze vazata mulimo washimbu yosena?
7 Vandumbwetu vamwe vanahase kuvatongola kupwa vamishonali, chipwe vapayiniya vakulipwila chipwe vapayiniya vashimbu yosena. Ava vandumbwetu vasakula kuzata shimbu yosena mulimo wakwambulula nakunangula vatu vapwenga tumbaji. Echi chinavakafwe vanangule vatu vavavulu vapwenga tumbaji twaKulishitu Yesu. Numba tuhu kavatwama naluheto lwaluvuluko, oloze Yehova navakisula mwamunene. (Mako 10:29, 30) Vandumbwetu kana twavamona kupwa vavalemu kaha nawa twawahilila kupwa navo muchikungulwilo.
8. Mwomwo ika vaka-kwambulula vosena vapwila vavalemu kuli Yehova?
8 Uno vandumbwetu vamalunga vatongola navaze vazata mulimo washimbu yosena, vakiko kaha vavalemu muchikungulwilo tahi? Nduma. Kala mutu uze eji kwambululanga mujimbu wamwaza apwa wamulemu kuli Kalunga namuchikungulwilo. (Loma 10:15; Koli. 1, 3:6-9) Mulimo waulemu chikuma shina wakunangula vatu vapwenga tumbaji twaMwata wetu Yesu Kulishitu. (Mateu 28:19, 20; Chimo. 1, 2:4) Vaka-kwambulula vosena vakumbapachisa navaze vakuzeneka kumbapachisa vamona ou mulimo kupwa waulemu.—Mateu 24:14.
9. Mwomwo ika twamwena vandumbwetu vamapwevo kupwa vavalemu?
9 Yehova amona nawa vandumbwetu vamapwevo vaze veji kumuzachilanga nakashishi kupwa vavalemu muchikungulwilo, numba vapwa vasomboki, chipwe visemi, chipwe vatuliwe, chipwe vajike. Mbimbiliya yahanjika hamapwevo vavavulu vaze valingilenga mwaya muchima waKalunga. Mapwevo kana vapwile namangana, nalufwelelo, natwima yakuzachila Kalunga, nakumika, nazumbu navilinga vyeka vyamwenemwene. (Luka 8:2, 3; Vili. 16:14, 15; Loma 16:3, 6; Fwili. 4:3; Hepe. 11:11, 31, 35) Twamusakwilila Yehova hakutuhana vandumbwetu vamapwevo vaze vatwama navilinga vyovimwe nganevi tunavuluka.
10. Mwomwo ika twamwena vandumbwetu vatushinakaji kupwa vavalemu?
10 Twapwa nawa vakutokwa hakupwa navandumbwetu vatushinakaji muchikungulwilo. Muvikungulwilo mwatwama vandumbwetu vatushinakaji vaze vanazachila Yehova nakashishi mukuyoya chavo chosena. Oloze tushinakaji veka vanalinangula muchano mukalinwomu. Ava vandumbwetu vosena veji kumonanga ukalu uze weji kwizanga mwomwo yaushinakaji. Ushinakaji unahase kuvahonesa kuzata chikuma milimo yamuchikungulwilo namulimo wakwambulula. Chipwe ngocho veji kuzatanga kweseka noho hakumina ngolo javo hakuzata mulimo wakwambulula nakukolezeza vandumbwavo nakuvanangula. Tweji kunganyalanga vyavivulu kuli vandumbwetu vatushinakaji ngocho twavamona kupwa vavalemu ngana muze avamona Yehova.—Vishi. 16:31.
11-12. Uno kupwa navakweze muchikungulwilo chinakukafwe ngachilihi hauka wove?
11 Nyi ngachilihi vandumbwetu vavakweze? Navakiko veji kumonanga ukalu wauvulu hakukolela mukaye kano vali nakuyula kuli Satana Liyavolo, muze nawa munayangilila vishinganyeka vyautu. (Yowa. 1, 5:19) Chipwe ngocho, tuvosena tweji kwivwanga kuwaha hakumona omu vakweze veji kwazananga hakukunguluka nakuya muwande, nakuhakwila nawa vyuma vafwelela. Chikupu vene, vakweze vapwa vavalemu muchikungulwilo chaYehova.—Samu 8:2.
12 Chipwe ngocho vandumbwetu vamwe cheji kuvakaluhwilanga kufwelela ngwavo navakiko vapwa vavalemu muchikungulwilo. Tushimutwilenu vyuma navitukafwa tumonenga ngwetu twapwa tuvavalemu muchikungulwilo.
TACHIKIZENU NGWENU MWAPWA MUVAVALEMU
13-14. Chuma muka cheji kulingisanga vamwe vashinganyeke ngwavo kavapwa vavalemuko?
13 Tushimutwilenu hachishina chamuchivali natulinangula kuchifwanyisa ahanjikile Paulu. Atachikijile vene ngwenyi vatu vamwe cheji kuvakaluhwilanga kufwelela ngwavo vapwa vavalemu muchikungulwilo. Ngocho asonekele ngwenyi: “Kachi nge lihinji nalyamba ngwalyo, ‘Ami kangweshi nguchihanda chamujimbako mwomwo kangweshi ngulivokoko,’ echi keshi chikiko nachilingisa lihinji lihone kupwa chihanda chamujimbako. Kaha kachi nge litwitwi nalyamba ngwalyo, ‘Ami kangweshi nguchihanda chamujimbako mwomwo kangweshi ngulisoko,’ echi keshi chikiko nachilingisa litwitwi lihone kupwa chihanda chamujimbako.” (Koli. 1, 12:15, 16) Uno chishina muka apwile nakulumbununa Paulu?
14 Kachi nge naulyesekesa kuli vakwenu muchikungulwilo, kaha nachikukaluhwila kumona ngwove wapwa uwamulemu. Vatu vamwe muchikungulwilo vatwama nawana wakunangula, veka wakulongesa kanawa vyuma chipwe wakuvendejeka vandumbwavo nakuvakolezeza. Pamo munahase kushinganyeka ngwenu kamwahetele haseteko vaheta vandumbwenu kanako. Echi chasolola nge mwapwa muvakulinyisa. (Fwili. 2:3) Oloze mwatela kuzangama, nge chiku, kulyesekesa chikuma kuli vakwenu nachimilingisa mulimone kupwa muvamokomoko. Kaha munahase nakushinganyeka ngwenu kamwatelemo nakumizachisako. Jino chuma muka nachimikafwa muhonese vishinganyeka kana?
15. Kweseka naWavaka-Kolinde 1, 12:4-11, chishina muka twatela kutachikiza kutalisa kumawana aze atuhana Yehova?
15 Tachikizenu ngwenu Yehova kahanyine vaka-Kulishitu vosena vamulikulukaji lyamyaka lyakulivanga shipilitu yajila mangana valinge vyuma vyakukomwesa vyovimweko. (Tangenu Wavaka-Kolinde 1, 12:4-11.) Numba tuhu Yehova avahanyine mawana akulihandununa handununa, oloze vosena avamwenenga kupwa vavalemu. Makumbi ano Kalunga katuhanyine shipilitu yajila mangana tulingenga vyuma vyakukomwesako. Oloze nayetu tukwechi mawana nauhashi wakulisezaseza. Chipwe ngocho, Yehova atumona kupwa tuvavalemu.
16. Mazu muka asonekele Paulu aze twatela kukavangiza?
16 Muchishishisa chakulyesekesa kuli vandumbwetu, twatela kukavangiza mazu asonekele kaposetolo Paulu ngwenyi: “Mutu himutu akekese vilinga vyenyi, kaha mwawahilila navyuma vyenyi ivene, keshi hakulyesekesa kumutu mukwavoko.”—Ngale. 6:4.
17. Kukavangiza mazu aPaulu nachitunganyalisa ngachilihi?
17 Kachi nge natukavangizanga mazu vamuhwiminyinyine Paulu nakukekesa vilinga vyetu, kaha natumona ngwetu nayetu tukwechi mawana nauhashi uze kaveshi nawo vakwetuko. Chakutalilaho, mukulwane muchikungulwilo nahase kupwa muka-kuzata kanawa mulimo wakunangula vatu vapwenga tumbaji, numba tuhu kahanjika vihande vyakuhyako nge ali hautenda. Veka nawa kavatachikiza kanawa kulongesa vyumako, oloze pamo vavatachikiza kupwa hitufunga vazangi, ngocho vandumbwavo veji kupwanga vakukasunuka kuya kuli vakiko mangana vavakafwe kuzachisa Visoneka. Veka pamo vavatachikijila hachisambo chavo nazumbu. (Hepe. 13:2, 16) Kachi nge natutachikiza mawana atuhana Kalunga, kaha natusuuluka nakala mulimo tuli nakuzata muchikungulwilo. Nachitukafwa nawa tuhone kwivwilanga vandumbwetu lwiso hamawana vatwama nawo aze katweshi nawoko.
18. Chuma muka nachitukafwa tuhotole uhashi wetu?
18 Chamokomoko nakulisezaseza chamilimo twazata muchikungulwilo, tuvosena twatela kufwila kuhotola uhashi wetu wakuzata milimo kana. Kaha Yehova eji kuzachisanga liuka lyenyi mangana litunangule tuhotole uhashi wetu. Chakutalilaho, hakukunguluka chamukachi kachalumingo, veji kutunangulanga mwakuzachila kanawa mulimo wakwambulula. Kutala muli nakuzachisa vyuma mweji kulinangulanga hakukunguluka kana tahi?
19. Chuma muka mwatela kulinga mangana mutengamo kuya kuShikola yaVaka-Kwambulula Wangana?
19 Yehova ali nawa nakunangula vatu jenyi kuhichila muShikola yaVaka-Kwambulula Wangana. Kushikola kana kweji kuyanga vandumbwetu vazata mulimo washimbu yosena vamyaka yakusemuka 23 nakuheta ku 65. Pamo muli nakushinganyeka ngwenu enu kamweshi kukahasa kuya kushikola kanako. Shikaho kanda kushinganyeka havyuma vize navimihonesa kuyako, oloze shinganyekenunga havyuma vize navimilingisa mufwile kuyako. Kufumaho nonekenu vyuma mwatela kulinga mangana mutesemo vyuma vyasakiwa. Kachi nge namukilikita kweseka noho hakumina ngolo jenu, kaha Yehova mwamikafwa ngocho nachipwa chachashi kulinga chuma chize mwashinganyekele ngwenu chachikalu.
ZACHISENU MAWANA ENU MUKOLEZEZE VANDUMBWENU
20. Chishina muka chatwama hali Wavaka-Loma 12:6-8?
20 Hali Wavaka-Loma 12:6-8, hatwama chishina chamuchitatu chize natulinangula kuchifwanyisa ahanjikile Paulu. (Tangenu.) Paulu asolola ngwenyi vatu muchikungulwilo vakwechi mawana akulisezaseza. Oloze chishina ashindakanyine shina chakukafwa mutu himutu azachisenga mawana atwama nawo mangana atunge vandumbwenyi nakuvakolezeza.
21-22. Chishina muka tunalinangula kuli Robert naFelice?
21 Tuchishimutwilenu chakutalilaho chandumbu Robert. Omu apwile nakuzachila mulifuchi lyeka, vamusanyikile mangana akazachile haMbetele yamulifuchi lyavo. Vamufwelelesele ngwavo nechi apihishile chauchi. Oloze ikiye ambile ngwenyi: “Hatukweji vavavulu, ngwevwilenga kupihya ngwami pamo vanangumono ngwavo kangwapwanga nakuzata kanawako. Lwola lumwe ngwashinganyekelenga kwecha kuzachila haMbetele.” Jino chuma muka chamukafwile apwenga cheka wakuwahilila? Mukwavo kalama muchikungulwilo amulwezele ngwenyi milimo atuhanyine Yehova yinatukafwe tutengamo kuzata milimo natuhane oholyapwa. Robert atachikijile jino ngwenyi atelelele kwecha kushinganyeka havyuma vyasolokele kunyima nakushinganyeka havyuma ali nakulinga oholyapwa.
22 Ndumbu Felice Episcopo napuwenyi nawa vamwene ukalu woumwe. Vakumishile shikola yaNgileyate mu 1956, kaha vazachile mulimo wakutambwojoka muBolivia. Kuheta mu 1964 vasemene mwana. Felice ambile ngwenyi: “Chatukaluhwilile kuseza mulimo uze twazangile. Kakavulu ngwalihanyine mulonga ami ivene. Oloze Yehova angukafwile ngwalumune vishinganyeka vyami, nakuhaka mangana kumulimo wami hakupwa nguchisemi.” Kutala nayenu mweji kwivwanga ngana muze evwile Robert chipwe Felice tahi? Kutala mweji kuhombanga mwomwo kamweshi cheka nakuzata milimo mwazachilengako tahi? Nge mukiko, kaha alumunenu vishinganyeka vyenu mangana mupwenga vakuwahilila nakuhaka mangana kuvyuma muli nakulinga oholyapwa omu muli nakuzachila Yehova. Kilikitenu chikuma hakuzachisa mawana enu mangana mukafwe vandumbwenu kaha namupwa vakuwahilila mwomwo muli nakuzamisa chikungulwilo.
23. Chuma muka twatela kulinga, kaha muchihande nachikavangizaho natushimutwila ika?
23 Yehova atumona tuvosena kupwa tuvavalemu. Asaka tupwenga mutanga yenyi. Kachi nge natushinganyekanga havyuma vize tunahase kulinga mangana tukafwe vandumbwetu, nakulinga vyuma kana, kaha katweshi kulimona kupwa tuvamokomoko muchikungulwiloko. Nyi vandumbwetu twatela kuvamona ngachilihi? Natusolola ngachilihi ngwetu twavamona kupwa vavalemu? Vihula kana natuvishimutwila muchihande nachikavangizaho.
MWASO 24 Twayenu kuPili yaYehova
^ par. 5 Tuvosena twasaka kutuzanga kuli Yehova. Oloze lwola lumwe cheji kutukaluhwila kufwelela ngwetu atumona kupwa tuvavalemu. Chino chihande nachitukafwa tumone ngwetu tuvosena twapwa tuvavalemu muchikungulwilo.
^ par. 3 MAZU VANALUMBUNUNA: Tuvosena twapwa tuvavalemu mwomwo tweji kukafwanga vandumbwetu muchikungulwilo nakuvakolezeza. Ulemu wetu kawapendamina hachikova chetu chipwe muyachi, chipwe kupita, chipwe kufumana chetu, chipwe chisemwa chipwe chinyingi chakushikolako.
^ par. 62 MAZU AKULUMBUNUNA MUVWIMBIMBI: Eyi mivwimbimbi yitatu yili nakusolola vyuma vyeji kulingiwanga shimbu kanda kukunguluka, nahalwola lwakukunguluka, nahanyima yakukunguluka. Muvwimbimbi 1: Kalama ali nakutambwokesa ngeji, ndumbwetu wakanyike ali nakutokejeka makina, kaha nandumbwetu wapwevo ali nakushimutwila nandumbu wakashinakaji. Muvwimbimbi 2: Vanyike navakulwane vali nakwazana haChilongesa chaKaposhi Kakutalila. Muvwimbimbi 3: Vapwevo nalunga vali nakwazana mumulimo wakuwahisa muZuvo yaWangana. Ndumbwetu wapwevo ali nakukafwa mwanenyi ahake wana muchikasha. Ndumbwetu walunga ali nakukolezeza ndumbwenyi wapwevo wakashinakaji.
