1. Chuma muka chize Yehova ahana kala ngamba yenyi wakushishika?

YEHOVA atwama nazangi kaha ahana kala ngamba yenyi wakushishika milimo yakuzata muchikungulwilo. Numba tuhu twatwama namilimo yakulisezaseza oloze twapwa tuvavalemu kaha nawa twasakiwa kutukafwa kuli vandumbwetu. Tutalenu omu kaposetolo Paulu atukafwa twivwishise echi chishina.

2. Kweseka naWavaka-Efwesu 4:16, mwomwo ika twatela kuvumbika vandumbwetu nakuzachila navo hamwe?

² Ngana muze chinahanjika chisoneka chamutwe wachihande, Paulu ashindakanyine ngwenyi kakwatela kupwa ngamba yaYehova uze mwamba nandumbwenyi ngwenyi, “kangweshi nakukusakako.” (Koli. 1, 12:21) Hakusaka muchikungulwilo mupwenga kuunda, mutu himutu atela kuvumbika mukwavo nakuzachila hamwe. (Tangenu Wavaka-Efwesu 4:16.) Kachi nge natuzachila hamwe mukulinunga, kaha chikungulwilo chinahase kufukila nakuzama.

3. Vyuma muka natushimutwila muchihande chino?

³ Tunahase kusolola ngachilihi ngwetu twavumbika vandumbwetu vosena muchikungulwilo? Muchihande chino natushimutwila omwo vakulwane muchikungulwilo vanahase kusolola ngwavo vavumbika vakwavo vakulwane. Kufumaho, natushimutwila omwo tuvosena tunahase kusolola ngwetu twavumbika vandumbwetu vavajike. Kaha nawa natushimutwila omwo tunahase kuvumbika vandumbwetu vaze kavatachikiza kanawa lilimi lyetuko.

4. Mazu muka ahali Wavaka-Loma 12:10, aze vatela kukavangiza vakulwane muchikungulwilo?

⁴ Vakulwane vosena muchikungulwilo vavatongola nashipilitu yajila. Chipwe ngocho ava vakulwane vakwechi mawana nauhashi wakulisezaseza. (Koli. 1, 12:17, 18) Vamwe vanavatongola kalinwaha, ngocho kanda vatachikize vyavivulu. Veka nawa kavazata chikumako mwomwo yaushinakaji nakuvizaviza. Oloze kakwatela kupwa mukulwane uze nahase kwamba mukwavo mukulwane ngwenyi “kangweshi nakukusakako.” Vosena vatela kukavangiza mazu akaposetolo Paulu atwama hali Wavaka-Loma 12:10.—Tangenu.

5. Uno vakulwane veji kuvumbikanga ngachilihi vakwavo vakulwane, kaha mwomwo ika?

⁵ Vakulwane veji kusololanga ngwavo vavumbika vakwavo vakulwane hakuvevwilila nge vali nakuhanjika. Omu mukiko vatela kulinga nge vanaliwane mangana vashimutwile vihande vimwe vyavilemu. Mwomwo ika? Kaposhi Kakutalila waChingeleshi waOctober 1, 1988, ambile ngwenyi: “Vakulwane vatela kwanuka ngwavo Kulishitu nahase kuhana kala mukulwane shipilitu yajila, mangana ahanjike lundongi lwamuMbimbiliya luze naluvakafwa kuvatula kanawa chihande vali nakushimutwila. (Vili. 15:6-15) Shipilitu yajila yeji kukafwanga vakulwane vosena keshi nge mukulwane umwe kahako.”

6. Chuma muka nachikafwa vakulwane vazatenga mukulinunga, kaha chikungulwilo nachinganyala ngachilihi?

⁶ Mukulwane uze avumbika vakwavo vakulwane kafwila kupwa watete kuhanjikako nge vali nakushimutwila. Katela kutwama vakwavo chivwotoko, chipwe kushinganyeka ngwenyi vishinganyeka vyenyi vikiko vyakwoloka. Oloze eji kupwanga wakulinyisa hakuhanjika vyuma nashinganyeka, nakwivwilila kanawa vyuma navahanjika vakwavo. Chachinenenyi atela kukavangiza jindongi jamuMbimbiliya najize jakufuma kuli “ndungo wakushishika wakuzangama.” (Mateu 24:45-47) Nge vakulwane navashimutwilanga muzangi nakulivumbika, kaha Kalunga mwavahana shipilitu yajila mangana yivatwaminyine nakusakula vyuma vize navitunga chikungulwilo.—Yako. 3:17, 18.

7. Uno Yesu amwenenga ngachilihi ujike?

⁷ Makumbi ano, muvikungulwilo mwatwama vandumbwetu vaze vatwama mumalo kaha vamwe vakwechi jitanga. Oloze mwatwama nawa vandumbwetu vavavulu vavajike. Uno twatela kuvamona ngachilihi ava vajike? Uno Yesu amwenenga ngachilihi ujike? Omu azachilenga mulimo wenyi hano hamavu, apwile mujike, kaha atwalileho kutwama ujike nakuhaka mangana kumulimo wenyi. Yesu kanangwile ngwenyi mutu himutu atela kumbata chipwe kutwama ujikeko. Oloze ambile ngwenyi vaka-Kulishitu vamwe navakasakula kutwama ujike. (Mateu 19:11, 12; talenu chishina chakulinangula hali Mateu 19:12.) Yesu avumbikilenga vajike, kaha kavamwenenga kupwa vakukuminamo, chipwe kumona ngwenyi vyuma vyamwaza vyapwile nakuvahitako.

8. Kweseka naWavaka-Kolinde 1, 7:7-9, Paulu akolezezele vaka-Kulishitu vakekese chuma muka?

⁸ Ngana muze chapwile kuli Yesu, naPaulu nawa apwile mujike omu azachilenga mulimo wenyi. Paulu kanangwile ngwenyi chapwile chakuhenga kwingila muuloko. Ejivile ngwenyi echi chapwa kusakula chamutu ivene. Chipwe ngocho, akolezezele vaka-Kulishitu vakekese nakumona numba nge navahasa kuzachila Yehova muujike. (Tangenu Wavaka-Kolinde 1, 7:7-9.) Chikupu vene Paulu kalumbilishile vaka-Kulishitu vavajikeko. Chakutalilaho, asakwile kanyike Chimoteu nakumuhana milimo yayinene chikuma. * (Fwili. 2:19-22) Shikaho nachipwa chakuhenga kushinganyeka ngwetu ndumbwetu ambata natemo kumuzachisa kuhambakana uze kambatako.—Koli. 1, 7:32-35, 38.

9. Chishina muka twatela kutachikiza haulo naujike?

⁹ Yesu naPaulu kavanangwile ngwavo vaka-Kulishitu vosena vatela kwingila muulo chipwe ngwavo vatela kutwama ujikeko. Jino twatela kumona ngachilihi ulo naujike? Kaposhi Kakutalila waChingeleshi waOctober 1, 2012, ambile ngwenyi: “Naulo naujike vinahase kupwa wana wakufuma kuli Kalunga. . . . Yehova kashinganyeka ngwenyi vajike vatela kwivwa sonyi chipwe kuhombako.” Shikaho twatela kuvumbikanga vandumbwetu vavajike muchikungulwilo.

10. Uno tunahase kusolola ngachilihi ngwetu twavumbika vandumbwetu vavajike?

¹⁰ Tunahase kusolola ngachilihi ngwetu twavumbika vandumbwetu vavajike? Twatela kutachikiza ngwetu vandumbwetu vamwe vavajike  valitomena vavene kutwama ujike. Veka vasaka kumbata chipwe kusomboka oloze chavakaluhwila kuwana mutu wakutamo wakulimbata nenyi. Kaha veka nawa vafwisa vaka-mahyavo. Kutala chapwa chakutamo kuhulisa ndumbwetu wamujike ovyo nahonena kumba chipwe kusomboka chipwe kumulweza ngwetu tuli nakusaka kumukafwa kuwana washi wakulimbata nenyi tahi? Vajike vamwe veji kulwezanga vandumbwavo vavatondeleko mutu wakulimbata nenyi. Oloze nge kavatukambileko, vanahase kwivwa ngachilihi nge natuvalweza ngwetu tuli nakusaka kuvakafwa kuvatondela mutu wakulimbata nenyi? (Teso. 1, 4:11; Chimo. 1, 5:13) Tushimutwilenu havyakutalilaho vimwe vyavandumbwetu vamwe vakushishika vavajike.

11-12. Nge katwazangamineko, tunahase kwivwisa ngachilihi vandumbwetu kupihya?

¹¹ Kalama wakutambwojoka uze apwa mujike ambile ngwenyi kutwama ujike chapwa changanyo chikuma. Oloze ambile nawa ngwenyi eji kwivwanga kupihya nge vandumbwenyi vakuhya kushipilitu navamuhulisa ngwavo: “Mwomwo ika unahonena kumbata?” Ndumbwetu weka walunga uze azachila hamutango ambile ngwenyi: “Shimbu jimwe ngweji kumonanga ngwami vandumbwetu veji kushinganyeka ngwavo vajike vatela kuvevwila keke. Kahechi chinahase kulingisa mutu amone ujike kupwa hichiteli keshi hiwanako.”

¹² Ndumbwetu umwe wapwevo wamujike uze azachila haMbetele ambile ngwenyi: “Vandumbwetu vamwe veji kushinganyekanga ngwavo vajike vosena vasaka kumbata chipwe kusomboka, kaha nawa ngwavo nge vatu vanalikungulwila hamwe, kaha hakiko vajike vatela kutonda wakulimbata nenyi. Lwola lumwe Mbetele yangutumine kuya nakuzatako mulimo umwe kungalila yimwe, kaha ngwakahetelele halikumbi vapwilenga nakukunguluka. Ndumbwami wapwevo, mwenyazuvo yize ngwatulilileko angulwezele ngwenyi muchikungulwilo chavo mwapwile vandumbwetu vamalunga vavali vamyaka yimwe nayami. Numba tuhu ambile ngwenyi kapwile nakusaka kungutondela lungako, oloze omu twahetele kuZuvo yaWangana, angutwalile kuli vaze vandumbwami vavali. Chuma alingile chevwishile sonyi nayami, navaze vandumbwami vamalunga.”

13. Vyakutalilaho muka vyakafwile ndumbwetu umwe asuuluke naujike wenyi?

¹³ Ndumbwetu weka wapwevo wamujike uze azachila haMbetele ambile ngwenyi: “Ngwatachikiza vapayiniya vakukola vakuzama kushipilitu, vamichima yakulisuula vaze vasuuluka namulimo vali nakuzata ngocho vali nakunganyalisa chikungulwilo. Vamona ujike nganomu aumona Yehova, kaha kavalimona kupwa vavalemu mwomwo yakutwama ujike, chipwe kushinganyeka ngwavo vyuma vyamwaza vili nakuvahita mwomwo yakuhona kupwa muulo nakupwa navanako.” Hakiko chawahila kupwa muchikungulwilo vali nakukuvumbika nakukumona kupwa uwamulemu. Kaweshi kwivwa ngwove vandumbwove vali nakukutetela mwomwo yakutwama ujike chipwe kukuliula, chipwe kukumona kupwa uwamulemu kuhambakana vakikoko. Oloze naumona kaha ngwove vakuzanga.

14. Natusolola ngachilihi ngwetu twavumbika vandumbwetu vavajike?

¹⁴ Vandumbwetu vavajike navevwa kuwaha kachi nge natuvamonanga kupwa vavalemu mwomwo yavilinga vyavo vyamwaza keshi nge kuvevwila keke mwomwo yakuhona kumbata chipwe kusombokako. Kanda kuvevwila kekeko oloze vasakwililenunga hakushishika chavo. Nge katweshi kusakwililanga vandumbwetu vavajikeko, kaha navevwa nge tuli nakuvamba ngwetu: “Kangweshi  nakukusakako.” (Koli. 1, 12:21) Vandumbwetu kana vatela kumona ngwavo twavavumbika nakuvamona kupwa vavalemu muchikungulwilo.

15. Vyuma muka vanalingi vandumbwetu vamwe hakusaka kuzata chikuma mulimo wakwambulula?

¹⁵ Mumyaka yakalinwaha, vaka-kwambulula vavavulu vanasakulanga kulinangula lilimi lyeka mangana chivakafwe kutohwesa mulimo wavo. Echi chinasakiwanga ava vandumbwetu kwalumunako vyuma vimwe mukuyoya chavo. Chakutalilaho, vanasezenga vikungulwilo vyazachisa malimi avo nakuya kuvikungulwilo vize vyazachisa malimi eka kuze kuli nakusakiwa vaka-kwambulula Wangana. (Vili. 16:9) Echi chapwa kusakula chamutu ivene uze ali nakusaka kuzachila chikuma Yehova. Numba tuhu heji kuhitanga lwola numba vatachikize kanawa lilimi, oloze veji kunganyalisanga chikungulwilo mujijila jajivulu. Vilinga vyavo vyamwaza nauhashi wavo vyeji kukafwanga vikungulwilo vizame, ngocho twavamona kupwa vavalemu mwomwo yamuchima wavo wakulisuula.

16. Uno vakulwane vatela kupendamina haka nge vali nakukekesa ndumbwavo mangana vamutongole?

¹⁶ Vakulwane kavatela kushinganyeka ngwavo ndumbwetu walunga katelemo kumutongola kupwa mukulwane chipwe muka-kuzachila, mwomwo katachikiza kanawa lilimi vazachisa muchikungulwiloko. Vakulwane vatela kukekesa ndumbwetu kweseka navyuma vyamuVisoneka atela kutesamo mutu numba vamutongole kupwa mukulwane chipwe muka-kuzachila keshi nge kupendamina hakutachikiza chipwe hakuhona kutachikiza lilimiko.—Chimo. 1, 3:1-10, 12, 13; Chitu. 1:5-9.

17. Vihula muka yatela kulihulisa tanga yize yinalukila kulifuchi lyeka?

¹⁷ Vaka-Kulishitu vamwe najitanga navo vanalukila kumafuchi eka mwomwo yaukalu chipwe kuya nakutonda milimo. Shikaho vana vavo vanahase kutanga shikola mulilimi lyakulifuchi vanayi. Visemi nawa pamo vanahase kuputuka kulinangula lilimi kana mangana chipwenga chachashi kuwana milimo. Uno nge kuze vanayi kuli lizavu lyazachisa lilimi lyavo, kaha navalinga ngachilihi? Uno vatela kuya kuchikungulwilo muka? Uno vatela kupwa muchikungulwilo chazachisa lilimi lyakulifuchi vanayi, nyi chize chazachisa lilimi lyakwimbo lyavo?

18. Kweseka naWavaka-Ngalesha 6:5, natusolola ngachilihi ngwetu twavumbika vyuma vize nasakula mutwe watanga?

¹⁸ Mutwe watanga atela kusakula chikungulwilo atela kuyanga natanga yenyi. Hakuwana nge chuma kana chapendamina hali mutu yivene, shikaho mutwe watanga atela kukekesa kanawa amone vyuma vize navinganyalisa tanga yenyi. (Tangenu Wavaka-Ngalesha 6:5.) Twatela kuvumbika vyuma mwasakula mutwe watanga. Twatela kwitavila kala vyuma nasakula, nakumutambwokesa natanga yenyi.—Loma 15:7.

19. Chuma muka vatela kushinganyekaho chikuma mitwe yajitanga?

 ¹⁹ Jitanga jimwe nawa jatwama muchikungulwilo chize chazachisa lilimi lyavisemi, oloze pamo vana vavo kavatachikiza kanawa lilimi kanako. Kachi nge chikungulwilo kana chatwama mungalila muze vahanjika lilimi lyeka, kaha vana chinahase kuvakaluhwila kwivwishisa vyuma vali nakulinangula hakukunguluka, nakuhona jino kuzovoloka. Mwomwo ika? Mwomwo vanyike vanahase kulinangula mulilimi lyeka kushikola. Halwola lwangana visemi vatela kukekesa kanawa vyuma nakulomba Kalunga avakafwe vasakule chuma chize nachikafwa vana vavo kupandama kuli Yehova naliuka lyenyi. Vanahase kunangula vana vavo vatachikize kanawa lilimi lyavo chipwe kunungulukila kuchikungulwilo chazachisa lilimi lize vatachikiza kanawa vana vavo. Kala mweshomwo mwasakula mutwe watanga, chikungulwilo kuze vanasakula kuya chatela kumuvumbika natanga yenyi nakuvamona kupwa vavalemu.

20. Tunahase kusolola ngachilihi ngwetu twavumbika vandumbwetu vaze vali nakulinangula lilimi lyeka?

²⁰ Nganomu tunashimutwila lyehi, muvikungulwilo vyavivulu namupwanga vandumbwetu vaze vali nakulinangula lilimi lyeka? Chinahase kuvakaluhwila kuhanjika vyuma vali nakushinganyeka. Oloze nge katweshi kuhaka mangana hajila veji kuhanjikilangamo lilimi lyetuko, kaha natumona ngwetu vazanga chikuma Yehova nakumona muchima wavo wakufwila kumuzachila. Nge natumona vilinga vyavo vyamwaza, kaha natuvazanga chikuma nakuvavumbika. Katwatela kwamba ndumbwetu ngwetu “kangweshi nakukusakako” mwomwo yakuhona kutachikiza kanawa lilimi lyetuko.

21-22. Kutokwa muka twatwama nacho?

²¹ Chapwa hikutokwa chachinene chikuma kupwa muchikungulwilo chaYehova. Numba tupwa tumalunga chipwe tumapwevo, vajike chipwe twatwama muulo, vakulwane chipwe vanyike, numba twatachikiza kanawa lilimi chipwe chiku, tuvosena Yehova atumona kupwa vavalemu.—Loma 12:4, 5; Kolo. 3:10, 11.

²² Shikaho, tuvosena tufwilenu kuzachisa vishina tunalinangula kuchifwanyisa chamujimba chize ahanjikile Paulu. Echi nachitukafwa tutwaleho kumonanga milimo twazata muchikungulwilo chaYehova kupwa yayilemu nakuvumbika nawa vandumbwetu.